Read Kpelle Nɔŋba 22 Bible Online

Nɔŋba 22 - Kpelle bible

Nɔŋba 22

¹Nya ƃe Eezuɛ-ŋai dí ŋɔ́nɔ tɛ̀ɛ dí lí dí díƃûui pú Môa Fɛ̃ɛ-kpalaŋ su Zɔdiŋ Ya-leei pôlu vóloi kulâi-pere Zɛleko téniŋ ma.

²Zipo ǹóŋ Bâla è mɛni-ŋai kélee kàa Eezuɛ-ŋai dí gɛ̀ a Amora-ŋai.

³Môa kaloŋ da ŋɔnûai kélee dí yào kpɔ́ a ŋánaa, kpɛ́ni fêi, Eezuɛ-ŋai dí kɛ̀ a dítamaa.

⁴Nya ƃe Môa-ŋai dí mò Midiɛŋ nuu-pɔlɔ-ŋai dîa dîyɛɛi, “Ǹúu kpɔŋ ŋí da pâi zi-sãai kélee su karâi yɛ̂ɛ berei niŋa a kala mii lai.”

⁵Nya ƃe Môa kaloŋ Bâla nyii kɛ̀ a Zîpo ǹóŋ, è kéla-ŋa tɛ̀ɛ Beɔ ǹóŋ Bâlaŋ pɔ́ naa nyii kɛ̀ Pîtɔ, Yufeletii Ya-leei mai, Amɔŋ-ŋai dílɔii sui. È worɛ̂-woo tɛ̀ɛ mì ǹyɛɛi, “Ŋa ŋ̀wɛ̂lii í gɔ́lɔŋ a gɛɛ nûa da kula Ize lɔii su da ǹɔii gwaa kélee síɣe da see ŋálɔii téniŋ ma.

⁶Mɛni ma pá í dífoo. Kpɛni fêi, dítâmaai é tɛ́ɛ kûa. Tãi da kwa pâi pɔrîi díyee mɛi ɣâlei kú díkpɛ ǹɔii ma. Kpɛni fêi, ŋá gɔ́lɔŋ a gɛɛ ǹúui ƃa lûwa tòo mai a lûwa sɔlɔ ƃô, ǹyaŋ ǹúui ƃa vòoi vòo-wooi a zòŋ.”

⁷Nya ƃe Môa-ŋai da Midiɛŋ-ŋai dínuu-pɔlɔ-ŋai dí lì a vòo-wooi maa fela-fei Bâlaŋ pɔ́ naa dí Bâla ŋɔworɛ̂-wooi ƃó ma.

⁸Nya ƃe Bâlaŋ è mò dîa ǹyɛɛi, “Ka nyii ƃɛ́ sâa. Mɛnii Yâwɛɛ a pâi môi ḿâi, ŋa pâi pâi pôlu ŋá mó kâa.” Nya ƃe Môa-ŋai dínuu tuɛ-ƃelai dí nyìi Bâlaŋ ŋɔpɛ́rɛi lá.

⁹Nya ƃe Ɣâla è pà Bâlaŋ pɔ́ naa é marê kɛ́ ǹyɛɛi, “Gbɛ̂ɛ ƃa ǹûai ŋí ípɛrɛi mui?”

¹⁰Bâlaŋ è Ɣâla wóo su tòo ǹyɛɛi, “Zipo ǹóŋ Bâla, nyii gáa a Môa-ŋai díkâloŋ ƃé ǹûai ŋí tɛ̀ɛ ǹyɛɛi,

¹¹‘Ǹûa da kùla Ize lɔii su da ǹɔii gwaa kélee síɣe. Mɛni ma, pá í dífoo. Tãi da kwa pâi pɔ̂rii díyee mɛi ɣâlei kú díkpɛ ǹɔii ma.’ ”

¹²Kɛ́lɛ Ɣâla è mò Bâlaŋ mà ǹyɛɛi, “Ka ǹûai ŋí káfe lì. Ífe Eezuɛ-ŋai fòo. Kpɛni fêi, ŋá lûwa làa dîa.”

¹³Ɣele ƃɔ́ɔi Bâlaŋ è lì Bâla ŋɔworɛ̂ ƃó-ƃelai pɔ́ naa ǹyɛɛ diai, “Ka lí pôlu kapɔ-taai, kpɛ́ni fêi, Yâwɛɛ fé fáa ní ma a gɛɛ kwa kâa-ni kú lí.”

¹⁴Nya ƃe dí lì pôlu dí mó Bâla mà dîyɛɛi, “Bâlaŋ fé fáa ní mà a gɛɛ kwa dîa-ni kú pá.”

¹⁵Nya ƃe Bâla è ŋɔ́nɔ nûa kpaya-kpaya támaa tɛ̀ɛ é tɛ́ɛ bɔlɔ-ŋai dîa.

¹⁶Nya ƃe dí lì Bâlaŋ pɔ́ naa dîyɛɛ mai, “Zipo ǹóŋ Bâla ǹyɛɛi, ‘Ífe nɛ̀ɛ naa sɛŋ da kélee é íkpera a gɛɛ í pá ḿbɔ-naa.

¹⁷Ŋa pâi ƃaa-kɛ-ma kɛ́tɛ tɛɛ̂i ípɔ. Mɛnii kélee ƃa mò mâi, ŋa pâi gɛ̂i. Mɛni ma pá í ǹûai ŋí fóo mî.’ ”

¹⁸Bâlaŋ è Bâla ŋɔkéla-ŋai wóo su tòo ǹyɛɛi, “À nɛ̃ɛ ma kpîŋ é ŋɔpɛ́rɛi láa fɛ́ɛ a káne da gôo é dɛ́ɛ ḿbɔ, fa pɔ̂ri ŋánuu-namui Ɣâla wóo pilîi a dɔnɔ kpîŋ.

¹⁹Mɛni ma káa máŋ ka nyii ƃɛ́ sâa, a gɛɛ ŋá mɛnii mɛ́ni Yâwɛɛ a pâi ŋɔ́nɔ môi mâi.”

²⁰Maa-kpinii tí Ɣâla è pà Bâlaŋ pɔ́ naa é mó mà ǹyɛɛi, “À kɛ̀ ǹûai ŋí dí pà ítôlii, ímu síɣe ka dîa-ni ká lí. Kɛ́lɛ mɛnii ŋa pâi môi yâi, ǹyaa nɔ́ ƃé í gɛ́.”

²¹Ɣele ƃɔɔ̂i Bâlaŋ è sèe ŋɔwɛlɛ-sôoi mɛi da Môa-ŋai dí lí.

²²Nya ƃe Ɣâla è ǹíi ŋwàna, kpɛ́ni fêi, Bâlaŋ è lì. Tãi Bâlaŋ è kɛ̀ liî la da ŋɔyee mu-ƃela feerɛi, Yâwɛɛ ŋɔkélai è tɔ̀ɔ berêi.

²³Tãi ŋwɛlɛ-sôoi è Yâwɛɛ ŋɔkélai kàa la tɔɔ ni berei su m̀óa-sɔ̂kpɔi kɛ́ ƃò ǹyêei, è sìɣe berei ma é lɔ́ nɔ̀ɔi su-pere. Bâlaŋ è ŋwɛlɛ-sôoi lòkwa é pá la pôlu berei ma.

²⁴Nya ƃe Yâwɛɛ ŋɔkélai è tɔ̀ɔ kpɔmɔ-ƃa kpɔmɔ feerɛ loai ƃɛ́i berei è kɛ̀ a zu kuro-te na, kɔni siɣãŋ kɛ́ ƃò bere-ƃelai veerɛ ma.

²⁵Tãi ŋwɛlɛ-sôoi è Yâwɛɛ ŋɔkélai kàa lai, è kànaŋ ǹyée-ƃelai dɔnɔ ma é Bâlaŋ kɔ́ɔ kîiŋ ma. Bâlaŋ è ŋwɛlɛ-sôoi lòkwa ŋɔ́nɔ.

²⁶Nya ƃe Yâwɛɛ ŋɔkélai è lì ŋɔ́nɔ tuɛ-pere é tɔ́ɔ ƃɛ́i berei è kɛ̀ kpɔ́ a zu kurɔ-teɛɛ naa a sɛŋ núu fa pɔ̂ri m̀aa lâai laa-mii-yee mɛi kpaa máŋ kɔ́ɔ-yee mɛi perei.

²⁷Tãi ŋwɛlɛ-sôoi è Yâwɛɛ ŋɔkélai kàa la ŋɔ́nɔ, è pɛ̀lɛ. Bâlaŋ líi è ŋwàna kpɔ́ é ŋwɛlɛ-sôoi lókwa a ŋɔsia-wurii.

²⁸Nya ƃe Yâwɛɛ è gɛ̀ ŋwɛlɛ-sôoi é lóno Bâlaŋ pɔ́ ǹyɛɛi, “Lé ƃé ŋá gɛ̀ a yá ƃa nokwa-laa kɛ́ saaƃai?”

²⁹Bâlaŋ ǹyɛɛ mai, “Kpɛni fêi, ƃa ɣɛlɛ-maa kúla ńzu. Ƃóa-sɔkpɔ èi kɛ̀ ńyêei, ŋâi ípàa.”

³⁰Nya ƃe ŋwɛlɛ-sôoi è mò Bâlaŋ mà ǹyɛɛi, “Íwɛlɛ-sôo tɔnɔi íkaa wɔ́lɔ seêi mɛ̀i ǹyaa fa ńyãa? Ŋa tá wɔ́lɔ tûa ŋí a yá?” Bâlaŋ ǹyɛɛ ma, “Kpao.”

³¹Nya ƃe Yâwɛɛ è gɛ̀ Bâlaŋ é Ŋ̀âla-taa-kelai káa tɔɔ ni berei su ƃóa sɔkpɔ kɛ́ ƃò ǹyêei. Nya ƃe Bâlaŋ è pìlaŋ ŋ̀úme ŋá é ŋuŋ ma pîlaŋ.

³²Yâwɛɛ ŋɔkélai è mò ma ǹyɛɛi, “Í íwɛlɛ-sôoi lòkwa gîei saaƃa lé mɛni ma? Ŋá pà a gɛɛ ŋá íkpera. Kpɛni fêi, vé a sɛŋ í ziai ŋí kɛ́.”

³³Kɛ́lɛ íwɛlɛ-sôoi è ŋ́gàa é ḿaa láa gîei saaƃa. Èi wàla gɛ̀ tí, ŋâi ípàa, ŋá ǹɛɛ a vúlu.

³⁴Nya ƃe Bâlaŋ è mò Yâwɛɛ ŋɔkélai ma ǹyɛɛi, “Ŋa sɔnyɔ̂ŋ kɛ́, fé kɛ́ ní a gɔ́lɔŋɔɔ a gɛɛ í kɛ̀ tɔɔ ní ḿberêi. À kɛ̀ maa fé nɛ̃ɛ ní a gɛɛ ŋá lí ziai ma, ŋa pâi penêi pôlu.”

³⁵Yâwɛɛ ŋɔkélai è mò mà ǹyɛɛi, “Ka ǹûai ka lí. Kɛ́lɛ mɛnii ŋa pâi môi yâi, ǹya nɔ́ ƃé í gɛ́.” Nya ƃe da Bâla ŋɔnûai dí lì.

³⁶Tãi Bâla è mɛ̀ni la a gɛɛ Bâlaŋ a pâi, è lì dúɛ tɔ̂ɔi Âa taai su nyii kɛ̀ Ano Ya-leei kɔlɛ Môa-ŋai dílɔi ŋɔkoyaŋ-perei mai.

³⁷Nya ƃe Bâla è mò Bâlaŋ mà ǹyɛɛi, “Fé nûa tɛɛ ní ítôlii? Ífe pá ní lé mɛni ma? Fa pɔ̂ri ƃaa-kɛ-maa tɛɛ̂i ípɔ?”

³⁸Bâlaŋ è ŋ̀óo su tòo ǹyɛɛ mai, “Ŋaâ pá, vé tí? Wála-wala káa ńyêei a gɛɛ ŋa mɛni da kélee ƃó? Ŋ̀óoi Ɣâla a pâi bûi ńai, ǹyaa nɔ́ ƃé ŋa pâi môi.”

³⁹Nya ƃe Bâla da Bâlaŋ dí lì dí seri Uzo taa-leei su.

⁴⁰Nya ƃe Bâla è sâla kùla a niŋa da ƃála é zua da tɛɛ Bâlaŋ pɔ́ a da ŋɔkɔlɛ ma-ƃela kpaya-kpayai.

⁴¹Bôlu ma ɣele-walai, Bâla è Bâlaŋ sìɣe da ǹyaa dí tɛ́ Bamo Baa yeei ma. Nàa ƃé dí kɛ̀ tɔɔ ni naa díkɛ Eezuɛ-ŋai da-ni kàa.