Read Kpelle Izikiɛ 1 Bible Online

Izikiɛ 1 - Kpelle bible

Izikiɛ 1

¹Ńyãa Izikiɛ, ŋ́gaa a sâla láa-soŋ nûu. Ńâŋ láa ƃa Buzi. Tãi kwa ḿarâa kɔ-soŋ-ŋai kú wɔ́lɔ kɛ̀ la Siƃa Ya-leei kɔlɛi, Ɣâla è lòno ḿbɔ. È kɛ̀ a kúkɛɛ gɔ-soŋ perei sui ŋɔkóraŋ buu-saaƃai, ŋɔŋáloŋ ǹáaŋ ŋɔfólo lɔ́ɔlu ɣele. Góraŋ ŋí ƃé Gâloŋ Zɛoasiŋ kɛ̀ la a kóraŋ lɔ́ɔlu gɔ-sôŋ laai su. Tãi ŋí ƃé ŋ̀ele-kɔlɔŋ láa è ƃò la ŋá zĩ̂a-ŋa káa gɛ́ pìlaŋ Ɣâla ma. Tãi ŋí yée mu, kúkɛ Siƃa Ya-leei kɔlɛ Babelɔŋ lɔii su. Yâwɛɛ è kɛ̀ ḿbôlu a m̀aa tãi tí.

⁴Tãi ŋá kɛ̀ tɔɔ̂i lai, ŋá fãa kɛ́tɛ da ɣele kɔ̂lɔŋ kole kàa gɛ̀ kùla yá-ŋua pere. È kɛ̀ kpɔ́ a m̀aa pɔlɔ-pɔlɔɔ ŋɔŋ lêŋ kɛ́ kùla zu m̀aa ponoɔɔ dínaŋɔɔ ma. Ǹyaŋ sɛŋ da è kɛ̀ ŋɔŋ lêŋ su gɛɛ yɛ̂ɛ ƃara gɛ́ fòlo kpɔ́ a ŋanaa.

⁵Nya ƃe ŋá ŋ̀ele kɔ̂lɔŋ kolei su kàa ŋá sãâ fulu náaŋ káa naa. Zãâi ŋí kɛ́ pere è kɛ̀ yɛ̂ɛ núu-kpune.

⁶Kɛ́lɛ zãâi ŋí dɔnɔ ŋɛ́i è kɛ̀ ŋuŋ m̀éla naaŋɔɔ ma. Díkoôŋ è kɛ̀ dîa náaŋ-nàaŋ.

⁷Zãâi ŋí kɔ́ɔ-ŋai dí kɛ̀ kpɔ́ a dísãa. Kɛ́lɛ díkɔɔ-ŋai dí kɛ̀ yɛ̂ɛ niŋa-lônii sôlo díkɛ fòlo kpɔ́ yɛ̂ɛ ƃara ƃé fôloi ŋɔŋ-ŋa.

⁸Díkoôŋ ǹaaŋɔɔ mu, díyee è kɛ̀ naa tɛi-tɛ́i gɛɛ yɛ̂ɛ núu yêe. Ǹyaŋ díkelee díŋɛi da díkoôŋ è kɛ̀ dîa náaŋ-nàaŋ.

⁹Díkoôŋ è kɛ̀ a bîlaŋɔɔ díkîe-ni dîa. Díkelee díkɛ̀ liî díŋɛi téniŋ ma pere dí ta fa tînaŋ m̀éla da kpɛ́ni ma pere.

¹⁰Díkelee díŋɛi è kɛ̀ yɛ̂ɛ núu, dítuɛ pere. Dílaa-mii yee mɛi pere ŋɛi è kɛ̀ yɛ̂ɛ yala-sûlu. Dí kɔ́ɔ-yee mɛi pere ŋɛi è kɛ̀ yɛ̂ɛ niŋa sîrɛ, díkpôlu-pere ŋ̀ɛi kɛ̀ ƃò yɛ̂ɛ kuɛ.

¹¹Ǹyaŋ bere ƃé díkelee díŋɛi kɛ́ pere è kɛ̀ la a tɛɛ-ŋa. Zãâi ŋí dɔnɔ è goôŋ veerɛ fùloŋ é zee gîe ma díkɛ kooŋ la. Kɛ́lɛ dí díkpono mɛi pɛ̂lɛ a díkoôŋ veerɛi kpéli.

¹²Díkelee kpɔ́ díkòoŋ díteniŋ ma père díkɛ lì ƃɛ́i kélee mɔ̃lêŋ è kɛ̀ liî naai. Da kâa lì nɔ́ ƃɛ́i kélee da ŋ̀wɛli dí lí naai dífa tînaŋ.

¹³Ǹyaŋ sɛŋ-da è kɛ̀ lênii yɛ̂ɛ kpáleŋ-soŋ gɛ́ pà zãâi ŋí sâmai gɛ́ pere kɛ́ ƃò yɛ̂ɛ ŋɔŋ-teŋa-ŋa ƃé lénîi. Ŋ̀ɔŋ ŋí è kɛ̀ kpɔ́ fôloi a ŋáŋanaa. Ŋ̀ele gbâna ŋɔmãla-mãla kɛ́ kùla ŋɔŋ su.

¹⁴Gɛɛ tíi goôŋ-sãa náaŋ ŋí díkɛ̀ liî tuɛ-pere da pôlu-pere yɛ̂ɛ ŋ̀ele gbâna ŋɔmãla-mãla.

¹⁵Ǹaa kɛ́ɛ tíi, tãi ŋá kɛ̀ goôŋ-sãa náaŋ kâai lai, ŋá káraŋ-ŋa kàa goôŋ-sãai kɔlɛ tɛi-tɛi ǹɔii mâ.

¹⁶Gáraŋ-ŋai díkɛ̀ kpɔ́ fôloi díkpãle kɛ́ tàa yɛ̂ɛ ŋɔŋ-kpã̂le. Díkelee kpɔ́ díkpɛtɛ pêre è kɛ̀ nɔ́ a zîi tɔnɔ. Gáraŋ-ŋai ŋí zoláŋ-ŋa díkɛ̀ zu.

¹⁷Tãi díkelee da kâa kɛ̀ kilîŋ nii lai, díkelee da kâa lì nɔ́ ƃéla kélee ma pere díta fá tînaŋ.

¹⁸Gáraŋ náaŋ ŋí wóli lá è kɛ̀ m̀a. M̀ɛi è kɛ́ kpɔ́ a gôyaa a mĩli-mĩli pere. Ŋ̀ɛ́i-gao è kɛ̀ a dínaŋɔɔ bîlaŋɔɔ gîei.[1]

¹⁹Ƃɛ́i kélee goôŋ-sãa náaŋ a kâa kɛ̀ liî naai, nàa nɔ́ ƃé gáraŋ náaŋ a kâa kɛ̀ liî naa. À kɛ̀ goôŋ-sãa náaŋ da kɛ̀ tɛ̂i ŋ̀elei su, gáraŋ náaŋ dia máŋ da kɛ̂ nɔ́ tɛ̂i ŋ̀elei su.

²⁰Ƃɛ́i kélee mɔ̃leŋ a kɛ́ liî naai, nàa nɔ́ ƃé goôŋ-sãa náaŋ da gáraŋ náaŋ da kâa kɛ̀ liî naa, kpɛ́ni fêi goôŋ-sãa náaŋ ŋí ŋɔmɔ̃leŋ è kɛ̀ gáraŋ náaŋ sáma.

²¹À kɛ̀ goôŋ-sãa náaŋ da kɛ̀ liî, gáraŋ náaŋ-ŋai dia máŋ da kɛ̂ liî. Goôŋ-saa náaŋ da kpèra, gáraŋ náaŋ-ŋai dia máŋ da kpêra. Goôŋ-sãa náaŋ-ŋai da tɛ̀ ŋ̀elei-su, gáraŋ-ŋai dia máŋ da tɛ̂ ŋ̀elei-su. Kpɛ́ni fêi goôŋ-sãai dímɔ̃leŋ è kɛ̀ gáraŋ su.

²²Nya ƃe sɛŋ da è kɛ̀ goôŋ-sãai mɛi-pere gɛ́ ƃò yɛ̂ɛ ŋ̀ele kɔ̂lɔŋ. È kɛ̀ kpɔ́ fôloi gɛ́ kɛ̀ yɛrɛŋ-yɛrɛŋ yɛ̂ɛ núu a ŋɔŋ lêŋ pìlaŋ kɔ́lɛ-kane ma bɛ́lɛɛ díŋuŋ mɛi.

²³Ǹyaŋ díkoôŋ è kɛ̀ a vúloŋɔɔ bîlaŋɔɔ gîe ni dîa ŋ̀ele kɔ̂lɔŋ-mu. Goôŋ-sãai kélee díkɛ̀ a díkpono mɛi pɛlɛɛ a díkoôŋ veerɛ-feerɛ.

²⁴Tãi díkɛ̀ koôŋ ni lai, díkoôŋ su tìŋ è kɛ̀ tɛ̂i yɛ̂ɛ Yuo too tîŋ, kpaa máŋ yɛ̂ɛ Ŋ̀wála-wâla-kelee Ɣalai wóo, kpaa máŋ yɛ̂ɛ kɔkûluƃa kpulu kɛ́tɛ kɔ́ɔ mu tìŋ. À kɛ̀ da tɔ̀ɔ tɔ̀ŋ, da díkoôŋ yèŋ a dia.

²⁵Nya ƃe wóo è kùla ŋ̀ele kɔ̂lɔŋ mɛi-pere nyii kɛ̀ díŋuŋ mɛi perei. Tãi da kɛ̀ koôŋ nii lai, da díkoôŋ yèŋ a dia.

²⁶Ǹyaŋ sɛŋ-da è kɛ̀ yɛ̂ɛ kâloŋ sèe-sɛŋ gɛ́ ƃò ŋ̀ele kɔ̂lɔŋ nyii kɛ́ díŋuŋ mɛi, m̀ɛi-pere. Zee-sɛŋ ŋí é kɛ̀ a gbɛtɛɛ a kɔni bûluŋ kɛ́ɛ sɔ̃ɔ kpanaŋɔɔ. Zɛŋ nyii kɛ̀ seê ni zɛŋ-kɛɛ yɛ̂ɛ kâloŋ-see-sɛŋ ŋai, gɛ́-pere è kɛ́ yɛ̂ɛ núu-kpune.

²⁷É síɣe záma é tɛ́ è kɛ̀ kpɔ́ fôloi yɛ̂ɛ ƃara nyii ŋɔŋ káa zui. É síye ǹaa mu-pere é yéŋ è kɛ̀ kpɔ́ yɛ̂ɛ ŋɔŋ gɛ́ fòlo kpɔ́ dínaŋɔɔ ma.

²⁸Gɔlɛ mâ è kɛ̀ kpɔ́ a bonoɔɔ dínaŋɔɔ ma yɛ̂ɛ berei tí gbeimɛ̂lɛ a kɛ̂ fôloi la a tuna yâ ɣelei. Bere ƃé Yâwɛɛ ŋɔfólo-laai ŋɔkɔɔŋ maa è kɛ̀ la. Nya ƃe tãi ŋá gàa lai, ŋá ŋuŋ mâ pìlaŋ. Nàa kɛ̀ɛ tíi, ŋá núu da wóo mɛ̀ni gɛ́ lòno ḿbɔ.