Read Kpelle Zɛlemaya 50 Bible Online

Zɛlemaya 50 - Kpelle bible

Zɛlemaya 50

¹Ŋ̀orɛ̂-wooi ŋí ƃé Yâwɛɛ è dɛ̀ɛ a ńyãa é pîlaŋ Babelɔŋ taa-leei ma da ǹaa-ƃelai.

²“Duŋ ŋí tóo ǹɔii-ŋuŋ-ŋai dîa! M̀ó! Ŋɛi kɛ́-maa lɛ́ dîa, í dùŋ too! Ífe gɛ̀ a loo mɛ́ni! Babelɔŋ aâ too! Ŋɔɣâlai Madɔ a too, a wólo, a táa-tâa! Ŋumɛ a Babelɔŋ ɣala pɔkɔɔŋ-ŋai sóŋ. Díɣâla-pɔkɔɔŋ-ŋai ŋí nyii m̀ɛlɛ fé ŋ́goi, da wólo-wôlo.

³“Lɔii-ŋuŋ da a kula yá ŋûa-pere a pá a kɔ́ pɛ́lɛ Babelɔŋ ma. Ǹyaŋ a pâi ǹaa lɛɛ̂i a fɛ̃ɛ-kpâlaŋ su. Ǹûai da daa tulɛ-ŋai da pâi pûi, ǹyaŋ núu da fé pâi lɛɛ̂i naa.”

⁴Yâwɛɛ è mò ǹyɛɛ, “Tãi ŋ̀ele-ŋai tí ŋ̀aa sèe a pâi kɛ̂i lai, Eezuɛ-ƃelai da Zuda-ƃelai da pâi lenêi pôlu dílɔii su díkɛ wɔ̀lɔ díkɛ ńyãai a Díɣâlai ŋ́gɔ̂ri.

⁵Da pâi Zãiyɔŋ perei maa mare kɛ̂ɛ kɛ̂i dí lí ǹaa pere. Kwa dîa ni kwa pâi wɔ́lɔ-wɔlɔ kpanaŋ-woo kɛ̂i kúloai. Ǹyaŋ m̀aa kpanaŋ-wooi fé pâi wɔ́lɔ kulâi dɔɔ̂i.

⁶“Ŋánûai díkaa yɛ̂ɛ ƃála-ŋa ƃé dímɛi káa-ƃela da dí lɛ́ɛ naa da láŋ ǹyéei tôŋ su. Da kɛ́ nɔ́ siâi dí kɛ́ kùla ǹyée kɛ́tɛi dɔnɔ ma dí kɛ́ lì gbéli ma. Da nia dípɔ-taai perei ma.

⁷Núu nyíi nɔ́ a díkâai a pɛ̂lɛ dîa. Díkpɔara-ƃelai da mò dîyɛɛi, ‘Kwa sɔnyɔ̂ŋ kɛ́ a Yâwɛɛ. M̀ɛni ma, m̀ɛnii kwa gɛ̂i a diai, zãâi. Dínâŋ pɔlɔ-ŋai diî kɛ̀ a dílaa a Yâwɛɛ, dia máŋ diî pɔ̀ri kɛ̂i a teniŋ ƃô-ƃela ḿɛni ma.’

⁸“Eezuɛ-ƃela, ka pú ká kúla Babelɔŋ! Ka kula ǹɔii ŋí su. Ká kɛ́ a ǹûai m̀aa ŋuŋ-ŋai ká lí!

⁹Ŋa pâi lɔii-ŋuŋ kpulu wála-wâlaa-ŋa líi mu siɣêi dí kúla yá ŋûa-pere dí pá dí kɔ́ pɛ́lɛ Babelɔŋ ma. Da pâi tɔɔ̂i díɣɛli ma gɔ́i su dí pɛ́lɛ Babelɔŋ ma dí ǹyée mɛi ɣále. Díkaa a loŋso lɛ́lɛɛ-ŋa. Dífa pɔ̀ara a díkerâŋ-ŋai

¹⁰Ǹûai da pâi too maa kɛ̂i, zãâi kélee da ŋ̀wɛ̂lii, da pâi ziɣêi. Ńyãa Yâwɛɛ ƃé mò tí.”

¹¹Yâwɛɛ è mò ǹyɛɛ, “Babelɔŋ-ƃela, ká ŋálɔii-ŋuŋ wólo. Kálii nɛ̃ɛ̂i kákɛ koi-nɛɛ kula. Ká kɛ́ sìa-sia yɛ̂ɛ niŋa a pìli mii-sɛŋ kpɔlɔ su gɛ́ mìi gɛ́ daŋ-taŋ kpaa máŋ yɛ̂ɛ soo-sîrɛ ƃé záa tôlii.

¹²Kɛ́lɛ, ƃâa a pâi kulâi kátaa-leei ma, dí zoŋ a nyɔ́mɔɔ. Babelɔŋ a pâi kɛ̂i a doɔ́ɔ mu é tɛ́ɛ ǹɔii-ŋuŋ-ŋai dítoɔɔ̂i m̀ui dîa. A pâi kɛ̂i a ǹɔii nyíi zu kpalâi, yá fé naa, gɛ́ ƃò a fɛ̃ɛ-kpâlaŋ,

¹³kpɛ́ni fêi, ńii-ŋwânai, ǹyaŋ ŋa pâi gɛ̂i núu da fé pâi seêi Babelɔŋ. Ǹaa a pâi lɛɛ̂i a pilêŋ ŋá. À kɛ̀ tí, diai nyíi kélee pâi tɛɛ̂i naai, da pâi díŋuŋ kpɛ́mɛnîi a làa kpâla maa-pere.

¹⁴“Káai kákaa a gerâŋ pili-ƃelai, ka tínaŋ Babelɔŋ ma. Kákelee kpɔ́ ká m̀óŋ a kátɔ̃a-ŋai kélee, kpɛ́ni fêi, a sɔnyɔ̂ŋ kɛ́ a Ńyãa Yâwɛɛ.

¹⁵Ka gɔ́i maa fɛ́ɛ ká tínaŋ daa-lêei ma. Babelɔŋ a gbîŋ tɛɛ gɔ-kuluƃa-ŋai pɔ́. Da ŋɔsiɣãŋ wólo da dòo ǹɔii ma. Ŋa mɛni kpâ kulâi Babelɔŋ-ƃelai dîa. M̀ɛni ma, ka ká mɛnii gba kula m̀a máŋ. Ka tûa a dîa yɛ̂ɛ berei dí tùa la a díƃarâai.

¹⁶Káfe ǹɛɛ naa dímii-sãa sí ǹɔii tí su, kpaa máŋ dí mii-sãa ŋáa tɛ́ gîe ma naa. Ŋ̀ɔ̃ya-ŋai kélee díkaa naai, da pâi yaôi gɔ-kuluƃa-ŋai dîa dí lene pôlu dípɔ-taai.”

¹⁷Yâwɛɛ è mò ǹyɛɛ, “Eezuɛ-ƃelai díkaa yɛ̂ɛ ƃála-ŋa nyíi-ŋai yala-sulu a díkpɛ̂i díkɛ tàa-taai. Tãi maa ŋuŋ, Asiria kaloŋ è kɔ́ pɛ̀lɛ dîa. Ǹaa pôlu ma, Babelɔŋ kaloŋ Nɛbukinaza é díkao wólo.

¹⁸M̀ɛni ma, ńyãa Ŋ̀wála-wâla kélee Yâwɛɛ, Eezuɛ Ŋɔɣâlai, ŋa pâi Gâloŋ Nɛbukinaza kula maa kɛ̂i da ŋɔlɔii, yɛ̂ɛ berei nɔ́ ŋá Asiria kaloŋ kula maa kɛ̂ lai.

¹⁹Ŋa pâi Eezuɛ-ƃelai tɛɛ̂i pôlu dílɔii su. Da pâi mii-sãa lɛ́lɛɛ-ŋa miî nyíi-ŋai da lɛ̂lɛ Kamɛɛ Yeei ma, Basãŋ kpiniŋ sui, da nyíi-ŋai da lɛ̂lɛ Ifiraŋ ŋɔlɔii kpiniŋ su da Giliai. Nyíi-ŋai kélee da pâi wɛ̂lii a diai, da pâi kɛ̂i miî.

²⁰Ŋ̀elei tí a pà, núu da fé pâi ŋɔ́nɔ sɔnyɔ̂ŋ kɛ̂i Eezuɛ. À kɛ̀ tí, núu da fé ŋɔ́nɔ pâi ŋwana lɔ̂ɔ tua kɛ̂i Zuda, kpɛ́ni fêi, diai ŋá gɛ̀ dí lɛ́ɛ ɣele mai, ŋa pâi dísɔnyɔ̂ŋ su-mɛni lɛɛ̂i. Ńyãa Yâwɛɛ ƃé mò tí.”

²¹Yâwɛɛ è mò ǹyɛɛ, “Kɔ́ pɛ́lɛ Mɛratiaŋ da Pikɔ-ƃelai dîa. Ye dípaa í dísu-kara. M̀ɛnii kélee ŋá mò yâi, gélee ŋ̀aa-see kɛ́. Ńyãa Yâwɛɛ ƃé mò tí.

²²Nûa da kɔ́ kɔ̂i ǹɔii su. Da ǹaa su-kara a ŋ̀ánaa.

²³Babelɔŋ è kɛ̀ a kpɔ́-kpɔ, gɛ̀ ǹɔii-ŋuŋ-ŋai wôlo-wolo ŋ̀éniɛi gwaa kélee ma. Kɛ́lɛ, da gbɔ́-kpɔui tí fṹa-fũa a bɛlɛ-pɛlɛɛ. Ǹyaŋ tãi ǹɔii-ŋuŋ-ŋai kélee dí ǹaa kàa lai, dílaa è kpàla dîa dí yao m̀ɛnii kɛ̀ kɛ̂i lai ma.

²⁴Babelɔŋ, ŋá ƃáre tɛ̀ íperêi. Ya kɔ́ là, kɛ́lɛ, ífe gɔ́lɔŋ.

²⁵Ŋà ŋákɔ kɔ́ kɔli-sãai pûi kɛ́ kwaai ma lá ƃó, ŋá ńii ŋwána ŋa díkula naa, kpɛ́ni fêi, ńyãai a Ŋ̀wála-wâla kélee Yâwɛɛi, tíi káa ńyêei a gɛɛ ŋá gɛ́ la Babelɔŋ.

²⁶Ka pɛlɛ dîa ƃéla kélee ma. Ka dímii-sãai lâai-kɛ̂i kélee wólo. Zãâi ka pâi ziɣêi naai, ka gélee ŋáa tɛ́ gîe ma mii-sãa ŋáa tɛ́ gîe ma kwaai ma. Ka ǹɔii su-kara! Káfe sɛŋ da lɛ̀ɛ naa.

²⁷Ka dí kɔ-kuluƃa-ŋai kélee kpɔ́ páa. Ka dípaa! Kpalo ƃêlai dîa, kpɛ́ni-fei vóloi a seri dí díkula maa kɛ́ mɛni ma.”

²⁸Ǹûai pù dí kúla Babelɔŋ dí pá Zerusâlɛŋ, dí mò kûa berei Kúɣâlai Yâwɛɛ a mɛni kpa kulâi la Babelɔŋ ma Ŋɔɣâla-pɛrɛ Kɛ́tɛi su-kara mɛni mai.

²⁹“M̀ó gerâŋ pili-ƃelai dîa dí pɛ́lɛ Babelɔŋ ma. Diai kélee da pɔ̂ri kerâŋ pilîi dí dítɛɛ. Ka tínaŋ daa lêei ma. Káfe ǹɛɛ naa núu da é pú. Ka véla fé m̀ɛnii è gɛ̀i, m̀aa mɛ̂ni ma. Ka tûa la yɛ̂ɛ berei è tùa la a m̀arâai, kpɛ́ni fêi, è ŋɛi-tɛ kɛ̀ a ńyãai a Eezuɛi, Ŋɔmaa-waa ǹúui.

³⁰M̀ɛni ma, da pâi ŋɔnyánkpa-ŋai paâi bere-ŋai ma daa-lêei su. Ǹyaŋ da pâi ŋɔkɔ-kuluƃa-ŋai kélee kpɔ́ pâai a maa fóloi tí. Ńyãa Yâwɛɛ ƃé mò tí.

³¹“Babelɔŋ-ƃela, káŋɛi tɛ̂ɛi. M̀ɛni ma, ńyãa, Ŋ̀wála-wâla kélee Yâwɛɛ, ńdɔɔ̂i kâa! Tãi aâ seri a gɛɛ ŋá kákula maa kɛ́.

³²Kálɔii-ŋuŋ ŋɛ́i tɛ̂ɛi, ǹyaŋ a pâi gɔ́ɔ tuâi é tóo. Ǹyaŋ núu da fé pâi kɛ̂i naa é mù siɣe. Ŋa pâi ŋɔŋ toôi kátaa lêei ma, ŋá kákɔ̃liŋ kélee kpɔ́ su-kara.”

³³Ŋ̀wála-wâla kélee Yâwɛɛ è mò ǹyɛɛ, “Eezuɛ-ƃelai da Zuda-ƃelai díkaa mɔ̃́lɛ-laa su. Diai dísòŋ a kɔ-sôŋ-ŋai, da dímaa kpɛɛ̂i kpɔ́, ǹyaŋ díta fa pɔ̂ri pûi.

³⁴Kɛ́lɛ, ǹúui nyíi pâi díkula yêei kɛ̂i, ŋ̀wála-walaai. Ǹáa ƃa Ŋ̀wála-wâla kélee Yâwɛɛ. Ǹyaa kpîŋ ƃé pâi dímɛnii su kâai. Gɛ̀ ní, a pâi pâi a lii-see ŋ̀éniɛi su. Kɛ́lɛ, a pâi mɛni kpɔ̂lu lâai Babelɔŋ ma.”

³⁵Yâwɛɛ è mò ǹyɛɛ, “Saa a too Babelɔŋ ma! Saa a too ŋɔnûai dîa, Saa a too ŋɔnúu mɛi-ƃelai da ŋɔtáre-ƃelai dîa.

³⁶Saa a too ŋɔlɛ́ɛ ɣala-lono kɛ-ƃelai dîa. Lé-ƃela ƃa dia nyíi táre fé díŋuŋ sui! Saa a too ŋɔkɔ-kuluƃa-ŋai dîa, da yao a ŋ̀ánaa.

³⁷Ka ŋɔsoo-ŋai da zoo sia-keleŋ-ŋai su-kara. Saa a too wɔ̃́ya kɔkuluƃa-ŋai è dísiɣaŋ sòŋ, dîa, dífii a kpɛɛ a ŋ̀ánaa. Ka too dîa ká dílaai kɛi-sãai kúla díyêei ka dísu-kara.

³⁸Fólo lá a ƃó dílɔii su, a ǹaa yà-ŋai kélee kpála. Babelɔŋ káa a lɔii nyíi ǹáa fɛ̂ɛi a ɣâla-pɔkɔɔŋ mĩli-mĩliɛɛ-ŋai, nyíi-ŋai da ƃoo kûla ǹûai kponôi.

³⁹“M̀ɛni ma, nyînaŋ-ŋa da gɔfɛ-ŋa da pâi kɛ̂i Babelɔŋ. Ŋɔni nyíi maa fé waa níi a pâi kɛ̂i naa. Núu da fé ŋɔ́nɔ pâi seêi naa wɔ́lɔ-wɔlɔ da wɔ́lɔ-wɔlɔ.

⁴⁰M̀ɛni tɔnɔi tí wɔ́lɔ kɛ̀ a Sodɔŋ da Gomorai, da ƃé pâi kɛ̂i a Babelɔŋ a tãi ŋa dísu-kara la da ǹaa kɔlɛ ma taa-ŋai. Núu da fé ŋɔ́nɔ pâi seêi naa wɔ́lɔ-wɔlɔ da wɔlɔ-wɔlɔ. Ńyãa Yâwɛɛ ƃé mò tí.

⁴¹Nûa da-ni da kulâi lɔii-ŋuŋ da su nyíi gáa yá ŋûa perei, da-ŋa díkɛ kùla lɔii-ŋuŋ wála-walaa su nyíi gáa kwaa koyaa mai. Kâloŋ-ŋa támaa da díkpîŋ kpɛtɛ̂i kɔ́ kɔ́-mɛni ma.

⁴²Da díkerâŋ-ŋai da díƃoa sɔkpɔ-ŋai síɣe, Dí líi nyɔ́mɔɔi, maloŋ kâa fé díyêei. Dísoo-ŋai kɔ́ɔ mu-tiŋ káa yɛ̂ɛ Yúo too tîŋ kɔ́ kɔ́-mɛni ma Babelɔŋ.

⁴³Babelɔŋ kaloŋ a duŋ mɛni, ǹyée da gɔ́ɔ fíi a kpɛɛ, malôŋ a too m̀a, sɛŋ a sôlii m̀a yɛ̂ɛ nɛnî ƃé koi-têe su.

⁴⁴“Ńyãa Yâwɛɛ, ŋa pâi pâi yɛ̂ɛ yala-sûlu ƃé kulâi wolâi Zɔdiŋ Ya-leei kɔlɛ, ŋá pá gala ŋûnui ŋá, ŋá gɛ́ Babelɔŋ é pú a maa félaa é kúla daa lêei su. Gɛ̀ ní ǹúu mɛi-nuui ŋa pâi ziɣêi, ǹyaa ƃé pâi ǹɔii-ŋuŋ tí mɛi kâai. Gbɛ̂ɛ ƃé ka pɔ̂ri gɔɔ̂nii ḿâi? Gbɛ̂ɛ ƃa pɔ̂ri tɔɔ̂i ḿâi? Kâloŋ nênɛ ƃa pɔ̂ri tɔɔ̂i ŋ́ɛi?

⁴⁵M̀ɛni ma, ka káwoli tɔ́ɔ m̀ɛnii mâ ŋá gbɛ̀tɛ é pîlaŋ Babelɔŋ ŋɔtaa-lêei mai da nyíi-ŋai ŋa ŋ̀wɛ̂lii ŋá gɛ́ a ŋɔnûai. Ŋa pâi dínîa-pɛlɛɛi ɣála-ɣalâi ŋá lí a dia lɔii da kpɛ́ni-ŋa su. À kɛ̀ tí, ǹûai kélee láa a pâi kpâlai dîa.

⁴⁶Ŋ̀elei Babelɔŋ-ƃelai da pâi toôi lai, dítiŋ a pâi kɛ̂i kpɔ́ a gɛ́tɛ é gɛ́ ŋ̀éniɛi gwaa kélee ma é kpɛ̃lîŋ. Ǹyaŋ núu kélee a pâi díwɔlɔ-woo mɛnîi ǹɔii-ŋuŋ da kpɛ́ni-ŋai su.”