Read Kpelle Zôna 4 Bible Online

Zôna 4 - Kpelle bible

Zôna 4

¹Kɛ́lɛ Zôna líi fè láa ní kɛ̀ a dɔnɔ kpîŋ. Nya ƃe ǹíi ŋwàna.

²È Yâwɛɛ fɛ̀li ǹyɛɛi, “Ŋá kɛ̀ a gɔ́lɔŋɔɔ a gɛɛ íkaa a ƃɛlɛ-see da maloŋ-kâa Ɣala, ífaa ílii ŋwàna a maa félaa, wɛli-kɛ-maa kɛ̀ ƃò íyêei, ƃa ílii maa fâleŋ ífaa núu ŋɔsɔnyɔ̂ŋ su too. M̀ɛnii ŋá kɛ̀ ŋ́gili ŋá siâi ma tãi ŋá kɛ̀ niî la ŋalɔii sui nyaa ká ŋí. M̀ɛnii ŋí ƃe gɛ̀ ŋá pú ŋá lí Sipîŋ.

³M̀ɛni ma, óo Yâwɛɛ, ŋa íkpera fêi a gɛɛ í ŋáfulu-laai síɣe a gɛɛ ŋá sáa. Maa nɛɛ̂i ŋá sáa é tɛ́ɛ la ŋ́gɛɛ ma ɣele ma.”

⁴Nya ƃe Yâwɛɛ è m̀arê kɛ̀ ǹyɛɛi, “Sâpo káa íyêei a gɛɛ í ílii ŋwána?”

⁵Nya ƃe Zôna è kùla daa-lêei su é sée vóloi kulâi-pere daai kɔlɛ é ƃafa pɛ́lɛ naa gbîŋ mɛni ma. È sèe naa ǹinîŋ mu a gɛɛ é m̀ɛnii káa pâi kɛ̂i a daa-lêei.

⁶Nya ƃe Yâwɛɛ Ɣâla è kpɔlɔ-wuru kɛ̀ é kúla é tɔ́ɔ ǹɔii ma, gbɔlɔi é sâla Zôna ŋuŋ mɛi a ninîŋ a gɛɛ vóloi fé gèreŋ. Zôna líi è nɛ̃̀ɛ kpɔ́ a dámaa gbɔlɔ-wurii ŋí mɛni ma.

⁷Kɛ́lɛ bôlu ma ɣele-walai, Ɣâla è kolo tɛ̂ɛ é lɔ́ ŋ̀úrii ma ŋ̀úrii é kpála.

⁸Tãi vóloi è kùla lai, Ɣâla è fãa kɛ́tɛ tɛ̀ɛ é kúla vóloi kulai-pere. Vóloi è Zôna kèreŋ ŋ̀ûa ǹyɛɛ kpîŋ é fôa. È ŋɔ́nɔ kɛ̀ ŋ̀wɛ̂lii é sáa. È mò ǹyɛɛ, “Maa nɛɛ̂i a gɛɛ ŋá sáa é tɛ́ɛ la ŋ́gɛɛ ma ɣele ma.”

⁹Kɛ́lɛ Ɣâla è mò Zôna ma ǹyɛɛi, “Ǹii-ŋwânai ƃa gɛ̂i gbɔlɔ-wurii mɛni mai maa-sâpo káa íyêei?” Ǹyɛɛ mai, “Maa-sâpo káa ńyêei. Ǹíi ŋwânai kpɔ́ a gɛɛ ŋá sáa.”

¹⁰Nya ƃe Yâwɛɛ è mò mà ǹyɛɛi, “Gbɔlɔ-wurii malôŋ káa yâ nyii ífe kôlo ní mà, kpaa máŋ ífe gɛ́ ní é ƃɔlɔ, nyii kɛ̀ nɔ́ naa a kpíni tɔnɔ é sáa a kpíni tɔnɔi.

¹¹Vé a sɛŋ Ninivɛ nyii gáa a taa-lêe kɛ́tɛ m̀alôŋ é kɛ́ ḿâ, nyii núu tɛɛ wála ŋuŋ tɔnɔ pôlu buu feerɛ (120,000) káa zu, nyii-ŋai dífe mɛni nyɔ́mɔɔ da mɛni lɛ́lɛɛ díloai kɔ́lɔŋ, nyii máŋ taa-tûlɛ támaa káa zui?”