Read Kpelle Izikiɛ 35 Bible Online

Izikiɛ 35 - Kpelle bible

Izikiɛ 35

¹Yâwɛɛ è lono ḿbɔ ǹyɛɛi,

²“Núu-kpune ǹóŋ, ye ǹia-wooi ŋí ƃó Idɔŋ ma.

³Mó m̀a yɛ̂ɛi, Ńyãai a Ŋ̀wála-wâla kélee Yâwɛɛi ŋá môi, ‘Ŋ́gaa a Idɔŋ yee-ŋai kpɔara-nuu. Ŋa pâi íkɛ̂i a lɔii pûŋ nyii sɛŋ da fé zui.

⁴Ŋa pâi ká taa lêe-ŋai su karâi. Ǹyaŋ naa é lɛ́ɛ a pilêŋ ŋá. À kɛ̀ tí, gɛ̀ ní ká pâi gɔ̂lɔnii a gɛɛ Ńyãa ƃa Yâwɛɛ.

⁵“ ‘Ká kɛ̀ a Eezuɛ ŋɔkpara-ƃela a tãi su kôyaa. Ká Eezuɛ-ŋai pâa a ƃóa-sɔ̂kpɔ a tãi mɛni kpɔ̂lu è kɛ̀ la dîai maa tãi díkɛ̀ dísɔnyɔ̂ŋ maa mɔ̃lɛ kɛ̂i lai.

⁶M̀ɛni ma, tãi nɔ́ Ńyãai a Ŋ̀wála-wâla kélee Yâwɛɛi ŋ́gaa la ɣele mai, ŋa pâi gɛ̂i ká sáa. Kpɛ́ni fêi, núu paa mɛ̂ni lɛ̂lɛi a ká nîa.

⁷Ŋa pâi Idɔŋ lɔii nyii gáa a yée lɔii, kɛ̂i é lɛ́ɛ a bûŋ. Diai kélee da pâ naai, ŋa pâi dípaâi.

⁸Ŋa pâi núu-poma táa tâai ká lɔii su ǹyée kpaya-kpaya-ŋai kélee, ǹyée pɛlɛ-pɛlɛɛ-ŋai kélee ma, da dìŋ-tiŋ-ŋai kélee su. Ǹûai ŋí da pâi kɛ̂i a ǹûai nyii-ŋai da pâi dí paâi kɔ́ sui.

⁹Ŋa pâi ká lɔii kɛ̂i é lɛ́ɛ kpɔ́ a bûŋ wɔ́lɔ-wɔlɔ da wɔlɔ-wɔlɔ. Núu da kélee fé pâi ŋɔ́nɔ seêi kátaa lêe-ŋai da su. À kɛ̀ tí, ka pâi gɔ̂lɔnii a gɛɛ Ńyãa ƃa Yâwɛɛ.

¹⁰“ ‘Í mò yɛ̂ɛ Eezuɛ da Zuda díkaa pâi kɛ̂i a ípɔɔ, ya pâi dísiɣêi é pɛ́lɛ dí lɔii kpîniŋ-ŋai kélee ma berei máŋ ŋ́gaa la a Díɣâlai Yâwɛɛi.

¹¹M̀ɛni ma, Ńyãai a Ŋ̀wála-wâla kélee Yâwɛɛi ŋa pâi ŋ́gbîŋ lɛ̂i yâ. Ŋa pâi íkula maa kɛ̂i kpɔ́ yɛ̂ɛ berei ítûa la a dia a tólo-pere, ŋwana lɔ̂ɔ da ƃɛlɛ-kpɛɛ goi perei.

¹²À kɛ̀ tí, ká pâi gɔ̂lɔnii a gɛɛ Ńyãai a Yâwɛɛi ŋá káɣɛlɛ-maa wooi mɛ̂ni nyii-ŋai kákɛ̀ môi ǹyée-ŋai ma Eezuɛi. Ká kɛ̀ môi kâai, “Dí káa da lɛ̀ɛ a lɔii pûŋ. Dí káa nâa a kúkɔ̃liŋ.”

¹³Ŋa ká ŋɛi tɛ̂ woo-ŋai mɛ̂ni nyii-ŋai ká kɛ môi é pîlaŋ ḿâi.’ ”

¹⁴Ŋ̀wála-wâla kélee Yâwɛɛi è mò ǹyɛɛ, “Ŋa pâi ká lɔii lɛɛ̂i a bûŋ a gɛɛ ŋ̀éniɛi kélee é lii-nɛ̃ɛ kula ká su kara mɛ̂ni ma.

¹⁵Yɛ̂ɛ berei ká lii-nɛ̃ɛ kula la tãi ká Eezuɛ lɔii nyii gáa a ḿbɔɔi su kara lai, bere ƃé ŋa pâi gɛ̂i la a káa. Siɛ-yeei da Idɔŋ lɔii kélee da pâi lɛɛ̂i a dí pûŋ. À kɛ̀ tí, gɛ̀ ní ǹɔii su-ƃelai kpéli-ŋai da pâi gɔ̂lɔnii a gɛɛ Ńyãa ƃa Yâwɛɛ.”