Read Kpelle Zɛlemaya 6 Bible Online

Zɛlemaya 6 - Kpelle bible

Zɛlemaya 6

¹Káai kákaa a Bɛŋsima ŋɔnûai, ka pú ká kúla Zerusâlɛŋ ká ŋuŋ ma ƃô sɔlɔ ƃó. Ka dúrui fɛ́ɛ Tekoa, ká ŋɛi-kɛ-maa lɛ́ Bɛɛ-akɛŋ kpɛ́ni fêi, mɛni kpɔ̂lu a kulâi yá-ŋua pere da su kâra-laa.

²Zãiyɔŋ taa-leei, ílɛ̂lɛɛi, íŋaa waai kɛ́lɛ ŋa pâi ísu karâi.

³Íkpɔara-ƃelai da pâi pâi dí tínaŋ yâ yɛ̂ɛ berei ƃála mɛi káa-ƃela da díƃala-ŋai da tînaŋ la taa ma a díkpulu-ŋai. Da pâi díƃûu-ŋai pûi díkpîŋ kwaa ma.

⁴Da pâi môi dîyɛɛi, “Kwaa kúkpîŋ kpɛtɛ a gɛɛ kú kɔ́ pɛ́lɛ m̀a. Í mu-siɣe a gɛɛ kú pɛ́lɛ m̀a a vólo tɛ́ɛ ŋuŋ-mai!” Kɛ́lɛ da ŋɔ́nɔ môi dîyɛɛi, “Kpalo ƃêlaai kûa, kpɛ́ni fêi, vóloi a kɛ́ nâa liî. Ŋ̀ele-wûlii niniŋ a nâa kôya.

⁵Í mu siɣe kú pɛ́lɛ m̀a a gbínii, kú ŋɔkâloŋ-pɛrɛ-ŋai su kara.”

⁶Ŋ̀wála-wâla kélee Yâwɛɛi è mò ǹyɛɛi, “Ka ŋ̀úru-ŋai tée a gɛɛ ká ziɣâŋ wólo la. Pɛlɛ Zerusâlɛŋ ma, í ǹaa su kara. Gáa a sɛŋ kú daa-lêei ŋí kùla maa kɛ́. Mɛni lɛ́lɛ da fé naa fɛ́ɛ nɔ́ ŋwana lɔ̂ɔ mɛni tée-tee.

⁷Ŋwana lɔ̂ɔ a kûla Zerusâlɛŋ taa leei su yɛ̂ɛ berei yá a kûla la ya ɣɛ̂li sui. Núu a mɛni nyɔ́mɔɔ da mɛni su kara mɛni maa mɛ̂ni m̀ɛni naa. Pala da kɔlɔ-fela díkaa nɔ́ m̀a.

⁸Ka ká mɛi káa, óo Zerusâlɛŋ-ƃela. À wàla kɛ́ tí, ŋa pâi ḿbôlu tɔɔ̂i kâa, ŋa kálɔii lɛ́ɛ a bûŋ ƃɛ́i núu da fé pâi lɛɛ̂i naai.”

⁹Ŋ̀wála-wâla-kélee Yâwɛɛ è mò ǹyɛɛi, “Berei kpɔmɔ-ƃa kpalaŋ nâmu a ŋɔkpɔmɔ-ƃai kélee kùla la dɛi-tɛi nɔ́ é lɛ́ɛ naai, bere ƃé Eezuɛ ŋɔkpɔara-ƃelai da pâi gɛ̂i la. Da pâi Eezuɛ-ƃelai kélee sonîi dɛi-tei nɔ́ é lɛ́ɛ naa.”

¹⁰Zɛlemaya è mò ǹyɛɛi, “Gbɛ̂ɛ ƃé ŋa pâi ǹia-woo ƃôi é mɛnii? Ka gáa, díwoli láa tɛɛ̂i, dífa díwoli tɔ̀ɔ. Yâwɛɛ wóo káa nɔ́ díwôlii a ɣɛ́lɛ-maa-sɛŋ. Dífa díyee sèe mù a lii-nɛ̃ɛ pere.

¹¹Yâwɛɛ, ńii ŋwânai kpɔ́ dîa yɛ̂ɛ berei í liî ŋwânai la dîa ǹyaŋ fa pɔ̂ri ńii maa sonîi.” Nya ƃe Yâwɛɛ è mò ḿâ ǹyɛɛi, “Ílii ŋwána ǹîa-pɛlɛɛi díkaa berei mai dîa é pɛ́lɛ ǹyaŋkpa-ŋai díkaa kɔyɛ̂ŋ sui, é pɛ́lɛ ǹɛyãai da dísinâai dîa da ǹúu-pɔlɔ-ŋai.

¹²Ŋa pâi dípɛrɛ-ŋai tɛɛ̂i díƃarâai pɔ, é pɛ́lɛ díkpâlaŋ-ŋa tíi da dínɛyãai dîa. Ŋa pâi ǹɔii ŋí su-ƃelai kélee su karâi.

¹³É síɣe ǹúui guro-tei ma é tóo gɛ́tɛi ma, díkelee díkaa wôya-sɛŋ wɛ̂lii. É síɣe Ɣâla ŋɔlóno kɛ́-ƃelai dîa é tóo zâla láa soŋ-ƃelai dîa, díkelee díkaa nɔ́ tûai a wôya pere.

¹⁴Dífa sále pù ŋánûai dí palai ŋá a ǹɛ́lɛɛ, dí kɛ̀ mò dîa dîyɛɛi, ‘Lii-see é kɛ́ kâa’ nyíi va pɔ̂ri lii-see tɛɛ̂i dí pɔi.

¹⁵Tãi dí kɛ̀ m̀ɛni nyɔ́mɔɔ-ŋai kɛ̂i lai, dífe kɛ́ ní a díkpaaŋɔɔ a dɔnɔ kpîŋ. Ŋumɛ fé dísoŋ ní a dɔnɔ kpîŋ. M̀ɛni ma, ŋá pâi ńii ŋwânai dîa a tãi ŋa pâi dí kula maa kɛ̂i lai. Ŋa pâi díyee mɛi ɣâlei. Ńyãa Yâwɛɛ ƃé mò tí.”

¹⁶Yâwɛɛ è mò ǹyɛɛi, “Ka tɔɔ bere tãɣaŋ lá ká wɔ́lɔ-wɔ́lɔi tí maa tûa-perei maa mare kɛ́ɛ kɛ́, ƃɛ́i tûa-pere lɛ́lɛɛ káa naai a gɛɛ kátûa tí, nyíi pâi gɛ̂i ká fii-tɔɔ sɔlɔ ƃó ká mɔ̂leŋ maa mɛ̂ni mai.” Kɛ́lɛ dí mò dîyɛɛi, “Kúfe pâi kúwoli tɔɔ̂i yâ.”

¹⁷Ŋá núu da tɔ̀ɔ a gɛɛ é dímɛi káa. Ŋá mò dîa ńyɛ̂ɛi, “Ka káwoli tɔ́ɔ dúru-wooi ma.” Kɛ́lɛ dí mò dîyɛɛi, “Kúfa pɔ̂ri kúwoli tɔɔ̂i.”

¹⁸Nya ƃe Yâwɛɛ è mò ǹyɛɛi, “Ka káwoli tɔ́ɔ káai a ǹɔii-ŋuŋ kpulu-ŋai, ka káwoli tɔ́ɔ káai a ǹúu-kpului, ká m̀ɛnii mɛ́ni ŋa pâi gɛ̂i a diai.

¹⁹Óo ǹɔii, ye íwoli tɔ́ɔ. Ŋa pâi mɛni kpɔ̂lu lâai ǹûai ŋí dîa m̀ɛni nyɔ́mɔi dí gɛ̀i maa mɛ̂ni ma. Kpɛ́ni fêi dífe díwoli tɔ̀ɔ ní ŋ́oo ma. Ǹyaŋ da díyee kúla ŋátɔ̂ŋ mu.

²⁰Ŋ́gbaaŋɔ̂ɔi ká kéreŋ-sɛŋ kúŋ-nɛ̃ɛ-ŋai ká kùla a dîa Siƃai dímɛni ma da zɛŋ kúŋ nɛ̃ɛ-ŋai ka bù kámii-sãai ma nyíi-ŋai ká kùla a dia lɔii su kôya-ŋa sui? Vé tí a dɔnɔ kpîŋ. Ńyee fé kákereŋ sama-sãai dɔnɔ kpîŋ mu. Ká sâla-ŋai dífa tela ńii làa.

²¹M̀ɛni ma, ŋa pâi ǹûai ŋí perêi kpáaŋ sɛŋ lâai díŋɛi túɛ nyíi da pâi karênii lai. Ǹaŋ-nuui da ǹóŋ-surɔŋ, núu-naa kɔlɛ ma-nuui da ǹâoi, díkelee da pâi saâi.”

²²Yâwɛɛ è mò ǹyɛɛi, “Ka gáa, kɔkuluƃa-ŋa díkaa kulâi yá-ŋua pere. Lɔii ŋuŋ kɛ́tɛ da a gbîŋ kpɛtɛ̂i kpɔ́ kwaa kôyaa ma ŋ̀éniɛi su.

²³Da díkerâŋ-ŋai da díkpala-ŋai síɣe. Dí ŋwana lɔ̂ɔi, dífa núu ŋɛ́i malôŋ kàa. Dí sia-tîŋ káa yɛ̂ɛ yúo too tîŋ. Díkaa seêni dísoo-ŋai mɛi dí kɛ̀ pà a gɛɛ dí kɔ́ pɛ́lɛɛ yá Zerusâlɛŋ yâ.”

²⁴Zerusâlɛŋ-ƃelai dí mò dîyɛɛi, “Kwa dímaa-tuŋ mɛni, kúyee a yeŋ a kûa. Kwa yaôi kpɔ́ dîa a ŋánaa. Sɛŋ sôli maa a kúsoŋ yɛ̂ɛ nɛnî ƃé koi têe su.

²⁵Káfe lì gbâlaŋ ŋá, kpaa ká lɛ́ɛ berei ma, kpɛ́ni fêi, ƃóa-sɔ̂kpɔ káa kúkpɔara-ƃelai yêei, mɛni kpɔ̂lu kɛ́ ƃò ƃéla kélee ma kú mɛni ma.”

²⁶Yâwɛɛ è mò ǹûai dîa ǹyɛɛi, “ŋánûa, ka seɣe sâa too kâa ká tóo ǹuui sú kákɛ kɔ̀-kɔ. Ka malôŋ see ƃó yɛ̂ɛ núu ǹóŋ-surɔŋ tɔnɔ à sàa. Ká wɔ́lɔ a ŋánaa, kpɛ́ni fêi, diai pâi ká paâi, díkaa nâa kákɔlɛ ma.

²⁷Zɛlemaya, ŋánûai kɔ̂ɔŋ yɛ̂ɛ berei ya kɔli kɔ̂ɔŋ la a gɛ̀ɛ í dímaa kpɛ́ɛ, í dítûa-pere kɔ́lɔŋ.

²⁸Díkaa a tɔɔ mâ-ƃela wôlii kpɔ́lɔɔ. Díkɛ lóno nyɔ́mɔɔ kɛ̀ é pîlaŋ ḿâ. Díkaa yɛ̂ɛ ƃara da kɔli. Díkelee kpɔ́ da tûa a wôya-pere.

²⁹Da vulɛi fɛ̂ɛi kpɔ́ a ŋánaa. Vooḿâi a séɣɛŋ ŋɔŋ ŋá. Dífe sɛŋ da kula ní gɔlii su. Kpɛ́ni fêi, ŋ̀wana lɔ̂ɔ-ƃelai dífe niî kula ní naa.

³⁰Da kɛ dîa káne nyíi núu a ǹyée kula mui, kpɛ́ni fêi, Yâwɛɛ a ńyee kula dímu.”