Read Kpelle Osia 7 Bible Online

Osia 7 - Kpelle bible

Osia 7

¹“Ŋá kɛ̀ ŋ̀wɛ̂lii ŋá Eezuɛ ƃálo, ŋá gɛ́ é ƃûu ƃó, kɛ́lɛ gáa nɔ́ nîi ŋɔsɔnyɔ̂ŋ kɛ̂i. Sameria káa nɔ́ ŋwana lɔ̂ɔ kɛ̂i da lɛ́ɛ, ŋ̀uma-ƃelai dí kɛ́ ŋúma kɛ̀, mɛni-nyɔmɔɔ kɛ́-ƃelai dí kɛ́ mɛni nyɔ́mɔɔ kɛ̀.

²Kɛ́lɛ dífe gɔ́lɔŋ à kɛ̀ dísɔnyɔ̂ŋ-ŋai kíli káa ŋ́a. Ǹyaŋ dísɔnyɔ̂ŋ-ŋai tínaŋɔ̂ɔi dîa, ŋ́gɛ gàa.”

³“Díŋwana-lɔ̂ɔ tuai su dí gâloŋ líi nɛ̃ɛ, ǹyaŋ gâloŋ ǹônii da ǹíi nɛ̃ɛ a dí lɛ́ɛ lono-ŋai.

⁴Díkelee dímaa fãai wulu-wulu kɛ́ mɛni ma. Díkɛɛi yɛ̂ɛ kpólo kpɛtɛ lêɣi fãa nyii a gbólo kpɛtɛ-nuui kɛ̀ va ŋɔŋ ŋá tɛ̀ ŋɔ́nɔ, é lɛ́ɛ la zu é kpɛ́ɛ a gbóloi yɔ́ɔŋɔɔ, é lɛ́ɛ pâi ŋɔŋ ŋá tɛ̂i.

⁵Kúkâloŋ maa sɔlɔ ƃó ɣêle maa pêle kɛ́ɛi, ŋwã̂ai fãai è gâloŋ ǹônii kɔ̀lɛ. Gâloŋ máŋ è ǹɔɔi kpêle é lí ǹûai sáma nyii-ŋai kɛ̀ ɣɛ́lɛ-maa kulâi gbonôi.

⁶Díkaa yɛ̂ɛ kɔli lêɣi fãa dí kɛ́ mɛni nyɔ́mɔɔ kpɛ̀tɛ dílii su. Dílii-ŋwânai su a kɛ̂tɛ a gbínii. À kɛ̀ a ŋ̀ele-wâlai, dílii ŋwânai su a kɛ̂tɛ yɛ̂ɛ ŋɔŋ lêŋ.

⁷“Díkelee dífãai yɛ̂ɛ kɔli lêɣi. Da díŋuŋ túɛ-ƃelai pàa. Díkâloŋ-ŋai kélee da saa. Dí tɔnɔ kpîŋ fa ńdôli kpɔŋ-maa mɛni ma.”

⁸Yâwɛɛ è mò ǹyɛɛi, “Eezuɛ a gbîŋ kánaŋ ǹɔii-ŋuŋ kpéli-ŋai dîa. Eezuɛ káa yɛ̂ɛ kpólo nyii dífe niî dínaŋ nii.

⁹Ŋɔ̃ya-ŋa da ŋɔwála-walai kúla ǹyêei, kɛ́lɛ vé gɔ́lɔŋ. Ŋuŋ pôa a too zu, kɛ́lɛ vé gɔ́lɔŋ.

¹⁰Eezuɛ-ŋɔyoŋkai káa a sêre faa nyii dɔɔ̂i gbîŋ mai. Ǹyaŋ dífe ŋ̀wɛ̂lii dí lene pôlu Yâwɛɛ pɔ́, Díɣâlai kpaa máŋ dí gɔ́ri mɛnii ŋí kélee su.

¹¹Eezuɛ-ƃelai ƃooɔ̂i yɛ̂ɛ tòloŋ. Táre fé díŋuŋ su. Dí lì Ize kpɔŋ-maa mɛni ma. Naa pôlu ma dí lí Asiria kpɔŋ-maa mɛni ma.

¹²Da kɛ̀ liî, ŋa pâi dísonîi a ŋátumai. Ŋa pâi pâi a dia ǹɔii ma yɛ̂ɛ ŋɔni-ŋa, ŋá díkula-maa kɛ́ díŋwana lɔ̂ɔ tua-ŋai mɛni ma.

¹³“Kpalo ƃêlai dîa. Da dípôlu fé ḿî. Da pâi saâi, kpɛ́ni fêi, da ŋ́gbɔara! Ŋâi pɔri dí ƃâloi, kɛ́lɛ da lɛ́ɛ kɛ̀ a ńaa.

¹⁴Dífa ḿvɛli é kúla dílii su. Kɛ́lɛ da kɛ̂ wɔ̂lɔi dígbìŋ-ŋai ŋá yɛ̂ɛ ǹûai laa-laa fé díyêei. Da kɛ̂ wɔ̂lɔi díɣâla-ŋai dîa díkɛ díkpîŋ ŋwàna a gɛɛ díkpɔmɔ kpâlaŋ da díkpâlaŋ-ŋai ŋá é lɛ́lɛ mii-sɛŋ da ŋwã̂ai mɛni ma. Ǹyaŋ da tɔɔ ḿâ.

¹⁵Berei máŋ ŋá sɛŋ lɛ̀ la dîa, ŋá wála-wala-laa tɛɛ dípɔi, da mɛni nyɔ́mɔɔ kpɛtɛ̂i nɔ́ ḿɛni ma.

¹⁶Da tínaŋ Bêe-ɣalai pɔ́ naa-pere. Díkaa yɛ̂ɛ kerâŋ-ɣɛli. Ƃóa-sɔkpɔ a pâi díkâloŋ-lonii paâi dílono nyɔ́mɔɔ-ŋai mɛni ma. Nyíŋi a pâi kɛ̂i a ɣɛlɛ-maa dîa Ize lɔii su.”