Read Kpelle Nɔŋba 19 Bible Online

Nɔŋba 19 - Kpelle bible

Nɔŋba 19

¹Yâwɛɛ è mò Eelɔŋ da Mose dîa ǹyɛɛi,

²“Ŋatɔ̂ŋ-ŋai ká ŋí ká dímɛi káa. M̀ó Eezuɛ-ŋai dîa yɛ̂ɛi, ‘Ka pá a niŋa kpɔ̂lu tɔnɔ nyii pɔ́ɔ da kélee fé mai, nyii vé nîi kpîri da kélee siɣe nii.

³Ka dɛ̀ɛ zâla láa-soŋ-nuui Ilieza pɔ́, é ǹûai kɛ́ dí lí la m̀ûui pôlu-pere dí báa Ilieza ŋɛ́i-tuɛ.

⁴Ilieza é ǹyée gbua lɔ́ niŋa ŋãai su é da kpɛ́mɛŋ zua kɔlɔ seɣe pɛrɛ maa waai ŋéi-tuɛ lɔ́ɔlu mɛi feerɛ.

⁵Fɛ̂ɛ dí niŋa pomai kéreŋ zâla láa-soŋ-nuui ŋéi-tuɛ, è máŋ kɛ́ a gɔlɔ, ǹúu, ŋãa da buru kélee.

⁶É sîda wuru da kpalo siɣe é pɛ́lɛ yee-kpɔlu ma é dípili niŋa poma kéreŋ-ŋuŋ su.

⁷Naa pôlu ma zâla láa-soŋ-nuui é ŋɔseɣe-ŋai wáa, é gbîŋ waa ǹyai su, é nâa pá m̀ûui su. Kɛ́lɛ maa fa pâi niî kɛ̂i a ŋwaa é lɛ́ɛ la zu ɣele-wulii é kɛ́.

⁸Ǹúui a niŋa pomai kèreŋ é ŋɔseɣe-ŋai wáa, é gbîŋ waa ǹyai su, kɛ́lɛ ǹyaa máŋ maa fa pâi niî kɛ̂i a ŋwaa é lɛ́ɛ la zu ɣele-wulii é kɛ́.

⁹A kɛ̀ tí, ǹúui maa waai, é niŋa-kereŋ-luui ŋá tɛ́ ma é bû kwaa maa waa mâ m̀ûui pôlu-pere. Dí bû naa Eezuɛ-ŋai dímɛni maa waa yai kpɛtɛ-mɛni ma.

¹⁰Ǹúui a niŋa-kereŋ-luui ŋá tɛ̀ mai, é ŋɔseɣe-ŋai wáa. Kɛ́lɛ maa fé pâi niî kɛ̂i a ŋwaa é lɛ́ɛ la zu ɣele-wulii é kɛ́.’

¹¹“Ǹúui a ǹyée pɛ̀lɛ poma mai, maa-nuui maa fé waa ní a fólo lɔ́ɔlu mɛi feerɛ.

¹²Fɛ̂ɛ maa-nuui é gbîŋ maa waa a zɔnyɔ̂ŋ su-mɛni lɛɛ yai da a ŋ̀ele-kuui zaaƃa-ɣelei da ŋ̀ele-kuui ǹɔ́ɔlu mɛi-feerɛ ɣelei, gɛ̀ ní, a pâi kɛ̂i a maa waa. Kɛ́lɛ à wàla gbîŋ maa waa a ŋ̀ele-kuui zaaƃa-ɣelei da ŋ̀ele-kuui ǹɔ́ɔlu-mɛi-feerɛi ɣelei, gɛ̀ ní maa fé pâi kɛ̂i a ŋwaa.

¹³Ǹúui kélee a ǹyée pɛ̀lɛ poma ma, kɛ́lɛ va gbîŋ wàa a Yâwɛɛ ŋɔsua kɔlɔ seɣe pɛrɛ maa waai kàra, fɛ̂ɛ dí maa nuui kúla Eezuɛ-ŋai sáma. Maa fé waa ní-laai a lɛɛ ma é lɛ́ɛ la zu dí ŋwaa a zɔnyɔ̂ŋ-su-mɛni lɛɛ-yai.

¹⁴“Núu à sàa ŋɔpɛ́rɛi mu, maa tɔ̂ŋ ká ŋí. Ǹúui kélee a lɔ̂ ŋɔpɛ́rɛi mui, da ǹúui kélee gáa naa a maa-tãi tíi, dímaa fé pâi kɛ̂i a ŋwaa a ɣele-kuu lɔ́ɔlu mɛi feerɛ.

¹⁵Bɛ́rɛ tí mu sɛŋ-foloi kélee ǹáa ƃoɔi nyii ǹá-tɛ-sɛŋ fé mai, maa fé waa ní.

¹⁶À kɛ̀ núu a ǹyée pɛ̀lɛ nuu-poma ma nyii dí bàa a ƃóa-sɔ̂kpɔ, kpaa máŋ nyii saa gbɔ́ɔi yee ma panaŋ ma, kpaa é ǹyée pɛ̀lɛ nuu-káo ma kpaa máŋ ƃolôŋ ma, maa-nuui maa fé pâi kɛ̂i a ŋwaa a ɣele-kuu lɔ́ɔlu mɛi feerɛ.

¹⁷“Maa ǹúui maa pere ka ŋí. Fɛ̂ɛ dí niŋa-kereŋ-luui da siɣe dí bú leɣi su dí yá nina pú ma.

¹⁸Fɛ̂ɛ ǹúui maa waai é kpalo siɣe é ǹɔ́ ǹyái su é gbɛ́mɛŋ bɛ́rɛi ma daa mu-sãa kélee, é pɛ́lɛ ǹûai kélee dîa kɛ̀ nàai. É ŋɔ́nɔ gbɛ́mɛŋ ǹúui ma nyii ǹyée pɛ̀lɛ nuu-kaoi, kpaa máŋ ǹúu-pomai mâ nyii dí bàai, kpaa máŋ ǹúui sàa gbɔ́ɔi yee mai, kpaa máŋ é ǹyée pɛ́lɛ ƃolôŋ mai.

¹⁹Fɛ̂ɛ ǹúui maa waai é ǹyái kpɛ́mɛi ǹúui mâ nyii maa fé waa níi a ŋ̀ele kuui zaaƃa-ɣelei da ŋ̀ele-kuui ǹɔ́ɔlu mɛi-feerɛ-ɣelei. Bere ƃé a pâi ǹúui tí maa waâi la a ŋ̀ele-kuui ǹɔ́ɔlu mɛi feerɛ-ɣelei. Fɛ́ɛ maa-nuuii é ŋɔseɣe-ŋai wáa é gbîŋ waa máŋ a yá, gɛ̀ ní a pâi kɛ̂i a maa waa a maa ɣele-wulii tí.

²⁰“À kɛ̀ ǹúui maa fé waa níi, vé gbîŋ waa ní, fɛ̂ɛ dí maa nuui kúla Eezuɛ-ŋai sáma, a Yâwɛɛ ŋɔsua kɔlɔ pɛrɛ maa waai maa tĩ̂a kàra. Kpɛni fêi, dífe zɔnyɔ̂ŋ su-mɛni-lɛɛ-yai pú ní mà. Ǹyaŋ maa fé waa ní.

²¹Dɔ̂ŋ ŋí káa kámɛni ma wɔlɔ-wɔlɔ da wɔlɔ-wɔlɔ. Ǹúui a zɔnyɔ̂ŋ-su-mɛni lɛɛ-yai kpɛ̂mɛŋ, é ŋɔseɣe-ŋai wáa máŋ. Ǹyaŋ ǹúui a ǹyée pɛ̀lɛ zɔnyɔ̂ŋ-su-mɛni lɛɛ-yai mai, maa-nuui maa fé pâi kɛ̂i a ŋwaa é lɛ́ɛ la zu ɣele-wulii é kɛ́.

²²Ǹúui maa fé waa ni à kɛ̀ à ǹyée pɛ̀lɛ sɛŋ da kélee ma, maa-sɛŋ tí maa fé pâi kɛ̂i a ŋwaa. Ǹyaŋ núu da kélee à ǹyée pɛ̀lɛ maa-sɛŋ tí mai, maa-nuui tí maa fé pâi kɛ̂i a ŋwaa é lɛ́ɛ la zu ɣele-wulii é kɛ́.”