Read Kpelle Nɔŋba 2 Bible Online

Nɔŋba 2 - Kpelle bible

Nɔŋba 2

¹Yâwɛɛ è mò Mose da Eelɔŋ dîa ǹyɛɛi,

²“Fɛ̂ɛ Eezuɛ-ŋai dí díƃûu-ŋai pu díkpulu ma díƃenâ-ŋai mu tɛ-tɛi. Dí dínûa-pɔlɔ-ŋai dípɛrɛ-ŋai maa ŋɛi-kɛ-maa-ŋai tɔ́ɔ naa. Dí díƃûu-ŋai lá tínaŋ Zua kɔlɔ seɣe pɛrɛ maa waai ma-pere m̀éla kélee ma.

³“Diai pâi díwɔ̂ ƃuui tɔɔ̂i vóloi kulâi-perei dí kɛ́ Zuda ŋɔƃenâi mu díkpulu ma. Zuda ŋɔnûai túɛ-nuui ƃa Aminɛda ǹóŋ Nasuŋ.

⁴Zuda ŋɔnúu-kpului su-ƃelai díkaa a wála buu lɔ́ɔlu mɛi feerɛ káo náaŋ pôlu ŋuŋ lɔ́ɔlu mɛi da (74,600).

⁵Diai pâi díwɔ ƃuui tɔɔ̂i gɔlɛ mai dí kɛ́ a Isaka ŋɔsuui. Isaka ŋɔnûai túɛ-nuui ƃa Zua ǹóŋ Natɛniɛ.

⁶Isaka ŋɔnúu-kpului su-ƃelai díkaa a wála buu lɔ́ɔlu káo náaŋ pôlu ŋuŋ náaŋ (54,400).

⁷Naa pôlu ma Zɛbulɔŋ ŋɔsuui. Zɛbulɔŋ ŋɔnûai túɛ-nuui ƃa Ɛlɔŋ ǹóŋ Ilia.

⁸Zɛbulɔŋ ŋɔnúu-kpului su-ƃelai díkaa a wála buu lɔ́ɔlu káo lɔ́ɔlu mɛi feerɛ pôlu ŋuŋ náaŋ (57,400).

⁹Diai kélee díkaa Zuda ŋɔƃûui sui díkaa a wála ŋuŋ tɔnɔ pôlu buu lɔ́ɔlu mɛi saaƃa káo lɔ́ɔlu mɛi da pôlu ŋuŋ náaŋ (186,400). Dia ƃa tɔ̂ɔ ziai kélee túɛ.

¹⁰“Nàa kwára-pere é kɛ́ Lubiŋ ŋɔƃenâi mu díkpulu ma. Lubiŋ ŋɔnûai túɛ-nuui ƃa Ilizɔ nóŋ Sidu.

¹¹Lubiŋ ŋɔnúu-kpului su-ƃelai kélee díkaa a wála buu náaŋ káo lɔ́ɔlu mɛi da pôlu nuŋ lɔ́ɔlu (46,500).

¹²Diai pâi díwɔ̂ ƃuui tɔɔ̂i gɔlɛ mai dí kɛ́ a Simiɔŋ ŋɔsuui. Simiɔŋ ŋɔnúu-kpului túɛ-nuui ƃa Zurisadai ǹóŋ Silumiɛ.

¹³Simiɔŋ ŋɔnúu-kpului su-ƃelai díkaa a wála buu lɔ́ɔlu káo lɔ́ɔlu mɛi náaŋ pôlu ŋuŋ saaƃa (59,300).

¹⁴Ǹaa pôlu ma Gâa ŋɔsuui. Gâa ŋɔnúu-kpului túɛ-nuui ƃa Luɛ ǹóŋ Iliasa.

¹⁵Gâa ŋɔnúu-kpului su-ƃelai kélee díkaa a wála buu náaŋ káo lɔ́ɔlu pôlu ŋuŋ lɔ́ɔlu mɛi da pôlu buu lɔ́ɔlu (45,650).

¹⁶Lubiŋ ŋɔnûai kélee bù gîe mà káa a wála ŋuŋ tɔnɔ pôlu buu lɔ́ɔlu káo tɔnɔ pôlu buu náaŋ pôlu buu lɔ́ɔlu (151,450). Dia ƃa tɔ̂ɔ ziai túɛ-ƃelai pôlu.

¹⁷“Nàa pôlu ma Livai-ŋai dí Zua-kɔlɔ seɣe pɛrɛ maa waai síɣe dí tɔ́ɔ la nuu kpulu-ŋai loai díkɛ lì. Ǹúu-kpului kélee é tɔ́ɔ ŋɔƃenâi mu tɛi-tɛi yɛ̂ɛ berei díƃûu-ŋai tɔɔ̂i káa lai.

¹⁸“Diai pâi díwɔ̂ ƃuui tɔɔ̂i vóloi liî-perei dí kɛ́ Ifiraŋ ƃɔƃenâi mu díkpulu ma. Ifiraŋ ŋɔnûai túɛ-nuui ƃa Amiyu ǹóŋ Ilisama.

¹⁹Ifiraŋ ŋɔnuu-kpului su-ƃelai díkaa a wála ŋuŋ náaŋ pôlu ŋuŋ lɔ́ɔlu (40,500).

²⁰Diai pâi díwɔ̂ ƃûui tɔɔ̂i gɔlɛ mai dí kɛ́ a Manasɛ ŋɔsuui. Manasɛ ŋɔnûai túɛ-nuui ƃa Pedazɔ ǹóŋ Gmaliɛ.

²¹Manasɛ ŋɔnúu-kpului su-ƃelai díkaa a wála buu saaƃa káo feerɛ pôlu ŋuŋ feerɛ (32,200).

²²Nàa pôlu ma Bɛŋsima ŋɔsuui. Bɛŋsima ŋɔnûai túɛ-nuui ƃa Gidioni ǹóŋ Abidaŋ.

²³Bɛŋsima ŋɔnúu-kpului su-ƃelai díkaa a wála buu saaƃa káo lɔ́ɔlu pôlu ŋuŋ náaŋ (35,400).

²⁴Diai kélee díkaa Ifiraŋ ŋɔƃûui sui, díkaa a wála ŋuŋ tɔ̂nɔ káoo lɔ́ɔlu mɛi saaƃa pôlu ŋuŋ tɔ̂nɔ (108,100). Dia ƃa tɔ̂ɔ Livai-ŋai pôlu ziai su.

²⁵“Nàa ŋûa-pere é kɛ́ Daŋ ŋɔƃenâi mu díkpulu ma. Daŋ ŋɔnûai túɛ-nuui ƃa Amisadai ǹóŋ Aizɛ.

²⁶Daŋ ŋɔnúu-kpului su-ƃelai kélee díkaa a wála buu lɔ́ɔlu mɛi da káo feerɛ pôlu ŋuŋ lɔ́ɔlu mɛi feerɛ (62,700).

²⁷Diai pâi díwɔ̂ ƃuui tɔɔ̂i gɔlɛ mai dí kɛ́ a Asɛ ŋɔsuui. Asɛ ŋɔnûai túɛ-nuui ƃa Okaŋ ǹóŋ Pagiɛ.

²⁸Asɛ ŋɔnúu-kpului su-ƃelai díkaa a wála buu náaŋ káo tɔnɔ pôlu ŋuŋ lɔ́ɔlu (41,500).

²⁹Nàa pôlu ma Nɛfɛtɛli ŋɔsuui. Nɛfɛtɛli ŋɔnûai mɛ-nuui ƃa Inaŋ ǹóŋ Aila.

³⁰Nɛfɛtɛli ŋɔnúu-kpului su-ƃelai díkaa a wála buu lɔ́ɔlu káo saaƃa pôlu ŋuŋ náaŋ (53,400).

³¹Diai kélee díkaa Daŋ ŋɔƃûui sui, díkaa a wála ŋuŋ tɔnɔ pôlu buu lɔ́ɔlu káo lɔ́ɔlu mɛi feerɛ pôlu ŋuŋ lɔ́ɔlu mɛi da (157,600). Dia ƃa tɔɔ̂ díƃenâ-ŋai mu tɛi-tɛi nuu-kpulu-ŋai kélee pôlu ziai su.”

³²Eezuɛ-ŋai kélee púɔ díkɛ ma yɛ̂ɛ berei dí dílono la dínâŋ-ni dípɛrɛi-ŋai dîa da díkpulu-ŋai, dí kɛ̀ a wála ŋuŋ lɔ́ɔlu mɛi da káo saaƃa pôlu ŋuŋ lɔ́ɔlu pôlu buu lɔ́ɔlu (603,550).

³³Kɛ́lɛ dífe Livai-ŋai lóno ní Eezuɛ-ŋai sáma, yɛ̂ɛ berei Yâwɛɛ è mò la Mose mai.

³⁴Ǹyaŋ bere nɔ́ ƃé Eezuɛ-ŋai dí gɛ̀ la. Dí mɛni-ŋai kélee kɛ̀ yɛ̂ɛ berei Yâwɛɛ è mò la Mose mai. Dí díƃûu-ŋai tɔ̀ɔ dí sía díƃêna-ŋai mu tɛi-tɛi dísuu ma da dínâŋ-ni dípɛrɛ-ŋai.