Read Kpelle Izikiɛ 42 Bible Online

Izikiɛ 42 - Kpelle bible

Izikiɛ 42

¹Nya ƃe kwa ǹalôŋ kú kùla banaŋ ma ziɣãŋ kɛ́tɛi su kú lí yá-ŋua pere ƃelai ma. Kú lì ƃɛ́i lôŋpo-ŋa díkɛ̀ naa nyii-ŋai kɛ̀ Ŋ̀âla-pɛrɛi téniŋ ma banaŋ mâ perei. Lôŋpo-ŋai ŋí díkɛ̀ bɛ́rɛi nyii kɛ̀ vóloi liî pere pɛrɛ-ƃelai téniŋ ma.

²È bɛ́rɛi ŋí kɔ̀ɔŋ ŋɔkôya kɛ́ ƃò a kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168). Ŋɔmu kɛ̂tɛ kɛ́ ƃò a kɔ́ɔ ƃɔ́rɔnii buu lɔ́ɔlu mɛi saaƃa káo náaŋ.

³Pɛ́rɛ tɔnɔ è kɛ̀ tɔɔ̂-ni naa Ŋ̀âla-pɛrɛi kɔlɛ. Da Ŋ̀âla-pɛrɛi díloai è kɛ̀ a kɔ́ɔ ƃɔ́rɔnii buu-saaƃa káo náaŋ. Bɛ́rɛi ŋí è kɛ̀ a dɔɔ́ gîe mɛi saaƃa. Pere è gɔlɛ ma nyii kɛ̀ a dínaŋɔɔ Ŋ̀âla-pɛrɛi ma ziɣãŋ kɛ́tɛi su.

⁴Bɛ́rɛi ŋí láƃerei è kɛ̀ a guláa yá-ŋua pere. Pere è kɛ̀ bɛ́rɛi ŋí ŋɔyá-ŋua pere ƃelai ma nyii ŋɔŋa kɛ̂tɛ è kɛ̀ a kɔ́ɔ ƃɔ́rɔnii púu-kao lɔ́ɔlu-mɛi da. Ŋɔkôya è kɛ̀ a kɔ́ɔ ƃɔ́rɔnii ŋuŋ tɔ̂nɔ pôlu buu lɔ́ɔlu mɛi-da káo lɔ́ɔlu mɛi saaƃa (168). Lôŋpo-ŋai ŋí lá è kɛ̀ a guláa yá-ŋua pere.

⁵Lôŋpo-ŋai kɛ̀ mɛi-perei díkɛ a dípɛlɛɛ-pɛlɛɛ é tɛ́ɛ mu-pere da zâamai ŋɔi ma. Kpɛ́ni fêi dílôŋpoi mɛ́i-pere ŋɔ-ŋai tuãŋ pôlu pere a da-loŋ.

⁶Lôŋpoi-ŋai ŋí yée-mu wuru fé kɛ́ ni mà yɛ̂ɛ nyii-ŋai kɛ̀ Ŋ̀âla-pɛrɛi Kɛ́tɛi kɔlɛi dí kɛ̀ lai.

⁷Pɛ́rɛ-kâŋ tɔnɔ è kɛ̀ naa ziaa a lôŋpo-ŋai kóo. Ŋɔkôya è kɛ̀ a kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ gɛ́ lì banaŋ mâ pere.

⁸Lôŋpoi nyii-ŋai kɛ̀ banaŋ mâ perei díkelee díkôya è kɛ̀ a kɔ́ɔ ƃɔ́rɔnii buu-lɔ́ɔlu mɛi-saaƃa káo náaŋ. Kɛ́lɛ, lôŋpoi nyii-ŋai kɛ̀ Ŋ̀âla-pɛrɛi téniŋ mai, díkôya è kɛ̀ a kɔ́ɔ ƃɔ́rɔnii buu lɔ́ɔlu mɛi-da káo lɔ́ɔlu mɛi saaƃa (168).

⁹Pɛ́rɛ láƃerei tɔnɔ è kɛ̀ vóloi kulâi pere loŋpo-ŋai ŋí mu-pere nyii núu a kâa tɛ̀ɛ ǹaa pere gɛ́ lɔ̀ bɛ́rɛi mu-perei.

¹⁰Gwaai ŋí ma pere ƃé banaŋ mâ pere pɛrɛ-kaŋ kɔ́ɔ è pilaŋ naa. Lôŋpo-ŋa díkɛ̀ séɣai-pere pɛrɛ-ƃelai mâ pere díkɛ ƃò bɛ́rɛi nyii kɛ̀ vóloi liî pere pɛrɛ-ƃelai téniŋ ma.

¹¹Pere è kɛ̀ dí ŋɛ́i-tuɛ. Lôŋpo-ŋai ŋí díkɛ̀ nɔ́ yɛ̂ɛ nyii-ŋai kɛ̀ yá-ŋua-perei. Díkelee díkɛ̀ nɔ́ a dípɔriɛɛ a gîe.

¹²Pɛ́rɛ láƃerei tɔnɔ è kɛ̀ séɣai-pere loŋpo-ŋai mu-pere nyii kɛ̀ vóloi kulâi perei. Berei ŋí a kâa lì ƃɛ́i bɛ́rɛ-kaŋ kɔ́ɔ è pìlaŋ naai.

¹³Nya ƃe ǹalôŋ è mò ḿâ ǹyɛɛi, “Lôŋpoi nyii-ŋai díkaa yá-ŋua da séɣai-perei bɛ́rɛi ŋɛ́i tuɛ pere téniŋ mai dímaa waâi. Gwaai ŋí ma ƃé zâla láa-soŋ-ƃelai nyii-ŋai da pâ Yâwɛɛ ŋɛ́i-tuɛi da pâi zâla-sãa maa-waai miî naa. Gwaai ŋí ma ƃé da pâi zâla-sãa maa-waa kɛ́ɛ yɛ̂ɛ mii-sɛŋ sama-sɛŋ, sɔnyɔ̂ŋ sama-sɛŋ, da sama-sɛŋ nyii da dɛ̀ɛ a sɔnyɔ̂ŋ kula maa ŋa-see kɛɛi. Kpɛ́ni fêi gwaai ŋí mà m̀aa waâi.

¹⁴Tãi zâla láa-soŋ-ƃelai da kpɛ̂ɛ la a tíi kɛ́ɛ Yâwɛɛ ŋɛ́i-tuɛ, da kɛ̀ ŋ̀wɛ̂li a gɛɛ dí lí ǹûai pɔ́ naa banaŋ mâ, fɛ̂ɛ dí díseɣe maa-waa-ŋai lɛ́ɛ gwaai ŋí ma dílɛɛ pâi kulâi ǹûai pɔ́ naa. Gáa a sɛŋ dí seɣe da kpɛ́ni-ŋa tòo dîa dílɛɛ pâi lɛɣɛ̂i a ǹûai.”

¹⁵Tãi ǹalôŋ è nâa kpɛ̀ɛ la a Ŋ̀âla-pɛrɛi mu pere kɔ̂ɔŋɔɔ lai, kwa ǹyaa kúkula ziɣãŋ lá pere nyii kɛ̀ vóloi kulâi perei. Nya ƃe è banaŋ mâ pere kɔ̀ɔŋ.

¹⁶Ǹalôŋ è zɛŋ kɔ̂ɔŋ-wurui sîɣe é ziɣãŋ kɛ́tɛi m̀élai nyii kɛ̀ vóloi kulâi perei kɔ̂ɔŋ la. Ǹaa è kɛ̀ a kɔ́ɔ ƃɔ́rɔnîi ŋuŋ lɔ́ɔlu mɛi saaƃa pôlu buu náaŋ (840).

¹⁷È tìnaŋ é yá-ŋua pere ziɣãŋ kɛ́tɛi m̀éla nyii kɛ̀ yá-ŋua pere kɔ̂ɔŋ a zɛŋ kɔ̂ɔŋ sɛŋ gɛ̀ ƃò a kɔ́ɔ ƃɔ́rɔnîi ŋuŋ lɔ́ɔlu mɛi saaƃa pôlu buu náaŋ (840).

¹⁸È ŋɔ́nɔ tìnaŋ é séɣai pere siɣaŋ-ƃelai kɔ̂ɔŋ a zɛŋ kɔ̂ɔŋ sɛŋ gɛ́ ƃò a kɔ́ɔ ƃɔ́rɔnîi ŋuŋ lɔ́ɔlu mɛi saaƃa pôlu buu náaŋ (840).

¹⁹Ǹaa pôlu ma, è ŋɔ́nɔ tìnaŋ é fólo lîi-pere siɣaŋ-ƃelai mâ kɔ̂ɔŋ a zɛŋ kɔ̂ɔŋ sɛŋ. Ǹaa pere è kɛ̀ a kɔɔ ƃɔ́rɔnii ŋuŋ lɔ́ɔlu mɛi saaƃa pôlu buu náaŋ (840).

²⁰Ǹalôŋ è ziɣãŋ m̀éla naaŋɔɔ ma kɔ̀ɔŋ ǹaa kɛ́ ƃó a kɔ́ɔ ƃɔ́rɔnîi ŋuŋ lɔ́ɔlu mɛi saaƃa pôlu buu náaŋ (840) m̀éla kélee ma. Pɛ́rɛ-kâŋ è kɛ̀ naa nyii gwaa-ma-waa da ƃɛ́i ǹaa maa fé kɛ́ ní a maa-waai ŋá kɔlɛi.