Read Kpelle Izikiɛ 8 Bible Online

Izikiɛ 8 - Kpelle bible

Izikiɛ 8

¹Kú kɛ́ɛ kɛ̀ gɔ-soŋ-laai su a koraŋ lɔ́ɔlu-mɛi da ŋ̀aloŋ lɔ́ɔlu mɛi-dai ŋɔfólo lɔ́ɔlu-ɣele, ŋá kɛ̀ sêei ŋápɛrɛi mu kwa Zuda nuu-pɔlɔ-ŋai. Nya ƃe Ŋ̀wála-wâla kélee Yâwɛɛi ŋɔmɔ̃lêŋ è pà ŋgbonoi.

²Gɛɛ tîi, ŋá sɛŋ tá kàa gɛ pere kɛ ƃo yɛ̂ɛ ǹúu. É síɣe ǹeŋei é yèŋ è kɛ̀ yɛ̂ɛ ŋɔŋ. Ǹaa mɛi pêre kɛ́ fòlo yɛ̂ɛ ƃara maa kiîŋɔɔ.

³È sɛŋ da kɛ́ɛ yɛ̂ɛ ǹúu yèe sãa, é ŋ́zôŋ a ŋuŋ-leɣa. Mɔ̃lêŋè ńdɛ ŋ̀elei su, é pá a ńyãa zĩ̂a su Zerusâlɛŋ. È ŋ́zeɣe é lí a ńyãa bɛrɛ mu pere siaŋ ŋɔkpôŋ lá ƃelei nyii kɛ̀ yá-ŋua pere Ŋ̀âla-pɛrɛ Kɛ́tɛi mai. Ɣâla pɔɔkɔŋ kɛ́tɛ tɔnɔ è kɛ̀ gwaai ŋí mâ nyii gɛ̀ Yâwɛɛ é ǹíi ŋwana kpɔ́ a ŋanaai.

⁴Nya ƃe ŋá Eezuɛ Ɣâlai ŋɔfolo-laai kâa naa. Gɛ pere è kɛ̀ nɔ́ yɛ̂ɛ zĩ̂ai nyii ŋa gáa dìŋ-tiŋ su a tãi ŋá kɛ́ la Siƃa ya-leei kɔlɛi.

⁵Naa kɛ́ɛ tii, è mò mâ ǹyɛɛi, “Núu-kpune ǹóŋ íŋuŋ mu siɣe í ŋ̀âla-teƃelei mela nyii gáa yá-ŋua pere naa kaa.” Nya ƃe ŋá ŋuŋ mu siɣe ŋá ya-ŋua kpòŋ lá ƃelei pere kaa. Ŋá ɣâla-pɔkɔɔŋ ta káa naa nyii m̀ɛlɛ fé kɛ̀ ní Ɣâla koi.

⁶È mò mâ ǹyɛɛi, “Núu-kpono ǹóŋ, nya mɛni nyɔmɔ sãŋ ŋí kâai nyii Eezuɛ-ŋai da gɛi a gɛɛ dí ŋ́gbɛ ŋápɛrɛ-maa-waai ŋí mui? Kɛ́lɛ yâ pâi mɛni nyɔmɔɔ támaa kâai é tɛɛ nyiŋi ma.”

⁷Nya ƃe è li a ńyãa banaŋ mâ kpòŋ la ƃelei ƃɛɛi ŋá lowa kâa naa bɛrɛ-kaŋ su.

⁸Gɛɛ tii, è mò mâ ǹyɛɛi, “Núu-kpono ǹóŋ, ye bɛrɛ-kaŋ wólo. Tãi ŋá bɛrɛ-kaŋ wólo lai, ŋá kpôŋ kàa naa.”

⁹È mò mâ ǹyɛɛi, “Lɔ́ naa í mɛni nyɔmɔ ma-pɔlɔ-pɔlɔ̂ɔi káa da gɛi naai.”

¹⁰Nya ƃe ŋá lɔ́ naa ŋá tɔara-sãa pɔɔkɔŋ da fɛnɛ-sãa nyii-ŋai dí maa fé waa nii pɔɔkɔŋ káa naa bɛrɛ-kaŋ mâ gwaa kélee ma. Ŋa ŋɔ́nɔ Eezuɛ-ŋai díɣâla pɔɔkɔŋ-ŋai káa naa bɛrɛ-kaŋ ma nyii-ŋai da kâa kɛ̀ dífɛlii.

¹¹Ŋá Eezuɛ-ŋai dínuu-pɔlɔ ŋai buu lɔ́ɔlu mɛi feerɛ kâa naa. Saŋfaŋ ǹóŋ surɔŋ Zaazania kɛ̀ ƃo dí sama. Kéreŋ-sɛŋ kuŋ-nɛ̃ɛ kéreŋ sɛ̂ŋ è kɛ̀ díkelee díyeêi. Naa láa è kɛ̀ a vɛ̀ɛ a kereŋ-sɛŋ kuŋ-nɛ̃ɛ kéreŋ luru.

¹²Nya ƃe è mò mâ ǹyɛɛi, “Núu-kpune ǹóŋ, yà mɛni nyɔmɔ sâŋ ŋí kâai Eezuɛ-ŋai díkaa gɛi loo-pere sui? Díkaa ɣâla fɛlii loŋpo-ŋa su nyii-ŋai dílaa fɛɛ̂i a ɣâla-pɔkɔɔŋ ŋa. Da mò diɛi, ‘Yâwɛɛ fé kú kâai. Yâwɛɛ a bôlu tɔɔ kûa.’ ”

¹³Yâwɛɛ è mò mâ ǹyɛɛi, “Ya pâi máŋ dítua pere nyɔŋ damaa kâai é tɛ́ɛ nyiŋi ma.”

¹⁴È lì a ńyãa Yâwɛɛ Ŋ̀ɔpɛrɛ Kɛ́tɛi laƃerei nyii kɛ̀ yá-ŋua perei. Nya ƃe ŋa nɛ̀yãa kaa naa díkɛ wɔ́lɔ díɣâlai Tamuzi mɛni ma.

¹⁵Nya ƃe è marê kɛ̀ ǹyɛɛi, “Núu-kpune ǹóŋ, yá mɛni-ŋai ŋí kâai nɛ̀yãai ŋí da gɛi? Ya pâi mɛni nyɔmɔɔ kpaya-kpaya támaa kâai é tɛ́ɛ nyiŋi ma.”

¹⁶È ŋɔ́nɔ lì a ńyãa Yâwɛɛ Ŋɔpɛ́rɛ Kɛ́tɛi ŋɔsiɣãŋ su pere siɣãŋ su bɛrɛi láƃerei. Kpakolo buu feerɛ káo lɔ́ɔlu díkɛ gbôŋ da ŋ̀âla-teƃelei díloai dípôlu féɣɛɛ Yâwɛɛ ŋɔpɛ́rɛi ma, díŋɛi liɛɛ voloi kulâi pere. Díkɛ naa díkɛ díŋuŋ mâ pîlaŋ díkɛ voloi-nɛnɛ̂ŋ ma foloi fɛli a díɣâlai.

¹⁷Yâwɛɛ è ŋɔ́nɔ mò ḿâ ǹyɛɛi, “Núu kpune ǹóŋ, yâ m̀ɛnii nyiŋi kâai da gɛi? Zuda ƃelai lii fé nîi laa ni a mɛni nyɔmɔ-ŋai da gɛi ƃɛi. Díkaa nâa pâi a ŋɛi-tɛ mɛni támaa ǹɔii mela kélee ma a gɛɛ dí gɛ ǹíi é ŋwana dîa. Da ƃaa kula mâ. Díkɛ ǹaraŋ a pere-sii kélee.

¹⁸M̀ɛni ma ŋa pâi ńii ŋwânai ŋá díkula maa kɛ̀. Ḿve pâi dísɔnyɔ̂ŋ-ŋai su mɛ̂ni lɛɛ̂i kpaa máŋ ŋá díŋɛi malôŋ kâa. A nɛ̀ɛ ma díwɔlɔ a ɣelêi pere, ḿve pâi ŋ́oli tɔɔ̂i díwɔlɔ-wôo ma.”