Read Kpelle Obadaya 1 Bible Online

Obadaya 1 - Kpelle bible

Obadaya 1

¹Ŋ̀orɛ̂-wooi ká ŋí Ɣâla Yâwɛɛ è dɛ̀ɛ Ŋɔlóno-kɛ́-nuui Obadaya pɔ́ é pîlaŋ Idɔŋ lɔii-ŋuŋ mai. Yâwɛɛ è ŋɔworɛ̂-woo ƃó-nuui tɛ̂ɛ ǹɔii-ŋûŋ-ŋai su, kú ŋɔworɛ̂-wooi mɛ̀ni ǹyɛɛi, “Kwaa kúkpîŋ kpɛtɛ! Kwaa lí kú kɔ́ pɛ́lɛ Idɔŋ ma!”

²Yâwɛɛ è lòno Idɔŋ-ƃelai pɔ́ ǹyɛɛi, “Ŋa pâi íkuro têi ǹɔii-ŋûŋ ŋai sáma. Núu kélee a pâi ŋ̀ɛ́i naŋînii ímɛi óo Idɔŋ.

³Íyôŋkai a ípɛlɛ kpɛ́ni fêi, ítaa-lêei káa kɔni yêe ma, ípɛrɛi kɛ́ ƃò ǹyée tɔɔ-ŋai su. M̀ɛni ma ƃa mò yɛ̂ɛ, ‘Gbɛ̂ɛ ƃa pɔ̂ri ŋ́gulâi ƃɛ́ é ḿbîlaŋ?’

⁴Berei máŋ ípɛrɛi káa la ɣelei pere yɛ̂ɛ kuɛ taai gɛ́ ƃò bɛmɛlɛŋ-kao-ŋai sámai, ŋa pâi íkulâi naa í pîlaŋ ǹɔii ma.

⁵“Tãi ŋuma-ƃela da pâ la ípɛrɛi mu a kpínii, da sãa siɣe nɔ́ nyii da ŋ̀wɛ̂lii. Tãi nûa da wúru-ƃa kùla la íkpɔmɔ-kpâlaŋ ŋái, da a lɛ̂ɛ naa. Kɛ́lɛ íkpɔara-ƃelai da pâi ílɔii su karâi kpɔ́ kpɔlɔwɔ.

⁶Kɛ́lɛ da pâi Isɔɔ ŋɔsuui-su-ƃelai kɔlĩŋ kulai díyeei.

⁷Íkɔlɛ-ma lɔii-ŋuŋ-ŋai nyii-ŋai ka dîa-ni ká kɔ́ kɔ̀ gîe mai, da pâi ípɛlɛ̂i dí íkpɛ íkpɔɔi lɔii su. Íƃarâai da pâi ípɛlɛ̂i dí íyee mɛi ɣále. Íƃarâai nyii-ŋai í làa a diai, da pâi ƃáre tɛ̂i ímɛni ma nyii ífe pâi gɔ́lɔnîi.”

⁸Yâwɛɛ ǹyɛɛ, “Maa ɣêlei tí ŋa pâi Idɔŋ lɔii su karâi, ŋá ŋɔtáre-ƃelai su kara, mɛni ŋá-kaa fé ŋɔ́nɔ pâi kɛ̂i ǹɔii tí su.

⁹Óo Temaŋ, íkɔ-kûluƃa-ŋai da pâi yaôi, ǹyaŋ da pâi Idɔŋ-ƃelai kélee paâi.

¹⁰“Káai a Idɔŋ-ƃelai, ŋumɛ a pâi kásonîi ŋ̀wana-lɔ̂ɔ tuai mɛ̂ni ma ká gɛ̀ a kálêɣe Zeeka ŋɔnûai. Ŋa pâi kásuui kélee kpɛɛ̂i ǹɔii ma wɔ́lɔ-wɔlɔ da wɔ́lɔ-wɔlɔ.

¹¹Maa ɣêlei tí í kɛ̀ tɔɔ̂ni ǹaa kɔlɛ ma tãi Zerusâlɛŋ ŋɔkpɔara-ƃelai dí Zerusâlɛŋ siɣãŋ wôlo la dí daai ŋɔtɔɔ-sãai ŋáa kɔ́lɛ díloai a kpɛɛ̂ŋ toɔɔ. Í kɛ̀ yɛ̂ɛ dita.

¹²Kɛ́lɛ maa fé kɛ́ ni a nɛ̃ɛ í yoŋka tée tã ilêɣe è kɛ̀ la mɛni kpɔlu sui. Ifêi pɔri lii-nɛ̃ɛ kulai Zuda ŋɔnûai su-kara mɛni ma. Ífêi pɔri ɣɛ́lɛ-maa kulâi díkponôi dimɛni-soli kaai su.

¹³Ífêi pɔri tɛ̂i ŋánûai dítaai su tãi mɛni kpɔ̂lu è làa la dîai, íkɛ yoŋka tèe dímɛi. Ífêi pɔri máŋ díkɔ̃̂liŋ da siɣêi tãi dí kɛ̀ la mɛni kpɔ̂lu sui.

¹⁴Ifêi pɔri tɔɔ̂i bere tãaŋ lá a gɛɛ dífe pù. Ifêi pɔri dísonîi í li a dîa pɔ̂lu díkpɔara-ƃelai pɔ́ tã dí kɛ̀ Mɛni kpɔ̂lu sui.

¹⁵“Tã a lɛɣɛ tã ńyãai a kánuu-namui, ŋa pâi ǹɔii-ŋûŋ-ŋai dimɛni ŋáa têei lai. Idɔŋ, berei í tùa lai, bere ƃé da pâi tûai la a yá: íkpɔɔi tua-perei a pâi pûi íŋûa.”

¹⁶Kúnuu-namui è mò Zuda-ƃelai dîa ǹyɛɛi, “Yɛ̂ɛ berei kâ kâkpele la ŋálii-ŋwana kɔɛi su ŋáyeê maa waai mai, bere nɔ́ ƃé kâkɔlɛ-ma lɔii-ŋuŋ ŋai kélee da pâi kpêlei la zu é lɛ́ɛ la zu dísu é kara.

¹⁷“Kɛ́lɛ ǹúu da-ni da pâi pûi dí li Zãiyɔŋ yeei ma, nàa a pâi kɛ̂i a kwaa maa waa. Ǹyaŋ Zeeka ŋɔsuui su-ƃelai da pâi seêi ŋɔ́nɔ ǹɔii ma nyii gáa a dínua pɔlɔ-ŋa pɔɔi.”

¹⁸Kúnuu-namui è mò ǹyɛɛi, “Zeeka da Zosɛ dísuui su-ƃelai da pâi kɛ̂i yɛ̂ɛ ŋɔŋ. Da pâi Isɔɔ ŋɔsuui su-ƃelai su karâi yɛ̂ɛ berei ŋɔŋ a kala kèreŋ lai. Ǹyaŋ Isɔɔ, ŋɔsuui su nuu da fé pâi lɛɛ̂i naa a vúlu.

¹⁹“Diai kùla Zuda lɔii kwara-peri, da pâi seêi Idɔŋ yee lɔii ma. Diai kùla ǹyéei vóloi lii-perei, da pâi seêi Felesia-ŋai dílɔɔi ma. Eezuɛ ƃelai kpêli-ŋai da pâi Ifiraŋ lɔii siɣêi da ŋɔtaa-leei Sameria. Bɛŋsima ŋɔsuui su-ƃelai dí sée Gilia yee lɔii ma.

²⁰Zuda-ŋai kùla Eezuɛ lɔii ŋua-perei da pâi kulâi luɛ-laa su dí pá pôlu dí Fonisia lɔii siɣe dí séri Zarefa taai kɔlɛ ma. Zuda-ŋai kùla, Zerusâlɛŋ nyii-ŋai tɛ̀ Sadi taa sui, da pâi liî pôlu dí daa-ŋai siɣe Zuda lɔii kwára pere.

²¹Diai Idɔŋ-ŋai yée mɛi ɣàlei, da pâi tɛɛ̂i Zãiyɔŋ yeei ma dí kɛ́ Idɔŋ-ŋai mɛi. Ǹyaŋ Kúnuu-namui a pâi kɛ̂i a kâloŋ ŋɔnûai mɛi.”