Read Kpelle Izikiɛ 12 Bible Online

Izikiɛ 12 - Kpelle bible

Izikiɛ 12

¹Yâwɛɛ è lono ḿbɔ ǹyɛɛi,

²“Núu-kpune ǹóŋ, íkaa tɔɔ-mâ ƃela sama. Díŋɛi káa dîa, kɛ́lɛ dífa kwaa kâa. Díwoli káa dîa, kɛ́lɛ dífa mɛni mɛ̂ni. Kpɛ́ni fêi díkaa a tɔɔ-mâ kɛ́ ƃela.

³“M̀ɛni ma, núu-kpune ǹóŋ, ye ítiyɛ̃i tolo yɛɛ kɔ-sôŋ ǹuu, í pɛlɛ liî sia mâ yɛɛ núu ƃe liî kɔ-sôŋ sia mâ gbínii é lɛɛ pâi toôi. Ǹɛɛ naa díkelee díkɛ íkaa íkɛli. Kɛ́ liî kwaa ŋa m̀a íkɛ pá díkɛ íkaa. Tãi ta dɔɔ-mâ kɛ ƃelai tí da pâi tarêi m̀ɛnii su íkaa gɛi su.

⁴Ítyɛ̃i tolo díŋɛi a kwaa ponoɔɔ a gɛɛ dí íkaa í ǹɛɛ naa díkɛ íkaa íkɛ lí yɛɛ núu ƃe liî kɔ-sôŋ sia m̀a. Lí a Ŋ̀ele-wâlai, ípa pôlu a ŋ̀ele-wulii tãi.

⁵Ye loa têe ípɛrɛ kaŋ su í ítiyɛ̃i siɣe í kula la naa íkɛ li. M̀ɛnii ŋí kɛ́ ǹûai kélee ŋ̀ɛi.

⁶Ye ítiyɛ̃i tɛ́ íkaraŋ-ŋa ǹûai ŋ̀ɛi íkɛ li gbínii su. Yâ kɛ liî, ye íŋɛi mɛi pɛlɛ ífa la ǹɔii káa la ya kulái zui. M̀ɛnii ŋí yâ pâi kɛ̂i gɛi, káa a ŋɛi-kɛ-maa maa Eezuɛ-ŋai maa mɛ̂ni ma.”

⁷Nya ƃe ŋá gɛ nɔ yɛɛ berei Yâwɛɛ è mò la mai. Ŋá ŋa tiyɛ̃i tolo voloi-ŋa yɛɛ kɔ-sôŋ ǹuu ŋɔtiyɛ̃i. Ŋele-wulii tãi kɛ́ɛ a serii, ŋa loa têe bɛrɛ-kaŋ su a ǹyée, ŋá lí gbinii-su ŋatiyɛ̃i kɛ ƃo ŋgaraŋ-ŋa díkɛ ŋ́gàa.

⁸Bolu ma Ŋ̀ele-wâlai, Yâwɛɛ è lono ḿbɔ, ǹyɛɛi,

⁹“Núu-kpune ǹóŋ, tãi Eezuɛ-ƃelai ŋí díkaa a tɔɔ-mâ kɛ ƃelai da í marê kɛ́i la lé mɛni ƃe yâ gɛi,

¹⁰m̀ó dîa yɛɛi, ‘M̀ɛnii ŋí ƃe Ŋ̀wála-wâla kélee Yawɛɛi a mòi é pîlaŋ Eezuɛ-ŋai láa-tuɛ ƃelai da diai kélee díkaa Zerusâlɛŋ dîa.’

¹¹M̀ó dîa yɛɛ m̀ɛnii ŋí káa a ŋ̀ɛi-kɛ maa ká maa mɛni ma. Bere ŋí ŋa tuai lai bere ƃe a pâi kɛ̂i la a dîa. Da pâi liî a dîa a kɔ-sôŋ-ŋa luɛ-laa su.

¹²Ǹuu-laa-tuɛ ƃelai nyii ŋai díkaa dílaa-tuɛi da pâi dítiyɛ̃-ŋai siɣei a kpini dí dɛ díkaraŋ-ŋa díkɛ lì. Da pâi loa teêi dípɛrɛ-kaŋ ŋai su dí tɛɛ naa gɛ̀ lí. Da pâi díŋɛi mɛi pɛlɛi a gɛɛ dífa la ǹɔii kàa ƃɛɛi dalîi naai.

¹³Kɛ́lɛ, ŋa pâi ŋá deŋai pɛlɛɛ̂i dím̀ɛi díkɔ la yɛ̂ɛ ƃarei. À kɛ̀ tí, ŋa pâi pâi dia Babelɔŋ lɔii su nyii gáa a Kadiɛŋ ŋai pɔɔi. Da pâi lɛɛ̂i naa dísaa, kɛ́lɛ dífe pâi ǹɔii tí su kaai.

¹⁴Ŋa pâi ŋɔtíi-kɛ ƃelai kélee da ŋɔkɔ-kuluƃa-ŋai kélee kpɔ́ taa-taai díkɔlɛ ma lɔii-ŋuŋ-ŋai su. Ŋa pâi díkpɛi a ƃóa-sɔ̂kpɔ kuláa daâi.

¹⁵“Tãi ŋa pâi dítaa-taai la ǹɔii-ŋuŋ da kpɛ́ni ŋai kélee sui, m̀aa tãi ƃe da pâi gɔlɔni la a gɛɛ ńyãa ƃa Yâwɛɛ.

¹⁶Kɛ́lɛ, ŋa pâi díkpulu-loŋ lɛɛ̂i a dífulu nyii-ŋai dífe pâi lɛɛ̂i ƃóa-sɔ̂kpɔ yée mu, ǹyaŋ puru da kɔlɔ-fela fé pâi dípâai. Dîa ƃe pâi lɛɛ̂i ŋ̀ele mâ a gɛɛ dí dísɔnyɔ̂ŋ-ŋai ƃó ǹɔii-ŋuŋ ŋai sama ƃɛɛi da pâi liî naai. À kɛ̀ tí, da pâi ŋ́gɔlɔni a Yâwɛɛ.”

¹⁷Ǹaa kɛ́ɛ tíi, Yâwɛɛ è ŋɔ́nɔ lòno ḿbɔ ǹyɛɛi,

¹⁸“Núu-kpune ǹóŋ, yà kɛ ílaa miî, kɛ kpɛ̃lini. Yà kɛ íkpelei, kɛ yoai íkɛ tumo-tùmo.

¹⁹M̀o ǹûai dîa díkaa Zerusâlɛŋ Eezuɛ lɔii sui, Ŋ̀wála-wâla kélee Yawɛɛi ǹyɛɛi ka pâi kɛ̂i kálaa miî kákɛ yao kákɛ kpɛ̃liŋ. Ka kɛ̀ kákpelei kákɛ tumo-tumo. Kpɛ́ni fêi dílɔii a pâi lɛɛ̂i a vólo. Da pâi zu-sãa kélee kpɔ́ siɣei a wála-wala laa, kpɛ́ni fei diai lɛ̀ɛ naai díŋwana-lɔ̂ɔi.

²⁰Daa-leei ŋai nyii kélee kpɔ́ ǹáa fɛɛi a pâi lɛɛ̂i a volo. Ǹɔii a pâi lɛɛ̂i bûŋ. À kɛ̀ tí, da pâi gɔlɔni a gɛɛ ńyãa ƃa Yâwɛɛ.”

²¹Yâwɛɛ è lono ḿbɔ ǹyɛɛi,

²²“Núu-kpune ǹóŋ, lé mɛni ƃe ǹûai da zã́ŋ tɔnɔi ŋí sɔ̂ɔi la a tãi kélee é pîlaŋ la Eezuɛ lɔii mai? ‘Tãi támaa yée mu, lé ƃe kɛ̀ m̀ɛni-ŋai da môi ŋ̀aa sèe fa kɛ̂i?’

²³M̀o dîa m̀ɛnii ńyãai Ŋ̀wála-wâla kélee Yâwɛɛi ŋ̀a mòi diai. Ŋa pâi zaŋ-wooi ŋí kperâi. Dífe ŋɔ́nɔ pâi da ƃoi Eezuɛ lɔii-ŋí su. M̀o dîa a gɛɛ tãi aâ seri a gɛɛ m̀ɛni-ŋai ŋí ŋa-see é kɛ.

²⁴“Kpɛ́ni fêi núu da fa ŋɔ́nɔ lɛ́ɛ zĩ̂a kàa, kpaa máŋ núu da é nûa lii-laa ɣâla-woo ƃó Eezuɛ lɔii ŋí su.

²⁵Ŋ̀wála-wâla kélee Yâwɛɛi è mò ǹyɛɛi, ‘Kɛ́lɛ, ńyãai Yâwɛɛ, ŋa pâi m̀ɛnii ƃoi nyii ŋa-see a pâi kɛ̂i. Ǹyaŋ ḿve ŋɔ́nɔ pâi tãi su-koyaa siɣei ŋ́gɛ m̀ɛni-ŋai su tôo. Ŋa pâi mɛni-ŋai su tôoi a tãi kákaa nîi la ŋ̀ele mai. Káai a dɔ̀ɔ-mâ ƃelai, ŋa pâi m̀ɛnii kɛ̂i a káa ŋá mòi.’ ”

²⁶Yâwɛɛ è ŋɔ́nɔ lôno ḿbɔ ǹyɛɛi,

²⁷“Núu-kpune ǹóŋ, Eezuɛ-ŋai da gaai yɛɛ sɛŋ ƃe zĩ̂ai í gaai da ŋ̀âla-wooi í mò diai gáa tãi su-koyaa mɛni ma.

²⁸M̀ɛni ma ye mò dîa a gɛɛ ńyãai ƃa ŋwála-wala kélee Yâwɛɛi ŋa mòi dîa a gɛɛ m̀ɛni-ŋai ŋa mòi diai ŋa-see a pâi kɛ̂i tãi kpua yée mu. M̀ɛnii nyii kélee ŋa mòi diai ŋa-see a pâi kɛ̂i. Ńyãai a ŋ̀wála-wala kélee Yâwɛɛi, ńyãa ƃe mò ti.”