Read Kpelle Izikiɛ 37 Bible Online

Izikiɛ 37 - Kpelle bible

Izikiɛ 37

¹Yâwɛɛ ŋɔmɔ̃lêŋ è pà ḿɛi é ŋ́ziɣe é lí a ńyãa é ŋ́zee diŋ-tiŋ su ƃɛ́i núu-kao támaa díkɛ̀ naai.

²È lì a ńyãa ǹaa gwaa kélee ma. Núu-kao támaa díkɛ̀ ǹaa gwaa kélee ma. Díkelee díkɛ̀ kpɔ́ a díkpalaa a ŋánaa.

³Nya ƃe è mò ḿâ ǹyɛɛi, “Núu-kpune ǹóŋ, ǹúu-kao-ŋai ŋí da ŋɔ́nɔ pɔri kɛ̂i pôlu a dífulu?” Ŋá ŋ̀óo su tòo ńyɛ̃ɛ, “Óo Ŋ̀wála-wâla kélee Yâwɛɛi, yá nɔ́ ƃé gɔ́lɔŋ.”

⁴È mò ḿâ ǹyɛɛi, “Ɣâla-woo ƃó ǹúu-kao-ŋai ŋí dîa yɛ̂ɛi, ‘Oó núu-kao kpálaa-ŋa ka Yâwɛɛ wóo mɛ́ni.

⁵M̀ɛnii ká ŋí Ŋ̀wála-wâla kélee Yâwɛɛ a môi kâai, “Ŋa pâi lêwɔ pûi kákponôi. Ka pâi kɛ̂i a káfulu ŋɔ́nɔ kákɛ ɣele ma.

⁶Ŋa pâi gɛ̂i káluu é kɛ́ kâa, ŋama é kɛ́ kákponôi da kɔlɔ é tɛ́ kâa. Ŋa pâi gɛ̂i ká lɛ̂wo é tóo kákponôi ká kɛ́ ɣele ma. Gɛ̀ ní ká pâi gɔ̂lɔnii a gɛɛ Ńyãa ƃa Yâwɛɛ.” ’ ”

⁷Nya ƃe ŋá Ɣâla-woo ƃò yɛ̂ɛ berei è mò la ḿâi. Ŋ́gɛɛ Ɣâla-woo ƃôi, ǹaa tìŋ è kɛ̀ tɛ̂i a dámaa. Ǹúu-kao-ŋai tíŋ è kɛ̀ tɛ̂i a dámaa. Ǹúu-kao-ŋai díkɛ̀ pâi díkîe ni dîa tɛi-tɛi.

⁸Ǹaa kɛ́ɛ tíi, ǹúu-kao-ŋai nana è kɛ̀ tɛ̂i dîa, ǹuu kɛ̀ tɛ́ m̀a da gɔlɔ. Kɛ́lɛ, dífe kɛ́ ni a dí fúlu.

⁹Nya ƃe è mò ḿâ ǹyɛɛi, “Núu-kpune ǹóŋ, Ɣâla-woo ƃó a gɛɛ dí lɛ̂wo é tóo díkponôi. Mó yɛ̂ɛ Ŋ̀wála-wâla kélee Yâwɛɛi ǹyɛɛi, ‘Fãa, kula kpɔ́ ǹɔii m̀éla naaŋɔɔ ma í pá í pú gbòno-ŋai ŋí kponôi a gɛɛ díkɛ a dí fúlu.’ ”

¹⁰Ŋá ɣâla-woo ƃò yɛ̂ɛ berei è mò la ḿâi. Ǹya ƃé dí lɛ̂wo è tòo díkponôi díkɛ ŋɔ́nɔ a dí fúlu. Dí dímu sìɣe dítɔɔ. Díkɛ̀ kpɔ́ a núu-kpulu kɛ́tɛ yɛ̂ɛ kɔkuluƃa kpulu-ŋa.

¹¹Nya ƃe è ńdòli ǹyɛɛi, “Núu-kpune ǹóŋ, Eezuɛ-ŋai díkaa yɛ̂ɛ ǹúu-kao-ŋai ŋí. Díkaa môi dîyɛɛi, ‘Kúkao a kpála kúkponôi. Kili-kɛ-zu fé ŋɔ́nɔ kúyêei tínaa-tuɛ-pere mɛni ma.’

¹²M̀ɛni ma ɣâla-woo ƃó dîa yɛ̂ɛ Ńyãai a Ŋ̀wála-wâla kélee Yâwɛɛi ŋa môi ńyɛ̂ɛi, ‘Ŋa pâi ká ƃolôŋ-ŋai lá ƃôi ŋa ká kúla káƃolôŋ-ŋai su káai kákaa a ŋánûai. À kɛ̀ tí, ŋa pâi pâi a káa kápɔ-taai Eezuɛ lɔii su.

¹³Tãi ŋa pâi káai a ŋánûai káƃolôŋ lá ƃôi la ŋá kákula naai, ka pâi gɔ̂lɔnii a gɛɛ Ńyãa ƃa Yâwɛɛ.

¹⁴Ŋa pâi ŋámɔ̃lêŋ pûi kákponôi kákɛ a ká fúlu. Ŋa pâi pâi a káa kákpɔɔi lɔii su. À kɛ̀ tí, gɛ̀ ni ka pâi gɔ̂lɔnii a gɛɛ ńyãa Yâwɛɛ ƃé mò tí, ŋá ŋa-see kɛ́.’ ”

¹⁵Yâwɛɛ è ŋɔ́nɔ lòno ḿbɔ ǹyɛɛi,

¹⁶“Núu-kpune ǹóŋ, ye wúru síɣe í ŋ̀óoi ŋí pɔ̃yɛ mà, ‘Zuda lɔii da Eezuɛ-ŋai nyii-ŋai dítɔ̂ɔi káa tɔnɔi.’ Ǹaa pôlu ma, wúru nina siɣe í ŋɔ́nɔ kɔlɔ pɔ̃yɛ ma, ‘Zosɛ da Eezuɛ-ƃelai nyii-ŋai dítɔ̂ɔi káa tɔnɔi.’

¹⁷Ŋ̀úru-ŋai ŋí veerɛŋɔɔ soŋ í díŋuŋ pîlaŋ gîe ma í zoŋ a gɛɛ díkɛ yɛ̂ɛ wúru tɔ̂nɔ íyee ŋa.

¹⁸Tãi ínûai da pâi í marê kɛ̂i a gɛɛ í ŋ̀úruii ŋí maa mɛ̂ni su kula dîyɛɛi,

¹⁹M̀ó dîa yɛ̂ɛ Ńyãa Ŋ̀wála-wâla kélee Yâwɛɛi ńyɛ̃ɛ, ‘Ŋa pâi ŋ̀úruii nyii gáa Eezuɛ m̀ɛni mai siɣêi da ŋ̀úruii nyii gáa Zuda m̀ɛni mai ŋá díkɛ a wúru tɔ̂nɔ a gɛɛ díkɛ a wúru tɔ̂nɔ ńyee-ŋa.’

²⁰“Tãi ŋ̀úru-ŋai í gɔlɔi pɔ̃yɛ mai a kɛ̀ la íyée-ŋai díŋɛi-tuɛi,

²¹gɛ̀ ní m̀ó dîa yɛ̂ɛ Ńyãa Ŋ̀wála-wâla kélee Yâwɛɛ ńyɛ̂ɛi, ‘Ŋa pâi Eezuɛ kulâi ǹɔii-ŋai su díkaa naai. Ŋa pâi dí kulâi ƃéla kélee ma ŋa pá a dia pôlu díkpɔɔi lɔii su.

²²Ŋa pâi dí kɛ̂i a lɔii-ŋuŋ tɔnɔ ǹɔii su Eezuɛ yèe-ŋai ma. Kâloŋ tɔnɔ nɔ́ ƃé pâi kɛ̂i dí mɛi. À kɛ̀ tí, dífe ŋɔ́nɔ pâi kɛ̂i a lɔii-ŋuŋ feerɛ. Dífe ŋɔ́nɔ pâi kɛ̂i a kâloŋ-laa feerɛ.

²³Dífe ŋɔ́nɔ pâi dí maa tĩa karâi a ɣâla da kpɛ́ni fɛliɛɛ nyii m̀ɛlɛ fé ŋ́goi da sɔnyɔ̂ŋ da kpɛ́ni-ŋa kɛ́ɛ. Kɛ́lɛ, ŋa pâi díƃâloi ŋa díkula dífii kpɛɛ̂i su nyii gɛ̀ díkɛ pìli sɔnyɔ̂ŋ sui. Ŋa pâi dímaa wáai. À kɛ̀ tí, da pâi kɛ̂i a ŋánûa, ńyaŋ ŋ́gɛ ƃò a Díɣâla.

²⁴Ńyee-mu nuui Deeƃé ŋɔsuui su nuu da a pâi kɛ̂i a díkâloŋ. À kɛ̀ tí, díkelee dímɛi káa nûu a pâi kɛ̂i nɔ́ tɔnɔɔ. Da pâi ŋátɔ̂ŋ-ŋai kélee mɛi kâai a téniŋ ƃô pere díkɛ m̀ɛi kâa a zãa.

²⁵Da pâi kɛ̂i ǹɔii ŋá wɔ́lɔ dɛ̀ɛ dínâŋ-ni pɔi su nyii ŋá wɔ́lɔ dɛ̀ɛ ǹyée-mu ǹuui Zeeka pɔi. Da pâi kɛ̂i naa da dílônii, é pɛ́lɛ dílônii díwɔ̂ lonii dîa wɔ́lɔ-wɔlɔ da wɔ́lɔ-wɔlɔ. À kɛ̀ tí, ńyee-mu nuui Deeƃé ŋɔsuui su nuu da a pâi kɛ̂i a díkâloŋ wɔ́lɔ-wɔlɔ da wɔlɔ-wɔlɔ.

²⁶Ŋa pâi lii sêe kpanaŋ-woo kɛ̂i díyêei. Ǹyaŋ, a pâi kɛ̂i a wɔ́lɔ-wɔlɔ da wɔlɔ-wɔlɔ kpanaŋ-woo. À kɛ̀ tí, ŋa pâi lûwa toôi dîa ŋá gɛ́ dítama. À kɛ̀ tí, ŋa pâi ŋápɛrɛi tɔɔ̂i dísama dílɔii su wɔ́lɔ-wɔlɔ da wɔlɔ-wɔlɔ.

²⁷Ŋa pâi kɛ̂i dísama. Ŋa pâi kɛ̂i a Díɣâla dia máŋ díkɛ ƃò a ŋánûa.

²⁸À kɛ̀ ŋa ŋápɛrɛi tɔ̀ɔ dísama wɔ́lɔ-wɔlɔ da wɔlɔ-wɔlɔ, ǹɔii-ŋûŋ-ŋai da pâi gɔ̂lɔnii a gɛɛ ńyãa ƃa Yâwɛɛ nyii Eezuɛ sìɣe ŋá gɛ́ a ŋánûa.’ ”