Read Kpelle Zɛlemaya 47 Bible Online

Zɛlemaya 47 - Kpelle bible

Zɛlemaya 47

¹Ize kaloŋ é lɛ́ɛ pâi kɔ́ pɛlɛ̂i Geza ma, Yâwɛɛ è lòno ŋɔlóno kɛ́-nuui Zɛlemaya pɔ́ é pîlaŋ Felesia lɔii ma.

²Yâwɛɛ è mò ǹyɛɛ, “Ka gáa, yá-ŋa da kulâi yá ŋûa-pere, ǹyaŋ da pâi pâi yɛ̂ɛ ya-lêe-ŋa da fɛ̀ɛ. Da pâi ǹɔii mɛi pɛlɛ̂i da zu sãa kélee daa-ŋai da zu-ƃela kélee. Ǹûai da pâi kɛ̂i wɔ̂lɔi kpɔŋ mâa mɛni ma. À kɛ̀ tí, ǹɔii su-ƃelai kélee da pâi wɔ̂lɔi a ŋ̀ánaa,

³tãi da pâi zoo-ŋai da gɔ́kɔ-keleŋ-ŋai tíŋ m̀ɛnii lai. Ǹâŋ-ƃelai dífe pâi pɔrîi tînanii dí dínîa-pɛlɛɛi pɔ́ naa pere a gɛɛ díkpɔŋ mâa tɛɛ dípɔ. Díyee a pâi kɛ̂i sɛ̂lɛnii dípɛ̂lɛi dífa pɔ̂ri tíi kɛ̂i a dia,

⁴kpɛ́ni fêi, vóloi a pá Felesia-ŋai su-kara mɛ̂ni ma. Ŋa pâi Taya da Sidɔŋ kulâi ǹɔii kpɛ́li-ŋai dîa, ŋá gbɔŋ mâai kélee dímɛni mai kpéra, kpɛ́ni fêi, Ńyãai ŋ́gaa a Yâwɛɛi, ŋa pâi Felesia-ŋai su-karâi da diai kélee pâi kulâi ǹyái kóo mâ Kulîi.

⁵Geza-ƃelai líi a too pôlu a ŋ̀ánaa, Asikɛlɔŋ-ƃelai da dímɛi sáa. Tãi ɣɛɛlu ƃé Felesia-ƃelai da pâi malôŋ see ƃôi lai?

⁶Ka wɔ́lɔi kâai, ‘Óo Yâwɛɛ ŋɔƃoa-sɔpkɔi! Tãi ɣɛɛlu ƃé yâ pâi ziɣêi ílɛɛ pâi kperâi kúpâai? Lɔ́ pôlu ítaâi, kɛ́ naa í ífii tɔ́ɔ!’

⁷Kɛ́lɛ, a pâi víi-tɔɔ pere kɛ̂i léŋ, ǹyaŋ ŋaâ tíi tɛ́ɛ bɔ́ a gɛɛ é gɛ́i? Ŋá mò ma a gɛɛ é pɛ́lɛ Asikɛloŋ ma da ǹûai nyíi-ŋai díseɛɛ káa ǹyái koo mai.”