Read Kpelle Danîa 9 Bible Online

Danîa 9 - Kpelle bible

Danîa 9

¹Midia nuui Dariɔ, Zase ǹóŋ-surɔŋ è kɛ̀ a kâloŋ Babelɔŋ lɔii-ŋuŋ mɛi.

²Ŋɔkâloŋ-laa koraŋ maa-ŋuŋ su, ńyãa, Danîa, ŋá kɛ̀ Ɣâla ŋɔkɔlɔi lônoi ŋ́gɛ ŋ́gili ŋá sìa é pîlaŋ ma nyii Zɛlemaya è bɔ̃yɛ é pîlaŋ Zerusâlɛŋ ma nyii pâi kɛ̂i lâani a bûŋ a kóraŋ buu lɔ́ɔlu mɛi feerɛi.

³Nya ƃe ŋá luu sia ḿâ ŋá maloŋ tôo-maa seɣe too ḿâ ŋá suŋ-siɣe ŋá tínaŋ Ǹuu-namui Ɣâla pɔ́ naa pere ŋá vɛli a gbanaŋɔɔ.

⁴Ŋá ŋánûai dísɔnyɔ̂ŋ-ŋai ƃò Ŋánuu-namui Yâwɛɛ ma, ŋá pɛ́lɛ a gɔ́ɔ. Ŋá ƃò mà ńyɛ̂ɛi, “Óo Ǹuu-namui, ǹyao ma Ɣala maa pɔlɔ-pɔlɔi, ya íwɛli kɛ́-maai maa kono-teei ŋàa-see kɛ̀ diai yêei dí íwɛli-ni dí kɛ́ ítɔ̂ŋ ŋàa-see kɛ̂i.

⁵“Kwa sɔnyɔ̂ŋ kɛ́ a yá. Kwa mɛni nyɔ́mɔɔ-ŋa kɛ́ kwa tɔɔ yâ. Kwa tɔɔ mɛni-ŋai dîa í mò kûai, kúfe ŋɔ́nɔ siâi a ítɔ̂ŋ-ŋai lá-woo.

⁶Kúfe kúwoli tɔɔ̂i ílono kɛ́-ƃelai dîa nyii-ŋai kúpɔ ílaai sui, kwa kúkâloŋ-ŋai, kúlaa túɛ-ƃelai, kúnâŋ pɔlɔ-ŋai da kúlɔii lônii-ŋai kpéli-ŋai kélee.

⁷Ǹuu-namui, ísãâi. Kɛ́lɛ kúai a Zuda, Zerusâlɛŋ, Eezuɛ da Eezuɛ-ŋai kpéli-ŋai nyii-ŋai dítaa-taai kúkɔlɛ ma da ǹɔii-ŋûŋ-ŋai su nyii-ŋai díkaa kwaa kôya mai, ŋumɛ a kúpaa a berei kúfe la a tɔ̃yâ-ƃela ímɛni mai.

⁸Sɔnyɔ̂ŋ ŋumɛ a kúmɛi pɛ́lɛ kwa kúkâloŋ-ŋai, kúlaa-tuɛ-ƃelai da kúnâŋ pɔlɔ-ŋai.

⁹Berei máŋ kútɔɔ̂i la yâi, maloŋ kâa da su-mɛni lɛ̂ɛ káa nɔ́ íyêei kúmɛni ma.

¹⁰Kúfe tá íwoo mɛni ní kpaa máŋ kú dɔ̂ŋ-ŋai mɛi káa í dɛ̀ɛ kúpɔ ílono kɛ́-ƃelai sârai.

¹¹Kúsɔnyɔ̂ŋ-ŋai da gɛ́ ǹaɣâŋ-ŋai da m̀óa-sɔkpɔ mɛni ŋá-teɛɛ-ŋai í bù íyee mu-nuui Mose ŋɔtɔ̂ŋ kɔlɔi sui gélee a pú kúŋûa.

¹²M̀ɛni kpɔ̂lui í mò a gɛɛ a pâi kɛ̂i a kûa kwa kúmɛi-ƃelai gélee ŋàa-see a kɛ́. Mɛni kpɔ̂lu da fé tá kɛ́ ní ɣele ma é kɛ́ yɛ̂ɛ m̀ɛnii kɛ̀ a Zerusâlɛŋ-ƃelai.

¹³M̀ɛni kpɔ̂lui kélee m̀ɛni pɔ̃yɛɛ̂i Mose Ŋɔtɔ̂ŋ Kɔlɔi sui, gélee a kɛ́ a kúa, kɛ́lɛ kúfe wɛ̂lii kú kúyee kúla kúsɔnyɔ̂ŋ-ŋai su kú tínaŋ ípɔ naa pere kú ítɔ̃yâi kɔ́ri.

¹⁴Óo Ǹuu-namui Ɣâla, íkɛ̀ a íkpîŋ kpɛtɛɛ a gɛɛ í kúkula maa kɛ́, ǹyaŋ í gɛ̀ kpɛ́ni fêi ya m̀ɛnii kɛ̂ nyii zãai. Kɛ́lɛ kúfe kúwoli tɔɔ-ni yâ.

¹⁵“Óo Kúnuu-namui Ɣâla, yá ƃe kú kùla Ize lɔii su a íwala-wala yeei. Nyàŋ maa laai tí káa sâa yâ nyii pâi kɛ̂i naa wɔ́lɔ-wɔlɔ da wɔ́lɔ-wɔlɔi. Kwa sɔnyɔ̂ŋ kɛ́ a yá.

¹⁶Ítɔ̃yâ-laai su, ílii ŋá yéŋ í Zerusâlɛŋ nyii gáa a ítaa-lee kɛ́tɛi, su-mɛni lɛɛ. Ítaa-leei ká ŋí íyee maa waai ma. Kúsɔnyɔ̂ŋ da kúnâŋ-ni díwɔ̂i a gɛ́ ƃaa kula maa a sɛ̂lɛŋ daa-leei ŋí ma. Gɔlɛ ma-ƃelai kélee da kɛ́ nɔ́ ɣɛlɛ-maa kulâi gbonôi.

¹⁷Kúɣâlai, íyee sée íyee mu-nuui ŋɔfɛli-wooi da ŋɔpɛlɛ gɔ́ɔ mu wooi mu. Íyee see íkwaa maa waa wóloɔi ŋí mɛni mu.

¹⁸Íwoli tɔ́ɔ kûa, óo Ɣâla. Íŋɛi lá ƃó í kúkaa daa-lee wóloɔɔi ŋí bilêŋ ŋá nyii ílaa seeɛ̂i mai. Kúfe í marê kɛ̂i nɔ́ ítɔ̃yâ-laai ǹyaa tɔnɔ mɛni ma kɛ́lɛ ímaloŋ kâa kɛ́tɛi mɛni ma.

¹⁹Óo Ǹuu-namui, íwoli tɔ́ɔ kûa í kúsu-mɛni lɛɛ. Kúwoo mɛni í mɛni da kɛ́ a maa félaa a gɛɛ nûa dí gɔ́lɔŋ a gɛɛ yá ƃa Ǹuu-namui. Ífe tãi támaa sìɣe, kpɛ́ni fêi ílaa káa daa-leei ma da ínûai.”

²⁰Ŋá kɛ̀ Ɣâla fɛlîi, ŋ́gɛ ŋásɔnyɔ̂ŋ ƃò da ŋánûai Eezuɛ-ŋai díwɔ̂i, ŋ́gɛ Ŋ̀âla-pɛrɛ Kɛ́tɛi maa kpera fei kɛ̀.

²¹È kɛ̀ nɔ́ tí, ŋá Ŋ̀âla-taa-kelai Geƃɔlɔ, nyii ŋá gàa zĩ̂ai su a maa ŋuŋ, káa gɛ́ kòoŋ gɛ́ pà é kúla kpɔ́ nɔ́ ŋ́ɛi ŋ̀á ma a ŋ̀ele-wulii salai kula tãi.

²²È mò ḿâ ǹyɛɛi, “Danîa, ŋá pá a gɛɛ ŋá ítare m̀ɛnii í naa kàai m̀ɛni su.

²³Í pɛ̀lɛ kpɔ́ nɔ́ Ɣâla fɛlîi Ɣâla é ífɛli-wooi su-too. Ǹyaa ká ŋí ŋá pà m̀ôi yâ. Ɣâla aâ ǹyée see ímu a gbîŋ-kpîŋ. Zĩai ŋá káa íyee sée ŋ̀orɛ̂-wooi mu.

²⁴“Góraŋ lɔ́ɔlu mɛi feerɛ seêi buu lɔ́ɔlu mɛi feerɛi kpɛɛ-ŋa tãi ƃé pâi kɛ̂i a káŋuŋ ma ƃò m̀ɛnii kɔ́ɔ pîlaŋ tãi da kátaa-lee maa waai. Zĩai ŋaa-see a pâi kɛ̂i. Ɣâla a pâi kásɔnyɔ̂ŋ su-mɛni lɛɛ̂i, é tɔ̃yâ-laa mɛni ƃóɔɔ kɔ́ɔ pîlaŋ kámɛni ma. A pâi gɛ̂i káa kpîŋ ka Ŋɔpɛ́rɛ Maa Waai tɛ́ɛ ŋɔ́nɔ bɔ́ pôlu.

²⁵M̀ɛnii ŋí kɔ́lɔŋ í ŋ̀á káa a ǹɛ́lɛɛ. É kúla tãi ma da pâi Zersalɛŋ tɔɔ́ pôlu maa tɔ̂ŋ tɛɛ̂i la a gɛɛ ŋ̀aa-see é kɛ́, ǹúui Ɣâla è ǹɛ é lɛ́ɛ pâi, kóraŋ lɔ́ɔlu mɛi feerɛ seêi lɔ́ɔlu mɛi feerɛ a pâi tɛɛ̂i. Da pâi Zerusâlɛŋ tɔɔ̂i ŋɔ́nɔ pôlu dí màa kóli a siɣaŋ kpânaŋ dí pere lêe-ŋa láa zâmai a tɛɛ-ŋa. A pâi kɛ̂i naa a kóraŋ lɔ́ɔlu mɛi feerɛ seêi buu lɔ́ɔlu mɛi da káo feerɛ. Kɛ́lɛ góraŋ-ŋai ŋí da pâi kɛ̂i a mɛni kpɔ̂lu koraŋ-ŋa.

²⁶Da pâi ǹúu láa túɛ-nuui ŋí paâi a góraŋ-ŋai ŋí kpɛɛ ŋá tãi ǹaa é lɛ́ɛ a vólo. Lɔii-ŋuŋ da kpɛ́ni su-ƃela láa túɛ nuu da ŋɔkɔ-kuluƃa-ŋai da pâi Zerusâlɛŋ su karâi da Ŋ̀âla-pɛrɛ Kɛ́tɛi. Kɔ́ a pâi kɛ̂i nɔ́ kɔ̂i naa yɛ̂ɛ ya fɛ̂ɛ yɛ̂ɛ berei Ɣâla è gbɛ̀tɛ lai.

²⁷A pâi gɛ̂i da núu támaa dí díwoo kɛ́ zu tɔnɔ góraŋ lɔ́ɔlu mɛi feerɛi ŋí yée mu. Góraŋ lɔ́ɔlu mɛi feerɛ ŋí a ƃèla nɔ́ zâmai é dísâla kula mɛni-ŋai kpéra. Gɛ̀ ní a pâi zɛŋ nyɔ́mɔɔ kɛ́tɛi seêi Ŋ̀âla-pɛrɛ Kɛ́tɛi tôŋ su. A pâi lɛɛ̂i naa é lɛ́ɛ la zu Ɣâla é ǹúui zɛŋ nyɔ́mɔɔi ŋí sèe naai su kara.”