Read Kpelle Izikiɛ 31 Bible Online

Izikiɛ 31 - Kpelle bible

Izikiɛ 31

¹Kúkɛɛ gɔ-sôŋ perei su ŋɔkóraŋ buu-kao tɔnɔi, ŋɔŋáloŋ zaaƃai ŋɔfóloi m̀aa-ŋuŋ ɣelei, Yâwɛɛ è lòno ḿbɔ ǹyɛɛi,

²“Núu kpune ǹóŋ, mó Ize kaloŋ da ŋɔnûai kélee dîa, ‘Ká wála-wala laai kɛ̂tɛi. Lé ƃé ŋa pɔ̂ri ká kɔɔ̂ni mai?

³Kákaa yɛ̂ɛ sîda wurii nyii gáa Lɛƃanɔŋ. Ŋ̀oŋo lɛ̂lɛɛi, ǹinîŋ kɛ́tɛ. Gáa a wúru kôyaa é tɛɛ m̀arâŋ wuru-ŋai kélee dîa.

⁴Yá támaa káa naa a gɛɛ é gɛ́ é ƃɔlɔ. A gɔ́nɔŋ sɔlɔ ƃô ǹyá lêei nyii gáa ǹɔii mûi su Da yá tɛ̀ɛ ƃɛ́i ŋ̀úruii káa naa gɛ́ ƃɔlɔi. Díkɛ yá tɛ̀ɛ ƃɛ́i ŋ̀úru-ŋai díkaa naa ŋ̀wolâai sui.

⁵Kpɛ́ni fêi a yá támaa sɔlɔ ƃôi, A ƃɔ̂lɔ é tɛ́ɛ m̀arâŋ wuru-ŋai kélee dîa. Ŋ̀wo-wo a kɛ̂tɛ é táa tâa é tɛ́ɛ m̀arâŋ wuru-ŋai kélee dîa

⁶Ŋ̀ɔni-ŋai díkaa ŋ̀elei sûi da dítaa tɔ̂ɔ zu. Ǹɔɔ-fɛnɛ-sãai díkɛ díkâa ǹinîŋ mu. Ǹɔii-ŋuŋ-ŋai díkaa ŋ̀éniɛi gwaa kélee mai da dífii tɔ̀ɔ ǹinîŋ mu.

⁷È kɛ̀ kpɔ́ a wuru kɛ́tɛ lɛ́lɛɛ, gôyaa kpɔ́ a ŋánaa, ŋ̀wo-wo kélee kpɔ́ kôyaa-koyaa. Zame-ŋai kôyaa-koyaa kpɔ́ gɛ́ yèŋ ǹɔii mu póŋ-poŋ gɛ́ yá ɣala naa.

⁸È kɛ̀ a gɛ́tɛ é tɛ́ɛ sîda wurui mâ nyii kɛ̀ Ɣâla ŋɔsûai sui. Fɛɣɛ-wuru-sĩi da fé kɛ́ ní naa ŋ̀wo-wo ƃóloŋɔɔ mà. Pãai-wurui ŋ̀wo-wo fé kɛ́ ní mà a sɛŋ da. Wuru-sîi da fé kɛ́ ní Ɣâla ŋɔsûai su ǹɛ́lɛɛ é seri bɔ́.

⁹Ŋá gbɛ̀tɛ a ǹɛ́lɛɛ. Ŋá ŋ̀wo-ŋwo táa-tâa. Ŋ̀úru-ŋai kɛ́ Idɛŋ suai sûi nyii gáa a Ɣâla ŋɔsûai díkelee kpɔ́ díkɛ̀ tólo kulâi mà.

¹⁰“ ‘M̀ɛni ma Ńyãai a Ŋ̀wála-wâla kélee Yâwɛɛi ŋa mó ńyɛ̃ɛ, ŋa pâi m̀ɛnii ƃôi yâ nyii ŋa pâi gɛ̂i a ŋ̀úrii nyii dôŋ seriɛ̂i ŋ̀ele-kɔlɔŋ mai. È kɛ̀ ŋ̀ɛ́i tɛ́ɛ kpɛ́ni fêi dôŋ è kɛ̀ a gôyaa é tɛ́ɛ m̀arâai dîa.

¹¹Ŋa pâi ḿbôlu tɔɔ̂i ma ŋá dɛɛ lɔii-ŋuŋ wála-walaa pɔ́. Ǹyaŋ a pâi gula maa kɛ̂i yɛ̂ɛ berei ŋɔtua-pere nyɔ̂ŋ káa lai.

¹²Ŋɔyaai nyii ŋwana-lɔɔi kpɔ́ a ŋánaa a pâi dêei é ǹɛɛ tôoi naa é lí. Ŋ̀wo-wo-ŋai da pâi ɣále-ɣalei dítaa-taa ǹyée-ŋai mâ dítaa tâa ǹyá bôto-ŋai su. Ǹɔii-ŋuŋ-ŋai nyii-ŋai kɛ̀ dífii tɔɔ̂i ǹinîŋ mui díkelee da pâi pûi.

¹³Ŋɔni-ŋai díkaa ŋ̀elei sûi, da pâi pâi dísee gɔ̀ɔ mɛi. Ǹɔɔ-fɛnɛ-sãai dia máŋ da pâi pâi díkɛ sìa ŋ̀wo-wo-ŋai mɛi.

¹⁴M̀ɛni ma, é síɣe tãi ŋí ma é lí tuɛ-pere, wúru sîi kélee da fé nâa pâi kɛ̂i naa nyii dôŋ a pâi tɛ̂i ŋ̀elei su a bere sîi tí. A nɛ̃ɛ ma kpîŋ m̀aa wûrui é kɛ́ yá kɔlɛ ma. Díkelee kpɔ́ da pâi saâi díli saa táa ƃɛ́i núu-kpune a sâa é lí naa ǹôa-kpóŋ kôyaai sûi.’ ”

¹⁵Ŋ̀wála-wâla kélee Yâwɛɛi è mò ǹyɛɛi, “Tãi ŋ̀úruii a pâi yèŋ nîi la saa táai, ŋa pâi gɛ̂i ǹɔii mu-yai é m̀ɛi pɛ́lɛ a ŋɔsaai maa mâloŋ see ƃóɔɔ. Ŋa pâi ǹyá lêei kperâi a gɛɛ ǹyá pɛlɛɛ-pɛlɛɛ-ŋai dífa lâ ɣilîŋ la. Tãi ŋ̀úrui ŋí a pâi saâi lai, ŋa pâi gɛ̂i kpíni é tóo Lɛƃanɔŋ m̀aa mɛ̂ni ma. Ǹyaŋ ŋ̀úru-ŋai díkaa ŋ̀olâi sûi díkelee da pâi kpâlai.

¹⁶Ǹyaŋ tãi ŋa pâi doôi la saa-taai, ǹɔii-ŋûŋ-ŋai kélee kpɔ́ da pâi tûmoi a m̀aa tîŋ tí. Ŋ̀úru-ŋai díkaa Idɛŋ suai sûi da ŋ̀úru lɛ́lɛɛ-ŋai da ŋ̀úru-ŋai nyii-ŋai díkaa Lɛƃanɔŋ da kâa yá támaa sɔlɔ ƃôi, nyii-ŋai da lí saa táai díkelee dílii a pâi nɛ̃ɛ̂i a doo tîŋ.

¹⁷Da dîa-ni díkelee da pâi liî saa táa é pɛ́lɛ diai mâ da saa ǹaa túɛ perei. Diai máŋ kɛ̀ ǹinîŋ mui da pâi táa tâai ǹɔii-ŋûŋ-ŋai sáma.

¹⁸“Ŋ̀úruii ŋí káa a Ize kaloŋ da ŋɔnûai kélee kɔɔŋ maa. Gbɛ̂ɛ ƃé ŋɔfólo laai kɛ̂tɛi yɛ̂ɛ ǹyaa ŋ̀úru-ŋai sáma Idɛŋ suai su? Ŋa pâi m̀aa yenîi saa táa da ŋ̀úru-ŋai díkaa Idɛŋ suai sûi. Ka pâi kɛ̂i diai sáma dífe Ɣâla kɔ́lɔŋ nyii-ŋai dí dípàa gɔ́i sûi. Ńyãai a Ŋ̀wála-wâla kélee Yâwɛɛi ƃé mò tí.”