Read Kpelle Danîa 1 Bible Online

Danîa 1 - Kpelle bible

Danîa 1

¹Zuda kaloŋ Zɛoakiŋ ŋɔkâloŋ-laa koraŋ zaaƃai su, Babelɔŋ kaloŋ Nɛbukinaza è pà a ŋɔkɔkûluƃa-ŋai dí Zerusâlɛŋ taa-leei maa tínaŋ dí bere-ŋai kélee tóo.

²Kúnuu-namui Ɣâla è gɛ̀ é Zɛoakiŋ soŋ é Ŋ̀âla-pɛrɛ Kɛ́tɛi mu sãai da-ŋa sìɣe. E zãai ŋí sìɣe é lí a dia Babelɔŋ ŋɔɣâla-pɛrɛi mu. È dí pù ƃɛ́i ma a kâa ŋɔɣâla-pɛrɛ kɛ́tɛi mu-sãai pûi kɛ̀ naai.

³Ɣele tɔ̂nɔ da gâloŋ è ŋɔtíi kɛ́-ƃelai láa túɛ-nuu kɛ́tɛi Asipena tòli é m̀ó mà a gɛɛ é Eezuɛ-ƃelai díkâloŋ-ŋai da ǹúu láa túɛ-ƃelai dílônii sinaai da-ŋa siɣe zu é pá a dia bɔ́.

⁴Ǹyɛɛ mà ǹûai ŋí dí kɛ́ a nyáŋkpa lɛ́lɛɛ-ŋa nyii-ŋai dífe kɔ̃́linii. Díkɛ a dítareɛɛ sɛŋ maa kɔ́ri pere sii kélee su. Díkɛ a díkili-ŋa ponoɔ́ɔ, dímɛni ŋá káa la nɛ̃ɛ. Díkɛ a díkpɛtɛɛ tíi kɛ́ mɛni ma gâloŋ ŋɔtíi kɛ́ pɛrɛi mu. Babelɔŋ sii-wooi lɛ́ dîa da maa mɛ̂ni-pɔ̂lɔ-ŋai.

⁵Gâloŋ è mò ma máŋ a gɛɛ é kɛ́ mii-sãai ŋɔpɛ́rɛi mu-ƃelai da mìi, da ŋwã̂ai da gbelei, da tɛɛ̂i ǹyaŋkpa-ŋai ŋí pɔ́, dí dímɛi kâa kóraŋ saaƃa yée mu. Góraŋ saaƃai a kpɛ̀ɛ, dí dí kɛ́ a gâloŋ-pɛrɛi mu tii kɛ́-ƃelai da.

⁶Danîa, Anania, Misãŋ da Azaria dí kɛ̀ ǹyaŋkpa-ŋai ŋí sáma. Ǹyaŋkpa-ŋai ŋí dí kɛ̀ a Zuda ŋɔsuui su-ƃelai da.

⁷Asipena è dílaa maa fâleŋ. È Danîa tòli a Bɛtesaza, é Anania tóli a Sadura, é Misãŋ tóli a Meesa, é Azaria tóli a Abɛnigo.

⁸Kɛ́lɛ Danîa è gbɛ̀tɛ gíli ŋá a gɛɛ vé gâloŋ ŋɔmii-sãai ŋí da mìi, kpaa máŋ é ŋwã̂ai da kpele kpɛ́ni fêi, a gɛ̀ tí màa fé pâi kɛ̂i a ŋ̀waá. Ǹya ƃe è Asipena marê kɛ̀ a gɛɛ é fáa ma.

⁹Ǹyaŋ Ɣâla è gɛ̀ Asipena é Danîa maloŋ káa.

¹⁰Kɛ́lɛ Asipena è kɛ̀ yaôi gâloŋ ma. È mò Danîa ma ǹyɛɛi, “Gâloŋ ǹyaa kpîŋ è ká kɔ̃́nɔŋ mɛni kpɛ̀tɛ, zãâi ká mii da zɛŋ ká gbelei é dɛ́ɛ ḿƃɔ a gɛɛ ŋ́gɛ dɛ̀ɛ ká pɔ́ a ɣele kélee. Tãi a seri à gàa a gɛɛ kákɔlɔ fé kâa a ǹɛ́lɛɛ yɛ̂ɛ ǹûai kpéli-ŋai, a pâi ḿbaâi.”

¹¹Danîa è lì ǹúui pɔ́ Asipena è dɔ̀ɔ ǹyaa Danîa, Anania, Misãŋ, da Azaria dímɛi káa mɛni mɛi ǹyɛɛ mai,

¹²“Kɛ́ nɔ́ tuma-laa da kpele-ya tɛɛ̂i kúpɔ fólo puu yée mu a kúwɔ̂ mii-sãai.

¹³Ǹaa pôlu ma kúkpono maa kpɛ́ɛ kwa ǹyaŋkpa-ŋai nyii-ŋai da m̀ii-sãai miî gâloŋ è m̀ɛni ƃòi í gáa berei kwa pâi kɛ̂i lai. À kɛ̀ tí, gɛ̀ ní mɛnii ya pɔ̂ri gɛ̂i, gɛ́.”

¹⁴È fàa díwoo ma. Dí gɛ̀ tí fólo puu yée mu.

¹⁵Ǹyaŋ vólo puui tɛɛi, dí kɛ́ a díkpono ŋɛ́i-kulaa, díƃɔlɔɔ é tɛ́ɛ diai dîa kɛ̀ gâloŋ-pɛrɛi mu mii-sãai miî.

¹⁶Nya ƃe ǹúui kɛ̀ dí mɛi káa mɛni mɛi è kɛ̀ tuma-laa tɛɛ̂i dípɔ a díwɔ̂ mii-sãai. Dífe kɛ́ ní m̀ii-sãai da miî nyii gâloŋ è m̀ɛni ƃòi.

¹⁷Ɣâla è táre da mɛni ŋá káa kili-ŋa pono tɛ̀ɛ ǹyaŋkpa náaŋ ŋí pɔ́. Dí kɔlɔ sîi támaa lòno díkili-ŋa é pono mɛni sîi támaa su. É kúla nyíŋi pôlu, Ɣâla è see-woo da zĩâ su-kula târe tɛ̀ɛ Danîa pɔ́.

¹⁸Góraŋ saaƃai Gâloŋ Nɛbukinaza è nɛ̀ ǹyaŋkpa-ŋai ŋí dísɛŋ maa kɔ́ri mɛni mai kpɛɛi, Asipena è pà a díkelee bɔ́.

¹⁹Gâloŋ è lòno dípɔ. È dímaa kpɛ̂ɛ a ǹɛ́lɛɛ. È gàa a gɛɛ Danîa, Ananîa, Misãŋ da Azaria dímɛni ŋá káai da dísɛŋ kɔ́lɔŋɔɔi è kɛ̀ a dɛɛ́ ǹyáŋkpa-ŋai kpéli-ŋai kélee dîa. Nya ƃe è díkɛ̀ a gâloŋ-pɛrɛi mu tii kɛ́-ƃelai da.

²⁰Mare kɛ̂ɛ sii kélee gâloŋ a kâa gɛ̂i ǹyaŋkpa-ŋai ŋí dí kɛ̀ a zu-kulâi kɔ́lɔŋɔɔ. Mɛni kpânaŋ da mare kɛ̂ɛ sii kélee gâloŋ a kâa pà lai ǹyaŋkpa-ŋai ŋí dí kɛ̀ a zu-too pêre kɔ́lɔŋɔɔ gîei puu é tɛ́ɛ la ŋɔtuɛ-mɛni ƃó-ƃelai da ŋɔtɛli kpɛ́-ƃelai dîa, ŋɔkâloŋ-laai su gwaa kélee.

²¹Danîa è lɛ̀ɛ tíi kɛ̂i gâloŋ ŋɔtíi kɛ́-pɛrɛi mu é lɛ́ɛ la zu Gâloŋ Sarɔ ŋɔkâloŋ koraŋ maa-ŋuŋ é seri.