Read Kpelle Izikiɛ 43 Bible Online

Izikiɛ 43 - Kpelle bible

Izikiɛ 43

¹Ǹaa pôlu ma, kwa ǹalôŋ kú lène pôlu vóloi kulâi pere siɣaŋ lá pere.

²Nya ƃe ŋá Eezuɛ Ɣalai ŋɔfólo-laai kâa é kúla vóloi kulâi pere. Bá tîŋ è kɛ̀ yɛ̂ɛ yá támaa ɣilîŋ tìŋ. Ŋɔfólo-laai è ǹɔii mâ pòno.

³Ǹyaŋ zĩ̂ai ŋá gàai è kɛ̀ yɛ̂ɛ zĩ̂ai nyii ŋá gàa a tãi è pà la a gɛɛ é Zerusâlɛŋ taa-leei su karai. È kɛ̀ nɔ́ yɛ̂ɛ zĩ̂ai nyii ŋá wɔ́lɔ gàa Siƃa-ya-leei kɔlɛi. Nya ƃe ŋá ŋuŋ mâ pîlaŋ ǹɔii ma.

⁴Yâwɛɛ ŋɔfólo-laai è nâa tɛ̀ɛ vóloi kulâi pere seɣaŋ lá pere é lɔ́ Ŋ̀âla-pɛrɛi Kɛ́tɛi mu.

⁵Nya ƃe Yâwɛɛ ŋɔmɔ̂leŋ è ŋ́zie é lɔ́ a ńyãa ziɣãŋ su-pere ŋ̀ɔi su. Yâwɛɛ ŋɔfólo-laai è kɛ̀ kpɔ́ a Ŋ̀âla-pɛrɛ Kɛ́tɛi láa fɛ́ɛ.

⁶Ǹalôŋ è kɛ̀ tɔɔ̂-ni naa ŋ́gɔlɛ ma. Nya ƃe Yâwɛɛ è mò ḿâ ǹyɛɛi,

⁷“Núu-kpune ǹóŋ, gwaai ŋí ma ƃa ŋá kâloŋ sèe-sɛŋ ŋá. Ŋ́gɔɔ tɔɔ̂i ká ŋí. Ƃɛ́ ƃé ŋa pâi kɛ̂i naa Eezuɛ-ŋai sáma wɔ́lɔ-wɔɔ da wɔlɔ-wɔlɔ. Ǹyaŋ Eezuɛ-ŋai dífe ŋɔ́nɔ pâi ńaa maa-waai maa tĩa karâi. Dia, kpaa máŋ gâloŋ-ŋai dífe ŋɔ́nɔ pâi ḿaa tĩa karâi a ɣâla da kpɛ́ni fɛliɛɛ kpaa máŋ a kâloŋ-ŋa pɔɔkɔŋ tɔɔ́ naa.

⁸Eezuɛ kaloŋ-ŋai dí dípɛrɛ-ŋai lɛ̂ɛ a ŋá-pɛrɛi. Pɛ́rɛ kâŋ nɔ́ ƃé kɛ̀ kúloai. Dí dípɛrɛ-ŋai láƃerei kùla ŋ́ɔ̂i kɔlɛ ma dí díkpôŋ-ŋai lá kúla ŋápɛrɛi láƃerei kɔlɛ ma. Ǹûai ŋí ni da ŋápɛrɛi maa-waai maa tĩa kara a m̀ɛni nyɔ́mɔɔ-ŋai da gɛ̀i. M̀ɛni ma, ŋá ńii ŋwàna dîa ŋá dí su kàra.

⁹Tɔɔ dí díɣâla-pɔkɔɔŋ-ŋai da díkâloŋ-ŋai pɔkɔ̂ɔŋ kúla ŋɛ́i tuɛ. Gɛ̀ ní ŋa pâi kɛ̂i dísama wɔ́lɔ-wɔlɔ da wɔlɔ-wɔlɔ.

¹⁰“Núu-kpune ǹóŋ, Ŋ̀âla-pɛrɛ Kɛ́tɛi tɔ́ɔ pere maa mɛni ŋáa lɛ́ ǹûai dîa a gɛɛ dí ŋumɛ dísɔnyɔ̂ŋ-ŋai mɛni ma.

¹¹Tãi da pâi ŋûmɛi lai, gɛ̀ ní bɛ́rɛi tɔɔ pere maa pɔɔkɔŋ lɛ́ dîa. Ziɣãŋ laƃerei lɛ́ dîa da m̀ɛni-ŋai kélee bîlaŋɔɔi ŋ̀âla-pɛrɛi tɔɔ mɛ̂ni mai. À kɛ̀ tí, dɔ̂ŋ-ŋai kélee lɛ́ dîa. Bɔyɛɛ díŋɛ́i túɛ a gɛɛ dí m̀ɛi káa dí m̀ɛni-ŋai kɛ́ nyii dɔ̂ŋ a gɛ̀ dîɛi.

¹²Ŋ̀âla-pɛrɛ Kɛ́tɛi ŋɔtɔ̂ŋ ká ŋí: Ǹyéei tôŋ su gɔlɛ mâ kélee é tínaŋ m̀a, maa waai. Ŋ̀âla-pɛrɛ Kɛ́tɛi ŋɔtɔ̂ŋ ká ŋí.”

¹³È ŋ̀âla-teƃelei kɔ̀ɔŋ a zɛŋ-kɔ̂ɔŋ sɛŋ tɔnɔi nyii è ŋ̀âla-pɛrɛi mu kɔ̀ɔŋ lai. Lóa è kɛ̀ a dínaŋɔɔ ŋ̀âla-teƃelei mâ. Ǹóai ŋí siŋɔɔ è kɛ̀ a iŋse buu-feerɛ. Ŋɔŋa kɛ̂tɛ è kɛ̀ a iŋse buu-feerɛ. Káraŋ è kɛ̀ a dínaŋɔɔ ŋ̀óli lá nyii ŋɔmɛi kôya è kɛ̀ a iŋse puu.

¹⁴Ŋ̀âla-teƃelei è kɛ̀ a ŋa kɔlɛɛ gîei saaƃa. É síɣe ǹóai ma ŋ̀âla-teƃelei kɔ́ɔ mu é tɛ́ ǹaa mɛi pere è kɛ̀ a kɔ́ɔ ƃɔ́rɔnii náaŋ. Veerɛ ɣelei ŋɔmɛi kôya è kɛ̀ a kɔ́ɔ ƃɔ́rɔnii lɔ́ɔlu mɛi-saaƃa. Mu-pere ŋ̀ɔi ŋɔŋa kɛ̂tɛ è kɛ̀ a iŋse buu feerɛ é tɛ́ɛ mɛi-pere ŋ̀ɔi ma. Gbɛɛ-ŋai ŋɔmɛi kôya è a kɔ́ɔ ƃɔ́rɔnii lɔ́ɔlu mɛi-saaƃa. Zâmai ŋ̀ɔi ŋɔkɛ̂tɛ è kɛ̀ a iŋse buu feerɛ m̀éla kélee ma é tɛ́ɛ mɛi-pere ŋ̀ɔi ma.

¹⁵Ŋ̀âla-teƃelei ŋá è kɛ̀ a kɔ́ɔ ƃɔ́rɔnii lɔ́ɔlu mɛi feerɛ. Ŋ̀âla-teƃelei mĩla è kɛ̀ m̀éla ǹaaŋɔɔ ma dɔɔ́ zôŋo ǹaaŋɔɔ su.

¹⁶Ŋ̀âla-teƃelei mɛi-pere ŋ̀ɔi ŋɔŋa kɛ̂tɛ è kɛ̀ kɔ́ɔ ƃɔ́rɔnii buu-feerɛ m̀éla kélee ma.

¹⁷Ŋ̀âla-teƃelei zâmai ŋ̀ɔi ŋɔŋa kɛ̂tɛ è kɛ̀ kɔ́ɔ ƃɔ́rɔnii buu-feerɛ káo náaŋ bɔriɛɛ m̀éla kélee ma. Káraŋ è kɛ̀ a dínaŋɔɔ ma nyii ŋɔmɛi kôya è kɛ̀ a iŋse puu. Ǹóai kɛ̀ a dínaŋɔɔ mai ŋɔŋa kɛ̂tɛ è kɛ̀ a iŋse buu-feerɛ. Núu tɛ̂i è kɛ̀ ŋ̀âla-teƃelei ma nyii kɛ̀ vóloi kulâi perei.

¹⁸Ŋ̀wála-wâla kélee Yâwɛɛi è mò ḿâ ǹyɛɛi, “Núu kpune ǹóŋ, íwoli tɔ́ɔ ḿâ. Ŋ̀âla-teƃelei ŋɔtɔ̂ŋ-ŋai ká ŋí. Tãi ka pâi ŋ̀âla-teƃelei tɔɔ̂i lai, kéreŋ-sala kula ŋa, kákɛ ŋãa kpɛ̂mɛŋ ŋa ḿɛni mai, ka ŋ̀âla-teƃelei kóraŋ ƃó.

¹⁹Ńyãai a Ŋ̀wála-wâla kélee Yâwɛɛ ŋa môi yâ a gɛɛ zâla láa-soŋ-ƃelai nyii-ŋai díkaa a Liiva ŋɔsuui su-ƃelai nyii-ŋai díkaa a Zadɔ ǹônii dîa nɔ́ ƃé dí pá ŋɛ́i-tuɛ a gɛɛ dítii kɛ́ ḿî. Ka niŋa sîrɛ-loŋ tɛɛ dí pɔ́ a gɛɛ dí sɔnyɔ̂ŋ-sala kula la.

²⁰Ka ŋ̀ãa da siɣe ká gbɛ́mɛŋ ŋ̀âla-teƃelei mĩla-ŋai dîa, ká da kpɛ́mɛŋ dísôŋo ǹaaŋɔɔ su ká dínaŋ ŋ̀óli la. Bere-sii ŋí ƃé ka pâi ŋ̀âla-teƃelei maa wâai la ká góraŋ ƃó ḿî.

²¹À kɛ̀ ti, ká ǹiŋa sîrɛi síɣe nyii ka pâi gulâi a sɔnyɔ̂ŋ salai. Ka géreŋ ƃɛ́i maa nɛ̃ɛi ká géreŋ naa Ŋ̀âla-pɛrɛ Kɛ́tɛi kɔlɛi.

²²Ǹaa pôlu ma ɣelei, ká ƃoli sîrɛ siɣe nyii kpɔlɔ̂ŋ fé mai ká gula a sɔnyɔ̂ŋ sala. À kɛ̀ tí, ká ŋ̀âla-teƃelei maa wáa. Ŋ̀âla-teƃelei maa-waa a ŋãa yɛ̂ɛ berei ká gɛ̀ la a ǹiŋa sîrɛ ŋãai.

²³Tãi ka kpɛ̀ɛ la a gɛɛ tíi, ká niŋa-sirɛ da ƃála sîrɛ siɣe nyii kpɔlɔ̂ŋ fé diai,

²⁴Ká pá a dia ŋ́ɛi-tuɛ. À kɛ̀ tí, zâla láa-soŋ-ƃelai dí mii-kpolo kpɛ́mɛŋ dîa ká díkula a kéreŋ-sala ḿaa mɛni ma.

²⁵Ka m̀ála sîrɛ-ŋai da m̀oli sîrɛ-ŋai ŋí dɔnɔ-tɔnɔ kúla a sâla fólo lɔ́ɔlu mɛi feerɛ yée mu a sɔnyɔ̂ŋ sala. Ka ŋɔ́nɔ niŋa sîrɛ da ƃála sîrɛ nyii kpɔlɔ̂ŋ fé dîai kúla máŋ a sâla.

²⁶Da pâi ŋ̀âla-teƃelei maa-waai fólo lɔ́ɔlu mɛi feerɛ yée mu a gɛɛ é kɛ́ a maa-waa tíi kɛ́ mɛni ma.

²⁷Tãi da pâi ŋ̀ele kûu-ŋai ŋí ŋa-see kɛ̂i lai, gɛ̀ ní é síɣe vóloi ǹɔ́ɔlu-mɛi saaƃa ɣelei ma é lí tuɛ pere, zâla láa-soŋ-ƃelai dí ká kéreŋ salai kúla da ká lii-see salai kúla ŋ̀a. À kɛ̀ tí, ńyãai ŋ́gaa a Ŋ́wála-wala kélee Yâwɛɛi, ŋa pâi ńyee seêi dímu.”