Read Kpelle Zɛlemaya 40 Bible Online

Zɛlemaya 40 - Kpelle bible

Zɛlemaya 40

¹Babelɔŋ kɔ-kuluƃa-ŋai mɛi-nuui Nɛbuzaradaŋ è ńdòo yɔlɛ ŋá kwa Zuda da Zerusâlɛŋ kɔsoŋ-ŋai a gɛɛ dí lí a kúa Babelɔŋ. Tãi kú sèri là Lamai, Nɛbuzaradaŋ è ŋ́uŋ ma ƃò naa. Ǹaa pôlu ma, Yâwɛɛ è lòno ḿbɔ.

²Gɔ-kuluƃa-ŋai mɛi-nuui è ńzìɣe é lí a ńyãa kúfeerɛ kwaa ma ǹyɛɛ ḿâi, “Yâwɛɛ nyíi gáa a Káɣâlai a bíli ƃôi a gɛɛ a pâi ǹɔii ŋí su karâi,

³ǹyaŋ aâ m̀ɛnii kɛ́ nyíi è mò a gɛɛ a pâi gɛ̂i. M̀ɛni-ŋai ŋí kélee è kɛ̀, kpɛ́ni fêi, ká sɔnyɔ̂ŋ kɛ̀ a Yâwɛɛ. Káfe káwoli tɔ̀ɔ ní ŋ̀óo ma.

⁴M̀ɛni ma, ŋ́gaa nâa ǹyɔlɛi kulâi íyee kwana, ŋá íŋuŋ ma ƃó. À kɛ̀ ya ŋ̀wɛ̂lii a gɛɛ kwa yá kú lí Babelɔŋ, ya pɔ̂ri gɛ̂i tí. Gɛ̀ ní, ŋa pâi ímɛi kâai. Kɛ́lɛ, à kɛ̀ ífe ŋ̀wɛ̂lii í lí, vé yâ a kpa. Ǹɔii kélee káa íŋɛi-tuɛ. Ƃɛ́i ya ŋ̀wɛ̂li í lí naai, ya pɔ̂ri liî naa.”

⁵Tãi ḿve ŋ̀óo su too ní lai, Nɛbuzaradaŋ è mò ḿâ ǹyɛɛ, “Lí pôlu Aikaŋ ǹóŋ Gidalia pɔ́ naa nyíi gáa a Safaŋ ǹóŋ ŋɔlòŋ. Babelɔŋ kaloŋ a gɛ́ a kâloŋ Zuda taa-ŋai mɛi. Ka ǹyaa ka pɔ̂ri kɛ̂i naa ǹûai sáma, kpaa máŋ í lí ƃɛ́i kélee ya ŋ̀wɛ̂lii í lí naai.” Nya ƃe è sama-sɛŋ tɛ̀ɛ ḿbɔ a gɛɛ ŋá lí la. È nâa tèe ḿbôlu ŋá lí.

⁶Ŋá lì kwa Gidalia kúkɛ ƃò ǹûai sáma nyíi-ŋai lɛ̀ɛ Mesipa.

⁷Zuda kɔ-kuluƃa-ŋai da-ni da dímɛi-ƃelai nyíi-ŋai dífe díkpîŋ tɛɛ ní Babelɔŋ kɔ-kuluƃa-ŋai pɔ́i, dí m̀ɛni a gɛɛ Babelɔŋ kaloŋ è Gidalia kɛ̀ a kâloŋ dia mɛi dífe li ní a dia Babelɔŋ. Ǹûai ŋí ƃé kɛ̀ a gôlo-ƃelai Zuda da Zerusâlɛŋ.

⁸Nya ƃe Natania ǹóŋ Isimɛ, Karia ǹóŋ Zoanaŋ, Taŋumɛ ǹóŋ Seraya, é pɛ́lɛ Ifai ǹônii nyíi-ŋai kùla Nɛtofa da Zezania nyíi kùla Maakai da díyee mu-ƃelai dí lì Gidalia pɔ́ naa Mesipa.

⁹Gidalia è mò dîa ǹyɛɛi, “Ŋa ŋ́gono têei káyêei a gɛɛ káfe yào kpɔ́ a dɔnɔ kpîŋ a gɛɛ ká kákpîŋ tɛɛ Babelɔŋ-ŋai pɔ́. Ka lɛɛ ǹɔii ŋí su, ká kákpîŋ tɛɛ Babelɔŋ kaloŋ pɔ́, kátii kɛ́ ḿî. Mɛni da fé pâi kákɛ̂i.

¹⁰Ńyãa kpîŋ ŋa pâi kɛ̂i Mesipa a káŋɛi-gao tãi Babelɔŋ-ŋai da pâ lai. Kɛ́lɛ, ka pɔ̂ri ŋwã̂ai kpɛtɛ̂i, ká ŋ̀úru ƃa-ŋai ŋá-tɛ gîe ma, ka ɔle-wulɔ kpɛtɛ, kákɛ ƃò gbanâŋ-ŋai lá ƃɛ́i káseɛɛ káa naai.”

¹¹Ǹaa kɛ́ɛ tíi, Eezuɛ-ƃelai nyíi-ŋai kɛ̀ Môa, Amɔŋ, Idɔŋ da ǹɔii da kpɛ́ni-ŋa sui, dí m̀ɛni a gɛɛ Babelɔŋ kaloŋ è ǹûai da-ni lɛ̀ɛ Zuda é Gidalia kɛ́ dímɛi a kâloŋ.

¹²Nya ƃe díkelee dí kùla ǹɔii-ŋai su dí kɛ̀ zui, dí lí Zuda. Dí lì Gidalia pɔ́ naa Mesipa dí ƃò naa dí kɛ́ ŋwã̂ai kpɛ̀tɛ a zu kɛ́tɛ, dí kɛ́ wúru-ƃa ŋáa tɛ̀ gîe ma a maa pɔlɔ-pɔlɔɔ.

¹³Ǹaa kɛ́ɛ tíi, Zoanaŋ da gɔ-kuluƃa-ŋai mɛi-ƃelai nyíi-ŋai dífe díkpîŋ tɛɛ ní Babelɔŋ-ŋai pɔ́i, dí pà dí m̀ó Gidalia ma Mesipa

¹⁴dîyɛɛi, “Í gɔ́lɔŋ a gɛɛ Amɔŋ Kaloŋ Baali aâ Isimɛ tɛɛ a gɛɛ é ípaa?” Kɛ́lɛ, Gidalia fé láa ní a díwoo.

¹⁵Kɛ́lɛ, Zoanaŋ è mò Gidalia ma dífeerɛ kwaa ma ǹyɛɛ, “Tɔɔ a gɛɛ ŋá lí ŋá Isimɛ paa loo-perei. Núu da fé pâi gɔ́lɔnîi ǹúui baai. Lé mɛni ƃé da dɛɛ̂i la a gɛɛ é ípaai? À kɛ̀ a ípàa, a pâi gɛ̂i Zûu-ŋai díkaa ƃɛ́i, nyíi pâi pâi a mɛni kpɔ̂lu ǹûai kélee pɔ́ nyíi-ŋai lɛ̂ɛ Zudai díkelee da pâi táa-taâi.”

¹⁶Kɛ́lɛ, Gidalia è Zoanaŋ wóo-su tòo ǹyɛɛ mai, “Ífe gɛ̀ tí. M̀ɛnii íkaa m̀ôi é pîlaŋ Isimɛ mai, vé a tɔ̃yâ.”