Read Kpelle Danîa 11 Bible Online

Danîa 11 - Kpelle bible

Danîa 11

¹Ǹyaa ƃe ŋa kpɔŋ mâa tɛɛ̂i bɔ́ ŋ́gɛ m̀aa kɔ̃ɔ. Ŋ́gaa wɔ́lɔ gbɔŋ maai ŋí tɛɛ̂i bɔ́ é síɣe Midia-nuui Darɔ ŋɔkâloŋ laa koraŋ maa-ŋuŋ ma.”

²Ŋ̀âla-taa-kelai è mò ǹyɛɛi, “M̀ɛnii ŋa pá m̀ôi yâi, gáa a tɔ̃yâ ǹyaŋ ŋ̀aa sèe a pâi kɛ̂i. Kâloŋ saaƃa da pâi kâloŋ-laa kɛ̂i Pɛsia lɔii mɛi a tɛɛ-ŋa. Gâloŋ ǹáaŋ ɣelei a pâi pâi nyii pâi kɛ̂i a dɔɔ́ è tɛ́ɛ gâloŋ maa-ŋuŋ saaƃai ma. A dɔɔ lâai ŋí sɔlɔ ƃô, a pâi tɔɔ̂i Gurii lɔii-kpiniŋ ma.

³“A kɛ̀ tí kâloŋ da kpɛ́ni a pâi mu siɣêi. Wála-wala-laa támaa a pâi kɛ̂i ǹyêei. M̀ɛnii kélee a pâi wɛ̂lii é gɛ́i ǹyaa ƃé a pâi gɛ̂i.

⁴Kɛ́lɛ tãi ŋɔkâloŋ-laai su a pâi kpananii lai, maa tãi ƃé ŋ̀aa pâi kɔlɛ̂i la gîei náaŋ. M̀éla da fé pâi lɛɛ̂i ǹóŋ da yêei. Núu da kpɛ́ni-ŋa ƃé pâi bɔ́ɔ-ŋa siɣêi. Kɛ́lɛ dí wála-wala-laai fé pâi kɛ̂i yɛ̂ɛ ŋ̀ɔi.

⁵“Ize kaloŋ a pâi kɛ̂i a ŋ̀wála-walaa. Kɛ́lɛ ǹyée mu-nuui dɔnɔ ŋɔwála-walai a pâi kɛ̂i a dɛɛ́ ŋ̀ɔi ma, ŋɔkâloŋ lɔii kɛ́tɛ é tɛ́ɛ ŋ̀ɔi ma.

⁶Kóraŋ kpɛ́-kpɛɛ a tɛ̀ɛ Ize kaloŋ da Asiria Kaloŋ da pâi díwoo kɛ̂i zu tɔnɔɔ. A gɛɛ ŋoo kɛ-zu-tɔnɔi ŋí su é kɛ́ a gbanaŋɔɔ Ize kaloŋ a pâi ǹóŋ-nɛnii tɛɛ̂i Asiria Kaloŋ pɔ́ a nɛnî. Kɛ́lɛ ŋ̀oo kɛ́-zu tɔnɔɔi ŋí su fé pâi tûai kpɛ́ni fêi, da pâi ǹɛnîi paâi da ǹóŋ, ŋɔsurɔ̂ŋ é pɛ́lɛ ǹyée mu-ƃelai kélee dîa.

⁷Nàa a kɛ̀ tí ǹɛnîi ŋɔkáayɔɔi dɔnɔ a pâi kɛ̂i a kâloŋ Ize lɔii mɛi. A pâi kɔ́ pɛlɛ̂i Asiria Kaloŋ ma é ŋɔsĩaŋ wólo. A pâi lɛɛ̂i kɔ̂i bɔ́ é ǹyée mɛi ɣále.

⁸A pâi díɣâla pɔɔ-kɔɔŋ-ŋai, dígôo-ŋai da díkane-ŋai kélee kulâi díyêei é lí a dia Ize lɔii su. Kóraŋ kpɛ́-kpɛɛ yée mu, laa sâa fé ŋɔ́nɔ pâi kɛ̂i Asiria Kaloŋ da Ize kaloŋ díloai.

⁹A kɛ̀ tí Asiria Kaloŋ ǹyaŋ a pâi kɔ́ pɛlɛ̂i Ize kaloŋ ma. Kɛ́lɛ ǹaa fé pâi tuâi Asiria Kaloŋ kɛ́ lène pôlu bɔ́-taai.

¹⁰“Asiria Kaloŋ ǹônii-sinaai da díkɔ-kɔ́-ƃelai da pâi díkpîŋ kpɛtɛ̂i kɔ́ kɔ́ mɛni ma. Dɔnɔ a pâi kɛ̂i tuɛ-pere da ŋɔkɔ́-kɔ́-ƃelai yɛ̂ɛ ya-fɛ̂ɛ kɛ́tɛ. Da pâi zĩ̂aŋ sonîi a wála-wala-laa.

¹¹Ize kaloŋ ǹyaŋ a pâi mu siɣêi a lii-ŋwana pere é pɛ́lɛ dîa. Ŋɔkɔ́ kɔ́-ƃelai da pâi kɔ̂i dípɔ a wála-wala pere dí díkɔ kɔ́-ƃelai gbulu kɛ́tɛ sóŋ.

¹²A pâi yoŋka têei gɔ kûluƃa kpulu kɛ́tɛi mɛni ma è dí sòŋ. A pâi dámaa ɣele paâi. Kɛ́lɛ ŋɔkɔkûluƃa-laai ŋí su fé pâi kôyai.

¹³“Asiria Kaloŋ a pâi kɔ́ kɔ́-ƃela kpulu da kpɛ́ni-ŋa siɣêi nyii zu-ƃela tâmaai é tɛ́ɛ maa-ŋuŋ ma é dípu ŋɔkɔ́ kɔ́-ƃelai dîa. Kóraŋ kpɛ́-kpɛɛ a tɛ̀ɛ, da pâi kɔ́ pɛlɛ̂i Ize ma.

¹⁴Núu támaa da pâi tɔɔ̂i Ize kaloŋ ma tãi támaa yée mu. M̀ɛni su-kara-ƃelai ínûai sámai díkelee da pâi tɔɔ̂i Ize kaloŋ ma a gɛɛ zĩ̂ai ŋí ŋàa-see é kɛ́. Kɛ́lɛ díyee fé pâi pɔrîi ma.

¹⁵Asiria Kaloŋ a pâi zĩ̂aŋ maa tínanîi é daa-leei sóŋ. Ize kaloŋ ŋɔkɔ́ kɔ́-ƃela wála-wala-ŋai dífe pâi pɔrîi tɔɔ̂i dí ŋɛ́i. Pɔri mâa fé pâi kɛ̂i kpîŋ gɔ-kuluƃa-ŋai yêei dí tɔ́ɔ.

¹⁶M̀ɛnii da pâi wɛ̂lii dí gɛ́i da pâi gɛ̂i. Núu da fé pâi pɔrîi tɔɔ̂i díŋɛi. Gâloŋ a pâi Gono-tee Lɔii siɣêi é sée m̀ɛi. Ǹaa a pâi kɛ̂i ŋɔwála-wala-laai mu.

¹⁷“A pâi ŋɔkɔ́ kɔ́-ƃelai siɣêi da dîa-ni dí lí Ize kaloŋ pɔ́ naa da ǹyaa dí díwoo pú gîei tɔnɔ é ǹóŋ-nɛnii tɛ́ɛ bɔ́ a ŋɔnɛnî. A pâi gɛ̂i tí a gɛɛ é pere kɔ́ri é ǹyée mɛi ɣále é ŋɔkâloŋ-laai kúla ǹyêei. Kɛ́lɛ ŋɔmɛni kpɛtɛɛi ŋàa-see fé pâi kɛ̂i a ǹɛ́lɛɛ. Vé pâi kpɔŋ mâa da sɔlɔ ƃôi zu.

¹⁸A kɛ̀ tí, a pâi kɔ́ pɛlɛ̂i yúo ma lɔii-kpiniŋ su kaloŋ-ŋai dîa é dámaa yée mɛi ɣále. Kɛ́lɛ lɔii-ŋuŋ da kpɛ́ni su kaloŋ a pâi ǹaa kulâi ǹyêei é ŋɔsu mɛni kɛ́tɛ laai kpéra. Ǹyaŋ a pâi liî pôlu a ŋumɛ bɔ́-taai.

¹⁹Ǹaa a kɛ̀ tí a pâi pûi gɛ́ lì gbɔ́ɔi lɔii su ƃɛ́i ŋɔkili tɔ̂ɔ-maai káa naai. Kɛ́lɛ da pâi ǹyée mɛi ɣâlei berei su ǹyaŋ núu da fé ŋɔ́nɔ pâi duŋ mɛnîi.

²⁰“Ǹúui pâi lɛɛ̂i ƃɔ́ɔ ŋái a pâi pɛlɛ̂i ǹûai lúaŋ-ni gɛ́ ŋuŋ-fela-fei kula dîa a gɛɛ ŋɔtɔɔ-laai su é kɛ́tɛ. Ǹyaa máŋ a pâi saâi. À kɛ̀ núu da ƃé bàa kpaa máŋ é lɛ́ɛ kɔ̂i, núu da fé pâi gɔ́lɔnîi.”

²¹Ŋ̀âla-taa-kelai è ŋɔ́nɔ mò ǹyɛɛi, “Ǹúui pâi lɛɛ̂i bɔ́ɔ ŋái, vé pa kɛ̂i a gâloŋ nuu-suui su-nuu da. A pâi kɛ̂i a zɔŋ nyɔ́mɔɔ. Tãi ǹûai kíli fé pâi kɛ̂i la mai, m̀aa tãi ƃé a pâi gâloŋ-laai siɣêi la a wôya-pere.

²²Ǹúui kélee pâi tɔɔ̂i mài, a nɛ̃ɛ ma kpîŋ maa nûui é kɛ́ a Ɣâla ŋɔsâla láa soŋ nuui da, a pâi m̀aa nuui su-karai.

²³Da màrâa lɔii-ŋuŋ da kpɛ́ni-ŋa su-ƃelai da díwoo pù gîei, a pâi díkîrii é kɔ́ pɛ́lɛ dîa. Ŋɔwála-walai su a pâi kpananîi a ŋ̀ánaa berei máŋ gáa la lɔii-ŋuŋ loŋ láa túɛi.

²⁴Ǹɔii m̀ɛi-ŋai tɔɔ-sãa támaa káa naai, a pâi nàa siɣêi ǹɔii ǹâmela tɛ̂i-pere. M̀ɛnii ǹâŋ kpaa máŋ ǹâŋ ŋɔ̀naŋ-ni dífe wɔ́lɔ gɛ́ níi, a pâi gɛ̂i. Zãâi a pâi zɔlɔ ƃôi kɔ́ sui, a pâi ŋ̀áa kɔlɛ̂i bôlu-ƃelai dîa. A pâi kɔ̂i a gɛɛ é taa-lee maa tínaŋɔɔ-ŋa sòŋ kɛ́lɛ ŋɔtãi su a pâi kɛ̂i a gbuaa.

²⁵“A pâi kɔ́ kɔ́-ƃela kpulu kɛ́tɛ siɣêi é kɔ́ pɛ́lɛ Ize kaloŋ ma. Ize kaloŋ ǹyaa máŋ a pâi ŋɔkɔ́ kɔ́-ƃela kpulu wála-walai siɣêi dí tɔ́ɔ ma. Kɛ́lɛ Ize kaloŋ fé pâi pɔrîi kpɛ́ni fêi,

²⁶ŋɔkɔ kuluƃa-ŋai da pâi gîrii, ǹyaŋ da pâi dámaa ɣele paâi.

²⁷Gâloŋ feerɛi da pâi seêi dí dílaa míi gîe ma. Dímɛni kpɛtɛɛ-ŋai da pâi kɛ̂i a kíri mɛni-ŋa. Da pâi lɛ́ɛ kɛ̂i díkîe-ni dîa. Dímɛni kpɛtɛi ŋàa-see fé pâi kɛ̂i, kpɛ́ni fêi, maa tãi fé nîi seri ní.

²⁸Zãai Asiria Kaloŋ è gula yêei kɛ̀ gɔ́i sui, a pâi tɔɔ̂i zu. A pâi liî a gélee bɔ́-taai. A pâi Ɣâla ŋɔnûai díɣâla mɛni kɛ́-perei kperâi. M̀ɛnii kélee a pâi wɛ̂lii é gɛ̂i, a pâi gɛ̂i. Ǹaa a kɛ̀ tí é lène pôlu bɔ́-taai.

²⁹“A pâi ŋɔ́nɔ pâi pôlu é Ize kpiniŋ síɣe yɛ̂ɛ berei ŋɔmɛni kpɛtɛɛi káa lai. Kɛ́lɛ vé pâi kɛ̂i a ǹɛ́lɛɛ m̀ɛni ma.

³⁰Yá ŋá kɔ-kɔ-keleŋ-ŋa támaa da pâi kulâi Kitiŋ dí pá kɔ́ pɛ́lɛ m̀a dí ǹyée mɛi ɣále. A pâi a yaôi é lene pôlu bɔ́-taai a lii ŋwâna. “Gɛ̀ ní ŋɔlii ŋwânai su, a pâi kɔ̂i a gɛɛ é Ɣâla ŋɔnûai kpéra díɣâla mɛni kɛ́-mɛni-ŋai dîa. Diai pâi kɛ̂i gbanaŋ-wooi mɛi kâai da Ɣâla-ni díloai, a pâi ǹíi ŋ̀wânai dîa. Kɛ́lɛ diai pâi gbanaŋ-wooi karâi da Ɣâla-ni díloai, a pâi dí féla fêi.

³¹Ŋɔkɔ kɔ́-ƃelai da pâi mɛni nyɔ́mɔɔ-ŋa kɛ̂i Ŋ̀âla-pɛrɛ Kɛ́tɛi mu. Da pâi ǹûai díɣele kélee sala kula mɛ̂ni-ŋai kperâi. Da pâi zɛŋ nyɔ́mɔɔ kɛ́tɛi seêi Ŋ̀âla-pɛrɛ Kɛ́tɛi mu.

³²Diai pâi gbanaŋ-wooi karai da Ɣâla-ni díloai, gâloŋ a pâi díkîrii é díyee mɛi ɣále. Kɛ́lɛ diai laa-la kpanaŋ káa díyêei Díɣâlai mɛni mai ǹyée fé pâi pɔrîi dîa.

³³Ǹúu láa túɛ-ƃela táreɛ-ŋai da pâi dítarei lɛ̂i núu támaa ma. Kɛ́lɛ da pâi da-ŋa paâi a ƃóa-sɔ̂kpɔ kpaa máŋ dí díkereŋ. Da pâi sãa kulâi da-ŋa yêei a wála-wâla-laa dí dípili kpini-pɔrɔŋ.

³⁴Da kɛ̀ dípaâi, Ɣâla ŋɔnûai da pâi kpɔŋ mâa loŋ sɔlɔ ƃôi. Núu támaa da pâi pâi dípɔnaa-pere berei máŋ teniŋ ƃô-laa fé la díyêei.

³⁵Da pâi dáre-ƃelai da-ŋa paâi. Nyíŋi a pâi gɛ̂i núu támaa dí maa wâa-laa sɔlɔ ƃó. A pâi lɛɛ̂i kɛ̂i tí ŋ̀éniɛi kpɛɛ ŋá tãi é seri tãi Ɣâla è ǹɛi.

³⁶“Asiria Kaloŋ a pâi m̀ɛnii kɛ̂i a wɛ̂lii lai. A pâi gbîŋ ma tɛ̂i, gɛ́ yoŋka tèe ŋ̀âla-ŋai mɛi. A pâi mɛni nyɔ́mɔɔ-ŋa ƃôi é pîlaŋ ŋâla-ŋai kélee mɛi Ɣâlai ma. A pâi nyíŋi kɛ̂i é lɛ́ɛ la zu tãi Ɣâla è ǹɛi é seri. Kpɛ́ni fêi m̀ɛnii Ɣâla a gbɛ̀tɛ a gɛɛ é kɛ́i, fɛ̂ɛ é kɛ́.

³⁷Vé pâi ŋumɛ mâa tɛɛ̂i ǹâŋ-ni díɣâlai pɔ́ kpaa máŋ ŋ̀âlai ǹɛyâai díwɛ̂li-ni lai, kpaa máŋ ɣâla da kélee. A pâi gbîŋ kɛ̂i a díkelee dímɛi kâloŋ.

³⁸A pâi ŋumɛ-maa tɛɛ̂i nɔ́ ŋ̀âlai pɔ́ nyii a nûa maa-kɔ̃ɔi mɛi kâai. A pâi gôo, káni, kɔ́ni da sama-sɛŋ sɔ̃ɔ kpanaŋɔɔ sala kulâi ŋ̀âlai ŋí ma nyii ǹâŋ-ni dífe kɛ́ ní a gɔlɔŋɔɔi.

³⁹A pâi ɣâla da kpɛ́ni fɛli-ƃela siɣêi a ŋɔsiɣãŋ mɛi káa-ƃela. Diai kélee da díyee sèe m̀ui a pâi ƃaa kɛ́-maa tɛɛ̂i dípɔ é tíi kpaya-kpaya-ŋa tɛɛ dípɔ da lɔii-kpûa-ŋa.

⁴⁰“Asiria Kaloŋ ŋɔtãi a kɛ̀ pâi kpɛɛ̂i, Ize kaloŋ a pâi kɔ́ pɛlɛ̂i m̀a. Asiria Kaloŋ ǹyaŋ a pâi pâi a ŋɔkɔ́ kɔ́-ƃelai kɔ́ kɔ́-keleŋ-ŋa su, soo-ŋa mɛi da tîma-ŋa dí kɔ́ bɔ́. Da pâi kɛ̂i pâi yɛ̂ɛ ya-fɛ̂ɛ, dí lɔii-ŋuŋ támaa síɣe.

⁴¹Tãi a pâi pâi la Gono-tee Lɔii sui, a pâi núu wála támaa paâi. Ǹyée fé pâi pɔrîi Idɔŋ da Môa dîa. Amɔŋ lɔii láa túɛ-ƃelai dîa máŋ da pâi pûi.

⁴²A pâi pɛlɛ̂i lɔii-ŋuŋ támaa mɛi. Ize lɔii-ŋuŋ a pâi lɛɛ̂i ǹyêei.

⁴³A pâi pɛlɛ̂i ƃɛ́i-ŋai mɛi gôo, káne da Ize tɔɔ-sãai díkaa naai. A pâi Lebia da Itiopia sonîi.

⁴⁴Kɛ́lɛ duŋ-ŋai pâi kulâi vóloi kulâi-pere da kpɛlɛɛ-perei da pâi kɛ̂i mà a lii sɛlɛ̂ŋ kɛ́tɛ. Da pâi gɛ̂i é kɔ́ a ŋánaa é núu támaa su-kara.

⁴⁵A kɛ̀ tí a pâi ƃûu tɔɔ̂i yúo da ǹyéei loai ƃɛ́i Ŋ̀âla-pɛrɛi è kɛ̀ naai. Ǹaa pôlu ma a pâi toôi núu da fa kɛ̂ naa é kpɔ́ŋ ma. Ǹyaŋ a pâi saâi.”