Read Kpelle Zɛlemaya 44 Bible Online

Zɛlemaya 44 - Kpelle bible

Zɛlemaya 44

¹Yâwɛɛ è lòno ḿbɔ é pîlaŋ Eezuɛ-ƃelai dîa nyíi-ŋai kɛ̀ Ize lɔii sui. Ǹûai ŋí dí kɛ̀ Midɔ, Tapaɣee da Meifee taa-lee-ŋai su. È máŋ ǹóno tɔnɔi ŋí kɛ̀ é pîlaŋ diai kɛ̀ séɣai-pere lɔii-kpiniŋ sui dípɔ-naa.

²Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai è mò ǹyɛɛ, “Káa kpîŋ ká m̀ɛni kpɔ̂lui kâa ŋá ǹaa Zerusâlɛŋ ma da daa-lêe-ŋai díkaa Zudai. Lonii ma kpîŋ, díkaa niî a taa-pîleŋ ŋá ƃɛ́i núu da fé naai,

³kpɛ́ni fêi, dínûai dí mɛni nyɔ́mɔ kɛ̀, dí gɛ́ ŋá ńii ŋwána dîa. Dí sâla kùla ɣâla da kpɛ́ni-ŋa dîa, dí kɛ́ ɣâla pɔkɔɔŋ-ŋa fɛ̀li nyíi-ŋai dífe gɔ́lɔŋ, ífe gɔ́lɔŋ, kpaa máŋ dínuu-pɔlɔ-ŋai.

⁴Ŋá ŋálono kɛ́-nuui tɛ̂ɛ ká pɔ́naa nyíi-ŋai mò kâa a gɛɛ ká kpéra m̀ɛni nyɔ́mɔɔ ŋánaa-ŋai kɛ̂i nyii m̀ɛlɛ fé ŋ́goi.

⁵Kɛ́lɛ, káfe káwoli tɔɔ ní ḿâ, kpaa máŋ ká m̀ɛni-ŋai kɛ́ nyíi-ŋai maa-nɛ̃ɛi ká gɛ́i. Ká kɛ̀ nɔ́ ká ŋwana-lɔɔ tuai kɛ̂i ká kɛ́ sâla kùla ɣâla da kpɛ́ni-ŋa dîa.

⁶M̀ɛni ma, ŋá ńii ŋwàna kpɔ́ Zuda taa-ŋai dîa da bere-ŋai díkaa Zerusâlɛŋ. Ŋá ŋɔŋ tôo dîa naa é lɛ́ɛ a bûŋ. Ǹaa è lɛ̀ɛ a yao ma kwaa ma é lɛ́ɛ la zu é seri sâa ma.

⁷“M̀ɛni ma, Ńyãai ŋ́gaa a Ŋ̀wála-wâla kélee Yâwɛɛ, Eezuɛ Ŋɔɣâlai, ŋa nâa kámarê kɛ̂i. Lé mɛni ƃé ká m̀ɛni nyɔ́mɔ sãŋ kɛ́ɛ tí kɛ́ la a kákpîŋ? Ka ŋ̀wɛ̂lii a gɛɛ ŋá kásinâai, ǹɛyâai, ǹîa-pɛlɛɛi da gwatâra-ŋai su-kara a gɛɛ núu da fé lɛ̂ɛ ɣele ma?

⁸Lé mɛni ƃé ka ńii ŋwána mɛni kɛ̂i la a ɣâla-pɔkɔɔŋ fɛliɛɛ da sâla kuláa ɣâla da kpɛ́ni-ŋa dîa Ize ƃɛ́i káseɛɛ káa naai? Kakaa nɔ́ gɛ̂i tí a gɛɛ ká kákpîŋ su-kara a gɛɛ ǹɔii-ŋuŋ-ŋai dí ɣɛ́lɛ-maa kúla kákponôi ŋ̀éniɛi su, díkɛ dífôo a kálaa?

⁹Ka nîa m̀ɛni nyɔ́mɔɔ-ŋai dîa kánâŋ pɔlɔ-ŋai dí gɛ̀ daa-ŋai su Zuda, bere-ŋai ma Zerusâlɛŋ da m̀ɛni-ŋai Zuda kaloŋ-ŋai da dínɛyâai, da m̀ɛni nyɔ́mɔɔ-ŋai ka kánɛyâai ká gɛi?

¹⁰Kɛ́lɛ, káfe niî kákpîŋ maa yeŋ ni. Káfe niî ƃaa kɛ́-maa tɛɛ ní ḿbɔ, kpaa máŋ kátûa yɛ̂ɛ berei ŋá ŋátɔ̂ŋ lɛ̀ la kâa da kánâŋ pɔlɔ-ŋai.

¹¹“M̀ɛni ma, Ńyãai ŋ́gaa a Ŋ̀wála-wâla kélee Yâwɛɛ, Eezuɛ Ŋɔɣâlai, ŋa pâi ḿbôlu tɔɔ̂i kâa, ŋá Zuda su-kara.

¹²É máŋ kɛ́ yɛ̂ɛ diai da lɛɛ dí kɛ́ ŋ̀wɛli a gɛɛ dí lí dí sée Izei, ŋa pâi lɛɛ̂i dípôlu ŋá dísu kara. É máŋ kɛ́ a ǹûa kpaya-kpayai kpaa máŋ bɛlɛɛ-pɛlɛɛi, díkelee da pâi saâi Ize lɔii su a puru, kpaa máŋ dílɛɛ kɔ́ su. Da pâi kɛ̂i a ɣɛ́lɛ maa sɛŋ. Nûa láa a pâi kpâlai dîa, díkɛ ɣɛ́lɛ-maa kûla díkponôi, dí kɛ̀ dífoo a dílaa.

¹³Diai díkaa Izei, ŋa pâi díkula maa kɛ̂i yɛ̂ɛ berei ŋá Zerusâlɛŋ kula maa kɛ̂ lai. Ŋa pâi díkula maa kɛ̂i a kɔ́, puru da kɔlɔ-fela.

¹⁴Diai kélee kpɔ́ kùla Zuda díkaa niî ɣele ma dí pú dí lí Izei, dɔnɔ kpîŋ fé pâi pûi, kpaa máŋ dílɛɛ ɣele ma. Dí tɔnɔ kpîŋ fé pâi lɛɛ̂i ɣele ma dí lene pôlu Zuda ƃɛ́i dí kɛ̀ ǹaa wɛ̂lii a gɛɛ dí lene pôlu naai. Dí kpulu lôŋ nɔ́ ƃé pâi lenêi pôlu.”

¹⁵Ǹaa kɛ̀ɛ tíi, zinâai nyíi-ŋai gɔ́lɔŋ a gɛɛ dínɛyâai dí sâla kùla ɣâla da kpɛ́ni-ŋa diai, da ǹɛyâai nyíi-ŋai kɛ̀ tɔɔ̂ni naai, da Eezuɛ-ƃelai nyíi-ŋai kɛ̀ séɣai-pere Ize lɔii sui, dí kɛ̀ a díkpulu kɛ́tɛ. Díkelee dí mò dîyɛɛi,

¹⁶“M̀ɛnii kpɔ́ í mò kûa Yâwɛɛ láai sui, kúyee fé mu.

¹⁷M̀ɛnii nɔ́ kú mòi, ǹyaa nɔ́ ƃé kwa pâi gɛ̂i. Kwa pâi sâla kulâi kúɣâla-nɛnii ma, nyíi gáa a Ŋ̀âla-taa Kâloŋ-nɛnii. Kwa pâi kpele-sɛŋ sala kulâi m̀a yɛ̂ɛ berei nɔ́ kwa kúnâŋ pɔlɔ-ŋai, kúkâloŋ-ŋai da kúlaa túɛ-ƃelai kwa kâa gɛ̀ la daa-ŋai su Zuda da Zerusâlɛŋ pere-ŋai mai. Tãi tí ma, mii-sɛŋ támaa è kɛ̀ kúyêei, kúkɔ̃lîŋ támaa, mɛni kpɔ̂lu da fé kúpôlu.

¹⁸Kɛ́lɛ tãi kwa wɔ́lɔ kpera lâ Ŋ̀âɣala-taa Kâloŋ-nɛnii fɛlîi la kúkɛ kpele-sɛŋ sala kula m̀ai, sɛŋ da fé ŋɔ́nɔ kúyêei. Kúnûai díkaa nɔ́ saâi kɔ́ su da puru.”

¹⁹Ǹɛyâai dí m̀ɛnii ŋí da pɛ̀lɛ m̀a dîyɛɛi, “Tãi kwa Ŋ̀âla-taa Kâloŋ-nɛni pɔkɔɔŋ kpɛ̀tɛ la yɛ̂ɛ kpóloi, kúsâla kúla ma, kúkpele-sɛŋ sala sɛŋ pú mai, Kúsinâai dí fàa m̀ɛni ŋí ma.”

²⁰Zinâai da ǹɛyâai nyíi-ŋai ŋ́oo su tòo a bere sîi tíi, ŋá mò dîa ńyɛ̃ɛi,

²¹“Ka gâai yɛ̂ɛ sɛŋ ƃé zâlai-ŋai ka kánâŋ pɔlɔ-ŋai, kákâloŋ-ŋai, kálaa túɛ-ƃelai da ǹûai kélee ká gùla Zuda taa-ŋai su da bere-ŋai ma Zerusâlɛŋ, Yâwɛɛ fé mɛni da kɔ́lɔŋ é pîlaŋ dîa kpaa máŋ a nia dîa? Vé tí.

²²Kálɔii kâa sâa a bûŋ, núu da fé naa lônii ma. Ǹaa káa sâa a yao ma kwaa ma, nûa dí kɛ́ dífoo a ǹaa láa, kpɛ́ni fêi, Yâwɛɛ fé ǹyée sèe ní kámɛni nyɔ́mɔɔi da káŋwana lɔ̂ɔ tua-ŋai mu.

²³Kákaa sâa mɛni kpɔ̂lu su, kpɛ́ni fêi, ka sâla kùla ɣâla da kpɛ́ni-ŋa dîa ká kɛ́ sɔnyɔ̂ŋ kɛ̀ a Yâwɛɛ. Káfe káwoli tɔ̀ɔ ní ŋ̀óo ma.”

²⁴Nya ƃe ŋá m̀ɛnii Ŋ̀wála-wâla kélee Yâwɛɛ, Eezuɛ Ŋɔɣâlai è mò ǹûai dîa, ŋuŋ kpɔ-kpɔɔi ƃa ǹɛyâai da ǹûai nyíi-ŋai kùla Zuda díseɛɛ kɛ́ ƃô Izei ńyɛ̃ɛi, “Ka kánɛyâai ká kákono tèe Ŋ̀âla-kaloŋ nɛnii yêei. Ká kákono tèe a gɛɛ ka pâi sâla kulâi m̀a, ká kpele-sɛŋ sama-sɛŋ tɛɛ bɔ́, ǹyaŋ ká gono-teei ŋí ŋa-see kɛ̀. M̀ɛni lɛ́lɛɛ ká tí. Ka lí ká m̀ɛnii kɛ́ ká kákono tèe lai.

²⁶Kɛ́lɛ, ka káwoli tɔ́ɔ voo-wooi ma nyíi Ńyãa Yâwɛɛ ŋaâ gɛ́ ńaai su é pîlaŋ kâai a Eezuɛ-ŋai káseɛɛ káa Ize lɔii sui. Ḿve ŋɔ́nɔ pâi ǹɛɛ̂i naa ká tɔnɔ kpîŋ é vóo a ńaa, gɛ́ mò ǹyɛɛ, ‘Ŋ̀wála-wâla kélee Yâwɛɛ fé ḿɛi kâa.’

²⁷Ŋa pâi gɛ̂i káfa ƃûu ƃo, kɛ́lɛ ka pâi saâi. Kákélee kpɔ́ ka pâi saâi kɔ́ su kpaa máŋ a kɔlɔ-fela é lɛ́ɛ la zu káta dɔnɔ kpîŋ da fa lɛ̂ɛ ɣele ma.

²⁸Kɛ́lɛ kákpulu lôŋ nɔ́ ƃé pâi kulâi Ize é lene pôlu Zuda. À kɛ̀ tí, gɛ̀ ní, diai pâi lenêi pôlui, da pâi gɔ́lɔnîi ǹúui nyíi a tɔ̃yâ ƃôi, ŋ́oo, kpaa díwɔ̂i.

²⁹Ńyãa Yâwɛɛ ŋa pâi sêre lɛ̂i kâa a gɛɛ ŋa pâi kákula maa kɛ̂i gwaai ŋí ma. À kɛ̀ tí, ka pâi gɔ́lɔnîi a gɛɛ gono-teei ŋá gɛ̀ ká su-kara mɛni mai, ŋá ŋaa-see kɛ̀ a tɔ̃yâ.

³⁰Ŋa pâi Ize kaloŋ Ofa tɛɛ̂i ŋɔkpɔara nuui pɔ́ nyii ŋ̀wɛ̂lii é baai yɛ̂ɛ berei ŋá Zuda kaloŋ Zɛdikaya tɛ̀ɛ la Babelɔŋ kaloŋ Nɛbukinaza pɔ́ nyíi kɛ̀ a ŋɔkpɔara-nuui nyíi kɛ̀ ŋ̀wɛ̂li é baai.”