Read Kpelle Osia 14 Bible Online

Osia 14 - Kpelle bible

Osia 14

¹Óo Eezuɛ-ƃela, ka pá pôlu Káɣâlai Yâwɛɛ pɔ́, kpɛ́ni fêi, kásɔnyɔ̂ŋ a gɛ́ ka too.

²Ka lí a kpera-fêi-woo Yâwɛɛ pɔ́, kâa, “Kúsɔnyɔ̂ŋ-ŋai kélee su mɛni lɛɛ, í íyee sée kúmɛni lɛ́lɛɛ-ŋai mu. Kwa pâi ílaa maa tɛ̂i yɛ̂ɛ berei kú kúkono tèe lai.

³Asiria lɔii fa pɔ̂ri wɔ́lɔ kúkulâi mɛnîi, ǹyaŋ kú kɔ́kɔ-soo-ŋai dí fé pâi kú maa kɔ̃ɔi. Kúfe pâi ŋɔ́nɔ kúkpɛtɛ-sãai tôlii a kúɣâla. Tee-loŋ a maloŋ kâa sɔlɔ ƃô ísârai.”

⁴Yâwɛɛ è mò ǹyɛɛ, “Ŋa pâi pâi a ŋánûai pôlu ḿbɔ naa. Ŋa pâi díwɛ̂lii a ńii kélee. Fé pâi ŋɔ́nɔ wɔ́lɔ ńii ŋwânai dîa.

⁵Ŋa pâi kɛ̂i yɛ̂ɛ lúu Eezuɛ-ŋai yêei. Da pâi poâi yɛ̂ɛ wúru. Dísame a pâi lɔ̂i ǹɔii mu yɛ̂ɛ wúru.

⁶Zame a pâi táa-tâai ǹɔii mu. Ŋɔlɛ́lɛ-laai a pâi kɛ̂i yɛ̂ɛ ɔ̂le-wuru, gúŋ nɛ̃ɛ yɛ̂ɛ ŋ̀úru-ŋai díkaa Lɛƃanɔŋ-lɔii sui.

⁷Da pâi lenêi pôlu ḿbɔ ŋá dímɛi káa. Da pâi kpɛtɛ̂i yɛ̂ɛ sí-sɛŋ. Dímaa mɛni a pâi kpananîi yɛ̂ɛ ŋwã̂ai gáa Lɛƃanɔŋ-lɔii sui.

⁸Óo Eezuɛ, ka ká pôlu tɔɔ Ɣâla da kpɛ́ni-ŋa dîa. Ńyãa ƃé ŋa káwoo mɛni ŋ́gɛ kámɛi kâa. Ŋ́gaa yɛ̂ɛ wúru kɛ́tɛ lɛ́lɛɛ. Káƃɛlɛ-seei kélee a kulâi ńyêei.”

⁹Tɔɔ ǹúui nyii dáreɛɛ̂i é m̀ɛni-ŋai ŋí ŋá káa, é zíɣe ǹíi su. Yâwɛɛ ŋɔperei káa a tɔ̃yâ pere, ǹyaŋ dɔ̃yâ-ƃelai da sîa berei ŋí su, kɛ́lɛ zɔnyɔ̂ŋ-ƃelai da kâreŋ dí tóo berei ŋí su.