Read Kpelle Nɔŋba 20 Bible Online

Nɔŋba 20 - Kpelle bible

Nɔŋba 20

¹Eezuɛ-ŋai dí sèri Ziŋ fɛ̃ɛ-kpalaŋ su dí díƃûui pú Kedɛ ŋ̀áloŋ maa-ŋuŋ su. Naa ƃé Miriaŋ è sàa naa dí nòo naa.

²Kɛ́lɛ yá fé kɛ́ ni ƃɛ́i dí díƃûui pù naai. Nya ƃe díkelee dí díŋa tɛ̀ díkîe ma dí lí Mose da Eelɔŋ pɔ́ naa.

³Nya ƃe dí laa-saa pɛ̀lɛ Mose ma díyɛɛ mai, “Eî pɔ̂ri kɛ̂i a sɛŋ kúa máŋ kú sáa a tãi kunûai dí sàa la Ɣâla ŋɛ́i-tuɛi.

⁴Ká pà a kúa vɛ̃ɛ-kpâlaŋ ŋí su lé mɛni ma?

⁵Ká kúkùla Ize lɔii su ká pá a kúa ǹɔii nyɔ́mɔɔi ŋí su lé mɛni ma? Ǹyaŋ sí-sɛŋ fa kpɛ̂tɛ ƃɛ́, fîi wuru fé ƃɛ́. Kpɔmɔ-ƃa fé ƃɛ́ da pɔmegurane. Yá kpîŋ fé ƃɛ́ gbèle mɛ̂ni ma.”

⁶Nya ƃe Mose da Eelɔŋ dí kùla ǹûai sáma dí lí dí tɔ́ɔ Yâwɛɛ ŋɔsua kɔlɔ seɣe pɛrɛi lá dí díŋuŋ ma pîlaŋ. Nya ƃe Yâwɛɛ ŋɔfólo-laai è pà dípɔ.

⁷Yâwɛɛ è mò Mose mà ǹyɛɛi,

⁸“Zia-wurii síɣe ka ílîa Eelɔŋ ká Eezuɛ-ŋai kélee ŋá tɛ́ díkîe ma, ká lóno gɔnii pɔ́ díkelee díŋɛi. Gɛ̀ ní yá a pâi kulâi zu. Bere-sii ŋí ƃé ka pâi yá kulâi la dímɛni ma a gɛɛ da dítaa-tulɛ-ŋai dí díkpele.”

⁹Nya ƃe Mose è ŋ̀urii sìɣe gbanaŋ-woo kɛ́ɛ maa-gãlai kɔlɛ yɛ̂ɛ berei Yâwɛɛ è mò la mai.

¹⁰Nya ƃe Mose da Eelɔŋ dí ǹûai kélee ŋá tɛ̀ díkîe ma gɔnii kɔlɛ. Mose è lòno dípɔ ǹyɛɛi, “Ŋuŋ-su-kpanaŋ-ƃela, ka káwoli tɔ́ɔ. Kwa pɔ̂ri yá kulâi gɔnii ŋí su kámɛni ma?”

¹¹Nya ƃe Mose è zia-wurii sìɣe é gɔnii túa la gîei feerɛ. Yá támaa è kùla zu, ǹûai kélee da dítaa-tulɛ-ŋai dí díkpele la.

¹²Nya ƃe Yâwɛɛ è mò Mose da Eelɔŋ dîa ǹyɛɛi, “Tãi káfe láa ní kɛ̀ la a ńyãai, káfe tela ŋamaa waa-laai ŋɔwála-walai maa mɛni ƃó ní Eezuɛ-ŋai diai, káfe pâi serîi a dîa ǹɔii su nyii ŋá ŋ́gono tèe la a gɛɛ ŋa pâi dɛɛ̂i dípɔi.”

¹³Nyíŋi è kɛ̀ Mɛriba Yai lá ƃɛ́i Eezuɛ-ŋai dí kɛ̀ Yâwɛɛ láa karâi naai, da ƃɛ́i Yâwɛɛ è ŋɔmaa-waa-laai lɛ̀ naa diai.

¹⁴Mose kɛ́ɛ Kedɛi, è kéla-ŋa tɛ̀ɛ Idɔŋ kaloŋ pɔ́ naa. Dí mò ma díyɛɛi, “Eezuɛ-ŋai nyii-ŋai díkaa a íkaa-yɔɔ-ŋai dí worɛ-woo ká ŋí. Í gɔ́lɔŋ berei kú tɛ̀ɛ la mɛni-kpɔlu támaa sui.

¹⁵Í gɔ́lɔŋ máŋ berei kúnuu-pɔlɔ-ŋai dí lì la Ize lɔii su ƃɛ́i kwa dîa-ni kú kóraŋ támaa kɛ̀ naai. Kɛ́lɛ Ize-ŋai dí kúsòŋ a nyɔ́mɔɔ kwa kúnuu-pɔlɔ-ŋai.

¹⁶Ǹyaŋ tãi kú wɔ̀lɔ la Yâwɛɛ ma a gɛɛ é kpɔ́ŋ kûai, è kúwoo mɛ̀ni é ŋɔkélai tɛ́ɛ nyii kúkùla Ize lɔii sui. Ǹyaŋ kúkaa nâa ƃɛ́ Kedɛ taai su ílɔii koyaŋ ma.

¹⁷Nɛ̀ɛ naa kú tɛ́ɛ ílɔii su. Kúfe pâi tɛɛ̂i kákpâlaŋ da kélee ŋá kpaa máŋ ká kpɔmɔ-ƃa kpalaŋ ŋá. Kúfe pâi kúkpelêi káya-loa-ŋai su. Kwa pâi lɛɛ̂i nɔ́ bere-leei ma. Kúfe pâi liî laa-mii-yee mɛi-pere kpaa máŋ kɔɔ-yee mɛi-pere é lɛ́ɛ la zu kú tɛ́ɛ ílɔii su.”

¹⁸Kɛ́lɛ Idɔŋ kaloŋ è mò ǹyɛɛi, “Kúfe fáa ní a gɛɛ ká tɛ́ɛ kúlɔii su. Kà tɛ̀ɛ naa, kwa pâi kɔ́ pɛlɛ̂i kâa.”

¹⁹Eezuɛ-ŋai dí mò mà dîyɛɛi, “Kwa pâi lɛɛ̂i nɔ́ bere-leei ma. À kɛ̀ kwà kútaa-tulɛ-ŋai kwà káyai da kpèle, kwa pâi vela-fei kɛ̂i. Kúfe pâi lɛɣɛi sɛŋ-da kélee ma. Mɛnii nɔ́ kwa ŋ̀wɛ̂lii ǹyaa ƃa kútɛɛ.”

²⁰Kɛ́lɛ Idɔŋ kaloŋ è mò dîa ǹyɛɛi, “Kúfe fáa ní a gɛɛ ká tɛ́ɛ kúlɔii su.” Nya ƃe Idɔŋ kaloŋ è pà a kɔ́ kɔ́-ƃela támaa da kɔ-kuluƃa támaa a gɛɛ dí kɔ́ pɛ́lɛ Eezuɛ-ŋai dîa.

²¹Idɔŋ-ƃelai dífe fáa ní a gɛɛ Eezuɛ-ŋai dí tɛ́ɛ dílɔii su-pere. Nya ƃe dí lène pôlu dí tɛ́ɛ a pere da kpɛ́ni.

²²Nya ƃe Eezuɛ-ŋai kélee dí kùla Kedɛ dí seri Ɔ̂ɔ yeei ma.

²³Ɔ̂ɔ yeei è kɛ̀ Idɔŋ-ƃelai dílɔɔi kóyaŋ ma. Nàa ƃé Yâwɛɛ è mò naa Mose da Eelɔŋ dîa ǹyɛɛ diai,

²⁴“Eelɔŋ a pâi saâi, vé pâi serîi gono-tee-lɔii mâ nyii ŋá dɛ̀ɛ Eezuɛ-ŋai pɔ́i, kpɛ́ni fêi, káfeerɛŋɔɔ ká ŋ́oo kàra Mɛriba Yai ma.

²⁵Eelɔŋ siɣe da ǹóŋ-surɔ̂ŋ Ilieza í pá a dia Ɔ̂ɔ yeei ma.

²⁶Eelɔŋ ŋɔsâla-laa soŋ-seɣe-ŋai kúla ma í dí tóo ǹóŋ-surɔ̂ŋ Ilieza ma. Nàa ƃé Eelɔŋ a pâi saâi naa.”

²⁷Nya ƃe Mose è gɛ̀ yɛ̂ɛ berei Yâwɛɛ è mò la mai. Dí tɛ̀ Ɔ̂ɔ yeei ma Eezuɛ-ŋai ŋɛ́i-tuɛ.

²⁸Mose è Eelɔŋ ŋɔsâla-laa soŋ-seɣe-ŋai kùla ma é dítoo ǹóŋ-surɔ̂ŋ Ilieza ma. Nya ƃe Eelɔŋ è sàa naa ǹyéei tôŋ su. Naa pôlu ma Mose da Ilieza dí ǹyéei yèŋ.

²⁹Gɔ́lɔŋɔɔ Eezuɛ-ŋai dîɛ a gɛɛ Eelɔŋ a saai, dí maa wɔ̂lɔ kɛ̀ a fólo buu saaƃa.