Read Kpelle Izikiɛ 44 Bible Online

Izikiɛ 44 - Kpelle bible

Izikiɛ 44

¹Nya ƃe kwa ǹalôŋ kú lì banaŋ mâ pere siɣaŋ lá-ƃerei nyii kɛ̀ a ǹá kuláa vóloi kulâi perei. Ǹá è kɛ̀ a dɛ́ɛ.

²Nya ƃe Yâwɛɛ è mò ḿâ ǹyɛɛi, “Ziɣãŋ ŋí láƃerei é kɛ́ nɔ́ a ǹá-tɛɛ. Núu da fé lɔ̀ naa. Ǹá é lɛ́ɛ nɔ́ a dɛ́ɛ kpɛ̂ni fêi Ńyãai a Eezuɛ-ŋai Díɣâlai Yâwɛɛ, ŋaâ tɛɛ naa. M̀ɛni ma ǹá é lɛ́ɛ nɔ́ a dɛ́ɛ.

³Ǹúu-laa-tuɛ nuui nɔ́ ƃé a pɔ̂ri seêi naa é m̀ii-sɛŋ maa waai míi naa ŋ́ɛi-tuɛ. À kɛ̀ lɔ̂i, é lɔ́ a bɛ́rɛi ŋɛ́i-tuɛ pere loŋpoi su pere. À kɛ̀ kulâi, é kúla nɔ́ a bere tɔnɔi tí.”

⁴Naa kɛ́ɛ tíi, kwa ǹalôŋ kú lì yá-ŋua pere siɣaŋ lá-pere Ŋ̀âla-pɛrɛi ŋɛ́i-tuɛ. Nya ƃe ŋá tìnaŋ ŋá Yâwɛɛ ŋɔfólo-laai káa a Yâwɛɛ ŋɔpɛ́rɛi láa fɛ́ɛ. Ŋá tôo ǹɔii mâ ŋá ŋuŋ mâ pîlaŋ.

⁵Yâwɛɛ è mò ḿâ ǹyɛɛi, “Núu kpune ǹóŋ, íwoli tɔ́ɔ kpɔ́ a ǹɛ́lɛɛ m̀ɛnii mâ ŋa pâi môi yâi. Gélee naa káa, í maa kpɛ́ɛ a ǹɛ́lɛɛ. Ŋa pâi tɔ̂ŋ tɛɛ̂i ípɔ é pîlaŋ ŋápɛrɛ kɛ́tɛi ma. Dɔ̂ŋ ŋí káa diai mɛ̂ni ma maa nɛ̃ɛi dílɔ Ŋ̀âla-pɛrɛi mu, kpaa dífe lɔ̀ Ŋ̀âla-pɛrɛi mui.

⁶“M̀ó Eezuɛ-ƃelai tí díkaa a dɔɔ mâ kɛ́-ƃelai dîa yɛ̂ɛi, ‘Ńyãai ŋ́gaa a Ŋ̀wála-wâla kélee Yâwɛɛ ḿve pâi ńyee seêi ŋɔ́nɔ kásɔnyɔ̂ŋ-ŋai mu nyii-ŋai ká káa wɔ́lɔ gɛ̂i.

⁷Ka ŋápɛrɛi maa-tĩa kara kpɛ́ni fêi ká kɛ̀ ǹɛɛ̂i naa diai dífa ḿvɛ̀li díkɛ pà ŋápɛrɛ kɛ́tɛi mu a sâla kuláa a mii-sãa da sua-wulɔ é pɛ́lɛ ŋãa ma. Ka ŋákpanaŋ-wooi kàra a kásɔnyɔ̂ŋ-ŋai ká gɛ̀i.

⁸Káfe ŋa sãa maa-waa-ŋai mɛi káa ní kɛ́lɛ, ká dí tɛ̀ɛ ŋɔ́ya-ŋa pɔ́ a gɛɛ díkɛ ŋápɛrɛi mɛi kâa.

⁹“ ‘M̀ɛni ma, Ńyãai Ŋ́gaa a Ŋ̀wála-wâla kélee Yâwɛɛ ŋá mò a gɛɛ ŋɔ́ya nyii Ɣâla mɛni fé ǹíi sui nyii gáa Eezuɛ-ŋai sámai vé pâi lɔ̂i ŋápɛrɛi mu.’ ”

¹⁰Yâwɛɛ è mò ḿâ ǹyɛɛi, “Liiva-ŋai nyii-ŋai dí pôlu tɔ̀ɔ ḿâ díkɛ ɣâla da kpɛ́ni-ŋa fɛ̀li a tãi Eezuɛ-ŋai díkùla la ḿbôlui, ŋa pâi díkula maa kɛ̂i.

¹¹Da pâi tíi kɛ̂i ŋápɛrɛi mu. Kɛ́lɛ da pâi kɛ̂i nɔ́ tíi kɛ̂i ziɣãŋ-ŋai láƃerei díkɛ́ tíi kɛ̀ ŋ̀âla-pɛrɛi mu. Dia ƃé pâi kɛ̂i daa-tulɛ-ŋai paâi géreŋ-salai da ǹûai dísâlai mɛ̂ni ma. Da pâi kɛ̂i tíi kɛ̂i ǹûai mɛ̂ni ma.

¹²Kpɛ́ni fêi dia ƃé kɛ̀ ŋ̀âla da kpɛ́ni-ŋai fɛlîi Eezuɛ-ƃelai mɛ̂ni ma. Bere-sii ŋí ƃé dí Eezuɛ-ƃelai kɛ̀ la díkɛ sɔnyɔ̂ŋ kɛ̀. M̀ɛni ma Ńyãai ŋ́gaa a Ŋ̀wála-wâla kéleee Yâwɛɛ ŋá mò a gɛɛ ŋa pâi díkula maa kɛ̂i m̀ɛnii ŋí maa mɛ̂ni ma.

¹³Dífe pà ŋ́gɔlɛ ma a gɛɛ dí sâla láa-soŋ tii kɛ́ ḿî. Dífe lɛ̀ɣɛ zãâ maa waai da ma. Bere ƃé ŋa pâi díkula maa kɛ̂i la m̀ɛni nyɔ́mɔi dí gɛ̀i maa mɛ̂ni ma.

¹⁴Ŋa pâi Ŋ̀âla-pɛrɛi mɛi káa tîi tɛɛ̂i dípɔ a gɛɛ díkɛ gɛ̀.”

¹⁵Ŋ̀wála-wâla kélee Yâwɛɛi è mo ǹyɛɛi, “Kɛ́lɛ zâla láa-soŋ-ƃelai nyii-ŋai kùla Liiva ŋɔsuui su, nyii-ŋai díkaa a Zadɔ ŋɔsuui su-ƃelai kɛ́ tíi kɛ̂i ḿî a tãi Eezuɛ-ŋai dí dípôlu tɔ̀ɔ la ḿâi, dia ƃé pâi kɛ̂i tíi kɛ̂i ḿî. Da pâi kɛ̂i tíi kɛ̂i ḿî díkɛ zama-sɛŋ suai wúlɔ da ŋãa kûla a sâla.

¹⁶Dia nɔ́ ƃé pâi pâi ŋápɛrɛi mu dítii kɛ́ ŋáteƃelei ŋá. Dia nɔ́ ƃé pâi kɛ̂i ŋápɛrɛi mu tii mɛi kâai.

¹⁷Tãi da kɛ̂ lɔ̂i la ziɣãŋ su-pere ŋ̀ɔi sui, díseɣe nɛnɛ-fɛfɛ too dîa. Dífe seɣe ƃɔɔ-fuu too dîa a tãi da kɛ̂ tíi kɛ̂i la bɛ́rɛi mu-pere siɣaŋ lá-pere bɛ́rɛi kpîŋ-kpiŋ mu perei.

¹⁸Dí seɣe nɛnɛ-fɛfɛ yɛkɛ too dîa da maa ƃɔ̂rɔ a gɛɛ fɔ́nɔ fé kùla dîa. Kɛ́lɛ dífe bɛ̂ti too díleŋei.

¹⁹Kɛ́lɛ tãi da kɛ̂ liî la banaŋ mâ ǹûai pɔ́ naai, gáa a sɛŋ dí dítii kɛ́ seɣei nyii díkɛ̀ tíi kɛ̂i zui kúla dîa dí dílɛɛ gwaa mâ waai mâ. À kɛ̀ tí, maa nɛ̃ɛ̂i a gɛɛ díseɣe da kpɛ́ni tóo dîa díseɣe maa waai fa lâ sɛŋ sóli la ǹûai dîa.

²⁰Zâla láa-soŋ-ƃelai dífe díŋuŋ kpɛ̂ɛ gáyoŋ ma, kpaa máŋ dí ǹɛɛ naa díŋuŋ é kpiri. Kɛ́lɛ dí díŋuŋ ƃó a ǹɛ́lɛɛ.

²¹Zâla láa-soŋ-ƃelai dífe ŋwã̂ai kpèle dílɛɛ pâi liî ziɣãŋ su-pere ŋ̀ɔi su.

²²Zâla láa-soŋ nuui da fé nɛnî da kùla nyii da ŋɔsurɔ̂ŋ da táai. Fɛ̂ɛ nɔ́ dí Eezuɛ nɛnî kula nyii gáa a nɛnî-kpelai, kpaa máŋ zâla láa-soŋ nuui nyii a saai ŋɔpɔɔ nîni.

²³“Gáa a sɛŋ zâla láa-soŋ-ƃelai dí sɛŋ lɛ́ ŋánûai dîa nyii maa waai da nyii maa fé waa nii. Gáa a sɛŋ dí sɛŋ lɛ́ dîa é pîlaŋ zɛŋ nyii maa waai sâla kula mɛ̂ni ma da nyii maa fé waa nii.

²⁴Tãi laa sâa a tôo lai, gáa a sɛŋ zâla láa-soŋ-ƃelai dí maa mɛ̂nii ŋá tée yɛ̂ɛ berei ŋátɔ̂ŋ è m̀ôi lai. Gáa a sɛŋ dí gûu-ŋai kélee maa mɛ̂ni ŋa see kɛ́ yɛ̂ɛ berei ŋátɔ̂ŋ da ŋásɛŋ lɛ́ɛi káa lai. Gáa a sɛŋ dí Vii Tɔ̂ɔ-ɣelei mɛi káa a m̀aa-waa.

²⁵“Zâla láa-soŋ-nuui da fé lɛ̀ɣɛ saa mâ. À gɛ̀ tí, gɛ̀ ní aâ m̀aa-tĩa kara, fɛɛ nɔ́ é kɛ́ a zâla láa-soŋ nuui tí ǹâŋ, ǹee ǹîa-surɔŋ, ǹóŋ-nɛni, kpaa ǹóŋ surɔŋ, da zaaƃɔlɔ nyii surɔ̂ŋ fé ǹyêei.

²⁶Tãi a m̀aa waa lai, fɛ́ɛ é maa-kpɛŋ kɛ́ a fólo lɔ́ɔlu-mɛi feerɛ.

²⁷À kɛ̀ tí é lí ziɣãŋ su-pere ŋ̀ɔi su é sâla kula naa gbîŋ mɛni ma a gɛɛ m̀aa é kɛ́ a ŋwaa tíi kɛ́ mɛ̂ni ma ŋɔ́nɔ. Ńyãai ŋ́gaa a Ŋ̀wála-wâla kélee Yâwɛɛ ńyãa ƃé mò tí.

²⁸“Zâla láa-soŋ-ƃelai kɔ̃lîŋ fé pâi kɛ̂i m̀a. Ńyãa ƃa díkɔ̃lîŋ. M̀ɛni ma, káfe sɛŋ da tɛ̀ɛ dí pɔ́ a díkɔ̃lîŋ Eezuɛ lɔii su.

²⁹Da pâi kɛ̂i mìi-sɛŋ sala-sɛŋ, zɔnyɔ̂ŋ-salai, é pɛlɛ zâla-sɛŋ nyii da dɛ̀ɛ sɔnyɔ̂ŋ mɛni mai miî. Zãâ maa waa-ŋai díkaa Eezuɛi káa pâi kɛ̂i a dí pɔɔ.

³⁰Ká kasí-sãai m̀á m̀aa-ŋuŋ da zâla-sii nyii kélee ka gulai káa a zâla láa-soŋ-ƃelai pɔɔ. Gáa a sɛŋ ká kákpolo-ŋai m̀aa ŋuŋ tɛ́ɛ zâla láa-soŋ-ƃelai pɔ́. Ka gɛ̀ tí, lûwa a pâi kɛ̂i kápɛrɛi ma.

³¹Zâla láa-soŋ-ƃelai dífe ŋɔni, kpaa máŋ fɛnɛ-sɛŋ nyii sàa gbîŋ yèe mai, kpaa máŋ nyii lɔɔ-fɛnɛ-sɛŋ è baai da mîi.”