Read Kpelle Nɔŋba 13 Bible Online

Nɔŋba 13 - Kpelle bible

Nɔŋba 13

¹Yâwɛɛ è mò mà ǹyɛɛi,

²“Nûa tɛɛ a gɛɛ dí lí dí Keena lɔii su káa nyii ŋa dɛ̀ɛ Eezuɛ-ŋai pɔ́i. Núu túɛ-nuu tɔnɔ kula ǹúu-suu tɛi-tɛi kélee su í dítɛɛ.”

³Nya ƃe Mose è gɛ̀ yɛ̂ɛ berei Yâwɛɛ è mò lai. È ǹûa kùla Paraŋ Fɛ̃ɛ-kpalaŋ su é dítɛɛ, nyii-ŋai kɛ̀ a Eezuɛ-ŋai dísuu-ŋai láa-tuɛ-ƃelai.

⁴Maa-ƃelai láa ká ŋí. Zakɔ ǹóŋ Samua è kùla Lubiŋ ŋɔsuui su Ɔli ǹóŋ Safa é kúla Simiɔŋ ŋɔsuui su. Zɛfune ǹóŋ Kelɛ é kúla Zuda ŋɔsuui su. Zosɛ ǹóŋ Íga é kúla Isaka ŋɔsuui su. Nuŋ ǹóŋ Osîa è kùla Ifiraŋ ŋɔsuui su. Lafu ǹóŋ Pati é kúla Bɛŋsima ŋɔsuui su. Sɔdi ǹóŋ Gadiɛ é kúla Zɛbulɔŋ ŋɔsuui su. Susi ǹóŋ Gadi é kúla Manasɛ ŋɔsuui su nyii kùla Zosɛ ŋɔsuui sui. Gemali ǹóŋ Amiɛ é kúla Daŋ ŋɔsuui su. Makɛɛ ǹóŋ Sɛtu è kùla Asɛ ŋɔsuui su. Vosi ǹóŋ Nabi é kúla Nɛfɛtɛli ŋɔsuui su. Mâki ǹóŋ Gɛuɛ é kúla Gâa ŋɔsuui su.

¹⁶Ǹûai Mose è dítɛɛ a gɛɛ dí ǹɔii su maa kpɛ́ɛi, dílaa ká tí. Mose è Nuŋ ǹóŋ Osîa láa ma fàleŋ a Zasua.

¹⁷Mose è dítɛɛ a gɛɛ dí Keena lɔii su màa kpɛ́ɛ ǹyɛɛ diai, “Ka tɛɛ a vɛ̃ɛ-kpâlaŋ su-pere ǹɔii kwára-pere ká lí ǹyée kwaa-ŋai mâ.

¹⁸Ká gáa berei ǹɔii káa lai, à kɛ̀ ǹûai díkaa naai díwala-walai kpaa máŋ dífii kpɛɛ̂i. Ka gáa à kɛ̀ dítâmaai kpaa máŋ dífe táma ní.

¹⁹Ka gáa à kɛ̀ ǹɔii díkaa mai ǹɛ̂lɛɛi kpaa máŋ vé lɛ́lɛ ní. Ka gáa à kɛ̀ dítaa-ŋai maa koliɛi a siɣãŋ kpaa máŋ dímaa fé kóli ní,

²⁰À kɛ̀ ǹɔii a sí-sɛŋ kpɛ̀tɛ kpaa máŋ va sí-sɛŋ kpɛ̀tɛ. A kɛ̀ wúru káa zu kpaa máŋ wúru fé zu. Ka kálii kpéle ká pá a ǹɔii su-sãai da. Maa-tãi è kɛ̀ a gbɔmɔ-ƃai maa-ŋuŋ kpɔlu-tãi.”

²¹Nya ƃe ǹûai dí ǹɔii su káa kɔ́ɔ pìlaŋ Ziŋ fɛ̃ɛ-kpalaŋ su-pere dí seri Lio, Ama-perei kɔlɛ ma.

²²Dí tɛ̀ɛ a vɛ̃ɛ-kpâlaŋ su-pere dí seri Iburɔŋ, ƃɛ́i Aimaŋ-ŋai, Sisai-ŋai da Tamai-ŋai dí kɛ̀ naa, nyii-ŋai díkaa a Anaa ŋɔsuui su-ƃelai. (Iburɔŋ tɔɔ è tɛ̀ɛ a kóraŋ lɔ́ɔlu mɛi feerɛ dí lɛ́ɛ pâi Zoaŋ tɔɔ̂i Ize lɔii su.)

²³Tãi dí sèri la Ɛsekɔ Títiŋ sui, dí kpɔmɔ-ƃa tiyɔŋ tɔnɔ kùla naa dí ŋiri wúru ma, núu feerɛ dí tɔ́ɔ mu. Dí pà máŋ a pɔmegurane wuru-ƃa-ŋa da fîi wuru-ƃa-ŋa.

²⁴Dí maa kwaai tí ma tòli a Ɛsekɔ potoi su. Kpɛni fêi, Eezuɛ-ŋai dí kpɔmɔ-ƃa tiyɔŋ tɔnɔ kùla naa.

²⁵Ɣele-kuu buu náaŋ tɛɛ pôlu mai dí nâa kùla ǹɔii su-kaa siai mâ dí pá pôlu.

²⁶Dí pà Kedɛ Mose pɔ́ da Eelɔŋ é pɛ́lɛ Eezuɛ-ŋai kélee dîa. Kedɛ káa Paraŋ fɛ̃ɛ-kpalaŋ su. Dí díkoraŋ ƃò dîɛ da ǹûai kélee. Dí gbɔmɔ-ƃa tiyɔŋ lɛ̀ dîa nyii dí kùla la naai.

²⁷Dí mò Mose mà díyêei, “Kú lì ǹɔii su í kú tɛ̀ɛ naai. Gáa a sí-sɛŋ kpɛtɛ-lɔii lɛ́lɛɛ. Zu si-sãai da ká ŋí.

²⁸Ǹûai díkaa ǹɔii sui díwala-walai, dítaa-ŋai kpaya-kpayai, dímaa tínaŋɔɔ a siɣãŋ. Kú Ana ŋɔsuui su-ƃela kàa naa máŋ.

²⁹Amɛlɛkai-ŋai díkaa vɛ̃ɛ-kpâlaŋ su ǹɔii kwára-pere, Ita-ŋai, Zɛbusai-ŋai da Amɔrai-ŋai díkɛ ƃò ǹyee kwaai ma-pere. Keena-ŋai díkaa máŋ Mɛditɛrenia Yuoi da Zɔdiŋ Ya-leei ma pere.”

³⁰Kɛ́lɛ Kelɛ è ǹûai kɛ̀ dí dímɛi sáa, nyii-ŋai kɛ̀ díŋuŋ su-woo saâi a Mose láai ǹyɛɛi, “Kwaa lí a maa félaa kú sée naa. Kpɛni fêi, pɔ̂ri káa kûɛ a gɛɛ kú gula-yeei kɛ́.”

³¹Kɛ́lɛ diai da Kelɛ-ni dí lìi, dí mò ǹûai dîa díyêei, “Kúfa pɔ̂ri kɔ̂i ǹûai pɔ́. Kpɛni fêi, díwala-walai é tɛ́ɛ kûa.”

³²Ǹûai ŋí dífe tɔ̃yâ koraŋ-ƃo too ní Eezuɛ-ŋai dîɛ ǹɔii mɛni ma dí lì zu kâai. Dí mò dîyɛɛi, “Ǹɔii kú sìa zu zu-kaa mɛni mai va pɔ̂ri sí-sɛŋ kpɛtɛ̂i a gɛɛ kpîŋ é zu-ƃelai ŋá kɔ́ŋ. Ǹûai kú díkaa naai díkelee díyee-la mu-seɛɛi.

³³Kú Nɛfiliŋ-ŋai kàa naa. Ǹûai ŋí díkaa a Ana ǹônii-sinaai. Kú kúkpîŋ kàa nɔ́ díŋɛi yɛ̂ɛ tonîŋ-na. Ǹyaŋ bere nɔ́ ƃé kú kɛ̀ la díŋɛi.”