Read Kpelle Izikiɛ 36 Bible Online

Izikiɛ 36 - Kpelle bible

Izikiɛ 36

¹Yâwɛɛ è mò ǹyɛɛi, “Núu-kpono ǹóŋ, mó Eezuɛ yee-ŋai dîa yɛ̂ɛi ka ŋ̀óoi mɛ́ni ŋa pâi môi kâai.

²Ŋ̀wála-wâla kélee Ɣalai ǹyɛɛ, ‘Kpɛ́ni fêi ká kpɔara-ƃelai dí kɛ̀ ɣɛ́lɛ maa kulâi kákponôi dîyɛɛ, “Ǹyée pɔlɔ-pɔlɔ-ŋai ŋí káa naa a kúpɔɔ.” ’

³“M̀ɛni ma m̀ó ǹyée-ŋai dîa yɛ̂ɛi, Ŋ̀wála-wâla kélee Yâwɛɛi ǹyɛɛ, ‘Ká kpɔara-ƃelai dí ká su kàra dí ká lɛ́ɛ a kápûŋ a gɛɛ kákɔlɛ ma lɔii-ŋai dí ká sóŋ dí kɛ́ ɣɛ́lɛ maa kûla ká kponôi.

⁴Ńyãai a Ŋ̀wála-wâla kélee Yâwɛɛi ŋa môi ńyɛ̃ɛ, ka ká wóli tɔ́ɔ káai a Eezuɛ ǹyée kpaya-kpayai, ǹyée pɛlɛɛ-pɛlɛɛi, ǹyá-ɣɛli ŋai, diŋ-tiŋ-ŋai, ƃɛ́i-ŋai lɛ̂ɛ a bûŋ, daa-lee-ŋai nyii-ŋai lɛ̂ɛ a bûŋ, da káai dí ká su kàra ká kɔlɛ ma lɔii-ŋuŋ-ŋai díka kɛ́ a ɣɛ́lɛ-maa sɛŋ.’

⁵“Ńyãai ŋ́gaa a Ŋ̀wála-wâla kélee Yâwɛɛi ŋa ǹíi ŋwânai kpɔ́ ká kɔlɛ ma lɔii-ŋuŋ-ŋai dîa é pɛ́lɛ Idɔŋ ma. Dí ŋá lɔii síɣe a dípɔɔ a ŋɛi-tɛ da lii-nɛ̃ɛ pere.

⁶“Ye lóno Eezuɛ lɔii pɔ́. M̀ó ǹyée kpaya-kpayai, ǹée pɛlɛɛ-pɛlɛɛi, ǹyá-ɣɛli-ŋai, diŋ-tiŋ-ŋai a gɛɛ Ńyãai a Ŋ̀wála-wâla kélee Yâwɛɛi a môi ńyɛ̂ɛi, ‘M̀ɛnii ŋa m̀ôi gáa a tólo lii-ŋwana kpɛ́ni fêi ká m̀ɔ̃lɛ a dámaa, ka woo-nyɔ̂ŋ támaa sɔlɔ ƃô ǹɔii-ŋûŋ-ŋai yêei.

⁷M̀ɛni ma Ńyãai a Ŋ̀wála-wâla kélee Yâwɛɛi ŋa ḿvoo ǹɔii-ŋûŋ-ŋai ká kɔlɛ mai yêei a gɛɛ ŋa pâi díkula maa kɛ̂i m̀ɔ̃lɛi ká gɛ̀ díyee mui mɛ̂ni ma.

⁸Kɛ́lɛ wúru-ŋa da pâi ƃɔ̂lɔnii ǹyé kpaya-kpayai ma Eezuɛ lɔii su, dí ƃá a gɛɛ ŋá ǹûai nyii-ŋai díkaa a Eezuɛ-ƃelai mɛ̂ni ma. Kpɛ́ni fêi ka pá lenêi pôlu dípɔi-taai.

⁹Ŋ́gaa ká pôlu. M̀ɛni ma, ŋa pâi gɛ̂i ká kási-sãa sí ǹɔii ma.

¹⁰Ŋa pâi gɛ̂i káai a Eezuɛ-ŋai ká ƃûu ƃó, ká daa pîleŋ-ŋai tɔ́ɔ pôlu. Ka pâi ǹɔii pûŋ-ŋai kélee láa fɛ̂ɛi nyii-ŋai dí díwôloi.

¹¹Ŋa pâi gɛ̂i ǹûai da daa-tulɛ-ŋai dítama. Ka pâi tâmai é tɛ́ɛ bɔlɔi ma. Ka pâi nîa-pɛlɛɛ támaa sɔlɔ ƃôi. Ŋa pâi ǹɛɛ̂i naa ká kɛ́ ǹɔii ma yɛ̂ɛ berei ká kɛ̀ la naa a bɔlɔi. Ŋa pâi tûai a káa a ǹɛ́lɛɛ é tɛɛ bɔlɔi ma. À kɛ̀ tí, gɛ̀ ní ká pâi gɔ̂lɔnii a gɛɛ Ńyãa ƃa Yâwɛɛ.

¹²Káai ká káa a Eezuɛ-ŋai ká káa a ŋánûa. Ŋa pâi pâi a káa pôlu ǹɔii su é kɛ́ a ká pɔɔ. Ǹyaŋ puru fé ŋɔ́nɔ pâi kánîa-pɛlɛɛi paâi.

¹³“ ‘Ńyãai Ŋ́gaa a Ŋ̀wála-wâla kélee Yâwɛɛi ŋá mò a gɛɛ m̀ɛnii ǹûai dí mòi gáa a tɔ̃yâ. Ǹɔii a núu mîi, gɛ̀ dínîa-pɛlɛɛi ŋûma dîa.

¹⁴Kɛ́lɛ vé ŋɔ́nɔ pâi ká mîi, kpaa máŋ é kánîa-pɛlɛɛi ŋúma kâa. Ńyãai ŋ́gaa a Ŋ̀wála-wâla kélee Yâwɛɛi ńyãa ƃé mò tí.

¹⁵Ḿve ŋɔ́nɔ pâi ǹɛɛ̂i naa ká ǹɔii-ŋûŋ-ŋai díɣɛlɛ-maa wóo-ŋai mɛni. Káfe pâi ŋɔ́nɔ káyee seêi díƃaa-kula-maa tûa-ŋai mu. À kɛ̀ tí, kálɔii fé ŋɔ́nɔ pâi lɛɛ̂i a vɔ́lɔ. Ńyãai a ŋ̀wála-wala kélee Yâwɛɛi ńyãa ƃé mò tí.’ ”

¹⁶Yâwɛɛ è lòno ḿbɔ ǹyɛɛi,

¹⁷“Núu-kpune ǹóŋ, tãi Eezuɛ-ŋai díkɛ̀ la díkpɔɔi lɔii sûi, dí ǹɔii m̀aa tĩa kàra a díkpîŋ tûa-pere. Dítûa-perei è gɛ̀ ǹɔii fé kɛ́ ní a maa waa yɛ̂ɛ berei nɛnî a kɛ̀ ǹyée tɛ̂i m̀aa fâ kɛ̂ a ŋ̀wáa lai.

¹⁸M̀ɛni ma ŋá ǹíi ŋwana kpɔ́ dîa a ŋánaa ǹûai dí dípàa dílɔii sûi da ŋâla-pɔkɔɔŋ-ŋai díkɛ̀ ǹɔii maa tĩa karâi lai maa mɛ̂ni ma.

¹⁹Ŋá díkula maa kɛ̂ dítûa-perei-ŋai mɛ̂ni ma ŋá dítaa tâa lɔii-ŋuŋ da kpɛ́ni-ŋa su. Ŋá díkula maa kɛ̂ dí mɛni nyɔ́mɔɔi mɛ̂ni ma.

²⁰Kɛ́lɛ, tãi dí lì la lɔii da kpɛ́ni-ŋa sui, dí ƃâa kùla ǹáa maa waai ma. Kpɛ́ni fêi, ǹûai díkɛ̀ m̀ôi dîyɛɛi, ‘Yâwɛɛ ŋɔnûai ká ŋí kɛ́lɛ dí díkpɛ̀ ŋɔlɔii su.’

²¹Ŋ́gbaaŋɔ̂ɔi ńaa maa-waai mɛni ma nyii Eezuɛ-ŋai dí ƃâa kùla ma ƃɛ́i kélee dí lì naa ǹɔii-ŋuŋ da kpɛ́ni-ŋai sûi.

²²“M̀ɛni ma mó Eezuɛ-ŋai dîa yɛ̂ɛ Ŋ̀wála-wâla kélee Yâwɛɛi ǹyɛɛ, ‘Káai a Eezuɛ-ŋai ká maa mɛ̂ni fé ŋá tùa la a gɛɛ ŋi. Kɛ́lɛ ŋa tûai a gɛɛ ŋí ńaa maa-waai mɛ̂ni ma nyii ká ƃâa kùla ma ǹɔii ŋuŋ da kpɛ́ni-ŋai su ƃɛ́i ká kɛ̀ a ká táa tâa naai.

²³Ŋa pâi ńaa maa-waai nyii ká m̀aa-tĩa kàra ǹɔii-ŋûŋ-ŋai sûi ŋɔkɛ́tɛ-laai lɛ̂i ǹɔii-ŋûŋ-ŋai kpîŋ dîa. À kɛ̀ tí, ǹɔii-ŋûŋ-ŋai da pâi gɔ̂lɔnii a gɛ́ɛ ńyãa ƃa Yâwɛɛ. Ńyãai a Ŋ̀wála-wâla kélee Yâwɛɛi ƃé mò tí. Ŋa pâi ńaa maa-waai lɛ̂i ǹɔii-ŋûŋ-ŋai dîa ká sârai.

²⁴Ŋa pâi kákulâi ǹɔii-ŋûŋ-ŋai su ŋá pá a káa kákpɔɔi lɔii su.

²⁵Ŋa pâi yá lɛ́lɛɛ kpɛmɛnîi kâa. À kɛ̀ tí, gɛ̀ ní ka pâi kɛ̂i a ká maa-waa. Gɛ̀ ní, ŋa pâi ńyee seêi ká mu. Ŋa pâi ká maa wâai ŋa ká kúla m̀ɛni nyɔ́mɔɔ-ŋai su nyii-ŋai gɛ̀ ká maa fé waa nii. Ŋa pâi ká maa wâai ŋa ká kúla ŋ̀âla da kpɛ́ni-ŋai fɛli mɛ̂ni-ŋai su.

²⁶Ŋa pâi líi-nina da kíli-nina tɛɛ̂i ká pɔ. Ŋa pâi ká lii su kpânaŋ maa fálenîi a lii maa yêŋ.

²⁷À kɛ̀ tí, gɛ̀ ní ŋá pâi ŋámɔ̃lêŋ pûi kákponôi, ŋá gɛ́ ká ŋá tɔ̂ŋ-ŋai mɛi káa, kátûa yɛ̂ɛ berei ŋá tɔ̂ŋ wóo káa lai.

²⁸Ka pâi seêi ǹɔii su nyii ŋá dɛ̀ɛ kánâŋ-ni pɔi. Ǹyaŋ, à kɛ̀ tí, gɛ̀ ní ka pâi kɛ̂i a ŋánûa, ńyaŋ ŋ́gɛ ƃò a Káɣâla.

²⁹Ŋa pâi ká kulâi kámɛni nyɔ́mɔ-ŋai su ŋá kámaa wáa. Ŋa pâi mii-sɛŋ maa poôi ŋá gɛ́ é támaa puru fa ŋɔ́nɔ ká kɛ̀.

³⁰Ŋa pâi gɛ̂i ká sí-sãai dí kpɛtɛ kpɔ́ a dámaa a gɛɛ puru fa ŋɔ́nɔ ƃâa kùla kâa ǹɔii-ŋûŋ-ŋai sáma.

³¹À kɛ̀ tí, ká mɛni nyɔ́mɔ-ŋai da kátua-pere nyɔ̂ŋ-ŋai kíli a pâi toôi ká ŋá. Ǹyaŋ, kákpîŋ ƃɛlɛ a pâi kpɛɛ̂i kákoi kásɔnyɔ̂ŋ-ŋai da ítùa-pere nyɔ̂ŋ-ŋai mɛ́ni ma.

³²Ḿve pâi m̀ɛnii ŋí kɛ̂i ká mɛni ma káai a Eezuɛ-ƃelai. Ŋa ŋ̀wɛ̂li a gɛɛ ŋumɛ é ká sóŋ ká sɔnyɔ̂ŋ-ŋai da ká ƃaa kula maai mɛ̂ni ma. Ńyãai a Ŋ̀wála-wâla kélee Yâwɛɛi Ńyãa ƃé mò tí.’ ”

³³Ŋ̀wála-wâla kélee Yâwɛɛi è mò ǹyɛɛi, “Tãi tí ma, ŋa pâi ká maa wâai ŋá ká kúla ká mɛni nyɔ́mɔ-ŋai su. Ŋa pâi gɛ̂i kátaa-lee-ŋai láa é fɛ́ɛ a núu. À kɛ̀ tí ka pâi kátaa pîleŋ-ŋai tɔɔ̂i pôlu.

³⁴À kɛ̀ tí, kálɔii nyii nûa dí kɛ̀ dîyɛɛ ve lɛ́lɛɛ-ni tíi kɛ́ mɛɛ̂ni mai, ka pâi ŋɔ́nɔ kɛ̂i tíi kɛ̂i ma.

³⁵Ǹyaŋ da pâi kɛ̂i môi dîyɛɛ ǹɔii ŋí kɛ̀ bûŋ gáa nâa yɛ̂ɛ Idiŋ-suai su. Daa lêe-ŋai dí zu-sãa kélee siɣe ǹaa é lɛ́ɛ a gbolôŋ. Díkaa nâa a taa lêe láa fɛ́ɛ siɣaŋ tínaŋɔɔ dîa.

³⁶Tãi m̀ɛni-ŋai da pâi kɛ̂i lai, ǹɔii-ŋuŋ-nyii-ŋai dí tínaŋɔ̂ɔi kâai da pâi gɔ̂lɔnii a gɛɛ ńyãa Yâwɛɛ ƃé daa pîleŋ-ŋai tɔ̂ɔ ŋá sí-sɛŋ sí ǹɔɔ pûŋ-ŋai su. Ńyãa Yâwɛɛ ƃé mò tí. Ǹyaŋ ŋa pâi gɛ̂i tí.”

³⁷Ŋ̀wála-wâla kélee Yâwɛɛ è mò ǹyɛɛ, “Ŋa pâi ǹɛɛ̂i naa Eezuɛ-ŋai dí ḿarê kɛ́ a gɛ́ɛ ŋá gɛ̀ dítama kpɔ́ yɛ̂ɛ ƃála-kpulu.

³⁸Daa lêe-ŋai kɛ̀ a dípûŋ da pâi kɛ̂i a dílaa fɛ́ɛ a nûa yɛ̂ɛ berei Zerusâlɛŋ láa a kâa kɛ̀ a vɛ́ɛ la a ƃála-ŋa a tãi da kâa kɛ̀ sâla támaa kulâi la naai. À kɛ̀ tí, da pâi gɔ̂lɔnii a gɛɛ Ńyãa ƃa Yâwɛɛ.”