Read Kpelle Zɛlemaya 48 Bible Online

Zɛlemaya 48 - Kpelle bible

Zɛlemaya 48

¹M̀ɛnii ŋí ƃé Ŋ̀wála-wâla kélee Yâwɛɛ è mò é pîlaŋ Môa ma ǹyɛɛi, “Kpalo ƃêlai Nebo-ƃelai dîa, dítaai a wólo! Da Kariatamiŋ soŋ, da ŋɔtaa-lêe tɔɔi kpanaŋɔɔi wólo, da ŋɔnûai ŋumɛ.

²Ƃâa fé ŋɔ́nɔ Môa ma. Ɛsibɔŋ ŋɔkpɔara-ƃelai da naa siɣe da mɛni kpɛtɛɛ kɛ́ a gɛɛ dí Môa lɔii su-kara. Káai a ƃoo-ƃelai, ká-taai su a pâi kɛ̂i tɔ̀ŋ. Kɔkuluƃa-ŋai da pâi tɛ̂i naa.

³Ɔlonaiŋ-ƃelai dí láɣi dîɛi, ‘Laa-saa! Mɛni-su-karaa kɛ́tɛ!’

⁴“Da Môa lɔii su-kara. Ka ǹîa-pɛlɛɛi wɔ́lɔ-woo mɛni.

⁵Ka díwɔlɔ-woo mɛni berei ma dí kɛ́ yèŋ Luɣii. Maloŋ too-maa wɔlɔ-woo kɛ́ tɛ̀ berei mâ a lî Ɔlonaiŋ.

⁶‘Ka kirɛ siɣe a maa félaa káfulu-laai mɛni ma. Ka kirɛ siɣe yɛ̂ɛ wɛlɛ-sôo nyíi a tɛɛ̂ fɛ̃ɛ-kpâlaŋ sui!’

⁷“Môa, í íkili tɔ̀ɔ íwala-wala laai da ítɔɔ-sãai dîa. Kɛ́lɛ, da pâi íyee mɛi-ɣâlei. Ǹyaŋ íɣâlai Kemosi a pâi liî kɔ-sôŋ-laai, ŋɔtíi kɛ́-ƃelai, da ŋɔsâla láa-soŋ-ƃelai.

⁸Taa da fé pâi lɛɛ̂i nyíi dífe pâi zu karâi. Da pâi ǹyée lɔii su taa-ŋai da diŋ-tiŋ su-taa-ŋai su karâi ǹaa é lɛ́ɛ a pûŋ. Ńyãa Yâwɛɛ ƃé mò tí.

⁹Lia-woo kpanaŋ ká ŋí Môa mɛni ma, kpɛ́ni fêi, naa a pá wôloi a maa félaa. Ŋɔtaa-ŋai da pá lɛɛ̂i a dípûŋ, núu da fa ŋɔ́nɔ zeêi kàa naa.”

¹⁰Kpalo ƃêlai ǹúui ma nyíi pâi Yâwɛɛ ŋɔtíi kɛ̂i a fii kpɛ̂ɛ-perei. Kpalo ƃêlai ǹúui ma nyíi vé pâi núu paâi a ŋɔƃóa-sɔkpɔi.

¹¹Yâwɛɛ è mò ǹyɛɛ, “Môa káa nɔ́ wɔ́lɔ lii-see su a tãi su kôyaa. Dífe tá lì ní kɔ-sôŋ perei. Gáa nɔ́ yɛ̂ɛ ŋwãai nyíi núu da fé niî lɛ̀ɣɛ ní ma é gúla zeêi kɛ́ gonoŋ su é bú da kpɛ́ni sui. Vé niî kpòna ní a dɔnɔ kpîŋ. Nɛ̃ɛ̂i kpɔ́ nɔ́ yɛ̂ɛ berei dí gbɛ̀tɛ lai.

¹²“Kɛ́lɛ, ɣele da a pâi, tãi ŋa pâi nûa tɛɛ̂i la a gɛɛ dí í pú yɛ̂ɛ berei da ŋwãai pù la sɛŋ-fôlo da kpɛ́ni sui. Tãi ya pâi kpɛɛ̂i la gònoŋ sui, da pâi gònoŋ wôloi kpɔ́ pɛ̀yɛ-pɛyɛ.

¹³À kɛ̀ tí, Môa-ƃelai díɣâlai Kemosi maa mɛni a pâi ŋumɛ lâai díŋɛi yɛ̂ɛ berei ŋ̀âlai nyíi Eezuɛ-ŋai dí kɛ̀ vɛlîi Bɛtɛ, dílaa lài, m̀aa mɛni è ŋumɛ lâa la díŋɛi.

¹⁴Môa sinaa, lé mɛni ƃé ka m̀ôi la a gɛɛ kákaa a kɔkuluƃa wála-walaâ-ŋa, kɔkuluƃa-ŋa nyíi-ŋai da dísu kɔ̀ɔŋ a kɔ́i?

¹⁵Da Môa ŋɔtaa-lêe-ŋai su-kara. Da ŋɔnyáŋ-kpa lɛ́lɛɛ-ŋai kélee páa. Ńyãa ƃa gâloŋ, Ŋ̀wála-wâla kélee Yâwɛɛ, Ńyãa ƃé mò tí.

¹⁶Môa ŋɔmɛni sôlii káa tãi a lɛɣɛ̂i. Zu-kara ɣelêi a pâi a maa félaa.

¹⁷“Káai kélee kákaa ǹɔii-ŋuŋ tí kɔlɛi, da káai kélee gɛ́-pere kɔ́lɔŋ a bɔlɔŋ, ka malôŋ see ƃó m̀ɛni ma. Ka mó kâa, ‘Ŋɔwála-walaai mɛi a tée. Ŋɔfólo-laai su fé ŋɔ́nɔ kpànaŋ ní, ŋɔwala-walaai su a saa.’

¹⁸Káai kákaa Dibɔŋ, ka kula káƃaa kɛ́-maa kwaa-ŋai dîa ká pîlaŋ, ká sée ǹɔii ma muluŋ su. Môa su-kara-ƃelai díkaa ƃɛ́. Da ŋɔkili-tɔɔ-ma kwaai ma lɛɛ a gbolôŋ.

¹⁹Káai ká seɛ́ɛ káa Aloɛi, ka pá ká tɔ́ɔ berei kɔlɛ ká maa kpɛ̂ŋ kɛ́, ǹûai tí pûi, ka dímarê kɛ́. Ka dímarê kɛ̀, lé ƃé kɛ̂i.

²⁰Da pâi kɛ̂i kâa dîyɛɛi, ‘Môa a wólo.’ Gáa a ŋumɛ mɛni, ‘Ka wɔ́lɔ m̀ɛni ma. Ka maa tuŋ too Ano Ya-leei kɔlɛ a gɛɛ da Môa lɛ̀ɛ a lɔii pûŋ!’

²¹“Mɛni ŋá-teɛɛ a pá ǹɛ̃ɣɛ lɔii su taa-lee-ŋai ŋí mɛni ma: Oloŋ, Zuda, Mefa,

²²Dibɔŋ, Nebo, Bɛɛ-diƃilita,

²³Kiriataiŋ, Bɛgamɔ, Bɛmiɔŋ,

²⁴Kɛriɔ da Bɔzira. Mɛni ŋá-teɛɛ a pá Môa lɔii su taa-lee-ŋai ŋí mɛni ma, nyíi-ŋai díkaa kwaa ma kpua-ŋa mai, da kwaa ma kôyaa-ŋa dîai.

²⁵Da Môa ŋɔwála-walaai da ŋɔkponoi kpânaŋ-laai su-kara. Ńyãa Yâwɛɛ ƃé mò tí.”

²⁶Yâwɛɛ è mò ǹyɛɛ, “Ka gɛ́ Môa é ŋwãai kpele é gɛ́, kpɛ́ni fêi, a tɔɔ ḿâ. Môa a pâi gɔŋ pilîi é tóo zu gɛ́ kɔ̀ kɔ̀. À kɛ̀ tí, nûa da pâi ɣɛ̂lɛi m̀a.

²⁷Môa, gíli é lɛ́ɛ íŋa berei í ɣɛ́lɛ-maa kùla la Eezuɛ kponôi. Ítûa a dia yɛ̂ɛ sɛŋ ƃé ya dísoŋ ŋúma-ƃela sáma.

²⁸“Káai kélee kpɔ́ káseɛɛ káa Môa taa-lee-ŋai sui, ka kula naa ká lí ká kɛ́ ǹyée wolo-ŋai su. Ka kɛ́ yɛ̂ɛ tòloŋ ƃé a daa tɔ́ɔ kɔni wôlo su.

²⁹Kwa Môa ŋɔyoŋkai maa mɛ̂ni mɛni. Ŋ̀ɛ́i tɛɛ̂i, ǹíi kɛ̂tɛ, gɛ́tɛɛ gbîŋ ŋɛ́i. A ŋ̀ɛ́i ǹaɣiŋ ǹûai mɛi.

³⁰Ńyãa Yâwɛɛ, ŋá díŋɛi tɛ̂i maa mɛni kɔ́lɔŋ. Mɛni lɛ́lɛɛ da fa kûla díkɛ mɛni da su. M̀ɛni ma, m̀ɛni-ŋai da gɛ̂i, zu a pâi karâi.

³¹M̀ɛni ma, ŋa pâi wɔ̂lɔi Môa da Kɛɛrɛ-ƃelai kélee mɛni ma.

³²Ŋa pâi wɔ̂lɔi diai kùla Simai dímɛni ma, ŋá wɔ́lɔ a ŋ̀ánaa Zazɛ-ƃelai mɛ̂ni ma. Sima taa-leei, íkaa yɛ̂ɛ kpɔmɔ nyíi ŋ̀owo a lí Ǹyuo Saai pôlu pere a seri kpɔ́ Zazɛ. Kɛ́lɛ, ífolo lá ƃóɔɔ ƃai da íkpɔmɔ ƃai kélee kpɔ́ su a kara.

³³Lii-nɛ̃ɛ da koi-nɛ̃ɛ dífe ŋɔ́nɔ mii-sãa kpɛtɛ lɔii Môa su. Ŋa gɛ́ ŋwãai fé ŋɔ́nɔ kulâi ŋwãai kpɛtɛ kwaai ma. Núu da fé naa gɛ́ ŋwãai kpɛ̀tɛ a lii-nɛ̃ɛ pere.

³⁴“Ɛsibɔŋ da Ilealɛ-ƃelai da wɔ̂lɔi kpɔ́ a ŋ̀ánaa. Díwɔlɔ-wooi a seri kpɔ́ Zâa. Zoa-ƃelai da dílaɣi-wooi mɛnîi. Ǹûai díkaa Ɔlonaiŋ da Ɛgila-silisiyai dí dílaɣi-wooi mɛ̂ni. M̀ɛnii ŋí kɛ́ɛi, Niŋri ya-ɣɛli-ŋai da kpála.

³⁵Ŋa pâi Môa-ƃelai kɛ̂i dí kpéra kéreŋ sala kulâi díɣâla-fɛli kwaa-ŋai ma, dí kpéra sâla kulâi díɣâlai-ŋai dîa. Ńyãa Yâwɛɛ ƃé mò tí.

³⁶“Ńii toɔɔ̂i pôlu Môa da Kɛɛrɛ mɛni ma yɛ̂ɛ núu da a kɛ̀ saa wûle toôi ƃɔɔ su, kpɛ́ni fêi, díkɔ̃lîŋ kélee kpɔ́ su a kara.

³⁷Díkelee da díŋuŋ kpɛ́ɛ gayôŋ ma da díla-leɣa pú. Da díŋwana díyee ma a tɛɛ-ŋa, díkelee da malôŋ seɣe-ŋa too dîa.

³⁸Maloŋ-too maa wɔlɔ-woo nɔ́ ƃé ya m̀ɛni Môa pɛrɛ-ŋai mɛi ƃɛ́i nûa da gôyɛŋ naai, da ƃɛ́i da díŋaa tɛ̀ naa mai. Ŋá Môa wòlo yɛ̂ɛ gònoŋ nyíi núu da fé wɛ̂lii lai.

³⁹Môa a wólo kpɔ́ pɛ̀yɛ-pɛyɛ! Dí lâɣi la! Da ƃâa kula Môa ma. Ǹaa a lɛɛ a gbolôŋ. Ǹɔii-ŋuŋ-ŋai da ɣɛ́lɛ maa kulâi gbonôi. Ńyãa Yâwɛɛ ƃé mò tí.”

⁴⁰Yâwɛɛ a góno tée a gɛɛ lɔii-ŋuŋ da a pâi yenîi Môa ma yɛ̂ɛ kuɛ é goôŋ pɛlɛ m̀ɛi.

⁴¹À kɛ̀ tí, a pâi ǹaa taa-lee-ŋai kélee siɣêi. M̀aa ɣêlei tí, Môa kɔ-kuluƃa-ŋai da pâi kɛ̂i kpɔ́ nɔ́ yɛ̂ɛ nɛnî a kɛ̀ koi-têe su.

⁴²Da pâi Môa su-karâi kpɔ́ va nâa kɛ̀ a lɔii-ŋuŋ, kpɛ́ni fêi, è tɔ̀ɔ ḿâ.

⁴³Mɛni kpɔ̂lu, lóa kpóŋ kôyaa da ƃáre díkaa Môa-ƃelai maa kpɛ́nîi. Yâwɛɛ ƃé mò tí.

⁴⁴Diai kélee pâi kulâi m̀ɛni kpɔ̂lui sui, da pâi toôi ǹóa kpóŋ kôyaai su. Diai kélee pâi kulâi ǹóa kpóŋ kôyaai sui, da pâi toôi m̀aréi ŋá, kpɛ́ni fêi, Yâwɛɛ a ŋ̀elei lɛ́ a pâi Môa su karâi lai.

⁴⁵Gɔ-pû-ƃelai nyíi-ŋai pɔri mâa fé kɛ́ ní dîɛi, dí lì dí tɔ́ɔ Ɛsibɔŋ koo mu. Ɛsibɔŋ ŋí ƃé kɛ̀ a daa-lêei Siɔŋ è wɔ́lɔ kɛ̀ naa mɛi. Dífe pɔri ní kɛ̀ tɛ̂i daai su, kpɛ́ni fêi, ŋɔŋ è kɛ̀ daai ma. Ŋɔŋ è ǹɔii ŋɔkɔyɛŋ-perei kêreŋ da ǹyée tôŋ su nyíi Môa-ŋai kɛ̀ a kɔ́ mɛni wɛ́liɛɛi dí kɛ̀ a díseɛɛ naai.

⁴⁶Kpalo ƃêlai Môa ma. Diai da Kesimɔ Ɣalai fêlii díkelee kpɔ́ dísu a kara. Da dílônii sinaai da ǹɛyâai sóŋ a kɔ-sôŋ-ŋa da lí a dia.

⁴⁷Kɛ́lɛ, ŋ̀elei káa pâi nyíi Yâwɛɛ a pâi gɛ̂i Môa é ŋɔ́nɔ ƃûu ƃó lai. M̀ɛni-ŋai ŋí ƃé Yâwɛɛ è wɔ́lɔ mò a gɛɛ a pâi kɛ̂i a Môa.