Read Kpelle Izikiɛ 9 Bible Online

Izikiɛ 9 - Kpelle bible

Izikiɛ 9

¹Nya ƃe Ɣâla è laɣi kpɔ́ ŋ́olii a ŋ̀a ŋánaa ǹyɛɛi, “Kaai pâi daa-leei su karai ka pá ƃɛ. Díkelee dí pa díkɔ-kɔ́ kɔli-sãai kɛ ƃo díyeei.”

²Naa kɛ́ɛ tii, núu lɔ́ɔlu mɛi da dí kula ziaŋ la nyii ǹá è kɛ̀ a gulaa yá-ŋua pere Ŋ̀âla-pɛrɛ Kɛ́tɛi la perei dí pa. Díkelee díkɔ-kɔ-sãai kɛ ƃo díyeei. Núu tɔnɔ è kɛ̀ dísama nyii kɛ a maa ɣiriɛɛ a seɣe nɛnɛ-fɛfɛ sɛŋ ta è kɛ̀ ǹyéei nyii da kɔlɔ pɔ̃yɛɛ lai. Nya ƃe dí li dítɔɔ mara-ɣâla teƃelei kɔlɛ.

³Nya ƃe Eezuɛ-Ɣalai ŋɔfólo laai nyii kɛ̀ Ŋ̀âla-taa koôŋ sãai diai è nâa kùla dîa é lí Ŋ̀âla-pɛrɛ Kɛ́tɛi láƃerei. Ǹaa kɛ́ɛ tíi, Yâwɛɛ è ǹúui nyii kɛ̀ a maa ɣiriɛɛ a zeɣe nɛnɛ-fɛfɛi tôli nyii gɔlɔ pɔ̃yɛɛ sɛŋ è kɛ̀ ǹyéei.

⁴Yâwɛɛ è mò m̀a ǹyɛɛi, “Lí Zerusâlɛŋ taa-leei su gwaa kélee í pɔɔ kɛ́ ǹûai tôŋ-la nyii-ŋai dílii toɔ̂ɔi pôlu díkɛ wɔ́lɔ kpɛ́ni fêi da m̀ɛni nyɔmɔɔ sãŋ ŋí kɛ́ daa-leei sui.”

⁵Nya ƃe Ɣâla è mò ǹûai gbeli-ŋai dîa ǹyɛɛi, “Káa máŋ ka lɛɛ dípôlu ká tɛɛ daai samai ká dípaa. Káfe dítɔnɔ kpîŋ da lɛɛ kpaa máŋ ká dímaloŋ kaa.

⁶Ka ziɛ-pɔ̂lɔ-ŋai, naŋa-tɔ̂ɔ-ŋai da ǹɛnî-kpela-ŋai, nîa-pɛlɛɛ-ŋai da nɛyãai kélee kpɔ́ páa. Kɛ́lɛ káfe diai tí bɔɔi káa dítôŋ-lai dɔnɔ kpîŋ pàa. Ka m̀ɛnii ŋí kɔ́ɔ pîlaŋ ŋápɛrɛi la.” Nya ƃe dí nâa pɛ̀lɛ ǹúu-pɔ̂lɔ-ŋai kɛ̀ tɔɔ̂ni Ŋ̀âla-pɛrɛ Kɛ́tɛi ŋɛ́i túɛi paá ma.

⁷Ɣâla è mò dîa ǹyɛɛi, “Ka Ŋ̀âla-pɛrɛ Kɛ́tɛi maa tĩ̂a kara. Ka pá a dípoma ká bu Ŋ̀âla-pɛrɛ Kɛ́tɛi ŋɛ́i-tuɛ. Ka lí ká dípaa.” Nya ƃe dí nâa lì daa-lêei su díkɛ ǹûai pâa naa.

⁸Díkɛɛ ǹûai ŋí paâi, ŋa lɛɛ tɔɔ-ni ńyãa tɔnɔ, nya ƃe ŋá ŋuŋ-ma pîlaŋ ŋ́gɛ wɔ́lɔ ǹyɛɛi, “Óo Ŋ̀wála-wâla kélee Yâwɛɛi, ya pâi ílii ŋwanai í Eezuɛ ƃelai gbeli-ŋai lɛ̂ɛ Zerusâlɛŋ kélee paa?”

⁹Nya ƃe Ɣâla è ŋ́oo su tòo ǹyɛɛi, “Eezuɛ ƃelai da Zuda ƃelai dísɔnyɔ̂ŋ-ŋai su kɛ̂tɛi kpɔ́ a m̀aa pɔlɔ-pɔlɔɔ. Da núu páa kpɔ́ ǹɔii gwaa kélee ma. Ǹyaŋ teniŋ ƃô laa fé ŋɔ́nɔ Zerusâlɛŋ. Kpɛ́ni fêi, da kɛ̂ m̀ôi dîyɛɛi, ‘Yâwɛɛ a bôlu tɔɔ ǹɔii mâ. Yâwɛɛ fé kú kaai.’

¹⁰M̀ɛni ma ḿve pâi díŋɛi malôŋ kaai. Dí tɔnɔ kpîŋ fé pâi lɛɛ̂i. Ŋa pâi tuai a dîa yɛ̂ɛ berei dítua la a díƃaraai.”

¹¹Nya ƃe ǹúui nyii kɛ a maa ɣiriɛɛ a zeɣe nɛnɛ-fɛfɛ̂i gɔlɔ-pɔ̃yɛɛ sɛŋ kɛ́ ƃo ǹyéei è lene pôlu é pá é goraŋ ƃó Yâwɛɛ mi ǹyɛɛi, “Mɛnii nyii kélee í mò mai, ŋâa gélee kpɔ́ ŋa see kɛ.”