Read Kpelle Izikiɛ 32 Bible Online

Izikiɛ 32 - Kpelle bible

Izikiɛ 32

¹Kúkɛɛ gɔ-sôŋ perei su ŋɔkóraŋ buu káo feerɛi ŋɔɣáloŋ buu káo feerɛi ŋɔfóloi m̀aa-ŋuŋ ɣelei, Yâwɛɛ è lòno ḿbɔ ǹyɛɛi,

²“Núu-kpune ǹóŋ, ye malôŋ wɔ̀lɔ kɛ́ Ize kaloŋ mâ. Ye ŋ̀orɛ̂-wooi ŋí ƃó mà yɛ̂ɛi, ‘Í íkpîŋ kàa yɛ̂ɛ yala-sulu ǹɔii-ŋûŋ-ŋai sáma. Kɛ́lɛ íkaa yɛ̂ɛ yúo-zele-kali nyii gáa ǹyá lêei sui. Í ǹyái nùnu a íkɔɔ.

³Tãi ǹɔii-ŋûŋ-ŋai da díŋa tɛ́ la díkîe mai, ŋa pâi dí kɛ̂i dí ísoŋ a ŋá deɣáŋ ŋá ítɛ zîŋ ŋá.

⁴Ŋa pâi ítoôi ǹɔii ma ŋá gɛ́ ŋ̀ɔni-ŋai da vɛnɛ-sãai dípa dí í míi.

⁵Ŋa pâi dìŋ-tiŋ-ŋai da ǹyée-ŋai mɛi pɛlɛ̂i a í poma lûulai.

⁶Ŋa pâi gɛ̂i í ŋãa é pú é ǹyée-ŋai mɛi pɛ́lɛ é ǹyá ɣîliŋ-ŋai láa fɛ́ɛ.

⁷Tãi ŋa pâi íkulâi la naai, ŋa pâi ŋ̀ele-kɔlɔŋ mɛi pɛlɛ̂i ŋa gɛ́ bɛ́mɛlɛ̂ŋ-kao-ŋai dífa ŋɔ́nɔ fòlo. Ŋa pâi vóloi mɛi pɛlɛ̂i a ŋ̀ele-kɔlɔŋ kolei. À kɛ̀ tí, ŋáloŋ ǹyaŋ vé pâi fôloi.

⁸Ŋa pâi gɛ̂i gwaa ponoɔɔi nyii kélee gáa ŋ̀elei sûi dífe ŋɔ́nɔ pâi fôloi. Ŋa pâi gɛ̂i kpíni é tóo ílɔii su. Ǹyãai a Ŋ̀wála-wâla kélee Yâwɛɛi ƃé mò tí.

⁹“ ‘Tãi ǹɔii-ŋûŋ-ŋai nyii-ŋai dífe íkɔlɔŋ, da pâi ísu-karai lai, ǹɔii-ŋûŋ-ŋai nyii pâi m̀aa mɛ̂ni mɛnîi, díkelee da pâi yaôi kpɔ́ a zu kɛ́tɛ.

¹⁰Tãi ŋa pâi ká su karâi lai, ǹûai kélee da pâi yaôi kpɔ́ a ŋánaa. Kâloŋ-ŋa da pâi kpɛ̃lînii a tãi ŋa pâi kɛ̂i ŋáƃoa-sɔkpɔi téniŋ ni la ká maa mɛ̂ni mai. Da pâi kɛ̂i yaôi díkɛ kpɛ̃liŋ dífulu-laai mɛ̂ni ma a tãi da pâi ká mɛni kpɔ̂lui maa mɛ̂ni mɛnîi lai.

¹¹“ ‘Ńyãai a Ŋ̀wála-wâla kélee Ɣalai ŋá mò a gɛɛ Babelɔŋ kaloŋ a pâi pâi a ŋɔƃóa-sɔkpɔi ká mɛi.

¹²Ŋa pâi gɛi ká ǹûai kélee dí lɛ́ɛ kɔ-kuluƃa wála-wala-ŋa yée mu ŋwana-lɔɔ lɔii-ŋuŋ-ŋai su. Da pâi zãai nyii kélee kpɔ́ a gɛ̀ ká ŋɛ́i a tɛ́i su kara.

¹³Ŋa pâi ká taa tûlɛ-ŋai kélee kpɔ́ su karâi ƃɛ́i da díkpêle naa ǹyá lôa-ŋai lai. À kɛ̀ tí, núu da kpaa máŋ taa tûlɛ da fé pâi lɛɛ̂i naa a gɛɛ é ŋɔ́nɔ ǹyái kpɔrɔ.

¹⁴Ŋa pâi gɛ̂i dí yá-ŋai díseɣeŋ, dí ya lêe-ŋai díkɛ ɣìliŋ kpɔ́ ŋgàa-ŋgaa. Ńyãai a Ŋ̀wála-wâla kélee Yâwɛɛi, ńyãa ƃé mò tí.

¹⁵À kɛ̀ tí, ŋa pâi Ize lɔii lɛɛ̂i a bûŋ. Tãi ŋa pâi ǹaa sãai kélee siɣêi lai, ŋá ǹaa-ƃelai kélee páai, gɛ̀ ní, da pâi ŋ́gɔlɔnîi a gɛɛ ńyãa ƃa Yâwɛɛ.

¹⁶Zamaŋ wulei ŋí ƃé da pâi doôi ka ínûai ká mɛni ma. Ǹɛnî-ŋai díkaa ǹɔii-ŋûŋ-ŋai sûi, da pâi zamaŋ wulei ŋí toôi. Ńyãai a Ŋ̀wála-wâla kélee Yâwɛɛi, ńyãa ƃé mò tí.’ ”

¹⁷Kúkɛɛ ǹuɛ-laai su ŋɔkóraŋ puu-kao feerɛi, ŋɔŋáloŋ m̀aa-ŋuŋ, ŋɔfólo puu-kao lɔ́ɔlu ɣele, Yâwɛɛ è lòno ḿbɔ ǹyɛɛi,

¹⁸“Núu-kpune ǹóŋ, ye wɔ́lɔ Ize-ƃela mɛ̂ni ma. Ye dítɛɛ saa táa da ǹɔii-ŋuŋ wala-wala-ŋai.

¹⁹M̀ó dîa, ‘Gbɛ̂ɛ ƃé ká lɛ̂lɛɛi é tɛ́ɛ mai? Ka lí saa táa ká kɛ́ naa ka diai dífe Ɣâla kɔ́lɔŋ.’

²⁰“Ize-ƃelai da pâi saâi da diai dí dípàa kɔ́ sui. M̀óa-sɔkpɔ-ŋai kpɛtɛɛ̂i a gɛɛ dí dípaa a dia.

²¹Gɔ-kuluƃa wála-wala-ŋai da diai nyii-ŋai kɛ̀ kpɔŋ-mâ tɛɛ̂i Ize-ŋai pɔ́i da pâi díyee seêi Ize-ŋai mû saa táa. Da pâi môi a ɣelêi pere dîyɛɛi, ‘Diai dífe ŋ́gɔlɔŋ nyii-ŋai dí dípàa kɔ́ sui daâ pá saa táa. Dia ká ŋí ƃɛ́i.’

²²“Asiria káa saa táa da ŋɔkɔ-kuluƃa-ŋai. Diai ŋí ƃé dí dípàa kɔ́ su.

²³Dí káa kpɔ́ saa táa kpóŋ ma. Tãi díkɛ̀ la ɣele mâi díkɛ̀ mɛni kpɔ̂lu lâai díƃarâi dîa.

²⁴“Elaŋ káa naa da ŋɔkɔ-kuluƃa-ŋai nyii-ŋai lɛ̀ɛ kɔ́ su díkɛ ƃò saa táa. Dia máŋ dí lì saa táa kpɛ́ni fêi dífe ŋ́gɔlɔŋ. Tãi díkɛ̀ la ɣele mâi dí mɛni kpɔ̂lu támaa làa díƃarâi dîa. Kɛ́lɛ díkaa lâai díkpɔɔɔi ŋumɛi su da dîa ni saa táa.

²⁵Elaŋ káa lâani diai sâa kɔ́ sui dísama. Díkaa a diai dífe ŋ́gɔlɔŋ nyii-ŋai dí dípàa kɔ́ sui. Tãi díkɛ̀ la ɣele mâi, dí mɛni kpɔ̂lu ŋánaa làa díƃarâi dîa. Kɛ́lɛ díkaa lâai díkpɔɔi ŋumɛi su da dîa ni saa táa.

²⁶“Mɛsɛi da Tuba díkaa naa díkɔ-kuluƃa-ŋai kɛ́ ƃò saa táa. Díkaa a diai dífe ŋ́gɔlɔŋ nyii-ŋai dí dípàa kɔ́ su. Tãi díkɛ̀ la ɣele mai, dí mɛni kpɔ̂lu ŋánaa làa díƃarâi dîa.

²⁷Dífe dí lòo ní a ƃaa kɛ́ maa pere yɛ̂ɛ berei dí wɔ́lɔ gɔkuluƃa wála-wala-ŋai lòo la a ƃaa kɛ́ maa perei. Díwɔlɔ ǹûai ŋí lòo a díkɔ-kɔ-sãai. Ǹyaŋ ǹûai ŋí díkɔ-kɔ-sãai káa niî díkao-ŋai dîa. Ǹûai ŋí díwɔlɔ kɛ̀ a dí wála-wala tãi dí wɔ́lɔ kɛ̀ la ɣele mai díkɛ mɛni kpɔ̂lu-ŋa laa díƃarâi dîa.

²⁸“Ize-ŋai da pâi pâi nɔ́ saa táa yɛ̂ɛ berei dífe ŋ́gɔlɔŋ dí lɛ̀ɛ la kɔ́ su.

²⁹“Idɔŋ káa naa da ŋɔkâloŋ-ŋai é pɛlɛ ŋɔlɔii mɛi-ƃela-ŋai dîa. Díkelee díkɛ̀ a kɔkuluƃa wála-wala-ŋa kɛ́lɛ díkelee díkaa saa táa. Díkaa saa táa da diai dífe kɛ̀ ní a ŋ́gɔlɔŋɔɔi nyii-ŋai dí dípàa kɔ́ sui.

³⁰“Ǹɔii mɛi-ƃelai nyii-ŋai kùla yá-ŋua perei díkelee díkaa naa. Sidɔŋ-ƃelai dìa máŋ díkaa naa. Díwɔlɔ mɛni kpɔ̂lu làa ǹɔii ma, kɛ́lɛ díkelee da lí saa táa a mâloŋ pere da diai dífe ŋ́gɔlɔŋ nyii-ŋai dí dípàa kɔ́ sui.

³¹“Ńyãai a Ŋ̀wála-wâla kélee Yâwɛɛi ŋá mò ńyɛ̃ɛ tãi Ize kaloŋ da ŋɔkɔ-kuluƃa-ŋai da pâi ǹûai ŋí dí dípaa gɔi sui kâai lai, dílii a pâi nɛ̃ɛ̂i.

³²“Ŋá gɛ̀ Ize kaloŋ é mɛni kpɔ̂lu láa ǹûai dîa díkɛ ŋ̀éniɛi-su, m̀ɛni ma, da pâi baâi da ŋɔkɔ-kuluƃa-ŋai. Díkelee da pâi liî saa táa da diai dífe ŋ́gɔlɔŋ nyii-ŋai dí dípàa kɔ́ sui. Ńyãai a Ŋ̀wála-wâla kélee Yâwɛɛ ƃé mò tí.”