Read Kpelle Izikiɛ 26 Bible Online

Izikiɛ 26 - Kpelle bible

Izikiɛ 26

¹Ǹûai kɛ́ɛ gɔ-soŋ perei su ŋɔkóraŋ buu-kao tɔnɔi, ŋáloŋ ŋɔfólo m̀aa-ŋuŋ ɣele, Yâwɛɛ è lòno ḿbɔ ǹyɛɛi,

²“Núu-kpune ǹóŋ, Taya-ƃelai da lii-nɛɛ kulâi dîyɛɛi, ‘Zerusâlɛŋ a wólo. Ŋɔsɛŋ-kao tii kɛ́ mɛni-ŋai kélee su a kara. M̀ɛni ma, kú kɛ́-mɛni-ŋai mu a pá siɣêi.’

³“M̀ɛni ma, ńyãai a Ŋ̀wála-wâla kélee Yâwɛɛi ŋa mó a gɛɛ ńdɔɔ̂i nâa Taya ma. Ŋa pâi gɛ̂i lɔii ŋuŋ támaa dí tɔ́ɔ ma. Da pâi tɔɔ̂i ma yɛ̂ɛ berei Yúo ŋɔzikɛ-zikɛ a kɛ̂ pâi lai.

⁴Da pâi Taya ŋɔsiaŋ-ŋai kélee wôloi, dí ŋɔyeŋkêŋ-ŋai kélee wólo. À kɛ̀ tí, ŋa pâi ŋɔlɔii mɛi kɔɔ̂i ŋá ǹaa lɛɛ a fɛ́ɛ ŋá.

⁵A pâi kɛ̂i ǹyuoi sâmai ƃɛ́i yá-kpɛ-ƃela da pâi kɛ̂i dí deyaŋ maa kpâlai naai. Ńyãai ƃa Ŋ̀wála-wâla kélee Yâwɛɛi ńyãa ƃé mò ti. Ǹɔii-ŋuŋ-ŋai da pâi ǹaa sãai siɣêi kɔ́ su.

⁶Da pâi díkelee dí paâi a ƃóa-sɔkpɔ-ŋa dítaa-lee-ŋai su ziŋ-ŋa. Gɛ̀ ní, Taya a pâi gɔlɔnîi a gɛɛ ńyãa ƃa Yâwɛɛ.”

⁷Ŋ̀wála-wâla kélee Yâwɛɛi è mò ǹyɛɛi, “Ŋa pâi liî yá-ŋua pere ŋá pá a Babelɔŋ kaloŋ Nɛbukinaza nyii gáa a kâloŋ kɛ́tɛi. A pâi pâi a kɔ́-kɔ keleŋ-ŋai da kɔ́-kɔ sôo-ŋa é pɛ́lɛ kɔkûluƃa-ŋa dîa nyii-ŋai pâi kɛ̂i siâi díkɔɔ ŋá a gɛɛ é kɔ́ pɛ́lɛ káai a Taya-ƃelai kâa.

⁸Da pâi ká ǹûai nyii-ŋai díkaa ziŋ ŋái paâi a ƃóa-sɔkpɔ-ŋa. Da pâi pɔ̂rɔ-siaŋ tɔɔ̂i dí dínaŋ ká taa-lee kɛ́tɛi ŋɔsiaŋ ma. À kɛ̀ tí, da pâi tínanîi kâa a kpála-ŋa ɣale kɔli kalaŋ-ŋa.

⁹Ŋɔkɔ-kuluƃa-ŋai da-ni da pâi kɛ̂i kásiaŋ lôkwai a wúru-gbua kpanaŋɔɔ da-ni díkɛ ká yeŋkêŋ-ŋai wôlo a kɔli-kpua kpanaŋɔɔ-ŋa.

¹⁰Ŋɔsoo-ŋai da pâi kɛ̂i kpɔ́ a dítamaa díkɔɔ-ŋa muluŋ é ká mɛi pɛ́lɛ. Tãi a pâi tɛ̂i la ká siaŋ sui, ŋɔkɔ-kɔ́-soo-ŋai da ŋɔkɔ-kɔ́-keleŋ-ŋai dítiŋ a pâi gɛ̂i kásiaŋ kɛ́ tùmo-tumo. A pâi ká siaŋ wôloi é tɛ́ daai su.

¹¹Ŋɔsoo-ŋai ƃɔ́rɔŋ-pɔɔ a pâi kɛ̂i ká taai gwaa kélee ma. A pâi ká paâi a ƃóa-sɔkpɔ-ŋa. A pâi ká pɛ́rɛ-yee mu wuru kpanaŋɔɔ-ŋai kélee têei é dóo ǹɔii ma.

¹²Da pâi kátɔɔ-sãai da ká pɔni-sãai siɣêi a dípɔɔ, dí kásiaŋ-ŋai wólo, dí kápɛrɛ lɛ́lɛɛ-ŋai síɣe. À kɛ̀ tí, da pâi kákɔni-ŋai, káwuru-ƃela-ŋai da kásãai nyii-ŋai pâi lɛɛ̂i kélee pilîi ǹyuoi-su.

¹³Ŋa pâi ká kperâi wule toɔ́ɔ ma. Núu da fé ŋɔ́nɔ pâi ká ɣale-sãai da tíŋ mɛnîi.

¹⁴Ŋa pâi ká kɛ̂i a fɛ̃ɛ. Ka pâi kɛ̂i a yá-kpɛ-ƃela dí deyaŋ kpâlai. Káfe ŋɔ́nɔ pâi pɔrîi ǹaa tɔɔ̂i pôlu. Ńyãai a Ŋ̀wála-wâla kélee Yâwɛɛi ńyãa ƃé mò ti.”

¹⁵Ŋ̀wála-wâla kélee Yâwɛɛi è mò Taya ma ǹyɛɛi, “Tãi da pâi íyee mɛi ɣâlei lai, diai díkaa ǹya-leei kɔlɛ mai, da pâi yaôi a kányiɣɛ-woo kà kɛ̀ saâi.

¹⁶À kɛ̀ tí, gâloŋ-ŋai díkaa ǹya-leei kɔlɛi da pâi kulâi díkâloŋ see-sɛŋ-ŋai ŋá dí pîlaŋ dí díkâloŋ-seɣe-ŋai kúla díkɔŋ ma da díseɣe lɛ́lɛɛ-ŋai. Da pâi dí maa ɣirîi a yao dísee ǹɔii ma díkɛ kpɛ̃lîŋ a tãi da pâi ká mɛi tûŋ mɛnîi lai.

¹⁷Da pâi wɔ̂lɔi ká mɛni ma díkɛ mò dîyɛɛi, ‘Daa-lee kɛ́tɛi su a kara! Ŋɔyá-ŋa keleŋ a láŋ ǹyái ŋá. Ǹûai díkaa daa-leei sui dí wála-wala-laai è kɛ̀ ǹyái mɛi. Da ǹyái kɔlɛ mâ-ƃelai maa yâo.

¹⁸Ǹyaŋ tãi è tòo lai, Dîŋ-ŋai díkpɛ̃liŋ, Ǹûai da yao a dísu-kara tîŋ.’ ”

¹⁹Ŋ̀wála-wâla kélee Yâwɛɛi è ŋɔ́nɔ mò Taya ma ǹyɛɛi, “Ŋa pâi ká lɛɛ̂i a bûŋ yɛ̂ɛ taa-pileŋ ŋá ƃɛ́i núu da fa nyîi naai. Ŋa pâi ká mɛi pɛ̂lɛi a yá nyii ŋa pâi gulâi ǹyuoi sui.

²⁰À kɛ̀ tí, ŋa pâi ká tɛɛ̂i zaa-ƃelai dítaai su a gɛɛ ká kɛ́ naa ká ǹúu-pɔlɔ-ŋai. Ŋa pâi gɛi ká kɛ́ ǹɔii mu-pere ɣeniɛi su bileŋ-ŋa wɔ́lɔ-wɔlɔ ka zaa-ƃelai ká kɛ́ lòno. Núu da fé ŋɔ́nɔ pâi seêi kátaa-leei su. À kɛ̀ tí, káfe ŋɔ́nɔ pâi kɛ̂i vúlu-ƃelai sáma.

²¹Ŋa pâi gɛi kákɛ a mɛni-kɔ̂ɔŋ maa nyii ǹûai da pâi yaôi mai. Ǹyaŋ káfe ŋɔ́nɔ pâi kɛ̂i naa. Nûa da pâi ká kɔ̂rii, kɛ́lɛ dífe pâi wɔ́lɔ ká kâai. Ńyãai a Ŋ̀wála-wâla kélee Yâwɛɛi, ńyãa ƃé mò tí.”