Read Kpelle Nɔŋba 21 Bible Online

Nɔŋba 21 - Kpelle bible

Nɔŋba 21

¹Tãi Keena kaloŋ Ava nyii bɔ́-taai è kɛ̀ Nɛgɛ lɔii sui è mɛ̀ni la a gɛɛ Eezuɛ-ŋai dí kɛ̀ pâi a Atariŋ-perei, è kɔ́ pɛ̀lɛ dîa é díta-ni soŋ a kɔ́-soŋ-ŋa.

²Nya ƃe Eezuɛ-ŋai dí díkono tèe Yâwɛɛ yêei a gbanaŋɔɔ dîyɛɛi, “À kɛ̀ ƃà fàa ma a gɛɛ kú ǹûai ŋí yée mɛi ɣále, gɛ̀ ní kwa pâi díkelee tɛɛ̂i ípɔ da dítaa-ŋai, kú dísu kara.”

³Yâwɛɛ è díwoo mɛ̀ni é kpɔ́ŋ dîa dí Keena-ŋai yée mɛi ɣále. Nya ƃe Eezuɛ-ŋai dí dísu kàra da dítaa-ŋai kélee. Maa mɛni ƃé dí kwaai tí ma sèe la a Ɔ̂ma.

⁴Dí kùla Ɔ̂ɔ yeei ma dí tɛ́ɛ Ǹyúo Kpɔ̂lui ma-pere a gɛɛ dí Idɔŋ lɔii maa láa. Ǹûai líi è tòo pôlu berei ma.

⁵Nya ƃe ǹûai dí tɔɔ-maa woo-ŋa ƃò é pîlaŋ Ɣâla ma da Mose díyɛɛi, “Lé mɛni ƃé ká kúkùla la Ize lɔii su a gɛɛ kú sáa vɛ̃ɛ-kpâlaŋ ŋí sui? Gáa kpólo fé ƃɛ́ da yá, ǹyaŋ mii-sɛŋ nyɔ́mɔɔi ŋí ƃɛlɛ fé kúkɔi.”

⁶Nya ƃe Yâwɛɛ è kali sîi nyɔ́mɔɔ-ŋa tɛ̀ɛ Eezuɛ-ŋai sáma, dí dí-nyîŋ kpɔ́ dítamaa dí sáa.

⁷Nya ƃe ǹûai dí pà Mose pɔ́ díyɛ mai, “Kwa sɔnyɔ̂ŋ kɛ́. Kpɛni fêi, kwa lóno nyɔ́mɔɔ kɛ́ Yâwɛɛ ma ka ǹyaa. Yâwɛɛ fɛli a gɛɛ é gali-ŋai kúla kúsama.” Nya ƃe Mose è Ɣâla fɛ̀li dímɛni ma.

⁸Yâwɛɛ è mò Mose ma ǹyɛɛi, “Kali-pɔkɔɔŋ kpɛtɛ a ƃara í ǹɔ́ wúru ŋá í dɔɔ. Ǹúui kélee kali a nyìŋ, à gàa, a pâi ƃâloi.”

⁹Nya ƃe Mose è ƃara-kali kpɛ̀tɛ è ǹɔ́ wúru ŋá é dɔɔ. Ǹyaŋ ǹúui kélee kali è nyìŋ é m̀ara-kalii kâai, è ƃálo.

¹⁰Nya ƃe Eezuɛ-ŋai dí kùla naa dí lí dí díƃûui pú Obo.

¹¹Nya ƃe è dí kùla Obo dí lí dí díƃûui pú Iyee Abariŋ, vɛ̃ɛ-kpâlaŋ su, Môa lɔii vóloi-kulâi-pere.

¹²Nya ƃe dí kùla naa dí lí dí díƃûui pú Zɛrɛ Fɛ̃ɛ-kpalaŋ su.

¹³Dí kùla naa dí lí dí díƃûui pú Ano Ya-leei pôlu-pere, vɛ̃ɛ-kpâlaŋ su nyii gáa Amora-ŋai dílɔii sui. Ano Ya-leei è kɛ̀ a Môa lɔii ŋɔkoyaŋ-pere nyii kɛ̀ Môa lɔii da Amora lɔii loai.

¹⁴Mɛni ma, yà nòno Yâwɛɛ ŋɔkɔ́ kɔ́-kɔlɔi su nyii mò ǹyɛɛi, “Waɣɛ taai káa Sufa lɔii-kpiniŋ su, ǹyaŋ Ano Ya-leei kɛ́ ƃò diŋ-tiŋ su,

¹⁵ǹyaŋ diŋ-tiŋ a yêŋ Âa taai ma-pere dí seri Môa lɔii kóyaŋ ma.”

¹⁶Dí sìɣe naa dí lí ǹya-toŋ ma Bɛ̂ɛ kɔlɛ ma ƃɛ́i Yâwɛɛ è mò naa Mose ma ǹyɛɛi, “Ǹûai ŋá tɛ́ díkîe ma, ńyaŋ ŋa pâi yá tɛɛ̂i dípɔ.”

¹⁷Maa tãi tí ƃé, Eezuɛ-ŋai dí ŋulei ŋí tòo la. “Yá íkùla nya-toŋ ma a dámaa. Kwa pâi wule toôi ímɛni ma.

¹⁸Kâloŋ ŋɔtíi-kɛ ƃelai da ǹúu-tuɛ ƃelai ƃé ǹyá-loai ŋí tèe a díkâloŋ-wuru-ŋai da dísia-wûru-ŋai.” Dí kùla vɛ̃ɛ-kpâlaŋ su dí lí Matana.

¹⁹Dí kùla Matana dí lí Naɣaliyɛ, dí kùla Naɣaliyɛ dí lí Bâmo.

²⁰Dí kùla Bâmo dí lí diŋ-tiŋ su nyii gáa Môa lɔii kpiniŋ su Piga yeei koo mu, nyii gáa vɛ̃ɛ-kpâlaŋ téniŋ mai.

²¹Nya ƃe Eezuɛ-ŋai dí kela-ŋa tɛ̀ɛ Amora-ŋai díkâloŋ Siɔŋ pɔ́ naa, díyɛɛ mai,

²²“Kpera yɛ̂, ǹɛɛ naa kú tɛ́ɛ ílɔii su. Kúfe pâi tɛɛ̂i kpâlaŋ da kélee ŋá kpaa máŋ kpɔmɔ-ƃa kpalaŋ ŋá. Kúfe pâi kú kpelêi íya-loa-ŋai da kélee su. Kwa pâi lɛɛ̂i nɔ́ bere-leei ma é lɛ́ɛ la zu kú tɛ́ɛ ílɔii su.”

²³Kɛ́lɛ Siɔŋ fé fáa ní ma a gɛɛ Eezuɛ-ŋai dí tɛ́ɛ ŋɔlɔii su-pere. È ŋɔkɔ́ kɔ́-ƃelai kélee ŋá tɛ̀ gîe ma é lí a dia vɛ̃ɛ-kpâlaŋ su Zaɣa kɔlɛ ma é kɔ́ pɛ́lɛ Eezuɛ-ŋai dîa.

²⁴Kɛ́lɛ Eezuɛ-ŋai dí núu támaa pàa gɔ́i su dí dílɔii síɣe é síɣe Ano Ya-leei ma é lí Zabɔ ya-leei ma dí seri Amɔŋ-ŋai dílɔii kóyaŋ ma. Ǹyaŋ Zazɛ è kɛ̀ a Amɔŋ-ŋai dílɔii kóyaŋ.

²⁵Eezuɛ-ŋai dí Amona-ŋai dítaa-ŋai kélee sìɣe da Ɛsibɔŋ é pɛ́lɛ gbânaŋ-ŋai kélee dîa dí sée dísu.

²⁶Ɛsibɔŋ è kɛ̀ a Amora-ŋai díkâloŋ Siɔŋ ŋɔtaa-leei, nyii wɔ́lɔ kɔ́ pɛ̀lɛ Môa kaloŋ pɔlɔi ma é ŋɔlɔii kélee sìɣe é seri Ano Ya-leei ma.

²⁷Mɛni ma ŋ̀ule-too-ƃelai da mò dîyɛɛi, “Ka pá Ɛsibɔŋ kú nàa tɔɔ. Tɔɔ kú galoŋ Siɔŋ ŋɔtaa-leei tɔ́ɔ ŋɔ́nɔ.

²⁸Siɔŋ ŋɔkɔ́ kɔ́-ƃelai dí wɔ́lɔ kùla Ɛsibɔŋ taa-leei ŋí su dí lí yɛ̂ɛ ŋɔŋ, Dí Âa taai su kàra Môa lɔii su, Dí Ano Ya-leei ŋua-pere su kàra.

²⁹Kpalo ƃélai kâa káai a Môa-ŋai! Káai a Kemɔ fɛli-ƃelai kpalo ƃêlaai kâai. Káɣâlai a ǹɛɛ naa kálônii-sinaai da kɛ́ a bîlaŋ-kɔɔ ma-ƃela, Kálônii-nɛyãai dí ƃò a Amora-kaloŋ Siɔŋ ŋɔkɔ́-soŋ-ŋa.

³⁰Ŋɔsuui su è pù é síɣe Ɛsibɔŋ é lí Dibɔŋ. É síɣe Nasiŋ é tóo Nofa nyii gáa Mɛdeba kɔlɛ mai.”

³¹Nya ƃe Eezuɛ-ŋai dí sèe Amora-ŋai dílɔii su.

³²Nya ƃe Mose è mɛni maa-kpɛɛ-ƃela tɛ̀ɛ Zazɛ-taai su. Dí daai ŋí sìɣe da gɔlɛ ma taa-ŋai, dí Amora-ŋai kɛ̀ daa-ŋai tí sui kélee kpɛ́.

³³Kú tìnaŋ kú lí Basãŋ yá-ŋûa pere. Basãŋ kaloŋ Oŋ da ŋɔnûai dí pà dí kɔ́ pɛ́lɛ kûa Ɛdirei taai su.

³⁴Kɛ́lɛ Yâwɛɛ è mò mâ ǹyɛɛi, “Ífe yào. Ŋaâ gâloŋ Oŋ tɛ̀ɛ ípɔ da ŋɔnûai kélee é pɛ́lɛ ŋɔlɔii ma. Zoŋ yɛ̂ɛ berei í gɛ̀ la a Amora-ŋai díkâloŋ Siɔŋ nyii kɛ̀ Ɛsibɔŋ.”

³⁵Nya ƃe Eezuɛ-ŋai dí Oŋ pàa da ǹônii-sinaai é pɛ́lɛ ŋɔnûai kélee dîa, núu tɔnɔ kpîŋ fé lɛ̀ɛ ní. Dí ŋɔlɔii sìɣe.