Read Kpelle Zɛlemaya 31 Bible Online

Zɛlemaya 31 - Kpelle bible

Zɛlemaya 31

¹Yâwɛɛ è mò ǹyɛɛ, “Tãi káa pâi, maa tãi tí ƃé ŋa pâi kɛ̂i la a Eezuɛ-ƃelai kélee kpɔ́ Díɣâla. Dia máŋ da pâi kɛ̂i a ŋánûa.

²Diai kélee dífe saa-ni, ŋá díŋɛi malôŋ kàa vɛ̃ɛ-kpâlaŋ su. Tãi Eezuɛ-ƃelai dí kɛ̀ ŋ̀wɛ̂lii la dí dífii tɔɔi,

³ŋá kula díŋɛi kwaa kôyaa ma. Káai a Eezuɛ-ƃelai, ká wɛ́li káa kpɔ́ ḿâ a ŋánaa. M̀ɛni ma, ḿve niî ŋáwɛli kɛ́-maai su-saa-ni ká mɛni ma.

⁴Ŋa pâi gɛ̂i ká kɛ́ a ká kɛ́-pere pɔlɔi. À kɛ̀ tí, gɛ̀ ní ka pâi ká nyɛ́ŋ-nyɛŋ-ŋai siɣêi ká kɛ́ mã̀la a koi-nɛɛ-pere.

⁵Ka pâi ŋɔ́nɔ kpɔmɔ-ƃa kpalaŋ kɛ̂i ǹyée-ŋai dîa Sameria. Diai pâi gbɔmɔ-ƃa kpalaŋ kɛ̂i, da pâi m̀á miî.

⁶Tãi káa pâi, maa tãi tí, ziɣãŋ-mɛi káa nuui a pâi tóli ƃôi a ɣelêi pere Ifiraŋ yee-ŋai ma ǹyɛɛi, ‘Ka pá kwáa lí Zãiyɔŋ Kúɣâlai Yâwɛɛ pɔ.’ ”

⁷Yâwɛɛ è mò ǹyɛɛ, “Ka lii-nɛɛ wule too Eezuɛ ma, nyíi gáa a ǹɔii-ŋuŋ-ŋai gɛ́tɛi. Ka laa-maa-tɛ wule too, ‘Yâwɛɛ a ŋɔnûai ƃálo. Diai kélee lɛ̀ɛi, a díŋuŋ-ma ƃó.’

⁸Ŋa pâi díkulâi yá-ŋua-pere ŋa pá a dia, ŋa díŋa tɛ́ díkîe ma ŋá dí kúla ŋ̀éniɛi kɔ̃́yɛŋ ma. Ŋ̀ɛi-pu ƃelai, é pɛ́lɛ diai dí kɔ́liŋɔ̂ɔi da pâi pâi díkîe ma, goo-nia-ŋai da diai díkaa koi-tee sui da pâi pâi. Da pâi kɛ̂i a lɔii-ŋuŋ kɛ́tɛ dí kɛ́ pà.

⁹Da pâi kɛ̂i wɔ̂lɔi dí kɛ́ pa, kɛ́lɛ ŋa pâi dí ŋáa nɛnɛ̂i kwa dîa-ni kúkɛ pà pôlu. Ŋa pâi liî dí láa lɛ̂i ǹyá-ɣɛli-ŋai lá, dí sía pere sã́a su dífa kâreŋ. Ŋ́gaa a Eezuɛ ǹâŋ, Ifiraŋ kɛ́ ƃò a ńoŋ-surɔŋ m̀aa-ŋuŋ.”

¹⁰Yâwɛɛ è mò ǹyɛɛ, “Lɔii-ŋuŋ ŋa, ka káwoli tɔ́ɔ ḿâ, ká ŋ́oo ƃó ǹyái-koo-ma ƃɛ́i ǹaa kôyaai. Ŋá ŋánûai tàa-taa, kɛ́lɛ ŋa pâi pâi pôlu a dia, ŋá dímɛi káa yɛ̂ɛ berei ƃála-mɛi-kaa nuu a ŋɔƃála-ŋai mɛi kâa lai.

¹¹Ŋá Eezuɛ-ƃelai ŋuŋ-maa ƃò, ŋá díkula lɔii-ŋuŋ wála-walaa yêi.

¹²Da pâi pâi dí lii nɛ̃ɛ-wule too Zãiyɔŋ yeei ma, ŋá ƃɛlɛ-see-sãai mɛni ma. Ŋa pâi mii-sãa, ŋwã̂ai, ɔle-wulɔ, ƃála da niŋa-ŋa tɛɛ̂i dípɔ. Da pâi kɛ̂i yɛ̂ɛ zí-sɛŋ nyíi da yá pú ma a ǹɛ́lɛɛi. Zɛŋ nyíi kélee da ŋ̀wɛ̂lii, da pâi zɔlɔ ƃôi.

¹³Gɛ̀ ní nɛyâa-nɛyãai líi a pâi nɛ̃ɛ̂i dí kɛ́ mã̀la. Ǹúu-pɔlɔ-ŋai da ǹyánkpa-ŋai dí kɛ́ lii-nɛ̃ɛ kùla. Ŋa pâi díŋa-nɛnɛi, ŋa dímalôŋ too maai kɛ́ a lii-nɛ̃ɛ.

¹⁴Ŋa pâi gɛ̂i zâla láa-soŋ-ƃelai dí píla a mii-sɛŋ lɛ́lɛɛ, ŋá ǹûai kélee líi láa a zɛŋ da ŋ̀wɛ̂lii. Ńyãa Yâwɛɛ ƃé mò tí.”

¹⁵Yâwɛɛ è mò ǹyɛɛ, “Ŋà wóo da mɛnîi gɛ́ kùla Lama. Gáa a maloŋ too maa wɔlɔ-woo. Leesa káa wɔ̂lɔi ŋɔnîa-pɛlɛɛi mɛni ma. Vé fáa ní ma a gɛɛ díŋa kpɛ́, kpɛ́ni fêi, ŋɔnîa-pɛlɛɛi dífe ŋɔ́nɔ naa.

¹⁶Kpera wɔ̂lɔi, í íŋɛi kɔ́ɔ. M̀ɛni-ŋai nyíi kélee í gɛ̀ ínîa-pɛlɛi dîɛi, ya pâi vela-fei sɔlɔ ƃôi. Da pâi lenêi pôlu díkula díkpɔara-ƃelai dílɔii su.

¹⁷Kili-kɛ-zu káa naa tínaa-tuɛ mɛ̂ni ma. Ínîa-pɛlɛɛi da pâi lenêi pôlu dípɔ-taai. Ńyãa Yâwɛɛ ƃé mò tí.

¹⁸“Ŋá Eezuɛ-ƃela wóo mɛ̀ni a lii-too pôlu pere, ‘Yâwɛɛ, kúkaa yɛ̂ɛ lɔɔ-fɛnɛ sãa. Kɛ́lɛ í kú tɔ̀ɔ a gɛɛ kú íwoo mɛni. Pá a kûa pôlu. Kwa kúkpîŋ kpɛtɛ a gɛɛ kú pá pôlu ípɔ naa. Yá ƃa Yâwɛɛ nyíi gáa a Kúɣâlai.

¹⁹Kú kúpôlu tɔ̀ɔ yâ, kɛ́lɛ, kwa ŋ̀wɛ̂lii kúlene pôlu a maa félaa. Tãi í kú kula-maa kɛ̂ lai, kú kúŋuŋ ma pìlaŋ lii-too pôlu su. Ƃâa è kùla kûa, kú ŋumɛ, kpɛ́ni fêi, kú sɔnyɔ̂ŋ kɛ̀ a kúlôloŋ tãi.’

²⁰“Eezuɛ, íkaa a ŋáwɛli-kɛ-ma loŋ, ǹôloŋ nyíi ŋá ŋ̀wɛ̂li-ni kpɔ́ a ŋ̀ánaai. Tãi kélee ílaa kíli a tôo la ŋ́ai, ŋà ŋ́gili-ŋa sìa a wɛli-kɛ maa é pîlaŋ yâ. Í maa mɛ̂ni káa nɔ́ niî ńii su. Ŋa pâi íŋɛi malôŋ kâai.

²¹Ŋɛi kɛ́-maa sɛŋ-ŋa kpɛtɛ berei su. Berei í tɛ̀ɛ lai gíli é lɛ́ɛ íŋa. Ífe nìa bere-leei ma é tɛ̀ɛ lai. Eezuɛ-ƃela, ka lene pôlu, ká pá pôlu kátaa-ŋai su ká sée naa.

²²Tãi ɣɛɛlu ƃé ka pâi kɛ̂i kákɔŋ toôi lai, káai ŋí laa-laa fé káyêei? Ŋa sɛŋ da kpɛ̀tɛ nyíi gáa a nina, gɛ́ ƃò a da kpɛ́ni yɛ̂ɛ nɛnî a kɛ̀ surɔ̂ŋ mɛi kâai.”

²³Ŋ̀wála-wâla kélee Yâwɛɛi nyíi gáa a Eezuɛ-ƃelai Díɣâlai è mò ǹyɛɛ, “Tãi ŋa pâi ǹûai dílɔii tɛɛ̂i la dípɔ pôlui, ǹûai da pâi môi Zuda lɔii da naa taa-ŋai su dîyɛɛi, ‘Yâwɛɛ é lûwa láa Zerusâlɛŋ yee maa waai ma, gwaa ma waai ƃɛ́i gáa naai.’

²⁴Nûa da pâi ŋɔ́nɔ kɛ̂i Zuda taa-ŋai kélee su. Kpâlaŋ-ŋa tíi kɛ́-ƃela da pâi kɛ̂i naa, ƃála mɛi káa-ƃela díkɛ ƃò naa díkɛ díƃala-ŋai mɛi kâa.

²⁵Diai dífii kpɛɛ̂i, ŋa pâi díkponôi kpananiî. Diai puru a dí kɛ̂i, ŋa pâi mii-sɛŋ tɛɛ̂i dípɔ dí píla.

²⁶À kɛ̀ tí, nûa da pâi kɛ̂i dîyɛɛi, ‘Ŋá ǹyii ŋá ŋɛ́i lá ƃó ŋ́gbonôi kpanaŋɔɔ.’

²⁷“Ńyãa Yâwɛɛ ŋá mò a gɛɛ tãi káa pâi, maa tãi tí, ŋa pâi Eezuɛ da Zuda dílaa fɛ̂ɛi a núu-kpune da taa-tulɛ.

²⁸Berei nɔ́ ŋátãi sìɣe la ŋ́gɛ díƃuleŋ, ŋ́gɛ dítòo, ŋ́gɛ díwoloi, bere nɔ́ ƃé ŋa pâi tãi siɣêi la ŋá dísi, ŋá dítɔɔ ŋɔ́nɔ pôlu.

²⁹Tãi maa tãi tí a pâi serîi lai, núu da fé pâi môi ǹyɛɛ, ‘Kúnuu-pɔlɔ-ŋai dí gbɔmɔ-ƃa kponai mîi, kɛ́lɛ, ǹîa-pɛlɛɛi nyíŋ-ŋa è kpòna.’

³⁰Kɛ́lɛ, ǹúui nyíi pâi kpɔmɔ-ƃa kponai miî, ǹyá ƃé ǹyíŋ-ŋa a pâi kponâi. M̀ɛni ma, núu kélee a pâi sâai gbîŋ sɔnyɔŋ mɛ̂ni ma.”

³¹Yâwɛɛ è mò ǹyɛɛ, “Tãi káa pâi, maa tãi tí ƃé ŋa pâi kpanaŋ-woo nina kɛ̂i la Eezuɛ da Zuda-ƃelai yêei.

³²Vé pâi kɛ̂i yɛ̂ɛ gbanaŋ-wooi nyíi ŋá gɛ̀ dínâŋ pɔlɔ-ŋai yêei a tãi ŋá dísòŋ la a díyee ŋá díkula Ize lɔii sui. Berei máŋ ŋá kɛ̀ la yɛ̂ɛ dísurɔ̂ŋ, dífe ŋákpanaŋ-wooi mɛi káa ní.

³³Bere ƃé gbanaŋ-woo ninai a pâi kɛ̂i la: Ŋa pâi ŋá tɔ̂ŋ pûi díkili ŋá, ŋá bɔ̃yɛ dí líi su. Ŋa pâi kɛ̂i a Díɣâlai, dí kɛ́ ƃò a ŋánûa.

³⁴Núu da fé pâi kɛ̂i naa é Yâwɛɛ maa mɛ̂ni lɛ́ m̀arâŋ nuu ma, kpɛ́ni fêi, díkelee da pâi kɛ̂i a ŋ́gɔlɔŋɔɔ, é síɣe ǹîa-pɛlɛɛi dîa é tóo ǹúu kpaya-kpaya dîa. Ŋa pâi dísɔnyɔ̂ŋ su mɛ̂ni lɛɛ̂i. Ǹyaŋ, dímɛni nyɔ́mɔ-ŋai kíli fé pâi lɛɛ̂i ŋ́ga. Ńyãa Yâwɛɛ ƃé mò tí.”

³⁵Yâwɛɛ a gɛ̀ vóloi é kwaa ponóɔɔ tɛ́ɛ a ɣele-laa ƃoɔɔ, ŋáloŋ da bɛ́mɛlɛŋ-kaoi dí kɛ́ fòlo a gbínii. A ǹyúoi tùmo-tumo gɛ́ tôo. Ǹáa ƃa Ŋ̀wála-wâla kélee Yâwɛɛi.

³⁶Yâwɛɛ è mò a gɛɛ à kɛ̀ nɔ́ ŋ̀éniɛi ŋí su-sãai kélee maa a fàleŋ, gɛ̀ ní Eezuɛ fé ŋɔ́nɔ pâi kɛ̂i a lɔii-ŋuŋ.

³⁷À kɛ̀ nɔ́ da pɔ̂ri ŋ̀ele-kɔlɔŋ kɔɔ̂nii, dí kɛ́ pɔ̀ri ǹɔii kpɛtɛ-sãai kélee maa kpɛɛ̂i, gɛ̀ ní maa tãi tí ƃé a pâi ǹyée kulâi la Eezuɛ-ƃelai mu, mɛnii dí gɛ̀i mɛ̂ni ma. Ńyãa Yâwɛɛ ƃé mò tí.

³⁸Yâwɛɛ è mò ǹyɛɛ, “Tãi káa pâi, maa tãi tí ŋa pâi Zerusâlɛŋ tɔɔ̂i ŋɔ́nɔ la a ŋátaa-lêe ninai. Ŋa pâi dɔɔ̂i é síɣe Anɛna yeŋ-keŋ ma vóloi liî-pere é tóo ziɣãŋ-laƃerei nyíi gáa Zônoŋ-su perei ma.

³⁹Ŋɔgɔ̃yɛŋ-perei a pâi kɛ̂i é síɣe vóloi lîi-pere é seri Galɛ yeei ma é tínaŋ é seri Goa.

⁴⁰É lí dìŋ-tiŋ su ƃɛ́i da zaai lôo naa dí kɛ́ galai pîli naai, é seri ǹɔii su nyíi gáa Kidɔŋ Yai kɔlɛi, é pîlaŋ Zoo-ŋai tɛɛ siɣãŋ laƃerei, é lí vóloi kulâi pere. Gwaai ŋí ma a pâi kɛ̂i a kwaa maa waa ḿaa mɛ̂ni ma. Daa-leei ŋí fé pâi wɔ́lɔ ŋɔ́nɔ pâi pûi a dɔnɔ kpîŋ.”