Read Kpelle Emɔ 5 Bible Online

Emɔ 5 - Kpelle bible

Emɔ 5

¹Ka ŋ̀óoi ŋí mɛ́ni, óo Eezuɛ-ƃelai, nyii gáa a wɔ́lɔ-woo kámɛi:

²“Eezuɛ nyii da dòli a nɛnî-kpelai, a saa. Ǹyaŋ ve pâi ŋɔ́nɔ mu siɣêi. Gáa laa ni ǹɔii ma, núu da fe é m̀u siɣe.”

³Kúnuu-namui Ɣâla e mò e mò ǹyɛɛ, “Taai nyii a núu wála tɔnɔ tɛ̀ɛ ŋuŋ tɔnɔ nɔ ƃa lɛ̂ɛ, nyii a ŋuŋ tɔnɔ tɛ̀ɛ, buu nɔ́ ƃa lɛ̂ɛ Eezuɛ-ƃelai mɛni ma.”

⁴Ɣâla Yâwɛɛ è mò Eezuɛ-ƃelai dîa ǹyɛɛi, “Ka ŋ́gɔri ká kɛ́ ɣele ma.

⁵Kɛ́lɛ káfe Bɛtɛ kɔ̀ri, kpaa máŋ ká lí Geega kpaa máŋ ká lí Bɛɛsiba, kpɛ́ni fêi, Geega a pâi liî luɛ-laa su, Bɛtɛ su é kara.”

⁶Ka Ɣâla Yâwɛɛ kɔ́ri ká kɛ́ ɣele ma, à wàla kɛ́ tí, a pâi toôi Zosɛ ŋɔpɛ́rɛi ma yɛ̂ɛ ŋɔŋ é géreŋ, ǹyaŋ núu da fé pâi kɛ̂i Bɛtɛ é ǹíiŋ.

⁷O káai ka teniŋ-mo pène aŋwana-lɔɔ, ká tɔ̃yâ-laa too ǹɔii mai!

⁸Nyii bɛ̂mɛlɛŋ-kao-ŋai kpɛ̂tɛ é gbínii pene a ɣele-wala, é ŋ̀eleƃoɔi pene a kpînii, nyii yá kùla yúo su é bú ǹɔii sui, ŋ̀áa ƃa Kunuu-nmui,

⁹Nyaa ƃa gɛ̀ ŋwala-wala-nuui su e kara, é pâ a su-kara ziyaŋ taa-leei ma.

¹⁰Da ǹúui kpɔara, nyi a mɛni ŋá tèe gêtii lai, díkɛ tɔ̃ya ƃo-nuu kpɔ̀ara.

¹¹M̀ɛni ma, ká gôlo-ƃelai lûaŋ, ká dímii-sãai kúla díyêei a wála-wala-laa, ká kɔni-pɛrɛ-ŋa tɔ̀ɔ, kɛ́lɛ káfe pâi kɛ̂i dímu. Ká kpɔmɔ-kpalaŋ-ŋa kɛ̀, kɛ́lɛ káfe pâi ŋwã̂ai kpelêi é kúla dísu.

¹²Kpɛ́ni fêi, ŋá gɔ́lɔŋ kátûa-pere-nyɔŋ tâmaai, kásɔnyɔ̂ŋ támaa káai ka dɔ̃yâ-ƃelai lûaŋ, kákɛ yee-pɛlɛ ǹá-sɛŋ sòŋ wôya kɛ́-mɛni ma, kákɛ káŋɛi nàŋiŋ gôlo-ƃelai dítɔ̃yâi mɛi gêtii lái.

¹³M̀ɛni ma, ǹúui dárêɛi a mɛi sâa a tãi tarei tí, kpɛ́ni fêi, gáa a tãi nyɔ́mɔɔ.

¹⁴Káfe mɛni nyɔ́mɔɔ kɔ̀ri, ka m̀ɛni lɛ́lɛɛ kɔ́ri a gɛɛ káfulu-laai é lɛ́ɛ káyêei. Gɛ̀ ní Ɣâla Yâwɛɛ a pâi kɛ̂i ká-kɔlɛ, yɛ̂ɛ berei ká mò lai.

¹⁵Ka mɛni nyɔ́mɔɔ kpɔara, ká mɛni lɛ́lɛɛ wɛ́li, ká tɔ̃yâ-laa kɛ́ ǹûai sáma. Tãi da ƃɛlɛ-see a pâi kɛ̂i Ɣâla Yâwɛɛ yêei Zosɛ ŋɔsuui kpêli-ŋai mɛni ma.

¹⁶M̀ɛni ma Ɣâla Yâwɛɛ ǹyaa kpîŋ ǹyɛɛi, “Wɔ́lɔ-woo a pâi kɛ̂i gwaa-ŋai kélee ma nûa da kpɔ̂ŋ naai. Da pâi lâɣii bere-lee-ŋai kélee su, dîyɛɛi, ‘Óo! Óo!’ Da pâi gbâlaŋ ŋá tii kɛ́-ƃelai tôlii ŋ̀ɔ́lɔi mɛni ma, da diai dí wɔ́lɔ-pere kɔ́lɔŋ.”

¹⁷Ɣâla Yâwɛɛ ǹyɛɛi, “Wɔ́lɔ-woo a pâi kɛ̂i gbɔmɔ-kpalaŋ-ŋai kélee su, kpɛ́ni fêi, ŋa pâi tɛɛ̂i kásama.”

¹⁸Kpalo ƃêlai kâa káai Ɣâla Yâwɛɛ ŋɔɣelei wɛ̂lii! Ka ŋ̀elei ŋí wɛ̂lii lé-mɛni ma? Gáa a kpíni, vé a kwaa-ponoɔ.

¹⁹Gáa nɔ́ yɛ̂ɛ núu à yào yala-sulu ma da ditala dí kɔ̃yaŋ. Kpaa máŋ yɛ̂ɛ núu à lɔ̀ pɛ́rɛ mu à ǹyée pɛ̀lɛ bɛ́rɛ-kaŋ ma, kali é ǹyíŋ.

²⁰Ɣâla Yâwɛɛ ŋɔɣelei fé a kpíni, nyii vé a kwaa-ponóɔi, zu kpiniɛ kpɔ́, zu fé pono ni?

²¹Yâwɛɛ è mò ǹyɛɛi, “Ŋa kákuu-ŋai kpɔara, ŋa ŋ́ɛi naŋîŋ dímɛi. Fé kpáaŋ ní kákɔ̃yaŋ-ŋai mɛni ma.

²²Berei máŋ ká kákereŋ sala-ŋai kûla la ḿâ a mii-sɛŋ sala-ŋai, fé pâi ńyee seêi dímu, kpaa máŋ ǹii-see sala-ŋai ká díkùla a zua wúlɔɔ-ŋai, fé pâi díkâai.

²³Ka kula ŋ́ôlii a ká wolii kâra wule-ŋai. Fe pâi ŋ́oli tɔɔ̂i káɣale-sãai wóo ma.

²⁴Kɛ́lɛ tɔɔ tɔ̃yâ-laa é ɣilîŋ yɛ̂ɛ ya-lee, teniŋ ƃô-laa é kɛ́ yɛ̂ɛ ya-ɣiliŋ.

²⁵“Óo Eezuɛ-ƃela, tãi ká kɛ̀ vɛ̃ɛ-kpâlaŋ su a kóraŋ buu náaŋ, ká pà mî a sâla-sãa da sama-sãa?

²⁶Ka pâi káɣâla kaloŋ Sâku siɣêi da kaɣâlai Kaiwaŋ, é pɛ́lɛ kánuu-kpɛtɛ ɣâla-ŋai dîa ká díkpɛ̀tɛ kakpîŋ mɛni mai.

²⁷M̀ɛni ma, Ńyãa Yâwɛɛ Ńyãai ńaa ƃa Ɣâla Yâwɛɛi, ŋa pâi kákɛ̂i ká lí luɛ-saa su Dɛmɛika pôlu-pere.”