Read Kpelle Zooɛ 1 Bible Online

Zooɛ 1 - Kpelle bible

Zooɛ 1

¹Yâwɛɛ ŋɔworɛ̂-wooi nyii pà ŋɔlóno-kɛ-nuui Zooɛ pɔ́ nyii kɛ̀ a Pɛtuɛ ǹóŋ.

²Káai a ǹúu pɔ̂lɔ-ŋai, ka nyíŋi mɛ́ni, káai kélee ǹɔii sui, ka káwoli tɔ́ɔ! M̀ɛnii ŋí da a tá wɔ́lɔ kɛ́ kákɛ̀ ɣéniɛi su, kpaa máŋ kánâŋ-ni dí kɛ̀ ɣéniɛi su?

³Ka m̀ɛnii ŋí ƃó kálônii dîa, dia máŋ dí m̀ó díwɔ̂ nia-pɛlɛɛi dîa, díwɔ̂ nîa-pɛlɛɛi dia máŋ dí m̀ó díwɔ̂ lonii dîa.

⁴Gotó kpulu è pù kási-sãai dîa dí mìi. Zí-sãai nyii lɛ̀ɛ naai, gotó kpului veerɛi è mìi. Gwaa-kara gotó-ŋai dí pà dí gbéli míi.

⁵Lɔɔ-kpele-ƃela, ka kámu siɣe ká wɔ́lɔ. Ka gbêɣei-too ŋwã̂ai nɛ̃ɛ-ŋai kélee su a kara.

⁶Gotó-ŋa da pá kú lɔii su, díwala-walai, dítamaa núu fa pɔ̂ri dílônoi. Dínyiŋ ŋá liɛi yɛ̂ɛ yala-sûlu, díyee ŋalêŋ kɛ́ ƃò dîa yɛ̂ɛ yala-sûlu.

⁷Da kúkpɔmɔ kpalaŋ-ŋai ŋá kɛ́ a vólo, da kúfîi wuru-ŋai míi. Da ŋ̀úru-ŋai kélee kɔlɔ míi dîa, da lɛɛ a dí káo.

⁸Ká wɔ́lɔ yɛ̂ɛ nɛnî kpela ƃé maa ɣiriɛ̂i a seɣe sâa gɛ́ wɔ̀lɔ ŋɔsurɔ̂ŋ saa mɛni ma.

⁹Zâla láa-soŋ-ƃelai da wɔ̂lɔi, kpɛ́ni fêi, m̀ii-sɛŋ da gbele-sɛŋ sala-sãai da kpɛɛ Yâwɛɛ ŋɔpɛ́rɛi mu.

¹⁰Ǹɔii a lɛɛ kpɛ́ni gɛ́ wɔ̂lɔ kpɛ́ni fêi, duma-lâa-ŋai kélee su a kara, ŋwã̂ai a kpɛɛ, ŋ̀úlɔi a kpɛɛ.

¹¹Ká malôŋ see ƃó, óo kpâlaŋ-ŋa tii kɛ́-ƃela, káai kpâlaŋ káa káyêei, ká wɔ́lɔ kási-sãai mɛni ma kpɛ́ni fêi, ká sí-sãai kélee su a kara.

¹²Gbɔmɔ-ŋai da fɔ̃ya, fîi wuru-ŋai da kpála, ŋ̀úru-ŋai kélee da fɔ̃ya, zara, wuru-ŋai, dóu wuru-ŋai da bɔ́ɔ wuru-ŋai lii-nɛ̃ɛ fé ŋɔ́nɔ núu kpune ǹônii yêei.

¹³Sâla-laa soŋ-ƃela, káai ká sâla kùla ŋ̀âla teƃelei mai, ka ƃɔrɔ sâa too kâa ká wɔ́lɔ. Ka lí Ŋ̀âla-pɛrɛ Kɛ́tɛi mu ká gbínii síɣe naa maloŋ tôo ma pere su, kpɛ́ni fêi, m̀ii sɛŋ da gbele sâla-sãai kélee da kpɛɛ Káɣâlai ŋɔpɛ́rɛi mu.

¹⁴Ká kpɔŋ tóo Kánuu-namui Ɣâla ŋɔpɛ́rɛi mu, ká ǹúu pɔlɔ-ŋai kélee ŋáa tɛ́ dí kîe ma da ǹɔii su-ƃelai kélee ká suŋ síɣe ká wɔ́lɔ Yâwɛɛ ma.

¹⁵Ŋ̀elei malôŋɔɔi kpɛ́ni fêi, Yâwɛɛ ŋɔɣelei a lɛ̀ɣɛ, Ŋ̀wála-wâla kélee Ɣalai a pâi pâi a su-kâra.

¹⁶Mii-sɛŋ a kpɛɛ kúyêei. Lii-nɛ̃ɛ da lii-laa fé ŋɔ́nɔ kúyêei Kúnuu-namui ŋɔpɛ́rɛi mu.

¹⁷Zí-sɛŋ kao-ŋai da saa ǹɔii mu, mii-sɛŋ pûi-kɛ pɛrɛ-ŋai da lɛɛ a vólo, gbɔmɔ ƃa pûi-kɛ pɛrɛ-ŋai da wólo kpɛ́ni fêi, sí-sɛŋ fé ŋɔ́nɔ kpɛtɛ̂i ǹɔii ma.

¹⁸Zua-ŋai da nyîɛi! Daa-tûlɛ-ŋai kíli-ŋa púɔɔ, kpɛ́ni fêi, dí liî fé ŋɔ́nɔ ma, m̀ála-ŋai máŋ da mɔ̃lɛ̂i.

¹⁹Óo Yâwɛɛ, ŋa wɔ̂lɔi yâ. Ŋɔŋ a galai kélee kéreŋ vɛ̃ɛ-kpâlaŋ su, ŋɔŋ léŋ a ŋ̀úru-ŋai kélee kéreŋ ǹɔii ma.

²⁰Zûa-ŋai máŋ da wɔ̂lɔi yâ, kpɛ́ni fêi, ǹyá pɛlɛɛ-ŋai kélee da kpála, ŋɔŋ a galai kélee kéreŋ vɛ̃ɛ-kpâlaŋ su.