Read Kpelle Zɛlemaya 32 Bible Online

Zɛlemaya 32 - Kpelle bible

Zɛlemaya 32

¹Yâwɛɛ è lòno ḿbɔ a tãi Zɛdikaya è kɛ̀ la galoŋ-laai su Zuda lɔii mɛi maa kóraŋ buui su. Góraŋ tɔnɔi ŋí ƃé wɔ́lɔ kɛ̀ a Babelɔŋ kaloŋ Nɛbukinaza ŋɔkóraŋ puu-kao lɔ́ɔlu-mɛi saaƃaai gɛ́ɛ a kâloŋ Babelɔŋ lɔii-mɛi.

²Góraŋ tɔnɔi ŋí ƃé Babelɔŋ kɔkuluƃa-ŋai dí kɛ̀ kɔ́ pɛlɛ̂ɛi la Zerusâlɛŋ ma. Maa tãi tí ƃé ŋá kɛ̀ la kpini-pɛrɛ mu gɔ-kuluƃa-ŋai dípɛrɛi lá Zuda kaloŋ pɛrɛi lá.

³Gâloŋ Zɛdikaya ƃé ḿbìli gbini-pɛrɛi mu, kpɛ́ni fêi, è mò ǹyɛɛ, “Lɛ́ ƃé gɛ̀ í mò ǹyɛɛ, ‘Yâwɛɛ a pâi daa-lêei ŋí tɛɛ̂i Babelɔŋ kaloŋ pɔi?

⁴Ǹyaŋ Gâloŋ Zɛdikaya fé pâi pûi. Da pâi zoniî dí dɛ̀ɛ Babelɔŋ kaloŋ pɔ́. Dífeerɛ da pâi díkîe ni kâai dí lono díkîe-ni pɔ́.

⁵Da pâi liî a Zɛdikaya Babelɔŋ. Ǹaa ƃé a pâi lɛɛ̂i naa é lɛ́ɛ la zu ŋá gula maa kɛ́. A nɛ̃ɛ ma kpîŋ é kɔ́, da pâi ǹyée mɛi ɣalêi. Ńyãa Yâwɛɛ ƃé mò tí.’ ”

⁶Yâwɛɛ è mò ḿâ

⁷a gɛɛ ŋ́gerâ Saluŋ ǹóŋ Anamɛ a pâi pâi é marê kɛ́ a gɛɛ ŋá ŋɔlɔii yá nyíi gáa Anatɔɔ-kpiniŋ sui. Anatɔɔ è kɛ Bɛŋsima kpiniŋ su. È kɛ̀ ǹɔii ŋí kɔlɛ̂i ma, kpɛ́ni fêi, ŋá kɛ̀ a ŋɔkáayɔɔ nyíi m̀aa nɛ̃ɛ̂i ŋá gɔ̂liŋ yá.

⁸Yɛ̂ɛ berei nɔ́ Yâwɛɛ è kɛ̀ lônoi la ḿbɔi, Anamɛ è pà ḿbɔ naa gɔ-kûluƃa-ŋai dípɛrɛi lá é ḿarê kɛ́ a gɛɛ ŋá ŋɔlɔii yá. M̀ɛni ma, ŋá gɔ̀lɔŋ a gɛɛ Yâwɛɛ è lóno ḿbɔ a tɔ̃yâ.

⁹Ŋá ǹɔii zɛŋ-kao kɔ̀ɔŋ, zɔ̃ɔ ŋɔwiɛ kɛ́ ƃò a káne kpua-kpua puu kao lɔ́ɔlu mɛi feerɛ ŋá dɛɛ Anamɛ pɔ́ ǹɔii kɛ̂ Anatɔɔi mɛ̂ni ma.

¹⁰Ŋá ńyee pɔ̂ɔ kɛ̀ ǹɔii kɔlɔi su, ŋá ŋɛi-kɛ-maa maa pɔɔ kɛ́ zu sêre-ŋa ŋɛ́i. Nya ƃe ŋá gâpai kɔɔ̂ŋ zɛŋ-kɔ̂ɔŋ sɛŋ su.

¹¹Kú ǹɔii ŋí gɔlɔ kpɛ̂tɛ feerɛ nyíi ƃɛ́i lɛ̀ ǹɔii è kɛ̀ naai, da berei ǹɔii è kɛ̀ lai. Kú dɔnɔ láa tɛ̀, kú ŋɛi kɛ́-maa kɛ́ ma, kú gbélii lɛ́ɛ a ǹáa ƃóɔɔ. Kú dɔnɔ lɔ̀ kɔlɔ-tâa su. Gbélii fé kɛ́ ní kɔlɔ-tâa su.

¹²Ŋá gɔlɔ-ŋai ŋí tɛ̀ɛ Baru pɔ́. Baru è kɛ̀ a Neria ǹóŋ. Neria ǹyaŋ ǹâŋ ƃé kɛ̀ a Masia. Ŋá gɔlɔi-ŋai ŋí tɛ̀ɛ Baru pɔ́ Anamɛ da serê-ŋa ŋɛ́i. Zêre-ŋai ŋí ƃé díyee pɔ̂ɔ kɛ̀ gɔlɔi su a tãi ŋá ǹya lai nyíi ǹɛ a gɛɛ ŋá ǹɔii ŋí yai. Ńûai kɛ̀ gɔkuluƃa-ŋai dípɛrɛi lái, dia máŋ dí kɛ̀ naa.

¹³Ŋá mò Baru ma díŋɛi ńyɛ̂ɛi,

¹⁴“Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò a gɛɛ í ǹɔii-kɔlɔ feerɛi ŋí, nyíi dɔnɔ láa tɛ̂ɛi, dɔnɔ lá ƃóɔɔi síɣe í dílâai kɛ́ pɔ̂rɔ leɣi su, díƃò naa a gɛɛ dífe kàra kóraŋ támaa yée mu.

¹⁵Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò a gɛɛ da pâi pɛ́rɛ-ŋa, lɔii-ŋa, da kpɔmɔ-ƃa kpalaŋ-ŋa yâi ŋɔ́nɔ pôlu ǹɔii ŋí su.”

¹⁶Gɛ́ɛ ŋa ǹɔii-kɔlɔi tɛ́ɛ Baru pɔ́i, ŋá Ɣâla fɛ̀li, ńyɛ̃ɛi,

¹⁷“Yá, Ŋ̀wála-wâla kélee Yâwɛɛ, yá ƃé ǹɔii da ŋ̀elei kpɛ̂tɛ a íwala-wala-laa kɛ́tɛi! Mɛni da fé naa nyíi gbanaŋɔ̂ɔi ímaa mɛni ma.

¹⁸Ya íwɛli kɛ́-maai lɛ̂ núu wála támaa ma, íkɛ nûa kula ma kɛ̂ zɔnyɔ̂ŋ-ŋai dínuu pɔ̂lɔ-ŋai dí gɛ̀i mɛ̂ni ma. Íkaa a Ɣâla nyíi gɛ̂tɛi, ŋ̀wála-walaa. Yá ƃa Ŋ̀wála-wâla kélee Yâwɛɛ.

¹⁹Ya mɛni kpɛ̂tɛ a táre pere, íkɛ mɛni kpaya-kpaya-ŋa kɛ̀. Ya núu kélee kpɔ́ kɛ́-mɛni kàa, íkɛ núu kélee féla fè dítûa-pere ma.

²⁰Í wɔ́lɔ ŋɛi kɛ́-maa-ŋa da mɛni maa pɔlɔ-pɔlɔɔ-ŋa kɛ̀ Ize lɔii su. Ǹyaŋ, íkaa nɔ́ niî m̀ɛni-ŋai ŋí kɛ̂i tãi ŋí su, Eezuɛ da ǹɔii-ŋuŋ da kpɛ́ni-ŋai su. M̀ɛni ma, dí íkɔlɔŋ kwaa kélee ma.

²¹Í ŋɛi-kɛ-maa da mɛni maa pɔlɔ-pɔlɔɔ-ŋa kɛ̀ Ize, nyíi dílaa kpàla dîa é yao kɛ́tɛ pú díkponôi a tãi í kɛ̀ ínûai Eezuɛ-ŋai kulâi la naai. Í dí kùla naa a íwala-walaai.

²²Í ǹɔii lɛ́lɛɛi ŋí tɛ̀ɛ dípɔ yɛ̂ɛ berei í íkono tèe la dínâŋ pɔlɔ-ŋai yêei.

²³Kɛ́lɛ, tãi dí pá la ǹɔii ŋí sui, dífe díyee see ní íwooi mu, kpaa máŋ dí tûa yɛ̂ɛ berei ísɛŋ-lɛɛi káa lai. M̀ɛni-ŋai í mò a gɛɛ dí gɛ́i, dífe dɔnɔ kpîŋ kɛ́ ní. Zɛŋ ƃé gɛ̀ íkɛ m̀ɛni kpɔ̂lui ŋí làa dîa.

²⁴“Babelɔŋ kɔ-kuluƃa-ŋai da dí sãai kpɛtɛ da dínaŋ daa-lêei ma a gɛɛ dí daai sóŋ. Da nâa pɛlɛ daai ma a kɔ́. Kɔ́, puru, da kɔlɔ-fela da pâi gɛ̂i dí daa-lêei sóŋ. Ye gáa a gɛɛ m̀ɛnii í mòi, gélee kpɔ́ a kɛ̂i.

²⁵Kɛ́lɛ yá, Ŋ̀wála-wâla kélee Yâwɛɛ, í mò ḿâ a gɛɛ ŋá ǹɔii kpuai ŋí yá sêre-ŋa kɛ́ ƃò ma, berei máŋ Babelɔŋ-ŋai da pâi ǹɔii ŋí sonîi lai.”

²⁶Nya ƃe Yâwɛɛ è mò ḿâ ǹyɛɛi,

²⁷“Ńyãa ƃa Yâwɛɛ. Ŋ́gaa a núu-kpune kélee Díɣâla. Mɛni da fé naa nyíi fa pɔ̂ri gɛ̂i.

²⁸Ŋa pâi daa-lêei ŋí tɛɛ̂i Babelɔŋ kaloŋ Nɛbukinaza pɔ́ da ŋɔkɔ-kuluƃa-ŋai. Da pâi zonîi,

²⁹dí ŋɔŋ tóo m̀a. Da pâi ǹaa kérenîi da bɛ́rɛ-ŋai ƃɛ́i ǹûai dí ńii sòli naa ŋ́goi a dí kɛ́ɛ kéreŋ sãa kúŋ-nɛ̃ɛ-ŋa kérenîi Bêe ɣalai ma, dí kɛ́ kpele-sɛŋ sama-sãa tɛ̀ɛ ɣâla da kpɛ́ni-ŋa pɔ́i.

³⁰É síɣe kpɔ́ Zuda da Eezuɛ-ƃelai dí kɛ̀ ɣéniɛi kɔ́ɔ pîlanii ma, díkaa nɔ́ wɔ́lɔ ńii ŋwána mɛni-ŋa kɛ̂i. Dí tua-pere nyɔ̂ŋ sii-ŋai ŋí da gɛ́ ŋa ńii ŋwána kpɔ́ dîa a ŋ̀ánaa.

³¹É síɣe kpɔ́ tãi ma da wɔ́lɔ daa-lêei ŋí tɔ́ɔ lai, ǹûai díkaa nɔ́ wɔ́lɔ ńii ŋwána mɛni kɛ̂i. Da gɛ́ ŋa ńii ŋwána dîa a ŋ̀ánaa dítua-pere nyɔ̂ŋ-ŋai mɛni ma. M̀ɛni ma, ŋa nâa gbɛtɛ a gɛɛ ŋá naa su-kara.

³²Ŋa pâi gɛ̂i tí Zuda da Zerusâlɛŋ-ƃela dísɔŋ ma, díkâloŋ-ŋai, dílaa túɛ-ƃelai, dísâla-laa soŋ-ƃelai da díɣâla ŋɔlóno kɛ́-ƃelai dîa.

³³Dí díyee kùla ḿû, dí dípôlu tɔɔ ḿâ, dí díyee kúla ŋásɛŋ lɛ́ɛi mu, berei máŋ ŋá kɛ̀ nɔ́ sɛŋ lɛ̂i la dîai, dífe m̀aa kɔ́ri ní.

³⁴Dí díɣâla-pɔkɔŋ ƃɛlɛ-kpɛɛ ŋ́goi tɔ̀ɔ Ŋ̀âla-pɛrɛ Kɛ́tɛi mu ƃɛ́i nûa da ḿvɛ̀li naai, dí ńaa sée m̀a. M̀ɛni ma da Ŋápɛrɛi maa-tĩa kara.

³⁵Da ɣâla-teƃele kpɛtɛ Bêe ɣalai mɛni ma Inɔŋ Tiŋ-tiŋ su a gɛɛ dí kɛ́ dílônii-sinaai da ǹɛyâai kula naa a sâla ŋ̀âlai Môlɛ ma. Ḿve mò ní dîa a gɛɛ dí gɛ́ tí. Vé kpîŋ kɛ́ ní ŋ́gili ŋá a gɛɛ da pɔ̂ri m̀ɛni sîi tí kɛ̂i a gɛɛ dí gɛ́ Zuda-ƃelai dí sɔnyɔ̂ŋ tare nyɔ́mɔɔ kɛ́ɛ ŋí kɛ́.”

³⁶Yâwɛɛ nyíi gáa a Eezuɛ Ŋɔɣâlai è mò ḿâ ǹyɛɛ, “Zɛlemaya, ǹûai da m̀ôi a gɛɛ puru, kɔ́, da kɔlɔ-fela da pâi gɛ̂i Babelɔŋ kaloŋ é daa-lêei ŋí kula yêei kɛ. Íwoli tɔ́ɔ í m̀ɛnii mɛ́ni ŋa m̀ôi yâi.

³⁷Ŋa pâi ǹûai ŋáa tɛ̂i gîe ma, ŋá díkula ǹɔii-ŋuŋ-ŋai kélee ŋá dítaa-taa zui su a tãi ŋá kɛ̀ a ńii ŋwánaa lai, ŋá pá a dia pôlu gwaai ŋí ma a gɛɛ dí kɛ́ ƃò ŋuŋ-ma ƃô su.

³⁸À kɛ̀ tí, ŋa pâi kɛ̂i a Díɣâla, dia máŋ dí kɛ́ ƃò a ŋánûa.

³⁹M̀ɛni-ŋûŋ tɔnɔi ŋa pâi gɛ̂i dí gɛ́ ḿîi ƃa, dí ƃaa kɛ́ maa tɛ́ɛ ḿbɔ a tãi kélee dí kɛ̀ ɣéniɛi su. Dà gɛ̀ tí, da pâi mɛni lɛ́lɛɛ sɔlɔ ƃôi da dísuui.

⁴⁰Ŋa pâi kpanaŋ-woo kɛ̂i díyêei wɔ́lɔ-wɔlɔ da wɔlɔ-wɔlɔ. Ḿve pâi kperâi mɛni lɛ́lɛɛ kɛ̂i dîɛ. Ŋa pâi gɛ̂i dí ŋumɛ maa tɛɛ ḿbɔ a dí líi kélee, dífa lâ ŋɔ́nɔ dípôlu tɔɔ la ḿâ.

⁴¹A pâi ńii nɛ̃ɛ̂i ŋá mɛni lɛ́lɛɛ kɛ́ dîɛ. Ŋa pâi gɛ̂i dí sée ǹɔii ŋí su teniŋ ƃô pere su wɔ́lɔ-wɔlɔ da wɔlɔ-wɔlɔ.

⁴²“Berei nɔ́ ŋá m̀ɛni kpɔ̂lui ŋí làa la ǹûai ŋí dîai, bere nɔ́ ƃé ŋa pâi gɛ̂i la dí mɛni lɛ́lɛɛ sɔlɔ ƃó, yɛ̂ɛ berei ŋá ŋ́gono tèe la díyêei.

⁴³Ǹûai da m̀ôi dîyɛ ǹɔii ŋí a pâi kɛ̂i a fɛ̃ɛ-kpâlaŋ. Núu-kpune kpaa máŋ fɛnɛ-sãa da fé ŋɔ́nɔ pâi kɛ̂i naa. À kɛ̀ tí, ǹaa a pâi kɛ̂i a Babelɔŋ pɔ́ɔ. Kɛ́lɛ, ǹûai da pâi ŋɔ́nɔ lɔii yâi ƃɛ́.

⁴⁴Nûa da pâi lɔii yâi ƃɛ́ dí maa kɔlɔi kélee kpɛtɛ dí díyee pɔ̂ɔ kɛ́ zu, dí ŋɛi-kɛ-maa pɔ̂ɔ kɛ́ zu serê-ŋa ŋɛ́i. Da pâi m̀ɛni-ŋai ŋí kɛ̂i Bɛŋsima ŋɔlɔii-kpiniŋ su da gbanâŋ-ŋai dítinaŋɔɔ̂i Zerusâlɛŋ mai su. Da pâi m̀ɛni tɔ̂nɔi ŋí kɛ̂i Zuda taa-ŋai su da daa-ŋai díkaa ǹyée lɔii sui. Da pâi m̀ɛni tɔ̂nɔi ŋí kɛ̂i ǹyée pɛlɛ-pɛlɛɛi ma Zuda ŋɔlɔii kwára-pere séɣai pere. Ŋa pâi lenêi pôlu a ǹûai dí kpɔ́ɔi lɔii su, Ńyãa Yâwɛɛ ƃé mò tí.”