Read Kpelle Osia 1 Bible Online

Osia 1 - Kpelle bible

Osia 1

¹Ŋ̀orɛ̂-wooi ká ŋí nyii Yâwɛɛ è dɛ̀ɛ Bɛɛri ǹóŋ Osia pɔ́. È kɛ̀ a tãi Uzia, Zotaŋ, Eeɣa da Ɛsekaya-ni dí kɛ̀ la a kâloŋ-ŋa Zuda lɔii su. Tãi ŋí ƃé Zɛoasi ŋ̀óŋ Zɛroboaŋ è kɛ̀ la a kâloŋ Eezuɛ lɔii sui.

²Yâwɛɛ è lòno Osia pɔ́ a maa-ŋuŋ. È mò ma ǹyɛɛi, “Lí íwulu-wulu-kɛ nɛni kula a ínɛnî ka ǹyaa ká nîa-pɛlɛɛ maa sɔlɔ ƃó. Ǹîa-pɛlɛɛi da pâi kɛ̂i nɔ́ yɛ̂ɛ dílee. Bere nɔ́ ƃé ŋánûai Eezuɛ-ŋai dí káa la kpɛ́ni fêi, dí káa ɣâla da kpɛ́ni-ŋa fɛlîi yɛ̂ɛ berei núu a wulu-wulu kɛ̀ lai. Da díyee kúla ḿû.”

³Nya ƃe Osia è lì é Gomɛ kula a nɛnî. Nɛnîi ŋí è kɛ̀ a Dibilaŋ ǹóŋ nɛnii. Gomɛ è koo sîɣe é lóŋ-surɔŋ maa sɔlɔ ƃó.

⁴Nya ƃe Yâwɛɛ è mò Osia ma ǹyɛɛi, “Ǹáa sée a Zariɛɛ, kpɛ́ni fêi, nàa kuro a kɛ̀ tí, ŋa pâi tɔ̂ŋ pûi Zewu ŋɔpɛ́rɛi ma ǹûai paa-mɛni ma Zariɛɛ tiŋ-tiŋ su. Ŋa pâi Eezuɛ lɔii su kara-kârai.

⁵Maa-ɣêlei tí, ŋa pâi Eezuɛ ŋɔwála-wala-laai kulâi ǹyêei Zariɛɛ tiŋ-tiŋ su.”

⁶Gomɛ è ŋɔ́nɔ koo sîɣe é lóŋ-nɛni maa sɔlɔ ƃó. Yâwɛɛ è mò Osia ma ǹyɛɛi, “Ǹáa sée a Loluama, kpɛ́ni fêi, fé pâi ŋɔ́nɔ Eezuɛ ŋɔpɛ́rɛi malôŋ kâai a gɛɛ ŋá dí su-mɛni lɛɛ.

⁷Kɛ́lɛ ŋa pâi Zuda ŋɔnûai malôŋ kâai. Ŋa pâi díkula-yêei kɛ̂i Ńyãai a Yâwɛɛ Díɣâlai. Fé pâi díkula yêei kɛ̂i a kerâŋ, ƃóa-sɔ̂kpɔ, kɔ́kɔ-soo-ŋa, kpaa máŋ a soo-kɔ kɔ́-ƃela.”

⁸Tãi Gomɛ è ǹóŋ nɛnii Loluama tɛ̀ la gbìŋ ŋái, Gomɛ è ŋɔ́nɔ koo sîɣe é lóŋ-surɔŋ maa sɔlɔ ƃó.

⁹Nya ƃe Yâwɛɛ è mò Osia ma ǹyɛɛi, “Ǹáa sée a Loaŋmi, kpɛ́ni fêi Eezuɛ-ŋai dífe a ŋánûa, ńyaŋ fé a díɣâla.”

¹⁰É máŋ kɛ́ tí, Eezuɛ-ƃelai da pâi kɛ̂i yɛ̂ɛ Yúo ma ŋãya nyii núu fa pɔ̂ri gɔɔ̂nii, kpaa máŋ é ǹónoi. Ƃɛ̂i dí mò naa dîa, “Káfe a ŋánûai,” da pâi dí tôlii nâa a “Gɛɣele-ma ɣalai ǹônii.”

¹¹Zuda da Eezuɛ-ƃelai da pâi ŋɔ́nɔ kɛ̂i zu tɔnɔɔ. Da pâi núu tɔnɔ lɛ̂i a dílaa túɛ-nuu. Da pâi dí lɔii siɣêi pôlu. Óoei, Zariɛɛ ŋɔɣelei a pâi kɛ́i a ɣele kɛ́tɛ. M̀ɛni ma ílîa-surɔŋ tóli a “Ŋánûai,” í ísaa-ƃɔlɔ tóli a “Ƃa maloŋ-kaa sɔlɔ ƃó.”