Read Kpelle Zɛlemaya 52 Bible Online

Zɛlemaya 52 - Kpelle bible

Zɛlemaya 52

¹Zɛdikaya è wɔ́lɔ kɛ̀ a kóraŋ buu-feerɛ káo tɔnɔ dí kɛ́ gɛ̀ a kâloŋ Zuda lɔii-kpiniŋ mɛi. È gɛ̀ gâloŋ-laai su a kóraŋ puu-kao tɔnɔɔ. Zeɛ́ɛ è kɛ̀ Zerusâlɛŋ. Ǹee láa ƃé kɛ̀ a Amutaa. Amutaa ǹâŋ láa ƃé kɛ̀ a Zɛlemaya. Zɛlemayai ŋí seɛ́ɛ è kɛ̀ Lebina taa-leei su.

²Gâloŋ Zɛdikaya è wɔ́lɔ kɛ̀ nɔ́ a zɔŋ nyɔ́mɔɔ Yâwɛɛ ma yɛ̂ɛ berei Zɛoakiŋ è kɛ̀ lai.

³M̀ɛni ma, Yâwɛɛ è wɔ́lɔ ǹíi ŋwàna kpɔ́ Zerusâlɛŋ da Zuda-ƃelai dîa é díkpɛ ŋ̀ɛ́i túɛ. Ǹaa kɛ́ɛ tíi, Zɛdikaya è tɔ̀ɔ Nɛbukinaza ma nyíi kɛ̀ a Babelɔŋ kaloŋ.

⁴Nya ƃe Nɛbukinaza è ŋɔkɔ-kuluƃa-ŋai kélee kpɔ́ sìɣe é pá a dia dí kɔ́ pɛ́lɛ Zerusâlɛŋ ma. Dí pɛ̀lɛ Zerusâlɛŋ ma a Zɛdikaya kɛ́ɛ a kâloŋ ŋɔkóraŋ ǹɔ́ɔlu-mɛi náaŋ ŋɔɣáloŋ buui ŋɔfólo puu ɣêle. Dí pà dí díƃûu-ŋai pú dí dínaŋ Zerusâlɛŋ ma. Dí kwaa ma-ŋa kpɛ̀tɛ a gɛɛ dí tɛ́ zíɣaŋ mɛi.

⁵Dí lɛ̀ɛ naa é lɛ́ɛ la zu Zɛdikaya é gɛ́ gâloŋ-laai su a kóraŋ puu-kao-tɔnɔ.

⁶Góraŋ tɔnɔi tí ŋɔɣáloŋ ǹáaŋ ŋɔfólo lɔ́ɔlu mɛi náaŋ ɣele, ǹûai kɛ́ɛ díkɔnɔ̃ŋ a kpɛɛi, puru è kɛ̀ dípaâi.

⁷Nya ƃe gɔ-kuluƃa-ŋai dí ziɣãŋ wôlo dí tɛ́ɛ naa, berei máŋ Babelɔŋ kɔ-kuluƃa-ŋai dí kɛ̀ la a dítinaŋɔɔ ziɣãŋ mai. Nya ƃe gɔ-kuluƃa-ŋai kélee kpɔ́ dí pù a gbínii. Dí pù dí tɛ́ɛ a ziɣãŋ lá-ƃerei pere nyíi kɛ̀ ziɣãŋ feerɛi loai, dí tɛ́ɛ gâloŋ ŋɔsûai su-pere dí díteniŋ tɔ́ɔ diŋ-tiŋ su pere nyíi kɛ̀ Zɔdiŋ Ya-leei ma perei.

⁸Nya ƃe Babelɔŋ kɔ-kuluƃa-ŋai dí pɛ̀lɛ Gâloŋ Zɛdikaya kpɛ̂i é lɛ́ɛ la zu dí zòŋ diŋ-tiŋ su Zɛleko kɔlɛ ma. Ŋɔkɔ-kuluƃa-ŋai dí pú ǹyêei.

⁹Gɔ-kuluƃa-ŋai dí Zɛdikaya sìɣe dí lí la Babelɔŋ kaloŋ Nɛbukinaza pɔ́ naa Lebila Taa-leei su nyíi kɛ̀ Ama lɔii-kpiniŋ sui. Nɛbukinaza è Zɛdikaya ŋɔmɛnii ŋá tèe gwaa tɔ̂nɔi tí ma.

¹⁰Nɛbukinaza è Zɛdikaya ǹônii-sinaai kélee kpɔ́ pàa Lebila Taa-leei su Zɛdikaya ŋɛ́i túɛ. È ŋɔ́nɔ pène é tɔ́ɔ é Zuda tii kɛ́-ƃelai kélee páa gwaa tɔ̂nɔi tí ma.

¹¹Nɛbukinaza kɛ́ɛ a m̀ɛni-ŋai ŋí kélee kɛ́i, è Zɛdikaya ŋɛ́i veerɛŋɔɔ wòlo é yɔlɛ too ǹeɣei é lí la Babelɔŋ é bili kpini-pɛrɛ mu é lɛ́ɛ la zu zaa tãi é seri.

¹²Babelɔŋ kaloŋ Nɛbukinaza kɛ́ɛ gâloŋ-laai su ŋɔkóraŋ puu-kao lɔ́ɔlu mɛi-náaŋ, ŋɔɣáloŋ ǹɔ́ɔlui ŋɔfólo puu ɣele ƃé Nɛbuzaradaŋ nyíi kɛ̀ a gâloŋ lia-woo ƃó-nuui, gɛ́ ƃò ŋɔ́nɔ a gɔ-kuluƃa-ŋai láa túɛ-nuui è tɛ̀ la Zerusâlɛŋ.

¹³Nya ƃe è Ŋ̀âla-pɛrɛ Kɛ́tɛi kèreŋ, gâloŋ-pɛrɛi da díi kɛ́-ƃelai kélee dípɛrɛ-ŋai.

¹⁴Babelɔŋ kɔ-kuluƃa-ŋai dí ziɣãŋ kélee kpɔ́ wòlo kɛ̀ a dínaŋɔɔ Zerusâlɛŋ mai.

¹⁵Nya ƃe Nɛbuzaradaŋ è lì a ǹûai kɛ̀ Zerusâlɛŋ, gɔ̂lɔ-ƃelai da-ni-ŋa, ǹyɛrɛ-ƃelai kpéli-ŋai da diai díkpîŋ tɛ̀ɛ Babelɔŋ-ŋai pɔi.

¹⁶Kɛ́lɛ, è gôlo-ƃelai da-ni lɛ̀ɛ Zuda a gɛɛ dí kɛ́ tíi kɛ̀ naa gbɔmɔ-ƃa-kpalaŋ-ŋai ŋá da gbâlaŋ-ŋai.

¹⁷Nya ƃe Babelɔŋ kaloŋ Nɛbukinaza è mò ŋɔkɔ-kuluƃa-ŋai dîa a gɛɛ dí lí dí Ŋ̀âla-pɛrɛ Kɛ́tɛi yée mu-wuru-ŋai nyii kɛ̀ a gbɛtɛ́ɛ a ƃarai kúla naa dí gélee wólo-wolo, dí ǹyá-see sɛŋ-folo see-sɛŋ, dí ǹyá soŋ m̀ara sɛŋ-folo kɛ́tɛɛ-ŋai kélee síɣe dí lí a dia Babelɔŋ. È mò dâi a gɛɛ dí lí máŋ a m̀ara sɛŋ-folo-ŋai ŋí kélee Babelɔŋ.

¹⁸È mò dîa a gɛɛ dí ǹuu kɔɔ sɔƃelei síɣe, ŋ̀âla-teƃelei ŋá kɔ̀ɔ sɛŋ-foloi, lâŋpoi maa kpɛtɛ-sãai, zâla fɛnɛ-sãai ŋãa soŋ sɛŋ-foloi, géreŋ sãa kúŋ-nɛ̃ɛi kéreŋ sɛŋ-folo-ŋai da m̀ara sãai kélee kɛ̀ Ŋ̀âla-pɛrɛ Kɛ́tɛi mui.

¹⁹Ka zãai kélee síɣe nyíi-ŋai dí díkpɛ̀tɛ a gôo kpaa máŋ kánei. Zãâi ŋí ƃa zɛŋ-folo pɛlɛ-pɛlɛɛi, ŋ̀ɔŋ siɣe goloŋ, vɛnɛ-sãai ŋãa soŋ sɛŋ-folo-ŋai, ǹuu kɔɔ goloŋ, lâŋpo-ŋai see-wurui, géreŋ sɛŋ kúŋ-nɛ̃ɛi kéreŋ sãai da ŋwãai sala sãai pú sɛŋ-folo-ŋai.

²⁰Kɛ́lɛ m̀ara sãai Saloma è díkpɛ̀tɛ Ŋ̀âla-pɛrɛ Kɛ́tɛi mɛni mai, dífe pɔri ní díkɔɔ̂ni, kpɛ́ni fêi, dí kɛ̀ kpɔ́ a díwiɛɛ. Zãâi ŋí ƃé kɛ̀ a bɛ́rɛi yée-mu wuru feerɛi, géleŋ-ŋai zoo-ŋai da kâa díɣâlai, ǹyá-soŋ sɛŋ-folo kɛ́tɛi da ǹiŋa-sirɛ pɔkɔɔŋ puu-kao-feerɛi nyíi-ŋai ǹyá soŋ sɛŋ-foloi è kɛ̀ a zeɛ́ɛ mɛi.

²¹Bɛ́rɛ yée-mu wuru feerɛi dí kɛ̀ a díƃoloŋɔɔ gîe ma. Dɔnɔ ŋɔmɛi kôyaa è kɛ̀ a kɔ́ɔ ƃɔ́rɔnîi buu-feerɛ káo lɔ́ɔlu mɛi feerɛ. Ŋɔkpono kɛ̂tɛ è kɛ̀ a kɔ́ɔ ƃɔ́rɔnîi puu-kao lɔ́ɔlu mɛi-saaƃa. Lóa è kɛ̀ dísâmai. Ŋɔkpi-kpitili è kɛ̀ a yée-gbua saaƃa. Ƃara-kalaŋ è kɛ̀ a zeɛ́ɛ díŋûa tɛi-tɛi. Ŋɔmɛi kôyaa è kɛ̀ a kɔ́ɔ ƃɔ́rɔnîi lɔ́ɔlu mɛi feerɛ da gbûra. M̀aa è kɛ̀ baláa a pɔmegurane nyíi dí gbɛ̀tɛ a ƃarai.

²³Pɔmegurane ŋuŋ-tɔnɔ è kɛ̀ m̀ara-kalaŋ ŋí dɔnɔ ma. Kɛ́lɛ zãâi ŋí buu lɔ́ɔlu mɛi-náaŋ kao lɔ́ɔlu-mɛi da nɔ́ ƃé núu a kâa gàa é síɣe ǹɔii ma pere.

²⁴Ǹaa pôlu ma, Nɛbuzaradaŋ è ŋɔ́nɔ zâla láa soŋ-nuu kɛ́tɛi Seraiyai sòŋ a kɔ-sôŋ, ǹyée mu-nuui Zɛfanaya da díi kɛ́-ƃela kpaya-kpayai saaƃai kɛ̀ tíi kɛ̂i Ŋ̀âla-pɛrɛ Kɛ́tɛi mui.

²⁵È ŋɔ́nɔ gɔ-kuluƃa-ŋai mɛi-nuui sôŋ, gâloŋ lia-woo ƃó-ƃela lɔ́ɔlu-mɛi-feerɛi nyíi-ŋai lɛ̂ɛ Zerusâlɛŋ da gɔ-kuluƃa-ŋai mɛi káa-nuui nyíi kɛ̀ a gɔlɔ pɔ̃yɛ-nuui gɔ-kuluƃa-ŋai mɛi. È ŋɔ́nɔ tíi kɛ́-ƃela kpaya-kpaya buu lɔ́ɔlu mɛi-da sòŋ. Ǹûai ŋí kélee dí lɛ̀ɛ Zerusâlɛŋ a tãi dí ǹûai dúɛ-tuɛ-ŋai sòŋ la gɔ́i su a maa-ŋuŋ.

²⁶Nɛbuzaradaŋ è ǹûai ŋí sòŋ é pá a dia Lebila Taa-leei su ƃɛ́i Babelɔŋ kaloŋ è kɛ̀ naai.

²⁷Nya ƃe Gâloŋ Nɛbukinaza è ǹûai ŋí lókwa é dí dípaa. È dí dípaa Lebila Taa-leei su nyíi kɛ̀ Ama lɔii kpiniŋ sui.

²⁸Berei ŋí ƃé Nɛbukinaza è wɔ́lɔ lì la kɔ-sôŋ pere su: Gɛ́ɛ gâloŋ-laai su ŋɔkóraŋ lɔ́ɔlu mɛi feerɛ su, è lì a Zuda-ŋai ŋɔwála saaƃa pôlu buu feerɛ káo saaƃa (3,023).

²⁹Góraŋ buu-kao lɔ́ɔlu-mɛi saaƃai su, è lì a núu ŋuŋ lɔ́ɔlu mɛi saaƃa pôlu buu saaƃa káo feerɛ (832). È ǹûai ŋí ní sòŋ Zerusâlɛŋ.

³⁰È lì a núu ŋuŋ lɔ́ɔlu mɛi feerɛ pôlu buu náaŋ káo lɔ́ɔlu (745) góraŋ buu-feerɛ-kao saaƃai su. Gɔ-kuluƃa-ŋai mɛi-nuui Nɛbuzaradaŋ ƃé kɛ̀ nuu soŋ mɛnii ŋí láa túɛ. Ǹûai dí lì a dia kɔ-sôŋ pere sui dí kɛ̀ a núu wála náaŋ pôlu ŋuŋ lɔ́ɔlu mɛi-da (4,600).

³¹Zuda kaloŋ Zɛoasiŋ kɛ́ɛ gɔ-soŋ laai a kóraŋ buu-saaƃa kao-lɔ́ɔlu mɛi-feerɛ koraŋ tí ŋɔɣáloŋ puu-kao-feerɛi ŋɔfólo buu-feerɛ káo lɔ́ɔlu ɣele, dí kâloŋ nina sèe Babelɔŋ lɔii mɛi. Gâloŋ ŋí è Zuda kaloŋ Zɛoasiŋ malôŋ kàa é gùla gbini-pɛrɛi mu. Babelɔŋ kaloŋ kpîŋ láa ƃé kɛ̀ a Ivɛmɛodasi

³²Babelɔŋ kaloŋ Ivɛmɛodasi è wɔ́lɔ ƃaa kɛ́-maa tɛ̀ɛ Zɛoasiŋ pɔ́. È ƃaa kɛ́-maa tɛ̀ɛ Zɛoasiŋ pɔ́ é tɛ́ɛ gâloŋ-ŋai nyíi-ŋai dîa da dia-ni dítɔɔ̂i è kɛ̀ tɔnɔi.

³³M̀ɛni ma, è gɛ̀ Zɛoasiŋ è ŋɔkpini-pɛrɛ mu-seɣei kúla m̀a da Babelɔŋ kaloŋ dí kɛ̀ dílaa m̀ii kwaa tɔnɔ ma é lɛ́ɛ la zu é seri ŋɔkɛ-ɣéniɛi kɔ̃́yɛŋ ma.

³⁴Babelɔŋ kaloŋ a kâa sãa tɛ̀ɛ bɔ́ a ɣele kélee ŋɔkɛ-ɣéniɛi mɛni ma é lɛ́ɛ la zu ŋɔɣéniɛi é kpɛ́ɛ.