Read Kpelle Izikiɛ 47 Bible Online

Izikiɛ 47 - Kpelle bible

Izikiɛ 47

¹Nya ƃe kwa ǹalôŋ kú lì Ŋ̀âla-pɛrɛ Kɛ́tɛi láƃerei. Ŋá yá kàa gɛ́ kùla gbôŋ-mu pere gɛ́ yèŋ fólo kulâi pere, kpɛ́ni fêi Ŋ̀âla-pɛrɛi ŋɛ́i lá è kɛ̀ a guláa fólo kulâi pere. Ǹyái è kɛ̀ ɣilînii gɛ́ kùla Ŋ̀âla-pɛrɛ Kɛ́tɛi ŋɔkɔɔ-yee-pere gɛ́ lì vóloi kulâi-pere gɛ́ tɛ̀ɛ Ŋ̀âla-teƃelei ŋɔsiɣãŋ kwára-pere ƃelai mâ.

²Kwa ǹalôŋ kú tɛ̀ɛ a yá-ŋua-pere siɣaŋ láƃerei pere. Kwa ǹyaa kú tìnaŋ a ziɣãŋ banaŋ mâ pere nyii kɛ̀ vóloi kulâi perei ǹyái kɛ́ kùla ziɣãŋ kɔɔ-yee mɛi-pere gɛ́ lì vóloi ƃêlai pere.

³Kúkɛɛ liî, sɛŋ kɔ̂ɔŋ-ɣɛli è kɛ̀ ǹalôŋ yêei nyii è kɔ́ɔ ƃɔ́rɔnii wála tɔnɔ, ŋuŋ lɔ́ɔlu mɛi-da pôlu buu lɔ́ɔlu mɛi-da káo lɔ́ɔlu mɛi feerɛ (1,667) kɔ̀ɔŋ gɛ́ yèŋ a ǹyái vóloi kulâi pere ƃelai mâ pere. Kwa ǹyaa kú ǹyái tìyeŋ gɛ́ kú sòŋ a kúkporo ma.

⁴Nya ƃe è ŋɔ́nɔ kɔ́ɔ ƃɔ́rɔnii wála tɔnɔ, ŋuŋ lɔ́ɔlu mɛi-da pôlu buu lɔ́ɔlu mɛi-da káo lɔ́ɔlu mɛi feerɛ (1,667) kɔ̀ɔŋ. Kwa ǹyaa kú lí a daloŋ ǹyái kɛ́ ńzòŋ a ŋ́gbêleŋ ma. È ŋɔ́nɔ kɔ́ɔ ƃɔ́rɔnii wála tɔnɔ, ŋuŋ lɔ́ɔlu mɛi-da pôlu buu lɔ́ɔlu mɛi-da káo lɔ́ɔlu mɛi feerɛ (1,667) kɔ̀ɔŋ kwa ǹyaa kú lí a daloŋ ƃɛ́i ǹyái è kɛ̀ kúsonîi naa ńeŋei.

⁵Ǹaa pôlu ma, è ŋɔ́nɔ kɔ́ɔ ƃɔ́rɔnii wála tɔnɔ, ŋuŋ lɔ́ɔlu mɛi-da pôlu buu lɔ́ɔlu mɛi-da káo lɔ́ɔlu mɛi feerɛ (1,667) kɔ̀ɔŋ. Ǹyái è nâa kɛ̀ a déɛɛ nyii ḿva pɔ̂ri tɛɛ̂i zu. Ǹyái è nâa kɛ̀ a ya-lee nyii núu fa pɔ̂ri tɛɛ̂i zu, fɛ̂ɛ nɔ́ núu é yá-ŋa kɛ́ zu.

⁶Nya ƃe è ḿarê kɛ̀ ǹyɛɛi, “Núu kpune ǹóŋ, ye m̀ɛni-ŋai ŋí maa kpɛ́ɛ a ǹɛ́lɛɛ.” Ǹya ƃé kwa ǹyaa kú lène pôlu kú sía zîŋ-ŋa ǹyái koo mâ.

⁷Tãi kwa ǹyaa kúkɛ̀ siâi la ǹyái koo mâi, ŋá wúru támaa kàa ǹyá ƃêlai veerɛ ma.

⁸È mò ḿâ ǹyɛɛ, “Ǹyái ŋí a ɣilînii gɛ́ tɛ̀ɛ vóloi kulâi pere gɛ́ yèŋ Zɔdiŋ Tiŋ-tiŋ-su pere gɛ́ lì Ǹyuo-saai su. Tãi a pâi serîi la Ǹyuo-saai mai, a pâi Ǹyuoi su kpolo yâi maa falenii é kɛ́ a yá lɛ́lɛɛ.

⁹À kɛ̀ ti, ƃɛ́i ǹyái a pâi ɣilîni é lí naai, fúlu-sãa da pâi kɛ̂i zu díkɛ sìa-sia zu díkɛ díkɛ̀-ɣeniɛi kɛ̀ naa. Nyɛ̃ɛ támaa a pâi kɛ̂i zu. Ǹyái ŋí a pâi gɛ̂i Ǹyuo-saai é kɛ́ a yá lɛ́lɛɛ. Ǹyaŋ, ƃɛ́i kélee a pâi ɣilîni naai, a pâi gɛ̂i fúlu-laa é kɛ́ naa.

¹⁰Yá kpɛ́-ƃela da pâi kɛ̂i m̀éla feerɛ ma é síɣe Ɛŋgidi é tóo Ɛŋ-gelaŋ díkɛ dídeɣaŋ-ŋai pîli. Ǹyaŋ nyɛ̃ɛ-sii támaa a pâi kɛ̂i ǹyái ŋí su yɛ̂ɛ bere nyɛ̃ɛ-sii támaa káa la Mɛditɛrenia Yuoi sûi.

¹¹Kɛ́lɛ, bâra-ŋai da báa-ŋai díkaa ǹaa kɔlɛ mai da pâi lɛɛ̂i a kpolo kɛ̂i.

¹²Kɛ́lɛ wúru támaa-ŋa da pâi kɛ̂i ǹyá ƃêlai veerɛ ma nyii-ŋai pâi kɛ̂i a mii-sãai. Ŋ̀úru-ŋai ŋí láa fé pâi pûi, kpaa máŋ dí kpera ƃâi. Da pâi kɛ̂i ƃâi a ɣáloŋ kélee, kpɛ́ni fêi yá a pâi kɛ̂i ɣilînii gɛ́ kùla Ŋ̀âla-pɛrɛ Kɛ́tɛi mu gɛ́ díkɔɔ mu yɔ̀ɔ. Ŋ̀úru-ŋai ŋí ƃá a pâi kɛ̂i a mii-sɛŋ. Dílaa kɛ́ ƃò a sále núu ƃálo mɛ̂ni ma.”

¹³Ŋ̀wála-wâla kélee Yâwɛɛ è mò ǹyɛɛ, “Ǹɔii-ŋai dígɔyɛŋ-pere-ŋai ká ŋí nyii ya pɔ̂ri díŋa kɔlɛ̂i ma Eezuɛ nuu-suu púu-kao feerɛi loai. Ǹɔii ŋí gbua feerɛ tɛ́ɛ Zosɛ ŋɔsuui pɔ́.

¹⁴Ŋá ŋ́gono tèe a gɛɛ ŋá ǹɔii ŋí tɛ́ɛ kánâŋ-ni pɔ́, kɛ́lɛ gáa nâa a ká pɔ́ɔ. M̀ɛni ma, ka ŋá kɔlɛ a bɔriɛɛ kákîe-ni loai.

¹⁵“Yá-ŋua-pere gɔyɛŋ-perei è tɛ̀ɛ vóloi kulâi pere é pîlaŋ Mɛditɛrenia Yuoi mâ é tóo Ɛtilɔŋ taa-leei mâ é tɛ́ɛ naa é tóo Ama perei ma, é tɛ́ɛ naa é tóo Zida taa-leei mâ.

¹⁶È sìɣe Zida taa-leei ma é tóo Bɛlota da Sibuaŋ taa-lee-ŋai dîa nyii-ŋai díkaa Dɛmɛika da Ama kaloŋ-lɔii-ŋai loai. È síɣe naa é lɛ́ɛ la zu é seri Tikɔŋ taa-leei mâ nyii gáa gɔyɛŋ perei ma Auraŋ lɔii kpiniŋ sûi.

¹⁷M̀ɛni ma, yá-ŋua pere gɔyɛŋ perei a pâi siɣêi Mɛditɛrenia Yuoi mâ nyii gáa vóloi kulâi perei é tóo Enɔŋ taa-leei mâ nyii gáa Dɛmɛika da Ama lɔii kpiniŋ-ŋai sui. Gɔyɛŋ perei ká ŋí yá-ŋua pere mɛni ma.

¹⁸“Vóloi kulâi pere gɔyɛŋ perei è sìɣe Dɛmɛika da Auraŋ díloai é sía a Zɔdiŋ Ya-leei kóo Eezuɛ kɛ́ ƃò vóloi liî pere, Gilia kɛ́ ƃò vóloi kulâi pere. È sìɣe naa é seri Tama taa-leei mâ nyii gáa Ǹyuo saai mai. Ǹyaŋ gɔyɛŋ perei ŋí ƃé pâi kɛ̂i vóloi kulâi pere.

¹⁹“Seɣai pere gɔyɛŋ perei è sìɣe Tama taa-leei mâ é seri ǹyá gɛlɛŋ-gɛlɛŋ mâ Kedɛ Meriba é síɣe naa é tɛ́ɛ Ize gɔyɛŋ perei ma ya-ŋua pere ƃelai ŋɔfólo liî pere é pîlaŋ Mɛditɛrenia Yuoi mâ.

²⁰“Vóloi liî pere gɔyɛŋ perei ƃé pâi kɛ̂i a Mɛditɛrenia Yuoi é lɛ́ɛ la zu é seri ŋ̀ɛ́i-kɛ maai ma nyii gáa Ama perei ŋɛ́i téniŋ ma.

²¹“M̀ɛni ma, ka ǹɔii ŋí ŋákɔlɛ káloai yɛ̂ɛ berei Eezuɛ-ŋai dísuui káa lai.

²²Ǹɔii ŋí káa a kápɔɔ ka ŋɔya-ŋai díkaa kásamai da nîa-pɛlɛɛ maa-sɔlɔ ƃó naai. Dí káa a Eezuɛ lɔii su nia-pɛlɛɛ-ŋa nyii-ŋai dí dímaa sɔlɔ ƃô kásamai. M̀ɛni ma gáa a sɛŋ ká ǹɔii da tɛɛ dípɔ yɛ̂ɛ berei Eezuɛ-ŋai da pâi díwɔ̂i sɔlɔ ƃôi lai.

²³Diai kélee díkaa a ŋɔ̃yâ-ŋai, da pâi díwɔ̂i lɔii sɔlɔ ƃôi ǹûai sáma ƃɛ́i díseɛɛ káa naai. Ńyãai ŋ́gaa a Ŋ̀wála-wâla kélee Yâwɛɛi ńyãa ƃé mò tí.”