Read Kpelle Nɔŋba 16 Bible Online

Nɔŋba 16 - Kpelle bible

Nɔŋba 16

¹Nya ƃe Iza ǹóŋ Kora nyii kɛ̀ a Koa ǹóŋ, nyii kɛ̀ a Livai ǹóŋ, da Ilia ǹônii Dataŋ da Abilaŋ, é pɛ́lɛ Pêlɛ ǹóŋ Oŋ mà, nyii-ŋai kùla Lubiŋ ŋɔsuui sui,

²dí tɔ̀ɔ Mose ma. Da Eezuɛ-ŋai láa-tuɛ-ƃela lɛ́lɛɛi ŋuŋ feerɛ pôlu buu lɔ́ɔlu (250) nyii-ŋai kɛ̀ a dítuɛ-ƃelai,

³Dí díŋa tɛ̀ díkîe mà dîyɛɛ Mose da Eelɔŋ-ni diai, “Kâa nâa lí póŋ. Kúai a Eezuɛ-ŋai kúkelee kúmaa waâi. Yâwɛɛ kɛ́ ƃò kúkɔlɛ. Ka kákpîŋ kɛ́ ŋaŋ kúmɛi lé mɛni ma?”

⁴Tãi Mose è nyíŋi mɛ̀ni lai è ŋuŋ pìlaŋ ǹɔii ma.

⁵È mò Koa da ǹûai kélee dîa ǹyɛɛi, “Yâwɛɛ a pâi ǹúui lɛ̂i a tínaa ɣele-wâla nyii gáa a bɔ́ɔi. A pâi ǹúui lɛ̂i nyii maa waâi a pɔ̂ri lɛɣɛ̂i lai. Ǹûui a pâi nɛ̂i ǹyaa ƃé a pâi nɛɛ̂i naa é lɛ́ɣɛ là.

⁶Tínaa ɣele-wâla, ka káŋɔŋ siɣe-sɛŋ-folo-ŋai síɣe.

⁷Ka ŋɔŋ pú dísu, ka kéreŋ-sɛŋ kúŋ nɛ̃ɛ pú ŋ̀á ká lí a dia Yâwɛɛ ŋɛ́i-tuɛ. Ǹúui nyii Yâwɛɛ a pâi nɛ̂i, ǹyaa ƃé pâi kɛ̂i a ǹúui maa waai. Káai a Livai lônii káa ƃé ka nâa lí póŋ-poŋ.”

⁸Nya ƃe Mose è mò Koa mà ǹyɛɛi, “Ka ŋ́oo mɛni káai a Livai lônii.

⁹Gáa a mɛni-loŋ a gɛɛ Eezuɛ-ŋai Díɣâlai é kákula Eezuɛ-ŋai sáma é ká lɛ́ɣɛ gbono ma a gɛɛ ká tíi kɛ́ ŋɔpɛ́rɛ maa waai mu ká tɔ́ɔ Eezuɛ-ŋai láa-tuɛ ká tíi kɛ́ dîɛ?

¹⁰A gɛ̀ ka Livai lônii kpéli-ŋai kélee ka lɛɣɛ gɔlɛ. Ǹyaŋ ka ŋ̀wɛ̂lii ká nâa kɛ́ a sâla láa-soŋ-ƃela máŋ.

¹¹Mɛni ma Yâwɛɛ ƃé ka ínûai kélee ká tɔ̀ɔ mà. Káfe tɔɔ ní Eelɔŋ ma.”

¹²Nya ƃe Mose è ŋ̀óo tɛ̀ɛ a gɛɛ dí Ilia nônii Dataŋ da Abilaŋ tóli. Kɛ́lɛ dí mò dîyɛɛi, “Kúfe pâi naa.

¹³Kúkulâi í mò mii-sɛŋ kpɛtɛ-lɔii lɛ́lɛɛi su í pá a kúa ƃɛ́ vɛ̃ɛ-kpâlaŋ su a gɛɛ í kúpaâi gáa a mɛni-loŋ, a gɛɛ í íkpîŋ kɛ́ a kâloŋ kúmɛi?

¹⁴Tɔ̃yâ mà ífe pá ní a kúa mii-sɛŋ kpɛtɛ-lɔii lɛ́lɛɛ mâ. Ífe tela kúsee-lɔii lɛ́ ní kûa da kpɔmɔ-ƃa-kpalaŋ. Ƃa ŋ̀wɛ̂lii í kúpɛlɛ? Kúfe pâi liî naa.”

¹⁵Mose è ǹíi ŋwàna kpɔ́ a ŋánaa. È mò Yâwɛɛ mà ǹyɛɛi, “Ífe íyee sèe dísama-sɛŋ mu. Fé niî díwɛlɛ-sôo-ŋai dɔnɔ kpîŋ kula ní díyêei, fé niî tela mɛni nyɔ́mɔɔ kɛ́ ní a dítà.”

¹⁶Nya ƃe Mose è mò Koa mà ǹyɛɛi, “Ka ínûai kélee ka tínaa pá Yâwɛɛ ŋɛ́i-tuɛ. Eelɔŋ a pâi kɛ̂i naa máŋ.

¹⁷Kákelee ka káŋɔŋ-pu-sɛŋ-folo-ŋai síɣe tɛi-tɛi, ká ŋuŋ pú dúsu ká kéreŋ-sɛŋ kúŋ-nɛ̃ɛ pú díŋa, kákelee ká pá Yâwɛɛ ŋɛ́i-tuɛ a káŋɔŋ-pu-sɛŋ-folo-ŋai. Ka Eelɔŋ-ni ka lí máŋ a káŋɔŋ-pu-sɛŋ-folo-ŋai. Gélee puɔ gîe ma káa a ŋɔŋ-pu-sɛŋ-folo ŋuŋ feerɛ pôlu buu lɔ́ɔlu (250).”

¹⁸Nya ƃe díkelee dí díŋɔŋ-pu-sɛŋ-folo-ŋai sìɣe dí ŋɔŋ pú dísu dí kéreŋ-sɛŋ kúŋ nɛ̃ɛ pú díŋa da Eelɔŋ-ni é pɛ́lɛ Mose ma dí lí dí tɔ́ɔ Yâwɛɛ ŋɔsua kɔlɔ seɣe pɛrɛ maa waai lá.

¹⁹Nya ƃe Koa è ŋɔnûai kélee ŋá tɛ̀ ma Yâwɛɛ ŋɔsua kɔlɔ seɣe pɛrɛ maa waai lá, dí díŋɛi tínaŋ Mose da Eelɔŋ pɔ́ naa pere. Yâwɛɛ ŋɔfólo-laai è pà díkelee dípɔ.

²⁰Nya ƃe Yâwɛɛ è mò Mose da Eelɔŋ dîa ǹyɛɛi,

²¹“Ka kula ǹûai kpîŋ sama ŋá dísu kara a maa félaa.”

²²Mose da Eelɔŋ dí díŋuŋ pìlaŋ ǹɔii ma díyɛɛ mai, “Óo Ɣâla, ƃíai íkaa a fúlu-laa kpɛtɛ Ɣâlai, ƃa pâi ílii ŋwanâi ǹúui kélee ma núu tɔnɔ ŋɔsɔnyɔ̂ŋ mɛni ma?”

²³Nya ƃe Yâwɛɛ è mò Mose mà ǹyɛɛi,

²⁴“M̀ó ǹûai dîa dí kúla Koa, Dataŋ da Abilaŋ dísua kɔlɔ seɣe pɛrɛ-ŋai lá.”

²⁵Nya ƃe Mose è mù sìɣe da Eezuɛ-ŋai dínuu-pɔlɔ-ŋai dí lí Dataŋ da Abilaŋ dípɔ naa.

²⁶È mò ǹûai dîa ǹyɛɛi, “Ka kula ŋwana-lɔ̂ɔ-ƃelai ŋí dísua kɔlɔ seɣe pɛrɛ-ŋai lá. Káfe lɛ̀ɣɛ díkɔ̃liŋ dɔnɔ kpîŋ mà. À wàla kɛ́ tí ka dîa-ni ka pâi dísɔnyɔ̂ŋ maa-saa kɛ̂i.”

²⁷Nya ƃe dí kùla Koa, Dataŋ da Abilaŋ dípɛrɛ-ŋai lá. Nya ƃe Dataŋ da Abilaŋ dí kùla dí tɔ́ɔ dípɛrɛ-ŋai lá da dínɛyâai é pɛ́lɛ dínîa-pɛlɛɛi dîa.

²⁸Nya ƃe Mose è mò ǹyɛɛi, “Berei ka pâi gɔ̂lɔnii la a gɛɛ Yâwɛɛ ƃé ńdɛɛ a gɛɛ ŋá díi-ŋai ŋí kɛ́, kɛ́lɛ fé díkɛ̂i ŋ́gbɔɔi yee mai, nya ka ŋí.

²⁹À kɛ̀ ǹûai ŋí da saa díkpɔɔi yee ma, dífe tɔŋ-kpɛ-maa sɔlɔ ƃó ní é kúla Yâwɛɛ yêei, gɛ̀ ní Yâwɛɛ fé ńdɛɛ ní.

³⁰Kɛ́lɛ à kɛ̀ Yâwɛɛ a laa-kpala maa-mɛni kɛ̀ ǹɔii lá é ƃó é díkpele da díkɔ̂liŋ kélee dí lí saa-taa a dífulu, gɛ̀ ní ka pâi gɔ̂lɔnii a gɛɛ ǹûai ŋí dí díŋɛi nàŋîŋ Yâwɛɛ mɛi.”

³¹Tãi è kpɛ̀ɛ la a mɛni-ŋai ŋí kélee ƃóɔi, ǹɔii è ƃèla díkɔɔ mu.

³²Ǹɔii láa è ƃò é díkpele da dípɛrɛi mu-ƃelai kélee da Koa ŋɔnûai kélee é pɛ́lɛ díkɔ̂liŋ kélee dîa.

³³Nya ƃe dí yèŋ saa-taa a dífulu da díkɔ̂liŋ kélee. Ǹɔii láa è tɛ̀ dímɛi, dí nâa láŋ díƃarâi ŋɛ́i-tuɛ.

³⁴Eezuɛ-ŋai kpêli-ŋai kélee kɛ̀ naa kɔlɛ mai dí pù ǹûai wɔ́lɔ-woo ma. Dí mò dîyɛɛi, “Kwà wàla pú, ǹɔii a pâi kúkpelêi kúa máŋ.”

³⁵Nya ƃe ŋɔŋ è kùla Yâwɛɛ yêei é núu ŋuŋ feerɛ pôlu buu lɔ́ɔlu (250) su kara nyii-ŋai kɛ̀ géreŋ-sɛŋ kúŋ-nɛ̃ɛi tɛɛ̂i.

³⁶Nya ƃe Yâwɛɛ è mò Mose mà ǹyɛɛi,

³⁷“M̀ó zâla láa-soŋ-nuui Eelɔŋ ǹóŋ Ilieza ma a gɛɛ é ŋɔŋ-siɣe sɛŋ-folo-ŋai kúla ŋɔŋ su, ŋɔŋ gáa dísui é dítaa-taa kwaa kôyaa ma. Kpɛni fêi, ŋɔŋ-siɣe sɛŋ-folo-ŋai maa wâai.

³⁸Ŋɔŋ-siɣe-sɛŋ-folo-ŋai ŋí maa waa-tãi ƃé kɛ̀ a tãi dí dípù la Yâwɛɛ ŋɔteƃelei mai. Mɛni ma ǹûai ŋí sàa dísɔnyɔ̂ŋ mɛni mai, díŋɔŋ-siɣe sɛŋ-folo-ŋai síɣe é díɣale a m̀éla-ŋa, í díkɛ a ŋ̀âla-teƃelei mɛi-pɛlɛ-sãa. A pâi kɛ̂i a kili-too-ŋa Eezuɛ-ŋai mɛni ma.”

³⁹Nya ƃe zâla-laa-soŋ-nuui Ilieza è ŋɔŋ-siɣe sɛŋ-folo-ŋai sìɣe é díɣale a m̀éla-ŋa a gɛɛ dí kɛ́ a ŋ̀âla-teƃelei mɛi-pɛlɛ-sãa.

⁴⁰Nyíŋi è kɛ̀ a kili-too-ŋa Eezuɛ-ŋai mɛni ma a gɛɛ diai kélee dífe a Eelɔŋ ŋɔsuui dai dífe pà ŋ̀âla-teƃelei ma kéreŋ-sɛŋ kúŋ nɛ̃ɛ kêrenii Yâwɛɛ mɛni ma. À kɛ̀ tí m̀aa-nuui su a pâi karâi yɛ̂ɛ Koa da ŋɔnûai. Mɛni-ŋai ŋí kélee è kɛ̀ yɛ̂ɛ berei Yâwɛɛ è mò la Ilieza ma Mose sârai.

⁴¹Kɛ́lɛ bôlu ma ɣele walai Eezuɛ-ŋai dí díŋuŋ su-woo sàa é pîlaŋ Mose da Eelɔŋ dîa. Dí mò dîyɛɛi, “Ka Yâwɛɛ ŋɔnûai páa.”

⁴²Tãi Eezuɛ-ŋai dí díŋa tɛ̀ la díkîe ma a gɛɛ dí tɔ́ɔ Mose da Eelɔŋ diai, dí díŋɛi tìnaŋ Yâwɛɛ ŋɔsua kɔlɔ seɣe pɛrɛ maa waai ma-pere. Nya ƃe ŋ̀ele-kɔlɔŋ kolei è bɛ́rɛ maa waai mɛi pɛ̀lɛ, dí Yâwɛɛ ŋɔfólo-laai káa.

⁴³Mose da Eelɔŋ dí pà bɛ́rɛ maa waai lá,

⁴⁴Yâwɛɛ é mó dîa ǹyɛɛi,

⁴⁵“Ka kula ǹûai kpîŋ sáma a gɛɛ ŋá dísu kara a maa félaa.” Nya ƃe dí díŋuŋ pìlaŋ ǹɔii ma.

⁴⁶Mose è mò Eelɔŋ ma ǹyɛɛi, “Íŋɔŋ-siɣe-sɛŋ-foloi síɣe í ŋɔŋ kula ŋ̀âla-teƃelai ma í bú zu í kéreŋ-sɛŋ kúŋ nɛ̃ɛ pú ŋá í lí la Eezuɛ-ŋai pɔ́ naa a maa félaa í dísɔnyɔ̂ŋ maa sâla kula. Kpɛni fêi, Yâwɛɛ a ǹíi ŋwána. Ǹyaŋ zaa-kɔlɔ-felai a nâa pâi.”

⁴⁷Nya ƃe Eelɔŋ è gɛ̀ yɛ̂ɛ berei Mose è mò la mai. È lì a ŋɔŋɔŋ-siɣe sɛŋ-foloi a kîrɛ ǹûai sáma. Tãi è sèri la naai, è gàa a gɛɛ zaa-kɔlɔ-felai a seri dîa. Nya ƃe è géreŋ-sɛŋ kúŋ nɛ̃ɛi pù é ǹûai dísɔnyɔ̂ŋ maa sâla kula la.

⁴⁸È tɔ̀ɔ zaa-ƃelai loai da vúlu-ƃelai, zaa-kɔlɔ-felai é kpɛ́ɛ.

⁴⁹Diai zaa-kɔlɔ-felai è dípàai, dí kɛ̀ a núu wála puu kao náaŋ pôlu ŋuŋ lɔ́ɔlu mɛi-feerɛ (14,700) é kúla diai pôlu sàa Koa lá-sɔŋ sui dîa.

⁵⁰Zaa-kɔlɔ-felai kpɛɛi, Eelɔŋ è lì pôlu Mose pɔ́ naa bɛ́rɛ maa waai lá.