Read Kpelle Emɔ 1 Bible Online

Emɔ 1 - Kpelle bible

Emɔ 1

¹Emɔ, nyii kɛ̀ m̀ála mɛi-kaa-ƃelai sáma Tekoai, ŋɔwóo-ŋai ká ŋí nyii-ŋai bîlaŋɔɔi Eezuɛ-ŋai dîai. È ŋ̀óo-ŋai ŋí mɛ̀ni a Zuda-kaloŋ Uzia ŋɔtãi da Zɛoasi ǹóŋ Zɛroboaŋ ŋɔtãi, nyii kɛ̀ a Eezuɛ-ŋai díkâloŋ kóraŋ feerɛ tɛɛ pôlu ma ǹɔii é lɛ́ɛ pâi kpɛlînii.

²Emɔ è mò ǹyɛɛi, “Kúnuu-namui kpéɣe-woo è kùla Zãiyɔŋ, ŋ̀óo é kúla Zerusâlɛŋ. Ǹyaŋ gala ŋûnu lɔii a pâi wɔ̂lɔi, Kamɛɛ Yeei tôŋ é kpála.”

³Kúnuu-namui e mò, ǹyɛɛi, “Dɛmɛika ŋɔsɔnyɔ̂ŋ saaƃa kpaa náaŋ mɛ̂ni ma, fé pâi dɔŋ-kpɛ-maai siɣêi pôlu mà kpɛ́ni fêi, da Gilia táŋ a mɔlɔŋ táŋ-kɔli.

⁴Mɛni ma, ŋa pâi ŋɔŋ pilîi Azae ŋɔpɛ́rɛi ma a gɛɛ é Bɛŋ Ada ŋɔkóli-ŋai kéreŋ.

⁵Ŋa pâi Dɛmɛika ŋɔsiɣãŋ gbôŋ wôloi, ŋá Bîka-Avɛŋ-ƃelai zu kara, ŋá ǹúui su kara, nyii gáloŋ-wurii káa ǹyéei Bɛ-Idɛŋ. Kúnuu-namui è mò, ǹyɛɛ, Siria-ƃelai da pâi liî luɛ-laa su Kîɛ.”

⁶Ɣâla Yâwɛɛ è mò, ǹyɛɛi, “Geza ŋɔsɔnyɔ̂ŋ saaƃa kpaa náaŋ mɛni ma, fe pâi dɔŋ-kpɛ-maai siɣêi pôlu mà, kpɛ́ni fêi, dí li a ǹûai kélee Idɔŋ luɛ-lâa su.

⁷M̀ɛni ma, ŋa pâi ŋɔŋ pilîi Geza ŋɔsiɣãŋ ma a gɛɛ é ŋɔkɔli-ŋai kéreŋ.

⁸Ŋa pâi Asɔdɔ-ƃelai su karâi, ŋá ǹúui su kara, nyii gâloŋ-wurii káa ǹyéei Asikɛlɔŋ. Ŋa pâi ńyee tínanîi Ɛkulɔŋ pɔ́-pere é lɛ́ɛ la zu Felesia-ŋai kpêli su é kara.”

⁹Ɣâla Yâwɛɛ è mò ǹyɛɛi, “Taya ŋɔsɔŋyɔ̂ŋ saaƃa kpaa naaŋ mɛni ma, fe pâi dɔŋ-kpɛ-maai siɣêi pôlu mà kpɛ́ni fêi, dí lì a ǹûai kélee Idɔŋ luɛ-laa su, dí nia díkono-tee-wooi mɛni ma da dîa-ni díkîe-ni loai.

¹⁰Ŋa pâi ŋɔŋ pilîi Taya ŋɔsiɣãŋ ma a gɛɛ é ŋɔkóli-ŋai kélee kéreŋ.”

¹¹Ɣâla Yâwɛɛ è mò ǹyɛɛ, “Idɔŋ ŋɔsɔnyɔ̂ŋ saaƃa kpaa náaŋ mɛni ma, fé pâi dɔŋ-kpɛ-maai siɣêi pôlu mà, kpɛ́ni fêi, è ǹêɣe kpɛ̀ a gbálai kɛ̀ ǹyéei, maloŋ-kaa kélee fé kɛ́ ní ǹyêei m̀ɛni ma, ŋɔlii-ŋwanai su è kɛ̀tɛ, è ƃò nɔ́ gíli ŋá wɔ́.

¹²M̀ɛni ma ŋa pâi ŋɔŋ pilîi Temaŋ ma a gɛɛ é Boza ŋɔkóli-ŋai kéreŋ.”

¹³Ɣâla Yâwɛɛ è mò, ǹyɛɛ, “Amɔŋ ǹônii dísɔnyɔ̂ŋ saaƃa kpaa náaŋ mɛni ma, fé pâi dɔŋ-kpɛ-maai siɣêi pôlu dîa kpɛ́ni fêi, dí Gilia koo-nɛyãai koi ƃêla a gɛɛ dí dílɔii su kɛ́tɛ.

¹⁴M̀ɛni ma ŋa pâi ŋɔŋ pɔnîi Laba ŋɔsiɣãŋ ma a gɛɛ é ŋɔkóli-ŋai kéreŋ, a láɣi-woo su kɛ́tɛ a kɔ́ kɔ́-tãi da fãa kɛ́tɛ tɛɛ-tãi,

¹⁵ǹyaŋ díkâloŋ a pâi liî luɛ-laa su, da ǹyaa kpîŋ é pɛ́lɛ ŋɔkâloŋ-lonii dîa.”