Read Kpelle Izikiɛ 46 Bible Online

Izikiɛ 46 - Kpelle bible

Izikiɛ 46

¹Ŋ̀wála-wâla kélee Yâwɛɛ è mò ǹyɛɛi, “Ziɣãŋ su-pere siɣaŋ ŋɔkpôŋ nyii ǹá-ƃerei kulâai vóloi kulai perei é kɛ́ a ǹá tɛ́ɛ a vólo lɔ́ɔlu mɛi dai nyii ka pâi kɛ̂i tíi kɛ̂i lai. Kɛ́lɛ ka ǹá ƃó a vóloi ǹɔ́ɔlu mɛi feerɛ ɣelei da ŋ̀áloŋ-ninai ŋɔkúui ŋ̀ele.

²Ǹúu láa-tuɛ-nuui a pâi tɛɛ̂i vóloi kulâi-pere ziɣãŋ lá é lí é tɔ́ɔ bɛ́rɛi ŋɛ́i túɛ loŋpoi ŋɔkpôŋ ma a tãi zâla láa-soŋ-ƃelai da pâi kɛ̂i ŋɔkéreŋ salai kulâi la da ŋɔlii-seee sala-ŋai. À kɛ̀ tí, gâloŋ a pâi Ɣâla fɛlîi gbôŋ lá. Tãi a pâi Ɣâla fɛlîi lai, a nâa lì. Kɛ́lɛ, gbôŋ lá a pâi lɛɛ̂i a m̀óɔɔ é lɛ́ɛ la zu ɣele wûlii é kɛ́.

³Gáa a sɛŋ ǹûai kélee dí ḿvɛli gbôŋ tɔnɔi tí láƃerei a Vii-tɔɔ-ɣelei da ŋ̀áloŋ-nina kuui kɛ́ tãi kélee.

⁴“Gâloŋ a pâi géreŋ-salai kulâi ḿâ a ƃála lɔ́ɔlu mɛi-da da ƃála sîrɛ tɔnɔ nyii kpɔlɔ̂ŋ fé dîai a Vii-tɔɔ-ɣelei.

⁵É pá a fêlaƃa pãŋ buu-feerɛ m̀ála sîrɛi mɛ̂ni ma. Ǹyaŋ a pɔ̂ri pâi a fêlaƃa nyii nɔ́ ǹyée a pɔ̂ri mà m̀ála-ŋai mɛ̂ni mai. Gáa a sɛŋ é pá a ɔle-wulɔ sane saaƃa pãŋ buu-feerɛi mɛni ma.

⁶Tãi da kɛ̂ ŋ̀áloŋ-nina kuui kɛ̂i lai, gâloŋ é pá a niŋa sîrɛ tɔnɔ, ƃála lɔ́ɔlu mɛi-da da ƃála sîrɛ tɔnɔ nyii kpɔlɔ̂ŋ fé dîai.

⁷É pá a fêlaƃa pãŋ buu-feerɛ niŋa sîrɛi mɛ̂ni ma, pãŋ buu-feerɛ m̀ála sîrɛi mɛ̂ni ma. É pá a fêlaƃa nyii ǹyée a pɔ̂ri ma m̀ála-ŋai mɛ̂ni ma. É pá a wúlɔ sane saaƃa fêlaƃa pãŋ buu-feerɛi mɛ̂ni ma.

⁸Gâloŋ é lene pôlu a bere tɔ̂nɔi è tɛ̀ɛ la gɛ́ lɔ̀ bɛ́rɛi ŋɛ́i-tuɛ loŋpoi sûi.

⁹“Tãi ǹûai da pâ la gúu-ŋai da kɛ́ mɛ̂ni ma ŋ́ɛi túɛi, ǹúui nyii kélee a lɔ̂ a séɣai-pere siɣaŋ lá perei vé lene pôlu a bere tɔ̂nɔi tí. Kɛ́lɛ é kúla a yá-ŋua pere siɣaŋ láƃerei pere. Ǹúui nyii a lɔ̂ a yá-ŋua pere siɣaŋ láƃerei perei é kúla a séɣai pere siɣaŋ láƃerei pere. Núu da kélee fé lène pôlu a berei è lɔ̀ lai. Kɛ́lɛ é lí kpɔ́ nɔ́ déniŋ ma pere é kúla banaŋ mâ pere.

¹⁰Tãi da kɛ̂ lɔ̂i lai, da gâloŋ ni dílɔ. Da kɛ̀ kulâi, da dîa ni díkula.

¹¹Tãi da kɛ̀ gúui kɛ̂i lai, dí pá a fêlaƃa pãŋ buu-feerɛ niŋa sîrɛ tɔnɔi mɛ̂ni ma, dí pá a fêlaƃa pãŋ buu-feerɛ m̀ála sîrɛi mɛ̂ni ma. Kɛ́lɛ da pɔ̂ri nɔ́ pâi a fêlaƃai nyii da pɔ̂ri dɛɛ̂i m̀ála-ŋai mɛ̂ni mai. Dí pá a wúlɔ sane saaƃa fêlaƃa pãŋ buu feerɛi mɛ̂ni ma tɛi-tɛi.

¹²“A kɛ̀ gâloŋ a ŋ̀wɛ̂lii é gula ǹíi-su sâla kula ḿɛni ma, nyii gáa kéreŋ-salai kpaa lii-see-salai, gɛ̀ ní ká ziɣãŋ nyii ǹá kulâi vóloi kulâi perei lá ƃó m̀ɛni ma. À kɛ̀ tí, a pâi ŋɔkéreŋ sâlai, kpaa máŋ ŋɔlii-see salai kulâi nɔ́ yɛ̂ɛ berei a sâla kùla la a Vii-tɔɔ-ɣelei. Ǹyaŋ à kɛ̀ tí a pâi kulâi dí gbôŋ lá tɛ́.”

¹³Ŋ̀wála-wâla kélee Yâwɛɛ è mò ǹyɛɛi, “Gáa a sɛŋ ká pá a ƃála-loŋ nyii gáa a kóraŋ tɔnɔi nyii kpɔlɔ̂ŋ fé mai ká gula ḿâ a kéreŋ-sala a ɣele-wala kélee.

¹⁴Gáa ŋɔ́nɔ a sɛŋ ká mii-sɛŋ sala kula a Ŋ̀ele-wâlai kélee Yâwɛɛ mɛni ma. Ka fêlaƃa pãŋ náaŋ síɣe é pɛ́lɛ ɔle-wulɔ ŋɔsane tɔ̂nɔ ma. Ka felaƃai yɔ́ɔŋ a ŋ̀ulɔi. Zâlai ŋí kula mɛ̂ni maa tɔ̂ŋ é kɛ́ kákili-ŋa a tãi kélee.

¹⁵Ka m̀ála-loŋ da mii-sɛŋ-salai é pɛlɛ ŋ̀úlɔi ma kula a kéreŋ sala ḿâ a ɣele-wala kélee.”

¹⁶Ŋ̀wála-wâla kélee Yâwɛɛ è mò ǹyɛɛi, “À kɛ̀ gâloŋ a ŋɔlɔii da tɛ̀ɛ ǹônii-sinaai da pɔ́ a bɔ́ɔ, a pâi kɛ̂i a bɔ́ɔ. Kpɛ́ni fêi, gáa a ǹúu-suui pɔ́ɔ.

¹⁷Kɛ́lɛ a kɛ̀ gâloŋ è ǹɔii ŋí tɛ̂ɛ ǹyée-mu nuui da pɔ́, gɛ̀ ní, a pâi lɛɛ̂i ǹyée-mu nuui tí yêei é lɛ́ɛ la zu ǹúu kɔ̃lîŋ ŋuŋ mâ ƃó koraŋ a seri é dɛɛ pôlu gâloŋ pɔ́. Gâloŋ ǹóŋ nɔ́ ƃa pɔ̂ri m̀ɛlɛ-seei ŋí siɣêi a bɔ́ɔ.

¹⁸Gâloŋ fé núu da kélee kɔ̃lîŋ kula ǹyêei. Gáa a sɛŋ é lɔii tɛ́ɛ ǹônii pɔ́ nyii kùla ŋɔlɔii sûi. Vé núu da kɔ̃lîŋ kula ǹyêei.”

¹⁹Nya ƃe è lì a ńyãa ziɣãŋ su-pere ŋ̀ɔi láƃerei nyii kɛ̀ seɣai perei, nyii kɛ̀ lôŋpo maa-waa-ŋai kɛ̀ zâla láa-soŋ-ƃelai mɛ̂ni mai. È kwaa da ma lɛ̀ ḿâ nyii kɛ̀ vóloi liî pere loŋpoi kɔlɛ pêrei.

²⁰È mò ḿâ ǹyɛɛi, “Gwaai ŋí ma ƃé zâla láa-soŋ-ƃelai da pâi kɛ̂i zɔnyɔ̂ŋ sala-sãai da sɔnyɔ̂ŋ su-mɛni lɛ̂ɛ sala-sãai ɣîlii naa. Gwaai ŋí ma ƃé da pâi kɛ̂i m̀ii-sɛŋ sala-sãai ɣelêŋ-nii naa a gɛɛ dífa lâa kula lâ a dia ziɣãŋ kɛ́tɛi su a gɛɛ núu da a lɛ̀ɣɛ ma dɛ̂i pere é sɛŋ sóli ma.”

²¹Nya ƃe è kùla a ńyãa ziɣãŋ loŋ su é li a ńyãa ziɣãŋ kɛ́tɛi ŋɔsôŋo náaŋ su. Ǹyaŋ lôŋpo è kɛ̀ zôŋo náaŋ ŋí kélee su.

²²Ŋa lôŋpo pɛlɛɛ-pɛlɛɛ-ŋa kàa naa nyii ŋɔŋa kɛ̂tɛ è kɛ̀ a kɔ́ɔ ƃɔ́rɔnii buu lɔ́ɔlu, ŋɔkôya kɛ́ ƃò a kɔ́ɔ ƃɔ́rɔnii buu lɔ́ɔlu mɛi da káo lɔ́ɔlu mɛi-feerɛ.

²³Ŋɔŋ pûi è kɛ̀ a dínaŋɔɔ lôŋpo-ŋai kaŋ mâ a ŋ̀ɛli nyii dí dɔ̀ɔ a kɔni.

²⁴Nya ƃe è mò ḿâ ǹyɛɛi, “Ƃɛ́ ƃé diai pâi kɛ̂i tíi kɛ̂i Ŋ̀âla-pɛrɛ Kɛ́tɛi mui da pâi kɛ̂i zâla-sãai ɣîlii naa ǹûai mɛ̂ni ma.”