Read Kpelle Nɔŋba 17 Bible Online

Nɔŋba 17 - Kpelle bible

Nɔŋba 17

¹Yâwɛɛ è mò Mose ma ǹyɛɛi,

²“M̀ó Eezuɛ-ŋai dîa a gɛɛ dí sia-wuru puu káo feerɛ tɛɛ ípɔ dí kúla dínuu-suu puu káo feerɛi dítuɛ-ƃelai kélee yêei tɛi-tɛi. Ǹúu-tuɛ ƃelai láa pɔ̃yɛ dísia-wûru-ŋai dîa tɛi-tɛi.

³Eelɔŋ láa pɔ̃yɛ Livai ŋɔsia-wurii ma. Kpɛni fêi, sia-wûru tɔnɔ a pâi kɛ̂i núu-suu tɔnɔ túɛ-nuu mɛni ma.

⁴Lí a ŋúru-ŋai zua kɔlɔ pɛrɛ maa waai mu í dípu gbanaŋ-woo kɛɛi maa-gãlai kɔlɛ ƃɛ́i kwa kúkîe-ni kàa naai.

⁵Ǹúui ŋa pâi nɛ̂i, maa-nuui ƃé ŋɔsia-wurii a pâi pɔmûnii. Bere-sii ŋí ƃé ŋa pâi Eezuɛ-ŋai kperâi la díŋuŋ-su-woo saa ma a tãi kélee é pîlaŋ kâa.”

⁶Nya ƃe Mose è lòno Eezuɛ-ŋai pɔ́. Ǹúu-suu puu káo feerɛi kélee dí-tuɛ-ƃelai dí sia-wûru tɛ̀ɛ Mose pɔ́ tɛi-tɛi. Eelɔŋ ŋɔsia-wûrii è kɛ̀ zia-wûru-ŋai ŋí sáma.

⁷Nya ƃe Mose è zia-wûru-ŋai ŋí pù zua kɔlɔ seɣe pɛrɛ maa waai mu Yâwɛɛ ŋɛ́i-tuɛ.

⁸Naa pôlu ma ɣele-walai Mose è lì é lɔ́ zua-kɔlɔ seɣe pɛrɛ maa waai mu é Eelɔŋ ŋɔsia-wurii káa nyii kɛ̀ Livai ŋɔsuui mɛni mai bɔmûŋɔɔ. È nâa pòa gɛ́ ƃà.

⁹Nya ƃe Mose è zia-wuru-ŋai kélee kùla Yâwɛɛ ŋɛ́i-tuɛ é pá a dîa pôlu Eezuɛ-ŋai pɔ́. Dí gàa dí díwɔ̂-ŋai síɣe tɛi-tɛi.

¹⁰Nya ƃe Yâwɛɛ è mò Mose mà ǹyɛɛi, “Eelɔŋ ŋɔsia-wûrii láa pôlu gbanaŋ-woo kɛ́ɛ maa-gãlai kɔlɛ a gɛɛ é kɛ́ naa a ŋɛi-kɛ-maa dɔɔ-maa-ƃelai mɛni ma a gɛɛ dí kpéra díŋuŋ-su-woo sáa ma dífa lâa saa la.”

¹¹Nya ƃe Mose è gɛ̀ yɛ̂ɛ berei Yâwɛɛ è mò la mai.

¹²Nya ƃe Eezuɛ-ŋai dí mò Mose mà dîyɛɛi, “Kúkelee kwa saa.

¹³Ǹúui nyii kélee pâi lɛɣɛ̂i Yâwɛɛ ŋɔsua kɔlɔ seɣe pɛrɛ maa waai mai, maa-nuui a pâi saâi. Kúkelee kwa pâi sâai.”