Read Kpelle Izikiɛ 40 Bible Online

Izikiɛ 40 - Kpelle bible

Izikiɛ 40

¹È kɛ̀ a kúkɛɛ gɔ-soŋ pere su ŋɔkóraŋ buu-feerɛ káo lɔ́ɔlui, ŋɔfólo puu-ɣelei, nyii kɛ̀ Zerusâlɛŋ kɛ́ɛ da ŋ̀óloi ŋɔkóraŋ puu-kao náaŋ. Maa ɣêle tí-ti ƃé Yâwɛɛ ŋɔmɔ̃lêŋ è ńzîɣe la é lí a ńyãa.

²Ɣâla è ńzîɣe zĩ̂a su é lí a ńyãa Eezuɛ lɔii su. È ńzèe yée kɛ́tɛ tɔnɔ tôŋ su. Tãi ŋá ńduɛ pere kàa lai, ǹaa è kɛ̀ yɛ̂ɛ taa lêe tɔnɔ.

³Tãi è pà la a ńyãa naai, nalôŋ tɔnɔ è kɛ̀ naa nyii gbɛ̀tɛ pere è kɛ̀ yɛ̂ɛ ƃarai. Sɛŋ kɔ̂ɔŋ ɣɛli fɛlɛŋ-fɛlɛŋ da sɛŋ kɔ̂ɔŋ wuru díkɛ̀ ƃò ǹyêei. È kɛ̀ tɔɔ̂-ni ziɣãŋ láƃerei.

⁴Ǹalôŋ è mò ḿâ ǹyɛɛi, “Núu-kpune ǹóŋ, ƃɛ́ káa a ǹɛ́lɛɛ, í íwoli tɔ́ɔ a ǹɛ́lɛɛ m̀ɛnii ma ŋa pâi môi yâi. Dí pà ƃɛ́ a yá a gɛ́ɛ ŋá m̀ɛnii ŋí lɛ́ yâ. M̀ɛnii nyii kélee ya pâi gâai ye gélee kpɔ́ lɛ́ Eezuɛ-ƃelai dîa.”

⁵Nya ƃe ŋá ŋ̀âla-pɛrɛ kɛ́tɛi kàa siɣaŋ tínaŋɔɔ mà. Ǹalôŋ è zɛŋ kɔ̂ɔŋ wurui sîɣe nyii ŋɔkôyaa è kɛ̀ a núu kɔ́ɔ ƃɔ́rɔnii puui è bɛ́rɛ kaŋ kɔ̂ɔŋ la. Bɛ́rɛ kaŋ ŋɔkpi-kpi-tilii è kɛ̀ a núu kɔɔ ƃɔ́rɔnii puu, ŋɔmɛi kôyaa kɛ́ ƃò a núu kɔ́ɔ ƃɔ́rɔnii puu.

⁶È lì ziɣãŋ lá nyii kɛ̀ vóloi kulâi perei é tɛ́ ǹuu-tɛ sɛŋ ma. È ziɣãŋ láƃerei pere pɛrɛ kaŋ nyii kɛ̀ vóloi kulâi-perei kɔ̂ɔŋ. Ŋɔkpi-kpi-tili kɛ́ ƃò kɔ́ɔ ƃɔ́rɔnii puu.

⁷Loŋpo-ŋa díkɛ̀ naa ŋ̀âla-pɛrɛi mɛi káa-ƃelai mɛ̂ni ma. Loŋpo-ŋai ŋí dɔnɔ ŋɔkôyaa è kɛ̀ a núu kɔ́ɔ ƃɔ́rɔnii puu, ŋɔmu kɛ̂tɛ kɛ́ ƃò a núu kɔ́ɔ ƃɔ́rɔnii puu. Bɛ́rɛ kaŋ nyii kɛ̀ loŋpo-ŋai ŋí loai dɔnɔ ŋɔkɛ́tɛ è kɛ̀ a núu kɔ́ɔ ƃɔ́rɔnii lɔ́ɔlu mɛi saaƃa. Ya tɛ̀ɛ ŋ̀âla-pɛrɛi mɛi káa-ƃelai dílôŋpo-ŋai dîa, pere è kɛ̀ naa nyii ŋɔkôyaa è kɛ a núu kɔ́ɔ ƃɔ́rɔnii puu. Berei ŋí a kâa tɛ̀ɛ ŋ̀âla-pɛrɛi láƃerei loŋpoi su nyii ǹá è kɛ̀ a zeɛ́ɛ Ŋ̀âla-pɛrɛ Kɛ́tɛi ma perei.

⁸Ǹalôŋ è lôŋpoi nyii kɛ̀ Ŋ̀âla-pɛrɛi ŋɛ́i-tuɛ-pere ziɣãŋ sui kɔ̂ɔŋ gɛ́ ƃò a núu kɔ́ɔ ƃɔ́rɔnii puu-kao náaŋ.

⁹M̀élai nyii kɛ̀ ziɣãŋ láƃerei pere nyii kɛ̀ Ŋ̀âla-pɛrɛ Kɛ́tɛi ma perei è kɛ̀ a núu kɔ́ɔ ƃɔ́rɔnii náaŋ.

¹⁰Ŋ̀âla-pɛrɛi mɛi káa-ƃelai dílôŋpo-ŋai díkɛ̀ bere-ƃelai veerɛŋɔɔ ma saaƃa sáaƃa. Díkelee díkɛ̀ a dípɔriɛɛ a gîe. Bɛ́rɛ-kaŋ-ŋai kɛ́ díloai gélee è kɛ̀ a bɔriɛɛ.

¹¹Nya ƃe è ziɣãŋ láƃerei kɔ̀ɔŋ gɛ̀ ƃò a núu kɔ́ɔ ƃɔ́rɔnii buu-feerɛ káo-feerɛ. Berei kɛ̀ naa loai ŋɔŋa-kɛtɛ è kɛ̀ a núu kɔ́ɔ ƃɔ́rɔnii puu-kao lɔ́ɔlu-mɛi da.

¹²Kâra-ŋa díkɛ̀ ŋ̀âla-pɛrɛi mɛi káa-ƃelai dílôŋpo-ŋai ŋɛ́i-tuɛ nyii-ŋai dímɛi kôyaa è kɛ̀ a iŋse buu-feerɛ, ŋɔŋa-kɛtɛ kɛ́ ƃò a iŋse buu-feerɛ. Ŋ̀âla-pɛrɛi mɛi káa-ƃelai dílôŋpo-ŋai ŋɔmu kɛ̂tɛ da ŋɔmu kôyaa è kɛ̀ a núu kɔ́ɔ ƃɔ́rɔnii puu.

¹³Ǹalôŋ è lôŋpoi veerɛ kɔ̀ɔŋ é síɣe dɔnɔ pôlu pere é naɣîŋ la berei mɛi é seri gbélii pôlu pere. Ŋɔkɛ́tɛ è kɛ̀ a núu kɔ́ɔ ƃɔ́rɔnii buu náaŋ kao-feerɛ.

¹⁴Lôŋpo tɔnɔ è kɛ̀ bɛrɛi láƃerei pôlu pere a daloŋ. Nya ƃe è nàa kɔ̀ɔŋ ŋɔmu kɛ̂tɛ kɛ́ ƃò a núu kɔ́ɔ ƃɔ́rɔnii buu-saaƃa káo náaŋ.

¹⁵È bɛ́rɛi kɔ̀ɔŋ é síɣe ziɣãŋ láƃerei banaŋ ma pere é seri lôŋpoi gbɛɛ-ŋai kɔ́yɛ̃ŋ ma è kɛ̀ a núu kɔ́ɔ ƃɔ́rɔnii buu-lɔ́ɔlu-mɛi saaƃa káo náaŋ.

¹⁶Wôna pɛlɛ-pɛlɛɛ-ŋa díkɛ̀ lôŋpo-ŋai pôlu-pere pɛrɛ-kaŋ ma a tɛ̀ɛ-ŋa. Wôna pɛlɛ-pɛlɛɛ-ŋa díkɛ̀ bɛrɛ-kaŋ nyii kɛ̀ lôŋpo-ŋai loai dîa. Bɛ́rɛ-kaŋ nyii kɛ̀ berei ma perei, mâ è kɛ̀ a bɔyɛ̃ɛ a tóu-laa pɔkɔɔŋ-ŋa lôŋpoi su pere.

¹⁷Ǹaa kɛ́ɛ tíi, ǹalôŋ è tɔ̀ɔ ńduɛ é lí a ńyãa ŋ̀âla-pɛrei ŋɛ́i-tuɛ ziɣãŋ su-pere. Lôŋpo buu-saaƃa è kɛ̀ a gúlaa ziɣãŋ kɛ́tɛi ma. Díkelee díŋɛi túɛ è kɛ̀ a ziaa a kɔni-kayaŋ-ŋa.

¹⁸Gwaa ma siái ŋí è kɛ̀ kpɔ́ ziɣãŋ kɔlɛ ma gwaa kélee. Ziɣãŋ kɛ́tɛi mu è kɛ̀ a doɔ́ɔ ziɣãŋ-loŋ mu-pere.

¹⁹Pere feerɛ ƃé kɛ̀ naa. Ǹalôŋ è ziɣãŋ láƃerei kɔ̀ɔŋ. Ziɣãŋ kɛ́tɛi ƃáƃerei è kɛ̀ a doɔ́ɔ ziɣãŋ loŋ mu. É síɣe ziɣãŋ kɛ́tɛi láƃerei é lí ziɣãŋ lôŋ láƃerei è kɛ̀ a núu kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168).

²⁰Ǹaa kɛ́ɛ tíi, ǹalôŋ è lì é ziɣãŋ nyii kɛ̀ yá-ŋua pere nyii kɛ̀ ŋ̀âla-pɛrɛi pɛ̂rɛ ma-perei ziɣãŋ kɛ́tɛi mai ŋɔŋa kɛ̂tɛ da ŋɔmɛi kôyaai kɔ̂ɔŋ.

²¹È ŋ̀âla-pɛrɛi mɛi káa-ƃelai dílôŋpo lɔ́ɔlu mɛi-dai da ziɣãŋ láƃerei loŋpoi nyii kɛ̀ yá-ŋua perei da bɛ́rɛ-kaŋ nyii kɛ̀ díloai kélee kɔ̀ɔŋ ziɣãŋ láƃerei. Díkelee díkɛ̀ nɔ́ a dípɔriɛɛ da lôŋpo-ŋai nyii-ŋai kɛ̀ vóloi kulâi pere siɣaŋ láƃerei. Ŋɔkôyaa è kɛ̀ a núu kɔ́ɔ ƃɔ̂rɔnii buu-lɔ́ɔlu mɛi-saaƃa káo náaŋ. Ŋɔŋa kɛ̂tɛ kɛ́ ƃò a núu kɔ́ɔ ƃɔ́rɔnii buu náaŋ káo-feerɛ.

²²Gâla-ŋai kɛ̀ lôŋpo-ŋai ŋɛ́i-tuɛi, wôna-ŋai, da dóu pɔkɔɔŋ-ŋai kɛ́ bɛ́rɛ-kaŋ-ŋai mai da vóloi kulâi pere ŋɔ-ŋai díkɛ̀ nɔ́ a dísîi tɔnɔ. Núu tɛ̂i lɔ́ɔlu-mɛi feerɛ ƃé kɛ̀ naa nyii núu a kâa tɛ̀ la gɛ̀ lì ziɣãŋ lá perei. Ŋ̀âla-pɛrɛi ŋɛ́i-tuɛ loŋpoi è kɛ̀ gwaai ŋí ma kpɛɛ ŋa bɛ̂rɛi ŋ̀âla-pɛrɛi ŋɛ́i-tuɛ pere.

²³Pere è kɛ̀ naa é síɣe yá-ŋua pere siɣaŋ lá-pere gɛ́ lì ŋ̀âla-pɛrɛi ŋɛ́i-tuɛ pere yɛ̂ɛ berei nɔ́ è kɛ̀ la a vóloi kulâi pere siɣaŋ lái. Ǹalôŋ è ziɣãŋ feerɛi ŋí loai kɔ̂ɔŋ gɛ̀ ƃò a núu kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168).

²⁴Nya ƃe ǹalôŋ è lì a ńyãa séɣai pere. Kú síɣaŋ tɔ̂nɔ kàa naa. Ǹalôŋ è bɛ́rɛ-kaŋ su pere kɔ̀ɔŋ é seri ŋ̀âla-pɛrɛi láƃerei loŋpoi ma. Díkelee díkɛ̀ a dípɔriɛɛ a gîe da m̀arâai.

²⁵Wôna-ŋa díkɛ̀ nɔ́ loŋpo-ŋai ŋí dîa yɛ̂ɛ berei è kɛ̀ la m̀arâai dîai. Díkôyaa è kɛ̀ a núu kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ, ŋɔŋa kɛ̂tɛ kɛ́ ƃò a núu kɔ́ɔ ƃɔ́rɔnii buu náaŋ káo-feerɛ.

²⁶Núu tɛ̂i lɔ́ɔlu mɛi feerɛ ƃé kɛ̀ naa gɛ́ tɛ̀ naa. Ǹyaŋ, ǹá ƃerei loŋpoi ƃé kɛ̀ gbɛɛ-ŋa ǹá seɛ́ɛ Ŋ̀âla-pɛrɛi pɛ̂rɛ ma pere. Tóu pɔkɔɔŋ kɛ́ ƃò bɛ́rɛ-kaŋ ma bɛ́rɛi mu-pere nyii kɛ̀ berei ma perei.

²⁷Ziɣãŋ laƃerei è kɛ̀ séɣai pere nyii a lí bɛrɛi ŋɛ́i-tuɛ perei. Ǹalôŋ è ziŋaŋ ŋí loai kɔ̂ɔŋ gé ƃò a núu kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168).

²⁸Nya ƃe kwa ǹyaa kú lɔ̀ a séɣai-pere siɣaŋ lá-pere kú lí bɛ́rɛi ŋɛ́i-tuɛ. È séɣai pere siɣaŋ láƃerei kɔ̀ɔŋ. Díkelee díkɛ̀ nɔ́ a dísîi tɔnɔ yɛ̂ɛ berei gáa la banaŋ mâ pere bɛ́rɛi ŋɛ́i-tuɛ pere pɛrɛ kaŋ mai.

²⁹Bɛ́rɛi mɛi-kaa-ƃelai dílôŋpoi, bɛ́rɛi ŋɛ́i túɛ loŋpoi da lôŋpoi loai pɛrɛ kaŋ-ŋai díkɛ̀ nɔ́ a dípɔriɛɛ a díkîe yɛ̂ɛ berei díƃarâai díkɛ̀ lai. Wôna-ŋa díkɛ̀ nɔ́ loŋpo-ŋai ŋí dîa yɛ̂ɛ berei è kɛ̀ la m̀arâai diai. Díkôyaa è kɛ̀ a núu kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ, ŋɔŋa kɛ̂tɛ kɛ̀ ƃò a núu kɔ́ɔ ƃɔ́rɔnii buu-náaŋ káo-feerɛ.

³⁰Lôŋpo-ŋai kɛ̀ bɛ́rɛi mu pere bɛ́rɛi ŋɛ́i-tuɛ perei ŋɔkôyaa è kɛ̀ a núu kɔ́ɔ ƃɔ́rɔnii buu náaŋ káo-feerɛ. Ŋɔŋa kɛ̂tɛ kɛ̀ ƃò a núu kɔ́ɔ ƃɔ́rɔnii lɔ́ɔlu mɛi-saaƃa.

³¹Gwaai ŋí ma láƃerei loŋpoi ŋɛ́i è kɛ̀ a dínaŋɔɔ Ziɣãŋ kɛ́tɛi ma pere bɛ́rɛi láƃerei pere. Bɛ́rɛ-kaŋ m̀élai nyii kɛ̀ berei ma perei è kɛ̀ a maa pɔ̃yɛɛ a tóu pɔkɔɔŋ. Núu tɛ́ sɛŋ lɔ́ɔlu mɛi saaƃa ƃe kɛ̀ naa gɛ̀ tɛ̂ ziɣãŋ lá pere.

³²Nya ƃe kwa ǹalôŋ kú lɔ̀ vóloi kulâi pere siɣaŋ lá kú lí ŋ̀âla-pɛrɛi ŋɛ́i túɛ. Nya ƃe è ziɣãŋ láƃerei kɔ̀ɔŋ. Ǹaa da m̀arâai díkɛ̀ nɔ́ a dípɔriɛɛ.

³³Ŋ̀âla-pɛrɛi mɛi káa-ƃelai dílôŋpo-ŋai, da bɛ́rɛ-kaŋ-ŋai kɛ́ díloai, da bɛ́rɛi ŋɛ́i túɛ loŋpoi díkɛ̀ a dípɔriɛɛ. Wôna-ŋai díkɛ̀ naa é pɛ́lɛ bɛ́rɛi ŋɛ́i túɛ loŋpo ma. Gwaai ŋí ma kélee bu gîe ma ŋɔkôyaa è kɛ̀ a núu kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ. Ŋɔŋa kɛ̂tɛ kɛ́ ƃò a núu kɔ́ɔ ƃɔ́rɔnii buu náaŋ káo feerɛ.

³⁴Gwaai ŋí ma ŋɛ́i-tuɛ loŋpoi lá è kɛ̀ a guláa ziɣãŋ kɛ́tɛi ma pere. Bɛ́rɛ-kaŋ è kɛ̀ a m̀aa pɔ̃yɛɛ a tóu pɔɔkɔŋ m̀éla kélee ma. Núu tɛ̂i lɔ́ɔlu-mɛi saaƃa ƃé kɛ̀ naa gɛ́ lì ziɣãŋ láƃerei.

³⁵Kú ŋɔ́nɔ lì yá-ŋua pere siɣaŋ láƃerei pere nyii kɛ̀ ziɣãŋ su-pere ŋ̀ɔi mai é ǹaa kɔ̂ɔŋ. Ziɣãŋ ŋí da m̀barâai díkɛ̀ nɔ́ a dípɔriɛɛ.

³⁶Ŋ̀âla-pɛrɛi mɛi káa-ƃelai dílôŋpo-ŋai, díloai pɛrɛ-kaŋ-ŋai, da bɛ́rɛi ŋɛ́i túɛ loŋpoi díkɛ̀ a dípɔriɛɛ. Wôna-ŋa díkɛ̀ lôŋpoi-ŋai kélee ma yɛ̂ɛ berei è kɛ̀ la díƃarâai dîai. Gwaai ŋí ma kélee bu gîe ma ŋɔkôyaa è kɛ̀ a núu kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ. Ŋɔŋa kɛ̂tɛ kɛ́ ƃò a núu kɔ́ɔ ƃɔ́rɔnii buu náaŋ káo-feerɛ.

³⁷Bɛ́rɛi láƃerei loŋpoi lá è kɛ̀ gúlaa ziɣãŋ kɛ́tɛi ma pere. Díkɛ a dímaa pɔ̃yɛɛ a tóu pɔɔkɔŋ m̀éla kélee ma. Núu tɛ̂i lɔ́ɔlu-mɛi saaƃa ƃé kɛ̀ naa gɛ̀ tɛ̂ yá-ŋua pere siɣaŋ láƃelei.

³⁸Lôŋpo tɔnɔ è kɛ̀ naa gánaŋɔɔ bɛ́rɛ-kaŋ ma nyii ǹá è kɛ̀ a gúlaa ziɣãŋ kɛ́tɛi ma perei. Gwaai ŋí ma ƃé da kâa géreŋ-sala-sãai maa wâa naa.

³⁹Têƃele náaŋ è kɛ̀ bɛ́rɛi ŋɛ́i túɛ loŋpoi su nyii kɛ̀ ziɣãŋ su-pere ŋ̀ɔi ma yá-ŋua pere. Lôŋpoi ŋí lá è kɛ̀ a gúlaa ziɣãŋ kɛ́tɛi ma pere. Veerɛ è kɛ̀ bɛ́rɛ ƃelai dɔnɔ ma veerɛ kɛ́ ƃò m̀éla gbéli ma. Têƃele-ŋai ŋí ŋá ƃé da kâa daa-tulɛ-ŋai pàa naa kéreŋ-sala, kpaa máŋ sɔnyɔ̂ŋ-sala da sɔnyɔ̂ŋ kula maa sâla mɛni ma.

⁴⁰Têƃele-sii náaŋ ŋí è kɛ̀ lôŋpo-ŋai ŋí kɔlɛ banaŋ mâ pere. Veerɛ è kɛ̀ bɛ́rɛi m̀éla dɔnɔ ma, veerɛ kɛ́ ƃò m̀éla kpéli ma yá-ŋua pere siɣaŋ láƃelei kɔlɛ mâ.

⁴¹Têƃelei kɛ́ naai gélee bu gîe ma è kɛ́ a têƃele lɔ́ɔlu-mɛi saaƃa nyii-ŋai da kâa taa-tulɛ-ŋa pàa díŋa sâla kula mɛni ma. Ǹáaŋ è kɛ̀ banaŋ mâ pere, ǹáaŋ kɛ́ ƃo ziɣãŋ su pere.

⁴²Têƃele náaŋ è kɛ̀ naa nyii dí gbɛ̀tɛ a kɔni ganaŋɔɔ ziɣãŋ ma nyii da kâa kéreŋ-sala kula ŋ̀á. Têƃele-ŋai ŋí dímɛi kôyaa è kɛ̀ a iŋse buu-feerɛ. Díŋa kɛ̂tɛ è kɛ́ a iŋse buu-saaƃa. Ŋɔŋa kôya kɛ́ ƃò a iŋsi buu-saaƃa. Gwaai ŋí mà ƃé da kâa gɔli-sãai nyii-ŋai da kâa zâla-kula taa-tulɛ pâa lai, lâai kɛ̀ naa.

⁴³Káraŋ-ŋa díkɛ a dítinaŋɔɔ têƃele-ŋai dîa. Dímɛi kôyaa è kɛ̀ a iŋse saaƃa zu ƃé da kâa zâla-suai lúu pú naa.

⁴⁴Nya ƃe kwa ǹyaa kú lɔ̀ ziɣãŋ su. Lôŋpo feerɛ è kɛ̀ naa nyii-ŋai kɛ̀ a díla kuláa bɛ́rɛi mu pere. Díkɛ díkîe ni kɔlɛ. Dɔnɔ lá è kɛ̀ a kuláa séɣai pere siɣaŋ lá pere gbéli lá kuláa yá-ŋua pere siɣaŋ lá pere. Díkɛ̀ díkîe-ni téniŋ ma.

⁴⁵È mò ḿâ a gɛɛ lôŋpoi nyii ǹá kulâai séɣai perei, gáa a zâla láa-soŋ-ƃelai nyii-ŋai da tíi kɛ̀ Ŋ̀âla-pɛrɛ Kɛ́tɛi mui pɔ́ɔ.

⁴⁶Nyii ǹá kulâai yá-ŋua perei gáa a zâla-laa-soŋ-ƃelai nyii-ŋai da tíi kɛ̀ ŋ̀âla-teƃelei mai pɔ́ɔ. Ǹûai ŋí ƃé díkaa a Zadɔɔ ǹônii-sinaai nyii-ŋai díkaa a Liva ǹônii-sinaai sáma nyii-ŋai nɔ́ ƃé da pɔ̂ri pâi Yâwɛɛ ŋɛ́i-tuɛ a gɛɛ dítii kɛ́ mì.

⁴⁷Ǹalôŋ è ziɣãŋ su-pere siɣaŋ su-pere kɔ̀ɔŋ gɛ́ ƃò a kɔ́ɔ ƃɔ̂rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168) m̀éla kélee ma. Ɣâla-teƃele è kɛ̀ tɔɔ̂ni Ŋ̀âla-pɛrɛ Kɛ́tɛi ŋɛ́i-tuɛ.

⁴⁸Nya ƃe kú lì Ŋ̀âla-pɛrɛ Kɛ́tɛi láƃerei loŋpoi su é ǹá-ƃerei kɔ̂ɔŋ ŋɔŋa kɛ̂tɛ kɛ́ ƃò kɔ́ɔ ƃɔ́rɔnii lɔ́ɔlu-mɛi saaƃa ŋɔŋa kɛ̂tɛ kɛ́ ƃò a kɔ́ɔ ƃɔ́rɔnii buu-feerɛ káo náaŋ. Bɛ́rɛ-kaŋ ŋɔkpi-kpi tiliɛɛ è kɛ̀ a kɔ́ɔ ƃɔ́rɔnii náaŋ.

⁴⁹È bɛ́rɛi láƃerei loŋpoi kɔ̂ɔŋ ŋɔŋa kɛ̂tɛ ƃɛ́ ƃò a núu kɔ́ɔ ƃɔ́rɔnii buu saaƃa káo náaŋ. Ŋɔkôya kɛ́ ƃò a núu kɔ́ɔ ƃɔ́rɔnii buu feerɛ. Núu tɛ́ sɛŋ puu è kɛ̀ naa bɛ́rɛi láƃerei. Pɛ́rɛ-yée mu wuru-ŋa díkɛ̀ ǹúu tɛ́-sãai ŋí m̀éla feerɛ ma.