Read Kpelle Zooɛ 2 Bible Online

Zooɛ 2 - Kpelle bible

Zooɛ 2

¹Ka dúrii fɛ́ɛ Zãiyɔŋ Yeei ma, ká vɛ́ɛ a ŋ̀óo su kɛ́tɛ ŋáyee maa-waai ma! Tɔɔ ǹɔii su-ƃelai kélee dí kpɛ̃lîŋ. Yâwɛɛ ŋɔtãi a pâi, a nâa lɛ̀ɣɛ.

²A pâi kɛ̂i a kpíni da ɣele kuyɔɔ, ǹúui pɛ́lɛɛ, gbínii su pîlaŋɔɔ! Gotó kpului-ŋai da pâi kɛ̂i a díwala-wâlaa yɛ̂ɛ núu-kpune, dí ǹyée-ŋai mɛi pɛ́lɛ yɛ̂ɛ kpíni. M̀ɛnii ŋí da fé tá kɛ́ ní ǹyaŋ da fé pâi ŋɔ́nɔ kɛ̂i wɔ́lɔ-wɔlɔ da wɔlɔ-wɔlɔ.

³Gotó-ŋa díkɛ̀ ŋ̀úru-ŋai miî yɛ̂ɛ ŋɔŋ-lêŋ. Dítuɛ-pere lɔii káa yɛ̂ɛ Idɛŋ suai, kɛ́lɛ dí pôlu-pere káa yɛ̂ɛ fɛ̃ɛ-kpâlaŋ. Sɛŋ da kélee fa pɔ̂ri pûi díyêei.

⁴Dí kɛ́-pere káa yɛ̂ɛ soo-ŋa, díkɛ kîrɛ sìɣe yɛ̂ɛ kɔ́-kɔ soo-ŋa.

⁵Da pîli ǹyée-ŋai tôŋ su, dí tíŋ kɛ́ ƃò yɛ̂ɛ kɔ́-kɔ keleŋ-ŋa. Dí kula tîŋ kɛ́ ƃò yɛ̂ɛ ŋɔŋ à kɛ̀ mɔlɔŋ-kpâŋ kérenii, díkpîŋ kpɛtɛ́ɛ yɛ̂ɛ soya-ŋa ƃé liî kɔ́ ma.

⁶Diai kélee dítuɛ-perei, dílii toɔɔ̂i pôlu, díŋɛi malôŋɔɔ.

⁷Da gbã tèe yɛ̂ɛ kɔ́-kɔ-ƃela, díkɛ tɛ̀ Zĩɣaŋ ma yɛ̂ɛ kɔkuluƃa-ŋa, díkɛ sìa díɣɛli ma, ǹyaŋ dífa dísia-pêre maa fâleŋ.

⁸Dífa díkîe-ni tùaŋ, díkelee díkɛ sìa a dí kpɔ́ɔi pere díkɛ tɛ̀ɛ gɔ́kɔ sãai loai ǹyaŋ sɛŋ da fa pɔ̂ri dí kperâi.

⁹Díkɛ pìli daa lêe-ŋai su, dí kɛ́ sìa ziɣãŋ-ŋai mɛi díkɛ tɛ̀ bɛ́rɛ-ŋai ɣelêi, díkɛ tɛ̀ wôna-ŋai lá yɛ̂ɛ ŋúma-ƃela.

¹⁰Ǹɔii a kɛ̂ kpɛ̃lînii dítuɛ, ŋ̀ele-kɔ̂lɔŋ kɛ́ tùmo-tumo, vóloi da ŋ̀áloŋ su kpíniɛɛ, bɛ́mɛlɛŋ-kao-ŋai dífa fôlo.

¹¹Yâwɛɛ a ŋ̀óo tɛ̂i ɣelêi ŋɔkɔkuluƃa-ŋai túɛ. Ŋɔkɔkuluƃa-ŋai tâmaai, wála-wâla kɛ́ ƃò diai kélee yêei da ŋ̀óo mɛnii. Ŋɔɣelei káa a ɣele kɛ́tɛ, maa-pɔlɔ-pɔlɔɔ. Gbɛ̂ɛ ƃa pɔ̂ri tɔɔ̂i dúɛi?

¹²Yâwɛɛ ǹyɛɛ, “Loníi ma kpîŋ, ka lene pôlu ká pá ḿbɔ a kálii kélee, ká kɛ́ sûŋ sìɣe, ká kɛ́ malôŋ sèe ƃò.

¹³Ka kálii su waa, kɛ́lɛ ká seɣe-ŋai fêi.” Ka tínaŋ Yâwɛɛ, ká Ɣâla pɔ́ naa pere, kpɛ́ni fêi, zɔŋ lɛ̂lɛɛi gɛ́ núu malôŋ kàa. Va ǹíi ŋwàna a maa félaa ǹyaŋ ŋɔwɛli kɛ́-maai káa nɔ́ naa wɔ́lɔ-wɔlɔ, gɛ́ sɔnyɔ̂ŋ su mɛni lɛ̀ɛ.

¹⁴Gbɛ̂ɛ ƃé gɔ́lɔŋ, ɣele da Íɣalai Yâwɛɛ a pɔ̂ri ǹíi penêi, é ímalôŋ káa, é lûwa-too yâ, ísi-sɛŋ támaa sɔlɔ ƃó. Gɛ̀ ní ƃa pɔ̂ri ísi-sɛŋ m̀á da tɛɛ̂i bɔ́ da ŋwã̂ai a sama-sɛ̂ŋ.

¹⁵Ka dúrii fɛ́ɛ Zãiyɔŋ Yeei ma, ká ǹûai ŋáa tɛ́ ma dí sûŋ siɣe.

¹⁶Ka ǹûai ŋá tɛ́ ma. Lûwa tòo gbɔ̀ŋ ma, ká ǹúu pɔlɔ-ŋai kélee ŋáa tɛ́ ma. Ǹîa-pɛlɛɛi ŋáa tɛ́ ma, da gwâtara-ŋai máŋ. Tɔ́ɔ nɛnî kùla surɔŋ é kúla lóŋpoi su, ǹɛnîi ǹyaŋ é kúla ŋ̀ɔi su.

¹⁷Tɔɔ zâla láa-soŋ-ƃelai da Yâwɛɛ ŋɔtíi kɛ́-ƃelai dí tɔ́ɔ ŋ̀âla-teƃelei da bɛ́rɛi lá loai dí wɔ́lɔ dîyɛɛi, “Ínûai ƃálo óo Yâwɛɛ. Ífe nɛ̀ɛ naa ƃâa é kúla ípɔɔ-sɛŋ ma é kɛ́ a ɣɛ́lɛ maa sɛŋ ǹɔii ŋuŋ-ŋai su. Dí m̀ó ǹûai dîa dîyɛɛi, ‘Díɣâlai kɔ́ɔ?’ ”

¹⁸È kɛ̀ tí Yâwɛɛ è tólo kùla ŋɔlɔii mɛni ma, é ǹûai malôŋ káa.

¹⁹Yâwɛɛ è mò ŋɔnûai dîa ǹyɛɛ, “Ka gáa, ŋa mii-sãa, ŋwã̂ai da wúlɔ tɛɛ̂i ká pɔ́, gɛ̀ ní ká líi a pâi lâai. Fé pâi ŋɔ́nɔ ƃâa kulâi kâa ǹɔii ŋuŋ-ŋai su.

²⁰Ŋa pâi gotó kpulu-ŋai kpɛ̂i nyii-ŋai kùla ǹɔii ŋûa-pere, ŋá da-ni tɛɛ vɛ̃ɛ-kpâlaŋ su. Ŋa pâi dí túɛ-ƃelai tuâŋ nii gbòlo yâi su, ŋá dí pôlu pere-ƃelai tuâŋ ǹyá-lee kɛ́tɛi su. Dílûla kùŋ a pâi tɛ̂i. Ŋa pâi dí su karâi kpɛ́ni fêi, dí mɛni nyɔ́mɔɔ kɛ̀ a káa.

²¹“Óo lɔii, ífe yào. Ílii é nɛ̃́ɛ ílii-nɛ̃ɛ kúla, kpɛ́ni fêi, Yâwɛɛ a mɛni kpaya-kpayaa támaa kɛ́.

²²Sua-ŋa, káfe yào, kpɛ́ni fêi, kala ŋûnu támaa káa vɛ̃ɛ-kpâlaŋ su, ŋ̀úru-ŋai da ƃá, fîi wuru-ŋai da gbɔmɔ-ŋai díkɛ ƃà a ǹɛ́lɛɛ.

²³“Óo Zãiyɔŋ-ƃela, ka lii-nɛ̃ɛ kúla Káɣâlai Yâwɛɛ mɛni ma kpɛ́ni fêi, a dunai maa-ŋuŋ tɛ́ɛ kákpɔŋ maa mɛni ma. A tuna támaa tɛ́ɛ kámɛni ma. A dunai maa-ŋuŋ da gbɛɛ-ŋai tɛ́ɛ yɛ̂ɛ berei a kâa gɛ̀ lai.

²⁴Kámii-sãa táŋ pɛrɛ-ŋai láa a pâi fɛ̂ɛi a mii-sɛŋ, kákoro-ŋai láa é fɛ́ɛ a wúlɔ da ŋwã̂ai máŋ.

²⁵Zãâi kélee gotó-ŋai, nyii-ŋai díkaa a ŋákɔ kɔ́-ƃelai dí zu-kara káyêei, ŋa pâi da tɛɛ̂i kápɔ pôlu.

²⁶Ka pâi mii-sɛŋ támaa sɔlɔ ƃôi ká mii, kálii é láa, ká Yâwɛɛ láa maa tɛ́ nyii gáa a Káɣâlai, nyii a mɛni lɛ́lɛɛ kɛ̀ kâai. Ǹyaŋ ŋánûai dífe pâi ŋɔ́nɔ wɔ́lɔ ŋumɛi.

²⁷Ka pâi gɔ̂lɔnii a gɛɛ ŋ́gaa Eezuɛ lɔii sáma, ŋ́gɛ ƃò a Yâwɛɛ nyii gáa a Káɣâlai, ǹyaŋ ɣâla da kpɛ́ni kélee fé naa é kúla ḿbôlu. Ŋánûai dífe pâi ŋɔ́nɔ wɔ́lɔ ŋumɛ sɔlɔ ƃôi.

²⁸“Ŋa pâi ŋámɔ̂leŋ pûi núu kélee kponôi a ŋ̀ele-ŋai kpɛɛ-ŋa. Kálônii-sinaai da kálônii-nɛyãai da pâi mɛni ƃôi naa túɛ, kásiɛ pɔlɔ-ŋai dí see ƃó, zĩ̂a a pâi tɛɛ̂i a kányakpa-ŋai.

²⁹Ŋa pâi máŋ ŋámɔ̂lɔŋ pûi ńyee ŋá-sinaai da nɛyãai kponôi a ŋ̀ele-ŋai tí ǹyaŋ da pâi mɛni ƃôi naa túɛ.

³⁰“Ŋa pâi mɛni kpaya-kpaya lɛ̂i ŋ̀elei su, ŋá ŋɛi kɛ́-maa-ŋa kɛ́ ǹɔii ma, ŋãa da ŋɔŋ é pɛ́lɛ luru ma.

³¹Vóloi a pâi penêi a kpíni, ŋ̀áloŋ é pene a ŋãa, Yâwɛɛ ŋɔɣelei é lɛ́ɛ pâi, nyii gáa a ŋ̀ele kɛ́tɛ maa pɔlɔ-pɔlɔɔi.

³²Tãi da a pâi diai pâi Yâwɛɛ láa tôlii, da pâi ƃâloi. Ǹyaŋ diai Zãiyɔŋ Yeei ma da Zerusâlɛŋ nyii-ŋai pûi, yɛ̂ɛ berei Yâwɛɛ è m̀ó lai, da diai lɛ̀ɛ pôlui dia ƃa ǹûai Yâwɛɛ a pâi dítôlii.”