Read Kpelle Izikiɛ 28 Bible Online

Izikiɛ 28 - Kpelle bible

Izikiɛ 28

¹Yâwɛɛ è lòno ḿbɔ ǹyɛɛi,

²“Núu kpune ǹóŋ, m̀ɛnii ńyãai a Ŋ̀wála-wâla kélee Yâwɛɛi ŋá môi yâi, m̀ó Taya kâloŋ ma. ‘Kpɛ́ni fêi íŋɛi tɛɛ̂i, yaâ íkpîŋ kɛ́ a ɣâla. Yaâ mò ǹyɛɛi, “Ŋa sêe ŋ̀âla-ŋai sêei ǹyái sâmai. Ya íkili-ŋa siâi yɛ̂ɛ gáa yɛ̂ɛ sɛŋ ƃé ítarei yɛ̂ɛ Ɣâla.” Kɛ́lɛ vé tí a dɔnɔ kpîŋ. Íkaa ŋɔ a núu-kpune.

³Ya gâai yɛ̂ɛ sɛŋ ƃé ítareɛi é tɛ́ɛ Dãya ma nyii mɛni da fa lôo yâ.

⁴Í mɛni-ŋa káai a gɛ́ ya tɔɔ-sãa kɛ́ɛ yɛ̂ɛ gôo da káne sɔlɔ ƃó.

⁵Í táre pɔni-tɔɔ perei a gɛ́ ítɔɔ-laai su a kɛ́tɛ. Ǹyaŋ ítɔɔ-laai a íŋɛi tɛ́.’

⁶“M̀ɛni ma Ńyãai a Ŋ̀wála-wâla kélee Yâwɛɛi ŋa mó ńyɛ̂ɛi, ‘Kpɛ́ni fêi ka mò a gɛɛ ká táreɛɛi yɛ̂ɛ ɣâlai,

⁷ŋa pâi pâi a ŋɔ̃ya-ŋa ŋwana lɔ̂ɔ dí pá díkɔ pɛ́lɛ kâa. Da pâi zãâ-lɛ́lɛɛ-ŋai ká dísɔlɔ ƃô ká táre pɔni-tɔɔi sui su karai.

⁸Da pâi ká paâi ǹyái sâmai. Ǹyái ƃé pâi kɛ̂i a ká ƃolôŋ.

⁹Tãi da pâi pâi la díkɛ ípàai, ya pâi môi nîi yɛ̂ɛ íkaa a ɣâla? Tãi ká paa-ƃelai da pâi pâi lai, ká pâi kɛ̂i nɔ́ a núu-kpune.

¹⁰Ŋɔ̃ya-ŋai da pâi ká paâi yɛ̂ɛ ɣîla-ŋa kpɛ́ni fêi, ńyãai a ŋ̀wála-wala kélee Ɣalai, ńyãa ƃé mò tí.’ ”

¹¹Ǹaa pôlu ma, Yâwɛɛ è lòno ḿbɔ ǹyɛɛi,

¹²“Núu-kpune ǹóŋ, ye zamaŋ wule too m̀ɛni kpɔ̂lui pâi kɛ̂i a Taya Kaloŋ m̀aa mɛ̂ni ma. Mó mà ńyãai a Ŋ̀wála-wâla kélee Yâwɛɛi ŋa môi, Yá ƃé wɔ́lɔ kɛ̀ a teniŋ ƃô laa ŋɔkɔɔŋ maa. Íkɛ̀ a ítareɛɛ, ílɛlɛɛ.

¹³Ípɔ-taai ƃé kɛ̀ a Idɛŋ suai sû, nyii gáa a Ɣâla ŋɔsûai. Ya kâa yɔlɛ tòo íkɔŋ mâ nyii dí gbɛ̀tɛ a kɔni sɔ̃ɔ kpanaŋɔɔ kɛ́ɛ yɛ̂ɛ gɔnii da kɛ̂ ma luƃi, topâai, ƃɛɛlɔ, kameliɔŋ, zasipa, safaya, ɛmɔlɔɔ da gaanɛ. Dí gɔni-ŋai ŋí kpɛ̀tɛ a gôo yɔlɛ imaa mɛ̂ni ma a tãi díwɔlɔ í kpɛ̀tɛ la ŋ̀éniɛi sui.

¹⁴Ŋa ɣâla-taa kooŋ tɛ̀ɛ a gɛɛ é ímɛi káa. Í kɛ̀ ŋáyee maa-waai ma. Í kɛ̀ naa íkɛ sìa kɔni fóloɔɔ-ŋa mɛi.

¹⁵Í sɔŋ fé kɛ́ ní yâ a tãi m̀aa-ŋuŋ íkɛ̀ la ɣele mai é lɛ́ɛ la zu ípɛ́lɛ sɔnyɔ̂ŋ kɛ̂i.

¹⁶Tãi íkɛ̀ pɔni tɔɔ̂i lai, ípɛ̀lɛ ŋwana-lɔɔ tùa da sɔnyɔ̂ŋ kɛ́ɛ ma. M̀ɛni ma, ŋá gɛ̀ í kúla ŋá yée maa-waai ma. Nya ƃe ŋ̀âla-taa kooŋ-sɛŋ nyii kɛ̀ ímɛi kâai è í kpɛ̀ é í kúla gɔni fóloɔɔi mɛi í kɛ̀ tɔɔ̂ni m̀ɛi.

¹⁷Í ŋɛ́i è kɛ̀ a dɛ́ɛ, kpɛ́ni fêi íkɛ̀ a ílɛlɛɛ. Í tuŋ è tàa-taa íkɛ tùa a ƃoo-pere. M̀ɛnii ŋí ƃé gɛ̀ ŋ́gɛ í tòo ǹɔii ma a gɛɛ íkɛ a ŋɛi kɛ́-maa gâloŋ-ŋai mɛ̂ni ma.

¹⁸Í kɛ́ɛ bɔnii tɔɔ̂i, í mɛni nyɔ́mɔ támaa kɛ̀ nyii gɛ̀ í íɣâlai fɛli kwaa-ŋai kélee maa tĩa kara. M̀ɛni ma, ŋá ŋɔŋ tôo yâ a gɛɛ ŋá ǹaa kéreŋ kpɔ́ kpái. Diai kélee da í kàai, da í kàa nɔ́ yɛ̂ɛ luu.

¹⁹Ífe ŋɔ́nɔ naa a dɔnɔ kpîŋ. Íkɛ̀ ɣéniɛi a nâa kpɛɛ. Ǹɔii-ŋuŋ-ŋai kɛ̀ a í kɔ́lɔŋɔɔi da yaôi a gɛɛ m̀ɛnii lâa yâi, da fa lâa láa la dîa.”

²⁰Ŋ̀wála-wâla kélee Yawɛi è lòno ḿbɔ ǹyɛɛi,

²¹“Núu kpune ǹóŋ, ye tínaŋ Sidɔŋ taa-leei mâ pere í ɣâla-woo ƃó é pîlaŋ m̀a,

²²Í mó dîa yɛ̂ɛ Ńyãai a Ŋ̀wála-wâla kélee Yâwɛɛi ńyɛ̂ɛi, ‘Ŋ́gaa a káai kákaa a Sidɔŋ-ƃelai ká kpɔara nûu. Ǹyaŋ ŋa pâi laa-maa tɛ̂ sɔlɔ ƃôi m̀ɛnii ma ŋa pâi gɛ̂i a káai mɛ̂ni ma. À kɛ̀ tí, da pâi gɔ́lɔnîi a gɛɛ ńyãa ƃa Yâwɛɛ a ŋá maa-waa-laai lɛ́ɛ dîa a díkula maa kɛ́ɛ.

²³Ŋa pâi kɔlɔ-fela pilîi kâa. Ŋa pâi gɛ̂i kákpɔara-ƃela dí kúla kwaa kélee ma dí ká páa a ƃóa-sɔkpɔ-ŋa. À kɛ̀ tí, da pâi gɔ̂lɔnii a gɛɛ ńyãa ƃa Yâwɛɛ.’ ”

²⁴Ŋ̀wála-wâla kélee Yâwɛɛi è mò ǹyɛɛi, “Ǹɔii-ŋuŋ-ŋai dítinaŋɔɔi Eezuɛ mai, da fé ŋɔ́nɔ pâi ɣɛ́lɛ-maa kulâi gbonôi. Kpaa máŋ dítɔɔ m̀a yɛ̂ɛ ŋalêŋ. À kɛ̀ tí, da pâi gɔ̂lɔnii a gɛɛ ńyãa ƃa Ŋ̀wála-wâla kélee Yâwɛɛi.”

²⁵Ŋ̀wála-wâla kélee Yâwɛɛi è mò ǹyɛɛi, “Tãi ŋa pâi Eezuɛ-ƃelai kulâi la ǹɔii-ŋûŋ-ŋai su dítaa tâai naai, ŋá ŋámaa-waa laai maa tɛ́ dísamai, gɛ̀ ní da pâi seêi díkpɔɔi lɔii su nyii ŋá dɛ̀ɛ ńyee mu nuui Zeeka pɔi.

²⁶Ǹyaŋ da pâi kɛ̂i naa ŋuŋ ma ƃô su. À kɛ̀ tí, da pâi pɛ́rɛ-ŋa tɔɔ̂i díkpɔmɔ-ƃa kpalaŋ-ŋa sí. Da pâi kɛ̂i a díŋuŋ mâ ƃóɔɔ a tãi ŋa pâi kɛ̂i díkɔlɛ mâ-ƃelai kula maa kɛ̂i la nyii-ŋai ɣɛ́lɛ maa kûla díkponôi. À kɛ̀ tí, da pâi gɔ̂lɔnii a gɛɛ ńyãa ƃa Díɣâlai Yâwɛɛ.”