Read Kpelle Osia 8 Bible Online

Osia 8 - Kpelle bible

Osia 8

¹Yâwɛɛ ǹyɛɛ, “Ka dúrii fɛ̂ɛ. Ŋ́gbɔara-ƃelai díkaa ŋá pɛrɛi mɛi yɛ̂ɛ kuɛ-ŋa, kpɛ́ni fêi, da ŋákpanaŋ-wooi kàra da tɔɔ ŋátɔ̂ŋ ma.

²Dí wɔ̀lɔ ḿâ dîyɛɛ, ‘Kúɣâlai, kúai a Eezuɛ-ŋai, kú íkɔlɔŋ.’

³Eezuɛ a ǹyée kúla mɛni lɛ́lɛɛ mu. Gbɔara-ƃela da pâi pîlanii bôlu.

⁴“Da kâloŋ-ŋa see díkpɔɔi-yee ma ŋ́gɔlɔŋ fé zu. Da ǹûa láa-tuɛ-ƃelai see, kɛ́lɛ ŋ́gɔlɔŋ fé zu. Da káne da gôo kpɛtɛ a díɣâla-ŋa díkpîŋ su-kara mɛni ma.

⁵Óo Sameria taa-leei, fé wɛ̂lii a kániŋa-loŋ pɔkɔɔŋ fɛli-mɛnii. Níi ŋwânaai dí mɛni ma. Tãi nênɛ ƃé ka pâi teêi la dífɛliɛɛ mai?

⁶Káne ɣale-nuu ƃé gbɛ̀tɛ ǹyaŋ vé a Ɣâla. Niŋa-loŋ pɔkɔɔŋ gáa Sameriai da pâi doôi dí ŋ̀ólo.

⁷À kɛ̀ da vãai sî, da pâi m̀á kulâi a fãa. Sí-sɛŋ nyii mɛi teɛ̂ɛi, va ƃà. À kɛ̀ máŋ a ƃà, ŋɔ̃ya-ŋa nɔ́ ƃé pâi m̀á miî.

⁸Eezuɛ-ƃelai laŋɔ̂ɔi. Díkaa nâa lɔii-ŋuŋ da kpɛ́ni-ŋa sáma yɛ̂ɛ sɛŋ-folo saa.

⁹Eezuɛ-ŋai da lí Asiria lɔii su yɛ̂ɛ wɛlɛ-sôo-ŋa ƃé dí sáa kɔ̂rii a gɛɛ dí tɛ́ dí kɛ́ tɛ̀ɛ-tɛɛ nɔ́ díŋuŋ ma díkɛ díkpɔŋ maa-ƃela kɔ̀ri. Da nâa díwɛli kɛ́ maa-ƃela káa.

¹⁰Berei máŋ díkaa nâa la lɔii-ŋuŋ da kpɛ́ni-ŋa su-ƃela sámai, ŋa pâi díŋa tɛ̂i díkîe ma, ŋa díkula naa. Kɔlɔ a pâi kpɛɛ̂i dîa a ŋánaa dímɔ̃lɛ laai su Asiria kaloŋ yée mu.

¹¹“Eezuɛ-ŋai da naa Ɣâla teƃele támaa kpɛ̀tɛ sâla kula mɛni ma dísɔnyɔ̂ŋ su-mɛni lɛɛ mɛni ma. Kɛ́lɛ da nàa kɛ́ nâa a sɔnyɔ̂ŋ kɛ́ kwaa ma.

¹²Ŋá máŋ tɔ̂ŋ wála puu pɔ̃yɛ Eezuɛ-ŋai mɛni ma, da pâi díyee kulâi dímu dí díkaa yɛ̂ɛ mɛni nîna.

¹³Dí wɛ́li ní a sâla kuláa. Da sua kûla a sâla dí mii. Kɛ́lɛ, Ńyãa Yâwɛɛ ḿve wɛ́li ní la. Ǹyaŋ ḿve pâi dísɔnyɔ̂ŋ su-mɛni lɛɛ̂i. Ŋa pâi díkula maa kɛ̂i. Ŋa pâi dítɛɛ̂i pôlu Ize lɔii su.

¹⁴“Eezuɛ-ŋai da nia ḿâ. Da kâloŋ pɛrɛ-ŋa tɔ̀ɔ díkpîŋ mɛni ma. Ǹyaŋ Zuda a taa-lêe kpaya-kpaya tɔ̀ɔ siɣãŋ tínaŋɔɔ dîa. Kɛ́lɛ ŋa pâi ŋɔŋ tɛɛ̂i daa-ŋai tí su. Ǹyaŋ díkili kɛ́-maa taa-ŋai da pâi kérenîi.”