Read Kpelle Izikiɛ 41 Bible Online

Izikiɛ 41 - Kpelle bible

Izikiɛ 41

¹Naa kɛ́ɛ tíi, kwa ǹalôŋ kú nâa lɔ̀ Ŋ̀âla-pɛrɛ Kɛ́tɛi mu. È nâa gbôŋ láƃerei kɔ̂ɔŋ. Ŋɔkôyaa è kɛ̀ a kɔ́ɔ ƃɔ́rɔnii puu.

²Ŋɔŋa kɛ̂tɛ kɛ́ ƃò a kɔ́ɔ ƃɔ́rɔnii puu kao-lɔ́ɔlu mɛi-saaƃa. Bɛlɛ-kaŋ feerɛi kɛ̀ gɔlɛi dɔnɔ ŋɔkpi-kpi-tiliɛɛ è kɛ̀ a kɔ́ɔ ƃɔ́rɔnii lɔ́ɔlu-mɛi-saaƃa. È Ŋ̀âla-pɛrɛi mu ƃɛ́i da kɛ̂ ma gwaa maa waaai kɔ̀ɔŋ. Ŋɔkôyaa è kɛ̀ a kɔ́ɔ ƃɔ́rɔnii buu-lɔ́ɔlu mɛi da kao-lɔ́ɔlu mɛi saaƃa, ŋɔmu kɛ̂tɛ kɛ́ ƃò a kɔ́ɔ ƃɔ́rɔnii buu-saaƃa kao-náaŋ.

³Ǹaa pôlu ma, è lɔ̀ loŋpoi su pere ŋɔi su è gboŋ láƃerei kɔ̂ɔŋ. Ŋɔmu sîɣe è kɛ̀ kɔ́ɔ ƃɔ́rɔnii saaƃa. Ŋɔŋa kɛtɛ è kɛ̀ kɔ́ɔ ƃɔ́rɔnii puu. Bɛrɛ-kaŋ nyii kɛ̀ m̀ela feerɛ mai díkpi-kpi tiliɛɛ è kɛ̀ a kɔ́ɔ ƃɔ́rɔnii puu-kao feerɛ.

⁴È Ŋ̀âla-pɛrɛi mu ƃɛ́i da kɛ̂ ma gwaa maa waai ŋɔkwaa maa waai naa kɔ̀ɔŋ gɛ́ ƃò a kɔ́ɔ ƃɔ́rɔnii buu-saaƃa kao-náaŋ m̀éla kélee ma. Loŋpoi ŋí è kɛ̀ gwaai ma da kɛ̂ ma gwaa maa waai pôlu-pere. È mò m̀â, “Gwaai ŋí m̀â ƃa Gwaa-maa-waai ŋɔkwaa maa waai.”

⁵Nya ƃe è Ŋ̀âla-pɛrɛ Kɛ́tɛi kaŋ kɔ̂ɔŋ. Ŋɔkpi-kpi-tilii è kɛ̀ a kɔ́ɔ ƃɔ́rɔnii púu. Loŋpo-ŋa díkɛ a dítinaŋɔɔ Ŋ̀âla-pɛrɛi gaŋ ma bɛrɛi mu pere ténaŋ ma. Loŋpo-ŋai ŋí dɔnɔ ŋɔkɛ́tɛ è kɛ̀ a kɔ́ɔ ƃɔ́rɔnii lɔ́ɔlu-mɛi feerɛ.

⁶Loŋpo-ŋai ŋí díkɛ díkîe mɛi saaƃa. Loŋpoi kɛ̀ naai gelee bu gîe ma è kɛ̀ a loŋpo buu-lɔ́ɔlu mɛi náaŋ. Buu saaƃa è kɛ mu-pere, buu saaƃa kɛ́ ƃo ǹaa sâmai, buu saaƃai gbeli kɛ́ ƃò m̀ɛi-pere. Loŋpo-ŋai ŋí dífe kɛ̀ ni a díkanaŋɔɔ Ŋ̀âla-pɛrɛi kaŋ ma. Loŋpo-ŋai ŋí buu saaƃai kɛ̀ gélee mɛi-pere díkɛ̀ a mu kɛ́tɛ dí tɛ́ɛ zâmai ŋɔ-ŋai dîa. Zâmai ŋɔ-ŋai diaŋ dí mu kɛ́tɛ dí tɛ́ɛ mu-pere ŋɔ-ŋai dîa Loŋpo-ŋai ŋí kélee dí kɛ̀ a díkanaŋɔɔ Ŋ̀âla-pɛrɛi kaŋ ma.

⁷Nyíŋi è gɛ̀ loŋpo-ŋai mu kɛ́tɛɛ é tɛ́ɛ gîe ni dîa é síɣe mu-pere é tɛ́ m̀ɛi-pere. Núu tɛ́-sɛŋ è kɛ̀ naa Ŋ̀âla-pɛrɛi kaŋ ma banaŋ mâ pere. M̀ɛni ma, núu a kâa tɛ̀ɛ loŋpoi sâmai ŋ̀ɔ́i su é lɛ́ɛ tɛ̂i m̀ɛi-pere ŋ̀ɔ́i su.

⁸Ŋá gàa a gɛɛ Ŋ̀âla-pɛrɛ Kɛ́tɛi kɔ́ɔ mu è kɛ̀ a dɛɛ ɣelêi da loŋpo-ŋai kɛ̀ gɔ̀lɛ mai dímɛi kôya kɛ́ ƃò a kɔ́ɔ ƃɔ́rɔniii puu.

⁹Bɛ́rɛ kaŋ nyii kɛ̀ loŋpo-ŋai ŋí mai díkpi-kpi-tilii è kɛ̀ a kɔ́ɔ ƃɔ́rɔnii lɔ́ɔlu-mɛi saaƃa. Sɛŋ da fé kɛ́ ní bɛ́rɛi ŋi da ziɣãŋ su-pere ŋɔi díloai. È nàa kɔ̀ɔŋ ŋɔŋa kɛ̂tɛ kɛ́ ƃò a kɔ́ɔ ƃɔ́rɔnii buu saaƃa káo-naaŋ.

¹¹Loŋpo-ŋai kɛ̀ bɛrɛi kɔlɛ mai láƃerei è kɛ̀ a guláa ziɣãŋ ma-pere. Gbôŋ dɔnɔ lá è kɛ̀ a guláa yá-ŋua-pere, gbéli lá kuláa séɣai-pere. Gwaai ŋí ma loai, pere è kɛ̀ naa nyii ŋɔŋa kɛ̂tɛ è kɛ̀ a kɔ́ɔ ƃɔ́rɔniii lɔ́ɔlu mɛi saaƃa dínaŋɔɔ bɛ́rɛi ma.

¹²Bɛ́rɛi nyii kɛ̀ a guláa Ŋ̀âla-pɛrɛi m̀a pere nyii kɛ̀ vóloi liî-perei, ŋɔkôya è kɛ̀ a kɔ́ɔ ƃɔ́rɔnii ŋuŋ tɔ̂nɔ pôlu lɔ́ɔlu (150), ŋɔmu-kɛ̂tɛ kɛ́ ƃó a kɔ́ɔ ƃɔ́rɔnii ŋuŋ tɔ̂nɔ pôlu puu káo lɔ́ɔlu mɛi-da (116). Bɛ́rɛi ŋí kaŋ ŋɔkpi-kpi-tilii è kɛ̀ a kɔ́ɔ ƃɔ́rɔnii lɔ́ɔlu-mɛi saaƃa é tínaŋ ma.

¹³Nya ƃe ǹalôŋ è Ŋ̀âla-pɛrɛ kɔ̂ɔŋ banaŋ ma pere. Ŋɔkôya è kɛ̀ a kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168). È ŋɔ́nɔ Ŋ̀âla-pɛrɛ Kɛ́tɛi pôlu pere kɔ̀ɔŋ é síɣe naa é tóo bɛ́rɛi kɛ̀ vóloi liîi-pere pɛrɛi pôlu gɛ́ ƃò a kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168).

¹⁴È Ŋ̀âla-pɛrɛi ŋɛ́i túɛ-pere kɔ̀ɔŋ é síɣe yá-ŋua pere é lí séɣai-pere gɛ́ ƃò a kɔ́ɔ ƃɔ́rɔnii buu lɔ́ɔlu mɛi-da káo lɔ́ɔlu mɛi saaƃa (168).

¹⁵Ǹalôŋ è bɛ́rɛi nyii kɛ̀ vóloi liî perei kɔ̂ɔŋ da gɔlɛ ma loŋpo-ŋai. Ǹaa kélee è kɛ̀ a kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168). Ŋ̀âla-pɛrɛi láƃerei loŋpoi, gwaa-ma-waai, da gwaa-ma-waai ŋɔkwaa maa-waai,

¹⁶gélee è kɛ̀ a gbɛtɛɛ a wuru-ƃela-ŋa é siɣe ǹɔii ma é tɛ́ wônai la.

¹⁷Ŋ̀âla-pɛrɛi mú-pere gwaa kélee mâ é siɣe ǹɔii ma é tɛ́ gbôŋ mɛi è kɛ̀ a bɔyɛ̃ɛ a ɣâla-taa-kôoŋ sãa da tóu-pɔɔkɔŋ.

¹⁸Tóu-wuru tɔnɔ pɔɔkɔŋ è kɛ̀ ŋ̀âla-taa kôoŋ sãai veerɛ pɔɔkɔ̂ŋ loai. Ŋ̀âla-taa kôoŋ sɛŋ dɔnɔ ŋɛ́i è kɛ̀ kwaa feerɛ ma.

¹⁹Ŋ̀ɛ́i dɔnɔ è kɛ̀ kɛ́ yɛ̂ɛ núu dinaŋɔɔ dóui dɔnɔ ma, gbeli kɛ́ ƃo yɛ̂ɛ yala-sulu-loŋ dínaŋɔɔ dóui dɔnɔ ma m̀elai gbeli ma pere. Bɔɔkɔŋ-ŋai ŋí díkɛ̀ a dítinaŋɔɔ Ŋ̀âla-pɛrɛi mu gwaa kélee ma bîlaŋɔɔ gîe ma.

²⁰Ŋ̀âla-taa kôoŋ sɛŋ da dóui dí pɔɔkɔŋ è kɛ̀ a gbɛtɛɛ dinaŋɔɔ bɛrɛ kaŋ m̀â bɛrɛ mu pere, é siɣe ǹɔii ma é tɛ́ gbóŋ mɛi.

²¹Gboŋ soŋ wurui kɛ̀ gwaa-ma-waai láƃerei m̀ela feerɛ è kɛ̀ a bɔriɛɛ a gîe. Sɛŋ da è kɛ̀ Gwaa-maa-waa ŋɔkwaa maa-waai ma ŋɛ́i-tuɛ gɛ́ ƃò yɛ̂ɛ,

²²ɣâla-teƃele nyii dí gbɛtɛ a wúrii. Ŋɔmu-sîɣe è kɛ̀ a kɔ́ɔ ƃɔ́rɔnii lɔ́ɔlu, ŋɔŋa kɛ̂tɛ kɛ̀ ƃò a kɔ́ɔ ƃɔ́rɔnii saaƃa, ŋɔŋa kôya kɛ́ ƃò a kɔ́ɔ ƃɔ́rɔniii saaƃa. Zôwoŋ-su, gɔ̀ɔ pîlanii, da bɛ́rɛ ma díkelee díkɛ a wúru. Ǹalôŋ è mò ḿâ ǹyɛɛi, “Têƃelei ŋí ƃé gáa tɔɔ̂ni Yâwɛɛ ŋɛ́i-tuɛ.”

²³Kpôŋ feerɛ è kɛ̀ gwaa-ma-waai láƃerei, veerɛ kɛ́ ƃò Gwaa ma waai ŋɔkwaa ma waai láƃerei.

²⁴Gbôŋ-ŋai ŋí díkɛ̀ a kpôŋ ƃela feerɛ. Ǹá a kâa ƃò zâmai gɛ̀ lí gɛ̀ pà pôlu.

²⁵Ɣâla-taa kôoŋ sɛŋ da tóu dí pɔɔkɔŋ è kɛ̀ gbôŋ mâ gwaa ma waai láƃerei yɛ̂ɛ berei nɔ́ è kɛ̀ la bɛrɛ kaŋ mâ bɛrɛi mu perei. Ya kɛ̀ lɔ̂i Gwaa ma waai ma, gbôŋ mɛi pere è kɛ̀ a bálaa a wúru ƃela.

²⁶Wôna-ŋa dí kɛ̀ Ŋ̀âla-pɛrɛ ŋɛ́i tuɛ loŋpoi mâ gaŋ ma pɔ̃yɛɛ a tóu pɔɔkɔŋ.