Read Kpelle Izikiɛ 39 Bible Online

Izikiɛ 39 - Kpelle bible

Izikiɛ 39

¹Nya ƃe Ŋ̀wála-wâla kélee Yâwɛɛ è mò ḿâ ǹyɛɛi, “Núu-kpune ǹóŋ, ye ɣâla-woo ƃó Gɔ̂ɔ ma. M̀ó mà yɛ̂ɛ Ńyãai a Ŋ̀wála-wâla kélee Yâwɛɛi ńyɛ̂ɛi, ‘Gɔ́lɔŋ a gɛɛ ńdɔɔ̂i ya Gɔ̂ɔ yái íkaa a Misɛɛ da Tuba díkâloŋ kɛ́tɛi.

²Ŋa pâi ítinaŋ nîi ŋá íɣala. Ŋa pâi íkulâi yá-ŋua-pere ŋa pá a yá Eezuɛ yèe kpaya-kpayai ma.

³À kɛ̀ tí, ŋa pâi í kerâŋ kulâi íkɔɔ yee ŋá, ŋá ítɔ̃ai kúla ílaa-mii-yee ŋá.

⁴Ka íkɔ kuluƃa-ŋai da ǹɔii-ŋûŋ-ŋai díkaa í pôlui ka kélee ka pâi saâi naa ǹyée-ŋai ma. Ŋa pâi ká poma kɛ̂i a ŋɔni-sii támaa da lɔɔ-fɛnɛ-sãa kɔ̃́nɔŋ.

⁵Ka pâi saâi naa ǹɔɔi su. Ńyãai ŋ́gaa a Ŋ̀wála-wâla kélee Yâwɛɛi ƃé mò tí.

⁶Ŋa pâi ŋɔŋ pilîi Maa-gɔɔ da diai díkaa ǹyái kɔlɛ dílɔii su ƃɛ́i lii sêe káa naai. À kɛ̀ tí, da pâi gɔ̂lɔnii a gɛɛ ńyãa ƃa Yâwɛɛ.

⁷Ŋa pâi gɛ̂i dí ńaa maa-waai lɛ́ Eezuɛ-ŋai dîa. Ḿve pâi ǹɛ̂ɛi naa dí ŋɔ́nɔ ńa maa-waai maa tĩa kara. À kɛ̀ tí, ǹɔii-ŋûŋ-ŋai da pâi gɔ̂lɔnii a gɛɛ ńyãa ƃa Yâwɛɛ nyii gáa a Ŋ̀âla maa-waai nyii gáa Eezuɛi.’ ”

⁸Ŋ̀wála-wâla kélee Yâwɛɛi è mò ǹyɛɛi, “Ŋ̀elei ŋá lòno é pîlaŋ m̀ai a pâi pâi a tɔ̃ya.

⁹Diai díkaa Eezuɛ taa-lee-ŋai sui, da pâi liî dí ŋɔŋ tóo gɔkɔ-sãai dîa dí díkereŋ. Da pâi ŋɔŋ toôi kpála-ŋa-ɣale kɔli-kalaŋ ŋa, kerâŋ ŋa, tɔ̃a ŋa, kpála ŋa, da gbɔ̂ŋ-gbua-ŋai kélee dîa. Da pâi díkerenîi a kóraŋ lɔ́ɔlu-mɛi feerɛ.

¹⁰Dífe pâi liî ǹɔɔi su a gɛɛ dí kɔi síɣe kpaa máŋ dí li ǹɔɔi su dí kɔi tée. Kpɛ́ni fêi da pâi kɛ̂i gɔkɔ-sãai kérenîi a kɔi. Da pâi toôi ǹûai dîa nyii-ŋai tòo dîai. Ǹûai wɔ́lɔ Eezuɛ-ŋai kɔ̃liŋ siɣei, Eezuɛ-ŋai dia máŋ da pâi díkɔ̃liŋ siɣêi.” Ŋ̀wála-wâla kélee Yaaɛi ƃé mò tí.

¹¹Yâwɛɛ è mò ǹyɛɛ, “Ŋa pâi Zia-ƃelai dítiŋ-tiŋ nyii gáa Ǹyúo-saai ŋɔfóloi kulâi pere lɛ̂i Gɔ̂ɔ ma a boma loôi Eezuɛ lɔii su a maa tãi tí. Ǹyaŋ, sia-nuu da fé ŋɔ́nɔ pâi tɛɛ̂i naa, kpɛ́ni fêi ǹaa ƃé da pâi Gɔ̂ɔ da ŋɔkɔ-kuluƃa-ŋai kélee loôi naa. Da pâi kɛ̂i ǹaa mà ‘Gɔ̂ɔ ŋɔkɔ-kuluƃa-ŋai dítiŋ-tiŋ su.’

¹²Eezuɛ-ŋai da pâi ɣáloŋ lɔ́ɔlu mɛi feerɛ siɣêi díkɛ dípoma lôo, a gɛɛ dí dílɔii su kpɛtɛ.

¹³Ǹûai díkaa Eezuɛ lɔii sui díkelee kpɔ́ da pâi kɛ̂i a zaa-loo-ƃelai da. Ǹyaŋ, tãi ŋa pâi gɔ́i yée mɛi ɣâlei lai, maa tãi tí ƃé da pâi ƃaa-kɛ́ maa sɔlɔ ƃôi la ǹûai saa loo mɛ̂ni ma. Ńyãai a Ŋ̀wála-wâla kélee Yâwɛɛi ńyãa ƃé mò tí.

¹⁴Tãi ŋ̀áloŋ lɔ́ɔlu-mɛi feerɛi a pâi kpɛɛ̂i lai, ǹûai da pâi kɛ̂i nɔ́ siâi ǹɔii su a gɛɛ da bomai da kàa dí ǹoo. Da pâi lɛɛ̂i gɛ̂i tí é lɛ́ɛ la zu dí bomai kélee lóo, dí ǹɔii su kpɛtɛ. Da pâi nûa tɛɛ̂i a gɛɛ dí ǹɔii su maa kpɛɛ.

¹⁵Tãi ǹûai ŋí ni da pâi lɛɛ̂i siâi la dí núu-kao da káai, da pâi wúru-gbua tɔɔ̂i naa a gɛɛ zaa-loo-ƃelai da gàa dínoo Gɔ̂ɔ ŋɔkɔ-kuluƃa-ŋai dí tiŋ-tiŋ su.

¹⁶Da pâi gɛ̂i tí a gɛɛ dí ǹɔii su kpɛtɛ.” (Da pâi taa lêe tɔnɔ tɔɔ̂i ǹaa kɔlɛ ma dí gɔkuluƃa-ŋai láa sée ma.)

¹⁷Ŋ̀wála-wâla kélee Yâwɛɛ è m̀ôi ǹyɛɛ, “Núu-kpune ǹóŋ, m̀ó wɔni-sii kélee da ǹɔɔ-fɛnɛ-sãa kélee dîa a gɛɛ dí pá. Ŋa sâla-sãa kpɛtɛ̂i dí mɛni ma Eezuɛ yèe-ŋai ma. Da pâi sua miî, dí ŋãa kpéle.

¹⁸Da pâi wála-wala-ƃela sua miî dí gâloŋ-ŋai díkaa ǹɔii mai ŋãa kpéle yɛ̂ɛ núu ƃé a Basãŋ ƃala-sirɛ, ƃala-loŋ, ƃoli da niŋa lɛ́lɛɛ-ŋa pàa.

¹⁹Tãi ŋa pâi zâlai ŋí kulâi lai, da pâi sua miî é lɛ́ɛ la zu dí píla. Dí ŋãa kpéle é lɛ́ɛ la zu é díkɛ́.

²⁰Da pâi soo-sua, da soo-sia-ƃela-sua miî é pɛ́lɛ kɔ́kɔ-ƃela-sii támaa-sua ma é lɛ́ɛ la zu dí píla.” Ńyãai a Ŋ̀wála-wâla kélee Yâwɛɛ ƃé mò tí.

²¹Yâwɛɛ è mò ǹyɛɛ, “Ŋa pâi ŋáfolo-laai lɛ̂i ǹɔii-ŋûŋ-ŋai kélee ma. À kɛ̀ tí, díkelee da pâi ŋáwala-wala laai kâai nyii ŋa gɛ̂i da berei ŋá díkula maa kɛ̀ lai.

²²É síɣe tãi tí ma é lí tuɛ pere, Eezuɛ-ƃelai kélee da pâi gɔ̂lɔnii a gɛɛ ńyãa ƃa Yâwɛɛ nyii gáa a Díɣâlai.

²³À kɛ̀ tí, ǹɔii-ŋûŋ-ŋai kélee da pâi gɔ̂lɔnii a gɛɛ Eezuɛ-ƃelai dí wɔ́lɔ lì kɔ-soŋ laa su kpɛ́ni fêi dí sɔnyɔ̂ŋ kɛ̀ a ńyãa. Dí tûa a ńyãa a nyɔ́mɔɔ m̀ɛni ma ŋá ŋ̀ɛ́i lôo dîa, ŋá dítɛɛ díkpɔara-ƃelai pɔ dí dípaa kɔ́ su.

²⁴Ŋá tûa a dîa yɛ̂ɛ berei dítûa-pere dí tua-pere nyɔ̂ŋ káa lai. M̀ɛni ma, ŋá ŋ́ɛi lòo dîa.”

²⁵Ŋ̀wála-wâla kélee Yâwɛɛ è mò ǹyɛɛ, “M̀ɛni ma ŋa pâi nâa Zeeka ŋɔsuui su-ƃelai malôŋ kâai, ŋá Eezuɛ see pôlu díseêi. À kɛ̀ tí, gɛ̀ ní ŋa pâi ńaa maa waai maa kɔ̃ɔ̂i.

²⁶Tãi da pâi kɛ̂i la dílɔii sûi núu da fa ŋɔ́nɔ dímaa yâo. Berei dí ƃâa kùla la dîa kpɛ́ni fêi dí ḿbɛ̀lɛi, m̀aa kîli fé ŋɔ́nɔ pâi toôi dí ŋá.

²⁷Ŋa pâi Eezuɛ-ŋai kulâi dí kpɔara-ƃelai dílɔii-ŋai su ŋá pá a dia dí kpɔ́ɔi lɔii su. À kɛ̀ tí, ǹɔii-ŋûŋ-ŋai da pâi gɔ̂lɔnii a gɛɛ ḿaa waâi.

²⁸À kɛ̀ tí, ŋá ǹûai da pâi gɔ̂lɔnii a gɛɛ ńyãa ƃa Yâwɛɛ nyii gáa a Díɣâlai. Kpɛ́ni fêi ŋá gɛ̀ dí lí kɔ-soŋ laa su lɔii-ŋuŋ da kpɛ́ni su, ŋá ŋɔ́nɔ gɛ́ dí pá pôlu díkpɔ̂ɔi lɔii su. Ḿve pâi ǹɛɛ̂i naa dí tɔnɔ kpîŋ é lɛ́ɛ lɔii da kpɛ́ni su.

²⁹Ḿve ŋɔ́nɔ pâi ŋ́ɛi loôi Eezuɛ-ƃelai dîa. Kɛ́lɛ ŋa pâi gɛ́i ŋá mɔ̃leŋ é kɛ́ dípôlu va kula naa. Ńyãai ŋ́gaa a Ŋ̀wála-wâla kélee Yâwɛɛi ńyãa ƃé mò tí.”