Read Kpelle Izikiɛ 18 Bible Online

Izikiɛ 18 - Kpelle bible

Izikiɛ 18

¹Yâwɛɛ è ŋɔ́nɔ lono ḿbɔ ǹyɛɛi,

²“Zaŋ ŋí yà zɔɔ é pîlaŋ Eezuɛ mai zukulâi ƃa lé? ‘Ǹáŋ-ƃelai dí gbɔmɔ-ƃa kponai mii, kɛ́lɛ ǹîa-pɛlɛɛi ƃe dínyiŋ-ŋa è kpona.’

³“Káfe pâi ŋɔ́nɔ zã́ŋ ŋí sɔɔ̂i Eezuɛ, ńyãai a ŋ̀wála-wâla kélee Ɣalai Yâwɛɛi ƃe mò tí.

⁴Ǹúui nyii kélee kpɔ́ gáa ɣele mai, gáa a ḿbɔɔ, é máŋ kɛ́ a ǹaŋ-nuu kpaa máŋ ǹoŋ-nuu, díkelee díkaa a ḿbɔɔ. Ǹúui nyii kélee pâi sɔnyɔ̂ŋ kɛ̂i, a pâi saa tí-ti ƃoi.

⁵“A kɛ̀ núu da káa naa nyii deniŋ ƃɔɔi, zãa, gɛ dɔ̂ŋ mɛi kâa,

⁶a kɛ vé sâla kula ní ǹyéei tôŋ su kpaa máŋ é Eezuɛ ŋɔɣâla-pɔɔkɔŋ-ŋai fɛli, vé lɔ-pɔ̂rɔŋ kɛ́ ní a m̀arâŋ-nuu ŋɔnɛnî, kpaa máŋ vé ǹɛnîi nyii gbaaŋɔɔi marê kɛ ni lɔ-pɔ̂rɔŋ kɛ́ mɛ̂ni ma,

⁷vé núu da kélee fili ni, kɛ́lɛ é ǹûai nyii è kpa soŋ diai dí kpa-ŋai kélee tee, va ŋuma kɛ, gɛ mii-sɛŋ tɛɛ diai puru káa diai pɔ, gɛ seɣe tɛɛ diai seɣe fé diai pɔ,

⁸a kpa pili va geni pɛlɛ ma, ńyee fé mɛni nyɔmɔɔ sîi da su, gɛ ǹûa loai kpɛtɛ a teniŋ ƃo pere,

⁹gɛ ŋáɔɔ̂i tɔ̂ŋ mɛi kâa, gɛ sia a ŋatɔ̂ŋ lá-woo. M̀aa ǹúui tí káa a teniŋ ƃo nuu vé pâi saâi.” Ńyãai a Ŋ̀wála-wâla kélee Yâwɛɛi, ńyãa ƃe mò tí.

¹⁰“Kɛ́lɛ a kɛ a lóŋ-surɔŋ maa sɔlɔ ƃo nyii gáa a ŋuma-nuu, gɛ ƃo a núu paa ǹúu,

¹¹gɛ mɛni nyɔmɔɔ-ŋai kɛ̀ nyii ǹâŋ fé gɛ̀ ni, gɛ sala kula ǹyée-ŋai tôŋ su, gɛ ƃo m̀araaŋ-nuui ŋɔnɛnî pôlu,

¹²gɛ ŋwana-lɔɔ tua kɛ a golo-ƃelai da diai sɛŋ da fé díyeei gɛ ƃo a ŋuma-nuu, da sɛŋ da sèe ǹyêei a kpɔ̀ma, da maa têe va dɛɛ va dɛɛ pôlu. Gɛ́ ŋâla-pɔɔkɔŋ ŋai fɛli, gɛ́ mɛni nyɔmɔɔ támaa kɛ,

¹³a kpa pili gɛ geni pɛlɛ m̀a, ǹúu-sĩi ŋí a pɔri kɛ̂i ɣele ma? Kpao! Va pɔri lɛɛ̂i ɣele ma. Kpɛ́ni fêi a m̀ɛni nyɔmɔɔ ŋai ŋí kɛ́. A pâi saa ti-ti ƃoi gbɔɔ sɔnyɔ̂ŋ su. Vé pâi sâai a núu da ŋɔsɔnyɔ̂ŋ.

¹⁴“Kɛ́lɛ a kɛ ǹúui ŋí a lóŋ-surɔŋ maa sɔlɔ ƃo nyii pâi ǹâŋ ŋɔsɔnyɔ̂ŋ ŋai ŋí kaai é yao vé da kɛ́ ní,

¹⁵a kɛ vé sala kula ní ǹyée-ŋai tôŋ su, kpaa máŋ é Eezuɛ-ŋai díɣâla pɔɔkɔŋ-ŋai da fɛli, a kɛ vé lɔ-pɔ̂rɔŋ-kɛ́ ni a m̀araaŋ nuui ŋɔnɛnî,

¹⁶vé mɛni nyɔmɔ da kɛ́ ní a m̀araaŋ nuu da, da kpɔ̀ma see ńyeêi da maa têe a dɛɛ pôlu namu pɔ, vé a ŋuma-nuu, kɛ́lɛ gɛ́ mii-sɛŋ tɛɛ diai puru káa diai pɔ, gɛ́ seɣe tɛɛ diai seɣe fé diai pɔ,

¹⁷ǹyee kuláa mɛni nyɔmɔɔ-sîi kélee su, a kpa pili va geni pɛlɛ ma, gɛ́ ŋátɔ̂ŋ ŋai mɛi káa gɛ́ sia a díwoo, vé pâi sâai a ǹâŋ ŋɔsɔnyɔ̂ŋ su. A pâi lɛɛ tí-ti ƃôi ɣele ma.

¹⁸Kɛ́lɛ mɛni a kpera ǹâŋ ma, nyii kɛ̀ a fili-nuui, kɛ̀ ŋuma kɛ̂i, gɛ́ mɛni nyɔmɔ kɛ̀ ŋɔnûai samai, ǹyaŋ a pâi saâi ŋɔsɔnyɔ̂ŋ è gɛi m̀ɛni ma.

¹⁹“Kɛ́lɛ ka pâi mòi kaai, ‘Lé ƃe kɛ ǹoŋ-nuui fé mɔ̃lɛ ni ǹâŋ ŋɔmɛni nyɔ́mɔɔi maa mɛ̂ni mai?’ A kɛ ǹoŋ-nuui è teniŋ ƃô tua kɛ́, ǹyaŋ gɛ ŋatɔ̂ŋ ŋai mɛi káa a ǹɛ́lɛɛ, a pâi lɛɛ tí-ti ƃôi ɣele ma.

²⁰Kɛ́lɛ ǹuui nyii a sɔnyɔ̂ŋ kɛ̂i a pâi saa tí-ti ƃôi. Ǹoŋ-nuui fé pâi ǹâŋ ŋɔsɔnyɔ̂ŋ maa saa kɛ̂i, kpaa máŋ ǹâŋ-nuui è saa ǹóŋ ŋɔsɔnyɔ̂ŋ su. M̀ɛni lɛ́lɛɛ kɛ́ nuui ŋɔ mɛni lɛ́lɛɛi a pâi kɛ̂i ŋua. M̀ɛni nyɔmɔ kɛ́ nuui ŋɔ mɛni nyɔmɔɔi kɛ ƃo ŋua máŋ.

²¹“A kɛ sɔnyɔ̂ŋ nuu a bôlu tɔɔ ŋɔsɔnyɔ̂ŋ mâ é ŋá tɔ̂ŋ ŋai mɛi káa é sia a teniŋ ƃo pere, a pâi lɛɛ tí-ti ƃôi ɣele ma. Vé pâi sâai.

²²Ǹyaŋ ŋɔ mɛni nyɔmɔɔ-ŋai da kili fé pâi lɛ̂ɛi ŋá. A pâi lɛ̂ɛi ɣele ma ŋɔ mɛni lɛ́lɛɛi maa mɛ̂ni ma.

²³Ká lâai la a lii-nɛ̃ɛ mɛni a gɛɛ ŋá zɔnyɔ̂ŋ-ƃelai káa díkɛ sáa. Kɛ́lɛ ńii a nɛ̃̂ɛ à kɛ̀ ŋa díkàa díkɛ dílii maa fâleŋ a gɛɛ dí lɛ́ɛ ɣele ma.”

²⁴Kɛ́lɛ à kɛ̀ teniŋ ƃô-nuu a kpèra ŋɔteniŋ ƃô-tuai ma é pɛ́lɛ m̀ɛni nyɔ́mɔɔ-sii tɔnɔi kɛ̂i nyii zɔnyɔ̂ŋ nuui è kɛ̀ gɛ̂i, a pɔ̂ri lɛɛ̂i ɣele mâ? Vé tí a dɔnɔ kpîŋ. Ŋɔmɛni lɛ́lɛɛ-ŋai dɔnɔ kpîŋ kili fé pâi lɛɛ̂i ŋá ŋɔmɛni nyɔ́mɔɔ-ŋai è gɛ̀i mɛ̂ni ma. Ǹyaŋ a pâi saa tí-ti ƃôi.

²⁵“Kɛ́lɛ, ká mò kâai, ‘M̀ɛnii ǹuu-namui è gɛ̀i vé lɛ́lɛ ní.’ Káai a Eezuɛ-ƃelai, ka káwoli tɔ́ɔ. Ńdûa-pere fé lɛ́lɛ ní? Káa fé kátua-pere nyɔmɔɔi?

²⁶A kɛ teniŋ ƃo nuu a bôlu tɔɔ ŋɔ teniŋ ƃó tuai mâ é mɛni nyɔmɔ kɛ́, a saa gɛ ni è saa ŋɔtua-pere nyɔ̂ŋ mɛni ma.

²⁷Kɛ́lɛ, a kɛ ŋwana-lɔ̂ɔ nuui a bôlu tɔɔ ŋɔsɔnyɔ̂ŋ mâ nyii è gɛi, é dɔ̂ŋ ŋa-see kɛ́ é tua a ǹɛ́lɛɛ vé pâi saai.

²⁸Tãi nɔ a ŋɔsɔyɔ̂ŋ-ŋai kɔlɔŋ la é bôlu tɔɔ diai, a pâi lɛ̂ɛi ɣele ma. Vé pâi saai.

²⁹Kɛ́lɛ Eezuɛ-ƃelai da mò dîɛi, ‘Nuu-namui tûa-pere fé lɛ́lɛ ni.’ Óo Eezuɛ-ƃela, ńdûa-pere fé lɛ́lɛ ní? Káa fé ká tûa-pere nyɔ̂mɔɔi?

³⁰“M̀ɛni ma ńyãai a Ŋ̀wála-wâla kélee Yâwɛɛi, ŋa pâi ká mɛnii ŋá têei káai a Eezuɛ-ƃelai yɛ̂ɛ berei ká tûa-perei káa la tɛi-tɛ́i. Ka kálii pene ká kápôlu tɔɔ kásɔnyɔ̂ŋ-ŋai dîa a gɛɛ kásɔnyɔ̂ŋ fa lâ ká lɛ́ la.

³¹Ka káyee kúla kásɔnyɔ̂ŋ-ŋai su nyii-ŋai ka gɛ a ńyãai a gɛɛ líi-nina da mɔ̃leŋ nina díkɛ ká kponoi. Lé mɛni ƃe ka pâi saai la kaai a Eezuɛ ƃelai?

³²Ńii fa nɛ̃̂ɛ núu da saa mɛ̂ni ma, m̀ɛni ma, ka kápôlu tɔɔ kásɔnyɔ̂ŋ ŋai dîa a gɛɛ ká lɛ́ɛ ɣele ma. Ńyãai a Ŋ̀wála-wâla kélee Yâwɛɛi ƃé mò tí.”